Минеи Богослужебные.
(Кíевъ: Тѵпогра́фія Кíево-Пече́рской Ла́вры, 1894).
Святы́хъ му́ченикъ дву́ тму́, въ Никомидíи сожже́нныхъ.
ВЕЧЕРЪ.
На Го́споди воззва́хъ: стихи́ры пра́здника, гла́съ 5. Подо́бенъ: Ра́дуйся.
Но́сиши Ада́мовъ зра́къ во о́бразѣ, Бо́жіи Сы́й Всесоверше́нный, и хо́щеши рука́ми держа́тися, руко́ю вся́ содержа́й си́лою Твое́ю, — Чи́стая Всенепоро́чная провѣщава́ше, глаго́лющи, — ка́ко Тя́ пелена́ми повію́ я́ко Младе́нца? Ка́ко воздою́ Тя, вся́ческая пита́ющаго? Ка́ко Твое́й па́че ума́ нищетѣ́ удивлю́ся? Ка́ко Тя́, Сы́на Моего́, назову́, раба́ Твоя́ ны́нѣ су́щи? Пою́, благословлю́ Тя, подаю́щаго мíру ве́лію ми́лость.
Младе́нца, воплоща́ема изъ Нея́, предвѣ́чнаго Бо́га, Всенепоро́чная зря́щи, рука́ми держа́щи, и облобыза́ющи ча́сто, и ра́дости исполня́ющися, провѣщава́ше Ему́: Бо́же Высоча́йше, Царю́ Неви́димый, ка́ко зрю́ Тя и разумѣ́ти та́инства не могу́ безмѣ́рныя нищеты́ Твоея́? Верте́пъ бо, малѣ́йшій и се́й чу́ждій, вну́трь вмѣща́етъ Тя́, ро́ждшагося и дѣ́вства нерѣши́вша, ложесна́ соблю́дшаго, я́ко пре́жде рождества́, и даю́щаго ве́лію ми́лость.
Сія́ ра́бски Чи́стая ужа́сно же вѣща́ющи, услы́шаше волхво́въ, предъ верте́помъ ку́пно предстоя́щихъ, и къ ни́мъ рече́: Кого́ и́щете вы́? Яко ви́жду бо, отъ инода́льныя страны́ пріидо́сте: пе́рсскій о́бразъ и мудрова́ніе иму́ще, стра́ненъ исхо́дъ и ше́ствіе сотвори́сте; и къ стра́нствовавшему отъ высоты́ и стра́нно въ Мя́ все́льшуся, я́ко вѣ́сть, со тща́ніемъ пріидо́сте Тому́ поклони́тися, да́рующему мíру ве́лію ми́лость.
Си́лою вжиля́еми,/ и тве́рдо укрѣпля́еми,/ и всиля́еми Влады́ки Христа́,/ въ не́мощи есте́ственнѣй/ непобѣди́ми яви́стеся, страстоте́рпцы,/ врага́ въ по́двизѣхъ побѣди́вше,/ и мо́литеся о соверша́ющихъ/ святу́ю и свѣтоно́сную ва́шу па́мять,/ великому́ченицы сла́вніи.
Въ словесѣ́хъ Ѳео́филъ,/ и въ дѣ́лѣхъ Дороѳе́й, и Мигдо́ній,/ ку́пно и Горго́ній,/ съ Секу́ндомъ же и Пе́тръ,/ и Индисъ, до́бльствовавше,/ и врага́ ополче́нія побѣди́ша, ра́дующеся,/ и мо́лятъ отъ вся́кихъ бѣ́дъ изба́вити/ вѣ́рою соверша́ющія/ всечестну́ю па́мять и́хъ.
Юноши, дѣ́вы,/ ста́рцы и младе́нцы/ еди́ну показа́ша до́блесть./ Тѣ́мже и ра́вная/ получи́ша возме́здія благода́тію,/ всѣ́хъ Царю́ и Бо́гу спребыва́юще./ Яже почти́мъ свяще́нными пѣснопѣ́ньми,/ я́ко свѣтоза́рныя свѣти́льники вселе́нныя,/ двѣ́ тмы́ су́щія.
