Минеи Богослужебные.
(Кíевъ: Тѵпогра́фія Кíево-Пече́рской Ла́вры, 1893).
СВЯТОЕ БОГОЯВЛЕНІЕ ГОСПОДА БОГА И СПАСА НАШЕГО ІИСУСА ХРИСТА.
При часѣ́ 5-мъ дне́ зна́менуетъ въ вели́кое и пото́мъ во вся́ тя́жкая. И собра́вшеся во хра́мъ, начина́емъ вече́рню и пое́мъ обы́чный псало́мъ. Та́же, ектенія́ вели́кая, и по ектеніи́, а́ще бу́детъ въ суббо́ту, стихосло́вимъ: Блаже́нъ му́жъ.., каѳи́сму всю́. Аще же въ недѣ́лю, пое́мъ 1-й антифо́нъ. Аще ли во ины́я дни́, стихоло́гія не быва́етъ, но а́біе пое́мъ: Го́споди воззва́хъ... на гла́съ 2. Іере́й же твори́тъ проскоми́дію. Діа́конъ кади́тъ це́рковь, по обы́чаю. И мы́ пое́мъ
Просвѣти́теля на́шего,/ просвѣща́ющаго вся́каго человѣ́ка,/ ви́дѣвъ Предте́ча крести́тися прише́дша,/ ра́дуется душе́ю и трепе́щетъ,/ руко́ю показу́етъ Eго́ и глаго́летъ лю́демъ:/ Се́й, избавля́яй Изра́иля,/ свобожда́яй на́съ отъ истлѣ́нія./ О, безгрѣ́шный Христе́, Бо́же на́шъ, сла́ва Тебѣ́! Два́жды.
Изба́вителю на́шему,/ отъ раба́ креща́ему/ и Ду́ха прише́ствіемъ свидѣ́тельствуему,/ ужасо́шася, зря́ще, а́нгельская во́инства./ Гла́съ же съ небесе́ принесе́ся отъ Oтца́:/ Се́й, Eго́же Предте́ча руко́ю креща́етъ,/ Сы́нъ Мо́й éсть возлю́бленный,/ о Не́мже благоволи́хъ./ Христе́ Бо́же на́шъ, сла́ва Тебѣ́. Два́жды.
Іoрда́нскія струи́/ Тебе́, Исто́чника, прія́ша,/ и Утѣ́шитель въ ви́дѣ голуби́нѣ схожда́ше./ Приклоня́етъ ве́рхъ Приклони́вый небеса́./ Зове́тъ и вопіе́тъ бре́ніе Зижди́телю:/ что́ ми повелѣва́еши, я́же вы́ше мене́?/ Азъ тре́бую Твоего́ креще́нія./ О, безгре́шный Христе́, Бо́же на́шъ, сла́ва Тебѣ́! Два́жды.
Спасти́ хотя́ заблу́ждшаго человѣ́ка,/ не не сподо́бился eси́ въ ра́бій зракъ облещи́ся:/ подоба́ше бо Тебѣ́, Влады́цѣ и Бо́гу,/ воспрія́ти на́ша за ны́,/ Тебѣ́ бо кре́щшуся пло́тію, Изба́вителю,/ оставле́нія сподо́билъ eси́ на́съ./ Тѣ́мже вопіе́мъ Ти́:/ Христе́, Бо́же на́шъ, сла́ва Тебѣ́! Два́жды.
Приклони́лъ eси́ главу́ Предте́чи, сокруши́лъ eси́ главы́ зміе́въ. Прише́дъ въ струи́, просвѣти́лъ eси́ вся́чeская, е́же сла́вити Тя́, Спа́се, Просвѣти́теля ду́шъ на́шихъ.