Да веселя́тся небеса́, и да ра́дуется земля́: дне́сь бо вои́стинну еди́но ста́до бы́сть а́нгеловъ и человѣ́ковъ. О, чудесе́! Неви́димый ви́дится, Невмѣсти́мый вмѣща́ется, Сло́во одебелѣва́етъ, Сы́нъ Бо́жій Сы́нъ человѣ́чь быва́етъ, и Дѣ́ва неискусому́жная Ма́ти зри́тся Бо́жія, и Ма́ти по Рождествѣ́ Дѣ́ва обрѣта́ется. Вопло́щшееся Сло́во Отчее въ я́слѣхъ возлега́етъ, и па́стыріе проповѣ́дницы о́бщницы та́инства быва́ютъ; волсви́ отъ восто́къ да́ры приноша́ху, звѣздо́ю наставля́еми, ро́ждшемуся Спа́су поклони́шася, съ ни́миже и мы́, празднолю́бцы, серде́чная сокро́вища усе́рдно отве́рзше, принесе́мъ Ему́ дѣя́нія блага́я: вѣ́ру, наде́жду и любо́вь, я́ко зла́то, и лива́нъ, и сми́рну, безпло́тныхъ гла́съ вопію́ще Ему́: сла́ва въ вы́шнихъ Бо́гу, и на земли́ ми́ръ, въ человѣ́цѣхъ благоволе́ніе, прише́дшему спасти́ отъ пре́лести ве́сь ро́дъ на́шъ.
Всего́ боголѣ́пно/ поне́съ отъ Дѣ́вы/ Ада́ма, Христе́, пе́рваго,/ роди́лся еси́ въ верте́пѣ,/ и въ я́слѣхъ пелену́емь.
Сти́хъ: Изъ чре́ва пре́жде денни́цы роди́хъ Тя́,/ кля́тся Госпо́дь и не раска́ется.
По́й проро́чески, Дави́де,/ движа́ свирѣ́ль:/ изъ твои́хъ бо чре́слъ,/ изъ ни́хже Богоро́дица,/ Христо́съ ражда́ется дне́сь.
Сти́хъ: Рече́ Госпо́дь Го́сподеви моему́:/ сѣди́ одесну́ю Мене́.
Хвалу́ боголѣ́пну/ съ па́стыри волсви́/ и со а́нгелы сла́ву/ отъ Дѣ́вы прозя́бшему Бо́гу,/ вѣ́рніи, принесе́мъ.
Сла́ва въ вы́шнихъ Бо́гу, въ Виѳлее́мѣ слы́шу отъ безпло́тныхъ дне́сь, на земли́ ми́ръ Благоволи́вшему бы́ти. Ны́нѣ Дѣ́ва небе́съ ши́рши: возсія́ бо свѣ́тъ омраче́ннымъ и смире́нныя возвы́си, а́нгельски пою́щія: сла́ва въ вы́шнихъ Бо́гу.
Страстоте́рпцы Госпо́дни, блаже́нна земля́, напи́вшаяся кровьми́ ва́шими, и свя́та селе́нія, пріи́мшая тѣлеса́ ва́ша: въ по́двизѣ бо врага́ побѣди́сте и Христа́ со дерзнове́ніемъ проповѣ́дасте. Того́, я́ко бла́га, моли́те спасти́ся, мо́лимся, душа́мъ на́шимъ.
Рождество́ Твое́, Христе́ Бо́же нашъ, возсія́ мíрови свѣ́тъ ра́зума, въ не́мъ бо звѣзда́мъ служа́щіи звѣздо́ю уча́хуся Тебѣ́ кла́нятися, Со́лнцу Пра́вды, и Тебе́ вѣ́дѣти съ высоты́ Восто́ка. Го́споди, сла́ва Тебѣ́.
НА УТРЕНИ.
Тропа́рь пра́здника, два́жды. Сла́ва, святы́хъ. И ны́нѣ, пра́здника.
На престо́лѣ огнезра́чнѣмъ въ вы́шнихъ сѣдя́й со Отце́мъ Безнача́льнымъ и Боже́ственнымъ Твои́мъ Ду́хомъ, благоволи́лъ еси́ роди́тися пло́тію отъ Дѣ́вы неискусому́жныя, Іису́се; сего́ ра́ди и звѣзда́ Тя отъ Перси́ды волхво́мъ показа́. Сла́ва всеблаго́му Твоему́ совѣ́ту, сла́ва явле́нію Твоему́, сла́ва къ человѣ́комъ кра́йнему соше́ствію Твоему́.
Превѣ́чнаго и Непостижи́маго, Соприсносу́щнаго Неви́димому Отцу́, во утро́бѣ пло́тски носи́ла еси́, Богоро́дице, еди́но и неслія́нное Тро́ицы Божество́; просія́ благода́ть Твоя́ въ мíрѣ, Всепѣ́тая. Тѣ́мже непреста́нно вопіе́мъ: ра́дуйся, Чи́стая Дѣ́во Ма́ти.
Пѣ́снь 1.
Ирмо́съ: Спасе́ лю́ди чудодѣ́йствуяй Влады́ка, мо́крую мо́ря волну́ оземлени́въ дре́вле; во́лею же ро́ждся отъ Дѣ́вы, стезю́ прохо́дну небесе́ полага́етъ на́мъ. Его́же, по Существу́ ра́вна же Отцу́ и человѣ́комъ, сла́вимъ.
Изнесе́ чре́во свяще́нное Сло́во, я́вѣ неопа́льно живопи́санное купино́ю, смѣше́на зра́комъ человѣ́чимъ Бо́га, Евы окая́нную утро́бу кля́твы дре́внія разрѣша́ющее го́рькія, Его́же, земни́и славимъ.
Показа́ звѣзда́ пре́жде со́лнца Сло́во, прише́дшее уста́вити грѣхи́, волхво́мъ я́вѣ во убо́зѣмъ верте́пѣ, ми́лостиваго Тебе́, пелена́ми пови́та, Его́же, ра́дующеся, ви́дяху Самого́ — и Человѣ́ка, и Го́спода.
Пѣ́снь 1.
Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.
Мно́жество многочи́сленное честны́хъ му́чениковъ, мно́жество очи́стите мно́гихъ прегрѣше́ній мои́хъ хода́тайствомъ ва́шимъ и дади́те сло́во воспѣ́ти ва́ше торжество́.
Свѣти́ла пресвѣ́тлая Це́ркве, добропобѣ́дніи му́ченицы, свои́ми у́ды Христа́ просла́вивше, свѣтоно́сною ны́нѣ ва́шею па́мятію просла́вистеся.
Вѣ́ра Боже́ственная страда́льцевъ невѣ́рныхъ безбо́жное мучи́тельство разори́ и потреби́ де́монское лука́вое противле́ніе благода́тію.
Бо́га Всемо́щнаго, пло́ть пріе́мша и сме́рть разруши́вша сме́ртію, му́ченицы, исповѣ́давше, умерщвле́ни бы́вше, жи́знь прія́сте непреста́нную.
Богоро́диченъ: Пою́ Тя́, Всепѣ́тая Благослове́нная, Бо́га Препѣ́таго пло́тію ро́ждшую, велича́ющаго страда́льцы, врага́ побѣди́вшія.
Ирмо́съ: При́зри на пѣ́нія рабо́въ, Благодѣ́телю, врага́ смиря́я вознесе́нную горды́ню, нося́й же, Всеви́дче, грѣха́ превы́шше, непоколе́блемо утвержде́нныя, Бла́же, пѣвцы́ основа́ніемъ вѣ́ры.
Невѣ́сты Пречи́стыя пребога́тое Рождество́ ви́дѣти па́че ума́ сподо́бився, ликъ свиря́ющихъ преклоня́шеся стра́ннымъ о́бразомъ, чи́нъ же пою́щихъ безпло́тныхъ, Царя́ Христа́, безсѣ́менно вопло́щшагося.
Высото́ю ца́рствуяй небе́съ милосе́рдіемъ соверша́етъ о на́съ изъ безневѣ́стныя Отрокови́цы: невеще́ственъ Сы́й пре́жде, но по́слѣжде Сло́во, одебелѣ́вшо пло́тію, да па́дшаго къ Себѣ́ привлече́тъ первозда́ннаго.
Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне.
Краснѣ́йше распаля́еми Христо́вою любо́вію, всехва́льніи, разже́гшуся огню́ ника́коже убоя́стеся, но въ не́мъ сконча́вшеся, ку́пно просла́вистеся.
Живы́мъ гла́сомъ Бо́га проповѣ́дающе, преще́нія безбо́жныхъ не устраши́шася, но дѣте́й гла́съ единому́дренно взыва́юще, всехва́льніи ору́жницы Христо́вы сконча́шася.