Въ нача́лѣ сотвори́ Богъ не́бо и зе́млю. Земля́ же бѣ́ неви́дима и неустро́ена, и тма́ верху́ бе́здны, и Ду́хъ Бо́жій ноша́шеся верху́ воды́. И рече́ Бо́гъ: да бу́детъ свѣ́тъ. И бы́сть свѣ́тъ. И ви́дѣ Бо́гъ свѣ́тъ, я́ко добро́; и разлучи́ Бо́гъ между́ свѣ́томъ и между́ тмо́ю. И нарече́ Бо́гъ свѣ́тъ де́нь, и тму́ нарече́ но́щь. И бы́сть ве́черъ, и бы́сть у́тро, де́нь еди́нъ. И рече́ Бо́гъ: да бу́детъ тве́рдь посредѣ́ воды́, и да бу́детъ разлуча́ющи посредѣ́ воды́ и воды́. И бы́сть та́ко. И сотвори́ Бо́гъ тве́рдь; и разлучи́ Бо́гъ между́ водо́ю, я́же бѣ́ подъ тве́рдію, и между́ водо́ю, я́же бѣ́ надъ тве́рдію. И нарече́ Бо́гъ тве́рдь не́бо; и ви́дѣ Бо́гъ, я́ко добро́. И бы́сть ве́черъ, и бы́сть у́тро, де́нь вторы́й. И рече́ Бо́гъ: да собере́тся вода́, я́же подъ небесе́мъ, въ собра́ніе еди́но, и да яви́тся су́ша. И бы́сть та́ко. И собра́ся вода́, я́же подъ небесе́мъ, въ собра́нія своя́, и яви́ся су́ша. И нарече́ Бо́гъ су́шу зе́млю, и собра́нія во́дъ нарече́ моря́. И ви́дѣ Бо́гъ, я́ко добро́. И рече́ Бо́гъ: да прорасти́тъ земля́ бы́ліе травно́е, сѣ́ющее сѣ́мя по ро́ду и по подо́бію, и дре́во плодови́тое, творя́щее пло́дъ, ему́же сѣ́мя его́ въ не́мъ, по ро́ду на земли́. И бы́сть та́ко. И изнесе́ земля́ бы́ліе травно́е, сѣ́ющее сѣ́мя по ро́ду и по подо́бію, и дре́во плодови́тое, творя́щее пло́дъ, ему́же сѣ́мя его́ въ не́мъ по ро́ду на земли́. И ви́дѣ Бо́гъ, я́ко добро́. И бы́сть ве́черъ, и бы́сть у́тро, де́нь тре́тій.
Рече́ Госпо́дь къ Моисе́ю: что́ вопіе́ши ко Мнѣ́? Глаго́ли сыново́мъ Изра́илевымъ, и да путеше́ствуютъ. И ты́ возми́ же́злъ тво́й, и простри́ ру́ку твою́ на мо́ре, и расто́ргни е́, и да вни́дутъ сы́нове Изра́илевы посредѣ́ мо́ря по су́ху. И се́ Азъ ожесточу́ се́рдце фарао́ново, и слу́гъ его́, и еги́птянъ всѣ́хъ, и вни́дутъ въ слѣ́дъ и́хъ, и просла́влюся въ фарао́нѣ, и во всѣ́мъ во́инствѣ его́, и въ колесни́цахъ, и въ ко́нѣхъ его́. И уразуме́ютъ вси́ еги́птяне, я́ко Азъ Госпо́дь, прославля́ющу Ми ся въ фарао́нѣ, и въ колесни́цахъ, и въ ко́нѣхъ его́. Простре́ же Моисе́й ру́ку на мо́ре, и возгна́ Госпо́дь мо́ре вѣ́тромъ ю́жнымъ си́льнымъ всю́ но́щь, и сотвори́ мо́ре су́хо, и разступи́ся вода́. И внидо́ша сы́нове Изра́илевы въ посре́дъ мо́ря по су́ху, и вода́ и́мъ бы́сть стѣна́ одесну́ю и стѣна́ ошу́юю. Погна́ша же еги́птяне и внидо́ша созади́ и́хъ вся́къ ко́нь фарао́новъ, и колесни́цы, и вса́дницы посредѣ́ мо́ря. Простре́ же Моисе́й ру́ку на мо́ре, и устро́ися вода́ ко дню́ на мѣ́сто, еги́птяне же бѣжа́ша подъ водо́ю, и истрясе́ Госпо́дь еги́птяны посредѣ́ мо́ря. И, обрати́вшися, вода́ покры́ колесни́цы, и вса́дники, и триста́ты, и всю́ си́лу фарао́нову, вше́дшихъ въ слѣ́дъ и́хъ въ мо́ре, и не оста́ отъ нихъ ни еди́нъ. Сы́нове же Изра́илевы проидо́ша по су́ху посредѣ́ мо́ря.