Не убои́мся огня́ единора́бнаго, — до́бліи вку́пѣ взыва́ху, ра́дующеся душе́ю, — Тебе́ ра́ди умерщвля́емся, уме́ршаго, и сме́рть, Спа́се, упраздни́вшего.
Богоро́диченъ: Да обожи́тъ человѣ́чество, Бо́гъ бы́сть Человѣ́къ изъ Тебе́, Дѣ́во Чи́стая, па́че сло́ва и смы́сла: сего́ ра́ди Тя́ согла́сно, вѣ́рніи, ублажа́емъ.
Тве́рди душе́ю по вѣ́рѣ, святíи, огне́мъ страда́ніе пріе́мше, двѣ́ тмѣ́ страда́лецъ вопію́ще Ро́ждшемуся отъ Дѣ́вы: пріими́ всесожже́нія на́ша за Тя́, я́коже да́ры пе́рсскихъ царе́й, зла́то, и сми́рну, и лива́нъ, Превѣ́чный Бо́же.
Во́инство, въ числѣ́ двою́ тму́ му́чениковъ честву́емо, на́мъ возсія́, просвѣща́ющее сердца́ и мы́сли благочести́выхъ вѣ́ры ра́ди. Разже́гшеся бо Боже́ственною любо́вію Влады́ки, кончи́ну святу́ю огне́мъ до́бліи усе́рдно прія́ша.
Во я́слѣхъ на́съ ра́ди безслове́сныхъ положи́лся еси́, Долготерпѣли́ве Спа́се, младе́нствовавъ во́лею; па́стыріе же Тя́ воспѣ́ша со а́нгелы, взыва́юще: сла́ва и хвала́ на земли́ рожде́нному и обожи́вшему земноро́дныхъ существо́, Христу́ Бо́гу на́шему.
Ирмо́съ: Ро́да человѣ́ча обновле́ніе дре́вле, поя́, проро́къ Авваку́мъ предвозвѣща́етъ, ви́дѣти неизрече́нно сподо́бився о́бразъ: млады́й Младе́нецъ бо изъ горы́ — Дѣ́вы изы́де люде́й во обновле́ніе, Сло́во.
Ра́венъ произы́де человѣ́комъ Вы́шній, во́лею пло́ть пріи́мъ отъ Дѣ́вы, я́дъ очи́стити змíевы главы́, приводя́ вся́ къ Свѣ́ту живоно́сному, Бо́гъ Сы́й, отъ вра́тъ безсо́лнечныхъ.
Язы́цы, и́же дре́вле тле́ю погруже́ни, па́губы зѣло́ вра́жія убѣжа́вше, возно́сятъ ру́ки съ похва́льными пѣ́сньми, еди́наго чту́ще Христа́, я́ко Благодѣ́теля, къ намъ ми́лостивно прише́дшаго.
Изъ ко́рене изра́стши Іессе́ева, Дѣ́во, уста́вы прешла́ еси́ человѣ́ческаго существа́, Отчее ро́ждши Превѣ́чное Сло́во, я́ко благоволи́ Са́мъ запеча́танную утро́бу проити́ истоща́ніемъ стра́ннымъ.
Ирмо́съ: Услы́шахъ, Го́споди, слу́хъ Тво́й и убоя́хся, разумѣ́хъ дѣла́ Твоя́, — проро́къ глаго́лаше, — и просла́вихъ си́лу Твою́.
Твое́й любви́ привяза́вше сердца́, Сло́ве, страстоте́рпцы, Тебе́ ра́ди умерщвля́еми, я́ко а́гнцы непоро́чніи, подража́теле стра́сти Твоея́ яви́шася.
Упра́вивше, святíи, ко приста́нищу спасе́нія ду́ши ва́ша Ду́хомъ, бу́ри убѣжа́сте идолонеи́стовства, блаже́нніи.
Непрело́жни яви́стеся въ по́двизѣ муче́нія, непоколеби́ми и неужа́сни, гони́телей противле́ніе боже́ственною вѣ́рою побѣди́вше.
Богоро́диченъ: Изба́вльшеся Рождество́мъ Твои́мъ, Благослове́нная, пе́рвыя кля́твы, благослове́ніе воспрія́хомъ, и жи́знь, и избавле́ніе, Тя́, Богоро́дицу, сла́вящіи.