Поя́тъ Моисе́й сы́ны Изра́илевы отъ мо́ря Чермна́го и веде́ и́хъ въ пусты́ню Суръ. И идя́ху три́ дни́ въ пусты́ни, и не обрѣта́ху воды́, да бы́ша пи́ли Пріидо́ша же въ Ме́рру, и не можа́ху пи́ти воды́ изъ Ме́рры, горька́ бо бѣ́. Сего́ ра́ди нарече́ся и́мя мѣ́сту тому́: Го́ресть. И ропта́ху лю́діе на Моисе́я, глаго́люще: что́ піе́мъ? Возопи́ же Моисе́й ко Го́споду, и показа́ ему́ Госпо́дь дре́во. И вложи́ е́ въ во́ду, и сладка́ бысть вода́. Та́мо положи́ ему́ Бо́гъ оправда́нія и суды́ и та́мо искуша́ше его́. И рече́: а́ще слу́хомъ услы́шиши гла́съ Го́спода, Бо́га твоего́, и уго́дная предъ Ни́мъ сотвори́ши, и внуши́ши за́повѣди Его́, и сохрани́ши вся́ оправда́нія Его́, вся́ку болѣ́знь, ю́же наведо́хъ на еги́птяны, не наведу́ на тя́. Азъ бо е́смь Госпо́дь, исцѣля́яй тя́. И пріидо́ша во Ели́мъ, и бя́ху та́мо двана́десять исто́чниковъ во́дъ и се́дмьдесятъ сте́бль фи́никовъ, и ополчи́шася та́мо при вода́хъ. И воздви́гшеся отъ Ели́ма, и пріи́де ве́сь со́нмъ сыно́въ Изра́илевыхъ въ пусты́ню Си́нъ, я́же е́сть между́ Ели́момъ и между́ Си́ною.
Яви́лся еси́ въ мíрѣ,/ Иже мíръ Сотвори́вый,/ да просвѣти́ши во тмѣ́ сѣдя́щія,/ Человѣколю́бче, сла́ва Тебѣ́.
Сти́хъ 1: Бо́же, уще́дри ны́ и благослови́ ны,/ просвѣти́ лице́ Твое́ на ны́ и поми́луй ны́./ Позна́ти на земли́ пу́ть Тво́й,/ во всѣ́хъ язы́цѣхъ спасе́ніе Твое́.
И пое́мъ коне́цъ: Да просвѣти́ши во тмѣ́ сѣдя́щія,* Человѣколю́бче, сла́ва Тебѣ́.
Сти́хъ 2: Да исповѣ́дятся Тебѣ́ лю́діе, Бо́же,/ да исповѣ́дятся Тебѣ́ лю́діе вси́./ Да возвеселя́тся и да возра́дуются язы́цы,/ я́ко су́диши лю́демъ правото́ю/ и язы́ки на земли́ наста́виши.
И па́ки: Да просвѣти́ши во тмѣ́ сѣдя́щія,* Человѣколю́бче, сла́ва Тебѣ́.
Сти́хъ 3: Да исповѣ́дятся Тебѣ́ лю́діе, Бо́же,/ да исповѣ́дятся Тебѣ́ лю́діе вси́./ Земля́ даде́ пло́дъ сво́й,/ благослови́ ны, Бо́же, Бо́же на́шъ./ Благослови́ ны, Бо́же, и да убоя́тся Его́ вси́ концы́ земли́.
И па́ки: Да просвѣти́ши во тмѣ́ сѣдя́щія,* Человѣколю́бче, сла́ва Тебѣ́.
Яви́лся еси́ въ мíрѣ,/ Иже мíръ Сотвори́вый,/ да просвѣти́ши во тмѣ́ сѣдя́щія,/ Человѣколю́бче, сла́ва Тебѣ́.