Ирмо́съ: Изъ но́щи дѣ́лъ омраче́нныя пре́лести очище́ніе на́мъ, Христе́, бо́дренно ны́нѣ соверша́ющимъ пѣ́снь, я́ко Благодѣ́телю, пріиди́, подава́яй удо́бну стезю́, по не́йже востека́юще, обря́щемъ сла́ву.
Лю́тую вражду́, ю́же къ намъ Влады́ка отсѣка́я па́ки плотски́мъ прише́ствіемъ, да держа́щаго разруши́тъ душетлѣ́ющаго, мíръ сочета́я съ невеще́ственными существы́, положи́въ присту́пна, Ро́ждшаго, тва́ри.
Лю́діе ви́дѣша, дре́вле омраче́нніи, по дне́хъ свѣ́тъ вы́шнія свѣ́тлости, язы́ки же Бо́гу наслѣ́діе Сы́нъ прино́ситъ, подая́ та́мо неизрече́нную благода́ть, идѣ́же мно́жайшій процвѣте́ грѣ́хъ.
Ирмо́съ: Свѣ́тлый на́мъ возсія́й Свѣ́тъ Присносу́щный, у́тренюющимъ о судьба́хъ за́повѣдей Твои́хъ, Влады́ко Человѣколю́бче, Христе́, Бо́же на́шъ.
Свѣтоявле́нна па́мять просія́ страстоте́рпецъ Твои́хъ и просвѣти́ земны́я концы́ чуде́съ Боже́ственными раздая́ніи, Христе́ Бо́же на́шъ.
Священнодѣ́теліе, же́ртву принося́ще, заколе́нія соверше́нная принесо́шася, всесожига́еми, со всѣ́ми ины́ми мно́жайшими му́ченики Христа́ велича́юще.
Хра́ми Бо́жіи су́ще, святíи, креще́ніемъ кончи́ну свя́ту вку́пѣ прія́сте въ дому́ Боже́ственнѣмъ и къ небе́сному хра́му взя́стеся.
Богоро́диченъ: Да Бо́гъ съ вы́шними совокупи́тъ попо́лзшіяся преступле́ніемъ въ вели́къ ро́въ, во Твою́ утро́бу всели́ся, Всенепоро́чная, и пло́ть бы́сть.
Ирмо́съ: Обита́я Іо́на въ преиспо́днихъ морски́хъ, пріити́ моля́шеся и бу́рю утоли́ти; унзе́нъ же а́зъ муча́щаго стрѣло́ю, Христу́ воспѣва́ю, зо́лъ губи́телю, ско́ро пріити́ Тебѣ́ къ мое́й лѣ́ности.
Иже бѣ́ испе́рва къ Бо́гу, Бо́гъ Сло́во ны́нѣ утвержда́етъ немощно́е дре́вле ви́дѣвъ сохрани́ти, е́же по на́мъ существо́, и́мже Себе́ вторы́мъ обще́ніемъ а́біе проявля́я страсте́й свобо́дное.
Гряде́тъ на́съ ра́ди изъ Авраа́млихъ чре́слъ темнопа́дшія во мра́цѣ прегрѣше́ній сы́ны воздви́гнути, до́лу пони́кшихъ, и́же во свѣ́тѣ обита́яй и я́слѣхъ чрезъ достоя́ніе, ны́нѣ благоволи́въ въ человѣ́ческое спасе́ніе.
Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́ и спаси́ мя, Спа́се мíра, зову́ща: сла́ва Тебѣ́.
Верхо́вникъ свяще́нныхъ бы́лъ еси́ люде́й и предпосла́лъ еси́ я́ въ ра́дости на небеса́, пострада́вшія, священному́чениче Анѳи́ме сла́вне.
Яко зла́то чи́сто посреди́ огня́, благоче́стіе ва́ше страда́льческое Іису́су позна́ся, со́лнца мно́жае облиста́ющее.
Умертви́вшеся пло́тію, жи́знь и́стинную наслѣ́довасте, му́дріи, со Христо́мъ су́ще, показа́вшимъ вы́ си́льнѣйшія му́къ.
Богоро́диченъ: По рождествѣ́ вои́стинну, я́ко пре́жде рождества́, Марíе, си́лою изъ Тебе́ вопло́щшагося Іису́са пребыла́ еси́ Дѣ́ва: чу́до вои́стинну пресла́вно.