Рече́ Госпо́дь ко Іису́су: въ де́нь се́й начина́ю вознести́ тя́ предъ всѣ́ми сы́нами Изра́илевыми, да разумѣ́ютъ, зане́ я́коже бѣ́хъ съ Моисе́омъ, та́ко бу́ду и съ тобо́ю. И ны́нѣ заповѣ́ждь свяще́нникомъ, взима́ющимъ ковче́гъ завѣ́та, глаго́ля: да я́ко вни́дите въ ча́сть воды́ Іорда́нскія и ста́нете при Іорда́нѣ. Якоже идя́ху свяще́нницы, взе́мшіи ковче́гъ завѣ́та Госпо́дня, во Іорда́нъ, и но́ги свяще́нниковъ, нося́щихъ ковче́гъ, омочи́шася въ ча́сти воды́ Іорда́нскія. Іорда́нъ же исполня́шеся во все́мъ ло́жи свое́мъ, я́коже во дни жа́твы пшени́цы. И ста́ша во́ды низходя́щія свы́ше въ со́нмъ еди́нъ, отстоя́щія дале́че зѣло́ отъ Адама́ гра́да, да́же до страны́ Каріаѳіари́ма. Низходя́щая же сни́де на мо́ре Арави́тское, да́же до мо́ря Соли́щнаго, до́ндеже вконе́цъ оскудѣ́, и лю́діе стоя́ху пря́мо Іерихо́на. И ста́ша свяще́нницы, взе́мшіи ковче́гъ завѣ́та Госпо́дня, на су́сѣ, посредѣ́ Іорда́на, гото́вы. И вси́ сы́нове Изра́илевы преидо́ша по су́ху, до́ндеже сконча́ша вси́ лю́діе, преходя́ще Іорда́нъ.
Рече́ Илія́ къ Елиссе́ю: сѣди́ у́бо здѣ́, я́ко Госпо́дь посла́ мя до Іорда́на. И рече́ Елиссе́й: жи́въ Госпо́дь, и жива́ душа́ твоя́, а́ще оста́влю тя́. И поидо́ста о́ба, и пя́тдесятъ муже́й отъ сыно́въ проро́ческихъ пріидо́ша и ста́ша пря́мо издале́ча, о́ба же ста́ста при Іорда́нѣ. И прія́тъ Илія́ ми́лоть свою́, и сви́тъ ю́, и порази́ е́ю во́ды, и раздѣли́ся вода́ сю́ду и сю́ду, и преидо́ста о́ба по су́ху. И бы́сть, я́ко преидо́ста, и рече́ Илія́ Елиссе́ю: проси́, что́ сотворю́ тебѣ́, пре́жде да́же не взя́тъ бу́ду отъ тебе́? И рече́ Елиссе́й: да бу́детъ у́бо Ду́хъ, Иже въ тебѣ́, сугу́бъ во мнѣ́. И рече́ Илія́: ожесточи́лъ еси́ проси́ти, оба́че а́ще уви́диши мя́ взе́млема отъ тебе́, бу́детъ ти́ та́ко; а́ще ли же не уви́диши, не бу́детъ. И бы́сть иду́щимъ и́мъ и глаго́лющимъ, и се́ колесни́ца о́гненна, и ко́ни о́гненни, и раздѣли́ между́ обѣ́ма. И взя́тся Илія́ тру́сомъ, я́ко на не́бо. И Елиссе́й зря́ше, и то́й вопія́ше: о́тче, о́тче, колесни́ца Изра́илева, и ко́ни его́! И не ви́де его́ ктому́. И я́тся Елиссе́й за ри́зы своя́, и раздра́ я́ на дво́е, и взя́тъ ми́лоть Иліину́, па́дшую верху́ его́. И обрати́ся Елиссе́й, и ста́ на бре́зѣ Іорда́на И прія́тъ Елиссе́й ми́лоть Иліину́, па́дшую верху́ его́, и уда́ри во́ды, и не раздѣли́шася. И рече́ Елиссе́й: гдѣ́ у́бо есть Бо́гъ Иліи́нъ апфо́? И уда́ри Елиссе́й во́ды второ́е, и раздѣли́шася во́ды, и пре́йде по су́ху.
Пріи́де Неема́нъ, кня́зь царя́ Ассирíйскаго, съ колесни́цами и ко́ньми свои́ми и ста́ при две́рехъ хра́ма Елиссе́ева. И посла́ Елиссе́й къ нему́ вѣ́стника, глаго́ля: ше́дъ, измы́йся во Іорда́нѣ седми́жды, и обрати́тся пло́ть твоя́ къ тебѣ́, и очи́стишися. И разгнѣ́вася Неема́нъ, и оты́де, и рече́: се́ рѣ́хъ, да изы́детъ ко мнѣ́, и призове́тъ о и́мени Го́спода Бо́га своего́, и положи́тъ ру́ку свою́ на прока́зу, и оты́метъ ю́ отъ пло́ти моея́. Не добрѣ́йши ли су́ть Арвана́ и Фарфа́, рѣцѣ́ Дама́сковѣ, па́че Іорда́на и всѣ́хъ во́дъ Изра́илевыхъ? Не ше́дъ ли, измы́юся въ ни́хъ и очи́щуся? И возврати́ся, и оты́де съ гнѣ́вомъ. И приступи́ша о́троцы его́ и рѣ́ша къ нему́: го́споди, а́ще бы ве́ліе сло́во глаго́лалъ къ тебѣ́ проро́къ, не бы́ ли сотвори́лъ, я́коже рече́ къ тебѣ́: измы́йся и очи́стишися? И сни́де Неема́нъ, и погрузи́ся во Іорда́нѣ седми́жды, по глаго́лу человѣ́ка Бо́жія, и обрати́ся пло́ть его́ къ нему́, я́ко отроча́те ма́ла, и очи́стися.
Грѣ́шникомъ и мытаре́мъ/ за мно́жество ми́лости Твоея́/ яви́лся еси́, Спа́се на́шъ./ Гдѣ́ бо имѣ́лъ бы свѣ́тъ Тво́й возсія́ти,/ то́кмо на сѣдя́щія во тмѣ́?/ Сла́ва Тебѣ́.
Сти́хъ 1: Госпо́дь воцари́ся, въ лѣ́поту облече́ся,/ облече́ся Госпо́дь въ си́лу и препоя́сася,/ и́бо утверди́ вселе́нную, я́же не подви́жится./ Гото́въ престо́лъ Тво́й отто́лѣ,/ отъ вѣ́ка Ты́ еси́.
Та́же, па́ки: Гдѣ́ бо имѣ́лъ бы свѣ́тъ Тво́й возсія́ти,/ то́кмо на сѣдя́щія во тмѣ́?/ Сла́ва Тебѣ́.
Сти́хъ 2: Воздвиго́ша рѣ́ки, Го́споди, воздвиго́ша рѣ́ки гла́сы своя́./ Во́змутъ рѣ́ки сотре́нія своя́ отъ гласо́въ во́дъ мно́гихъ.
Та́же, па́ки: Гдѣ́ бо имѣ́лъ бы свѣ́тъ Тво́й возсія́ти,/ то́кмо на сѣдя́щія во тмѣ́?/ Сла́ва Тебѣ́.
Сти́хъ 3: Ди́вны высоты́ морскíя, ди́венъ въ высо́кихъ Госпо́дь./ Свидѣ́нія Твоя́ увѣ́ришася зѣло́./ До́му Твоему́ подоба́етъ святы́ня, Го́споди, въ долготу́ днíй.
Та́же, па́ки: Гдѣ́ бо имѣ́лъ бы свѣ́тъ Тво́й возсія́ти,/ то́кмо на сѣдя́щія во тмѣ́?/ Сла́ва Тебѣ́.
Грѣ́шникомъ и мытаре́мъ/ за мно́жество ми́лости Твоея́/ яви́лся еси́, Спа́се на́шъ./ Гдѣ́ бо имѣ́лъ бы свѣ́тъ Тво́й возсія́ти,/ то́кмо на сѣдя́щія во тмѣ́?/ Сла́ва Тебѣ́.