Дѣ́ва дне́сь Пресу́щественнаго ражда́етъ, и земля́ верте́пъ Непристу́пному прино́ситъ. Ангели съ па́стырьми славосло́вятъ, волсви́ же со звѣздо́ю путеше́ствуютъ: на́съ бо ра́ди роди́ся Oтроча́ Мла́до, Превѣ́чный Бо́гъ.
Еде́мъ Виѳлее́мъ отве́рзе, пріиди́те, ви́димъ, пи́щу въ та́йнѣ обрѣто́хомъ; пріиди́те, пріи́мемъ су́щая ра́йская вну́трь верте́па: та́мо яви́ся ко́рень ненапое́нъ, прозяба́я отпуще́ніе, та́мо обрѣ́теся кла́дязь неиско́панъ, изъ него́же Дави́дъ пи́ти дре́вле возжада́ся. Та́мо Дѣ́ва ро́ждши Младе́нца, жа́жду уста́ви а́біе Ада́мову и Дави́дову. Сего́ ра́ди къ Нему́ и́демъ, гдѣ́ роди́ся Отроча́ Мла́до, Превѣ́чный Бо́гъ.
Ирмо́съ: Всецаря́ любо́вію уловле́нніи, о́троцы укори́ша безчи́сленно яря́щася мучи́теля злобо́жное языковре́діе, и́мже повину́ся о́гнь мно́гій, Влады́цѣ глаго́лющимъ: во вѣ́ки благослове́нъ еси́.
Слуги́ у́бо неи́стовно попаля́етъ, спаса́етъ же всепаля́щая со стра́хомъ ю́ныя, седмочи́сленнымъ разжже́ніемъ возвы́шена; и́хже вѣнча́ пла́мень, незави́стно Го́споду подаю́щу благоче́стія ра́ди ро́су.
Помо́щниче, Христе́, человѣ́комъ, проти́вное гада́ніе, воплоще́ніе неизглаго́ланное имѣ́яй, посрами́лъ еси́; бога́тство обоже́нія нося́й, вообра́жся ны́нѣ, Его́же ра́ди упова́ніемъ свы́ше въ преиспо́дній пріидо́хомъ мракъ.
Злѣ́ неудержа́нно возвыша́емый, нече́стно бѣся́щійся отъ развраще́нія мíра, низложи́лъ еси́ всемо́щнѣ грѣ́хъ, я́же привлече́ пре́жде, дне́сь же отъ сѣ́тей спаса́еши, вопло́щся во́лею, Благодѣ́телю.
Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́ о́гнь. Тогда́ тріе́ я́ко еди́нѣми усты́ поя́ху и благословля́ху, глаго́люще: благослове́нъ Бо́гъ оте́цъ на́шихъ.
Смотря́юще еди́на, я́же та́мо, блаже́нніи, пребыва́ющая си́лою Боже́ственною, я́коже тріе́ въ Вавило́нѣ боже́ственніи о́троцы, огня́ вы́шшіи яви́стеся, Боже́ственнымъ свѣ́томъ просвѣща́еми.
Глаго́лъ мучи́телевъ безслове́сный, му́дріи, поху́ливше, со свяще́нными жена́ми, и приноше́ніе я́ко и́стинно боже́ственными младе́нцы, приноше́нія всецѣ́ла Царю́ всѣ́хъ принесо́стеся.
Просвѣще́ніе зна́нія Христо́ва предстоя́щи вну́трь души́ всеблагоговѣ́йно, те́мный безбо́жія о́блакъ вои́стинну страда́льцы проидо́сте и въ вѣ́чный свѣ́тъ пріидо́сте.
Богоро́диченъ: Вы́шши яви́лася еси́ небе́съ, ро́ждшая всѣ́хъ Влады́ку и Бо́га, Его́же прилѣ́жно моля́щи не преста́й, Всесвята́я Чи́стая, спасти́ вѣ́рою те́плою пѣсносло́вящія Тя́.
Ирмо́съ: Утро́бу неопа́льну образу́ютъ Отрокови́цы и́же въ ве́тсѣмъ опаля́еміи ю́ноши, преесте́ственно ражда́ющую запечатлѣ́нну. Обоя́ же, содѣва́ющи чудодѣ́йство еди́но, лю́ди къ пѣ́нію возставля́етъ благода́ть.