Та́ко глаго́летъ Госпо́дь: измы́йтеся и чи́сти бу́дете, отыми́те лука́вствія отъ ду́шъ ва́шихъ предъ очи́ма Мои́ма, преста́ните отъ лука́вствій ва́шихъ. Научи́теся до́брое твори́ти, изыщи́те суда́, изба́вите оби́дима, суди́те си́ру и оправди́те вдови́цу. И пріиди́те, и истя́жимся, — глаго́летъ Госпо́дь, — и а́ще бу́дутъ грѣси́ ва́ши, я́ко багря́ное, я́ко снѣ́гъ, убѣлю́; а́ще же бу́дутъ, я́ко червле́ное, я́ко во́лну, убѣлю́. И а́ще хо́щете и послу́шаете Мене́, блага́я земли́ снѣ́сте. Аще ли же не хо́щете, ниже́ послу́шаете Мене́, ме́чь ва́съ поя́стъ, — уста́ бо Госпо́дня глаго́лаша сія́.
Воззрѣ́въ Іа́ковъ и ви́дѣ по́лкъ Бо́жій ополчи́вшійся, и срѣто́ша его́ а́нгели Бо́жіи. Рече́ же Іа́ковъ, егда́ ви́дѣ и́хъ: по́лкъ Бо́жій се́й. И нарече́ и́мя мѣ́сту тому́: Полки́. Посла́ же Іа́ковъ вѣ́стники предъ собо́ю ко Иса́ву, бра́ту своему́, въ зе́млю Сіи́ръ, во страну́ Едо́мскую. И заповѣ́да и́мъ, глаго́ля: си́це рцы́те господи́ну моему́ Иса́ву: та́ко глаго́летъ о́трокъ тво́й Іа́ковъ: съ Лава́номъ пожи́хъ и укоснѣ́хъ до ны́нѣ, и бы́ша ми́ о́вцы, и воло́ве, и осля́та, и рабы́, и рабы́ни. И посла́хъ возвѣсти́ти го́сподеви моему́ Иса́вови, да обря́щетъ благода́ть о́трокъ тво́й предъ тобо́ю. И возврати́шася вѣ́стницы ко Іа́кову, глаго́люще: идо́хомъ ко Иса́ву, бра́ту твоему́, и се́ са́мъ гряде́тъ въ срѣ́теніе твое́ и четы́ре ста́ муже́й съ ни́мъ. Убоя́ся же Іа́ковъ зѣло́, и недоумѣва́шеся, и раздѣли́ лю́ди, и́же съ ни́мъ, и волы́, и о́вцы на два́ полка́. И рече́ Іа́ковъ: а́ще пріи́детъ Иса́въ на по́лкъ еди́нъ и посѣче́тъ и́, бу́детъ по́лкъ вторы́й во спасе́ніе. И рече́ Іа́ковъ: Богъ отца́ моего́ Авраа́ма и Богъ отца́ моего́ Исаа́ка, Го́споди, рекíй ми́: отбѣжи́ въ зе́млю бытія́ твоего́, и добро́ ти сотворю́. Дово́льно ми́ да бу́детъ отъ вся́кія пра́вды и отъ вся́кія и́стины, ю́же сотвори́лъ еси́ о́троку Твоему́, съ жезло́мъ бо мои́мъ си́мъ преидо́хъ Іорда́нъ.
Сни́де дщи́ фарао́нова измы́тися на рѣку́, и рабы́ни ея́ прехожда́ху при рѣцѣ́, и ви́дѣвши крабíйцу въ лучи́цѣ, посла́вши рабы́ню взя́тъ ю́. Отве́рзши же, ви́дитъ отроча́, пла́чущееся въ крабíйцѣ, и пощади́ е́ дщи́ фарао́нова, и рече́: отъ дѣте́й евре́йскихъ сіе́. И рече́ сестра́ его́ дще́ри фарао́новѣ: хо́щеши ли призову́ ти жену́ пита́тельницу отъ евре́й, и воздои́тъ ти́ отроча́? И рече́ е́й дщи́ фарао́нова: иди́. Ше́дши же, отрокови́ца призва́ ма́терь отроча́те Рече́ же къ не́й дщи́ фарао́нова: соблюди́ ми отроча́ сіе́ и воздо́й ми́ е́, а́зъ же да́мъ ти́ мзду́. Пріе́мше же жена́ отроча́ и доя́ше е́. Устраби́вшуся же отроча́ти, введе́ е́ ко дще́ри фарао́новѣ, и бы́сть е́й въ сы́на. Именова́ же и́мя ему́ Моисе́й, глаго́лющи: отъ воды́ взя́хъ его́.
Рече́ Гедео́нъ къ Бо́гу: а́ще спаса́еши руко́ю мое́ю Изра́иля, и́мже о́бразомъ ре́клъ еси́: Се́ а́зъ положу́ руно́ о́вчее на гумнѣ́ и, а́ще бу́детъ роса́ на рунѣ́ то́кмо, по все́й же земли́ су́ша, разумѣ́ю, я́ко спасе́ши руко́ю мое́ю Изра́иля, и́мже о́бразомъ ре́клъ еси́. И бы́сть та́ко. И ура́нивъ Гедео́нъ нау́тріе, и исцѣди́ руно́, и истече́ роса́ отъ руна́, испо́лненъ окри́нъ воды́. И рече́ Гедео́нъ къ Бо́гу: да не прогнѣ́вается у́бо я́рость Твоя́ на мя́, и возглаго́лю еще́ еди́ною, и искушу́ еще́ еди́ною руно́мъ: да бу́детъ у́бо су́ша на рунѣ́ то́кмо, по все́й же земли́ роса́. И сотвори́ Бо́гъ та́ко въ нощи́ то́й, и бы́сть су́ша на рунѣ́ то́кмо, по все́й же земли́ бы́сть роса́.
Рече́ Илія́ къ лю́демъ: приступи́те ко мнѣ́. И приступи́ша вси́ лю́діе къ нему́. И взя́тъ Илія́ двана́десять ка́меній, по числу́ двана́десяти колѣ́нъ сыно́въ Изра́илевыхъ, я́коже глаго́ла Госпо́дь къ нему́, глаго́ляй: Изра́иль бу́детъ и́мя твое́. И созда́ ка́меніе, и исцѣли́ олта́рь Госпо́день раско́панный, и сотвори́ ро́въ, вмѣща́ющъ по двѣ́ мѣ́ры сѣ́мени, о́крестъ олтаря́. И положи́ полѣ́на на олтари́, его́же сотвори́. И раздроби́ всесожже́нія, и положи́ на полѣ́на, и обы́де олта́рь. И рече́ Илія́: пріими́те ми́ четы́ре водоно́сы воды́, и да пролію́тся на олта́рь, на всесожже́ніе же и на полѣ́на. И рече́: удво́йте. И удво́иша. И рече́: утро́йте. И утро́иша. И идя́ше вода́ о́крестъ олтаря́, и ро́въ испо́лнися воды́. И возопи́ Илія́ на не́бо, и рече́: Го́споди Бо́же Авраа́мовъ, и Исаа́ковъ, и Іа́ковль, услы́ши мене́ днесь огне́мъ, и разумѣ́ютъ вси́ лю́діе сíи, я́ко Ты́ еси́ Еди́нъ Госпо́дь Бо́гъ Изра́илевъ, и а́зъ ра́бъ Тво́й и Тебе́ ра́ди сотвори́хъ сія́ вся́, и Ты́ обрати́ сердца́ люде́й си́хъ въ слѣ́дъ Тебе́. И паде́ о́гнь отъ Го́спода съ небесе́ и пояде́ всесожже́нія, и полѣ́на, и во́ду, я́же на ни́хъ, и во́ду, я́же въ ро́вѣ, и ка́меніе, и пе́рсть полиза́ о́гнь. И падо́ша вси́ лю́діе на лицѣ́ свое́мъ и рѣ́ша: вои́стину Госпо́дь Бо́гъ, То́й е́сть Бо́гъ.