Па́губы убѣжа́вши, е́же обожи́тися пре́лестію, непреста́нно пое́тъ излія́вшагося Сло́ва ю́ношески вся́ съ тре́петомъ тва́рь, несла́вну хвалу́, боя́щися, прино́ситъ, тлѣ́нна су́щи, а́ще и му́дрѣ терпя́ше.
Гряде́ши, заблу́ждшее на па́жить обраща́я цвѣтотво́рную изъ пусты́нныхъ холмо́въ язы́ковъ воста́ніе, человѣ́ческое естество́, си́лу ну́жную человѣкоубíйцы угаси́ти, мужъ же яви́вся и Бо́гъ промышле́ніемъ.
Ирмо́съ: Пѣсносло́вцы въ пещи́ спа́сшаго дѣ́ти и громопла́менную прело́жшаго на ро́су, Христа́ Бо́га по́йте и превозноси́те во вся́ вѣ́ки.
То́чатъ Боже́ственнаго благово́нія врачева́ніе мѵ́ра му́чениковъ мо́щи и страсте́й смра́дъ отъе́млютъ вѣ́рою пѣсносло́вящихъ Тя́, Христа́, во вѣ́ки.
Яви́стеся, я́ко шипцы́, страда́льцы краснѣ́йшіи, посредѣ́ ходя́ще огня́ и усе́рдно зову́ще: по́йте и превозноси́те Христа́ во вѣ́ки.
Юноши, вку́пѣ и дѣ́вы, и ста́рцы, и ю́ніи, младе́нцы святíи, же́нъ же мно́жество безчи́сленное вы́шнее улучи́ша ликова́ніе, вку́пѣ пострада́вше.
Богоро́диченъ: Іезекíиль Тя́ две́рь зри́тъ заключе́нну, Дѣ́во, Еюже про́йде Іису́съ, всели́выйся во утро́бѣ Твое́й и пло́ть отъ Твои́хъ крове́й поне́съ неслія́нно.
Ирмо́съ: Люби́ти у́бо на́мъ, я́ко безбѣ́дное стра́хомъ удо́бѣе молча́ніе, любо́вію же, Дѣ́во, пѣ́сни тка́ти, спротяже́нно сложе́нныя, неудо́бно е́сть; но и, Ма́ти, си́лу, ели́ко е́сть произволе́ніе, да́ждь.
Образы несвѣ́тлы и сѣ́ни приведе́ны, о Ма́ти Чи́стая, ви́дѣвше Сло́ва, но́ва я́вльшагося отъ вра́тъ заключе́нныхъ, мня́щіи же и́стинную свѣ́тлость, досто́йно Твою́ благослови́мъ утро́бу.
Жела́ніе получи́вше и Бо́жія прише́ствія христокра́сніи лю́діе сподо́бльшеся, ны́нѣ утѣша́ются па́ки бытіе́мъ: я́ко живоно́сну благода́ть дае́ши, Дѣ́во Чи́стая, поклони́тися сла́вѣ.
Ирмо́съ: Свѣтоно́сный о́блакъ, въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся на́съ ра́ди, бы́въ Человѣ́къ, Безнача́льный, велича́емъ вси́ я́ко Ма́терь Бо́га на́шего Чи́стую.
Яко вольнозакла́нніи а́гнцы, всесожго́стеся вку́пѣ, и, я́ко же́ртвы чи́стыя, закла́нному Влады́цѣ о на́съ, земноро́дныхъ, добропобѣ́дніи му́ченицы, приведо́стеся, и вѣнцы́ побѣ́ды досто́йно прія́сте вку́пѣ.
Со святы́ми проро́ки, съ честны́ми апо́столы и съ ли́ки избра́нныхъ предстоя́ще а́нгелъ, мно́жество му́чениковъ свяще́нныхъ, Го́споду моли́теся, е́же спасти́ отъ напа́стей и бѣ́дъ вѣ́рою блажа́щія ва́съ.
Со́лнечныхъ лу́чь свяще́нная ва́ша па́мять мно́жае сія́етъ, страда́льцы, де́монскую тму́ отгоня́щи при́сно и всѣ́хъ просвѣща́ющи, всехва́льніи, вѣ́рою и любо́вію по до́лгу блажа́щія ва́съ.
Богоро́диченъ: Свѣ́тъ ро́ждшая Боже́ственный, отъ Отца́ возсія́вшій, омраче́нную мою́ ду́шу лестьми́ житія́ и бы́вшую враго́мъ, Всенепоро́чная, игра́лище, уще́дри и свѣ́томъ покая́нія спаси́тельнаго сподо́би, Чи́стая.
Посѣти́лъ ны́ е́сть свы́ше Спа́съ на́шъ, Восто́къ восто́ковъ, и су́щіи во тмѣ́ и сѣ́ни обрѣто́хомъ и́стину, и́бо отъ Дѣ́вы роди́ся Госпо́дь. Два́жды.
До́ме Евфра́ѳовъ,/ Сіо́не, гра́де святы́й,/ пріими́ съ ра́достію Влады́ку всѣ́хъ,/ въ Тебѣ́, отъ Дѣ́вы па́че сло́ва ражда́ема,/ градонаписа́ти хотя́ща/ рая́ отпа́дшія,/ къ Нему́же зове́мъ:/ благослове́нъ прише́дый,/ Бо́же на́шъ, сла́ва Тебѣ́.
Сти́хъ: Изъ чре́ва пре́жде денни́цы роди́хъ Тя́,/ кля́тся Госпо́дь и не раска́ется.
Тя́, на́съ ра́ди по на́мъ я́вльшася, Сло́ве,/ свиря́ющихъ ли́къ ви́дѣвъ въ верте́пѣ/ пелена́ми пови́та,/ въ я́слѣхъ же лежа́ща,/ пое́тъ Тя́ я́вѣ со а́нгелы:/ сла́ва Бо́гу въ вы́шнихъ./ Съ ни́миже зове́мъ:/ благослове́нъ рожде́йся,/ Бо́же на́шъ, сла́ва Тебѣ́.
Сти́хъ: Рече́ Госпо́дь Го́сподеви моему́:/ сѣди́ одесну́ю Мене́.
Иже во проро́цѣхъ велегла́сный взыва́етъ:/ отъ дѣ́вственнаго хо́щетъ роди́тися чре́ва/ Отроча́ — Влады́ка/ па́че сло́ва и мы́сли,/ Ангелъ совѣ́та вои́стинну вели́ка/ и Жи́знь живу́щихъ Сы́й./ Съ ни́миже зове́мъ:/ благослове́нъ рожде́йся,/ Бо́же на́шъ, сла́ва Тебѣ́.
Не́бо и земля́ дне́сь проро́чески да возвеселя́тся, а́нгели и человѣ́цы духо́вно да торжеству́ютъ, я́ко Бо́гъ во пло́ти яви́ся су́щимъ во тмѣ́ и сѣ́ни сѣдя́щимъ, рожде́йся отъ Дѣ́вы; верте́пъ и я́сли прія́ша Того́, па́стыріе чу́до проповѣ́дуютъ, волсви́ отъ восто́къ въ Виѳлее́мъ да́ры прино́сятъ. Мы́ же хвалу́ недосто́йными устна́ми, а́нгельски Тому́ принесе́мъ: сла́ва въ вы́шнихъ Бо́гу, и на земли́ ми́ръ, пріи́де бо ча́яніе язы́ковъ, прише́дъ, спасе́ на́съ отъ рабо́ты вра́жія.
НА ЛИТУРГІИ.
Блаже́нна пра́здника, пѣ́снь 4-я и 5-я на 6. Проки́менъ святы́хъ, гла́съ 5: Ты́, Го́споди, сохрани́ши ны́ и соблюде́ши ны́ отъ ро́да сего́ и во вѣ́къ. Сти́хъ: Спаси́ мя, Го́споди, я́ко оскудѣ́ преподо́бный. Апо́столъ къ Ри́мляномъ, зача́ло 96 отъ полу́. Аллилу́ія, гла́съ 4: Воскли́кните Го́сподеви, вся́ земля́, по́йте же и́мени Его́, дади́те сла́ву хвалѣ́ Его́. Сти́хъ: Яко искуси́лъ ны́ еси́, Бо́же, разже́глъ ны́ еси́, я́коже разжиза́ется сребро́ Ева́нгеліе Луки́, зача́ло 51 отъ полу́. Прича́стенъ Ра́дуйтеся, пра́ведніи, о Го́сподѣ, пра́вымъ подоба́етъ похвала́.
Источникъ: Минíа, мѣ́сяцъ Деке́мврій. — Кíевъ: Въ Тѵпогра́фіи Кíево-Пече́рской Ла́ѵры, 1894. — Л. 282 об. – 289.