Реко́ша му́жіе гра́да Іерихо́нска ко Елиссе́ю: се́ жили́ще гра́да сего́ добро́, я́коже ты́, го́споди, ви́диши, и во́ды злы́ и безча́дны. И рече́ Елиссе́й: пріими́те ми́ водоно́съ но́въ и всы́плите ту́ со́ль; и прія́ша и́. И изы́де на исхожде́ніе во́дъ, и вве́рже та́мо со́ль, и рече́: та́ко глаго́летъ Госпо́дь, исцѣли́хъ во́ды сія́, и не ктому́ бу́детъ отню́дъ умира́я, ниже́ безча́дствующая си́ми. И исцѣлѣ́ша во́ды до дне́ сего́, по глаго́лу, и́же глаго́ла Елиссе́й.
Та́ко глаго́летъ Госпо́дь: во вре́мя прія́тное послу́шахъ тя́ и въ де́нь спасе́нія помого́хъ тебѣ́. И созда́хъ тя́ и да́хъ тя́ въ завѣ́тъ язы́ковъ, е́же устро́ити зе́млю и наслѣ́дити наслѣ́діе пусты́ни. Глаго́люща су́щимъ во у́захъ: изыди́те! И су́щимъ во тмѣ́: откры́йтеся! На всѣ́хъ путе́хъ пасти́ся бу́дутъ, и на всѣ́хъ стезя́хъ па́жить и́хъ. Не вза́лчутъ, ниже́ вжа́ждутъ, ниже́ порази́тъ и́хъ зно́й, ниже́ со́лнце, но Ми́луяй и́хъ утѣ́шитъ я́ и сквозѣ́ исто́чники во́дъ проведе́тъ я́. И положу́ вся́кую го́ру въ пу́ть и вся́кую стезю́ въ па́ству и́хъ. Се́ сíи издале́ча пріи́дутъ, сíи отъ сѣ́вера и мо́ря, инíи же отъ земли́ Пе́рсскія. Да веселя́тся небеса́, и ра́дуется земля́, да отры́гнутъ го́ры весе́ліе и хо́лми пра́вду, я́ко поми́лова Бо́гъ лю́ди Своя́ и смире́нныя люде́й утѣ́ши. Рече́ же Сіо́нъ: оста́ви мя́ Госпо́дь, и Бо́гъ забы́ мя. Еда́ забу́детъ жена́ отроча́ свое́? Или́ не поми́луетъ изча́дія чре́ва своего́? Аще ли же и си́хъ забу́детъ жена́, но Азъ не забу́ду тебе́, — глаго́летъ Госпо́дь.
Та́же проки́менъ, гла́съ 3: Госпо́дь просвѣще́ніе мое́ и Спаси́тель мо́й,/ кого́ убою́ся? Сти́хъ: Госпо́дь Защи́титель живота́ моего́, отъ кого́ устрашу́ся?
Бра́тіе, свобо́дь сы́й отъ всѣ́хъ, всѣ́мъ себе́ порабо́тихъ, да множа́йшія пріобря́щу. Бы́хъ іуде́емъ, я́ко іуде́й, да іуде́и пріобря́щу; подзако́ннымъ, я́ко подзако́ненъ, да подзако́нныя пріобря́щу. Беззако́ннымъ, я́ко беззако́ненъ, не сы́й беззако́нникъ Бо́гу, но зако́нникъ Христу́, да пріобря́щу беззако́нныя. Бы́хъ немощны́мъ я́ко не́мощенъ, да немощны́я пріобря́щу. Всѣ́мъ бы́хъ вся́, да вся́ко нѣ́кія спасу́. Сіе́ же творю́ за благовѣ́стіе, да соо́бщникъ ему́ бу́ду. Не вѣ́сте ли, я́ко теку́щіи въ позо́рищи вси́ у́бо теку́тъ, еди́нъ же пріе́млетъ по́честь? Та́ко тецы́те, да пости́гнете. Вся́къ же подвиза́яйся отъ всѣ́хъ воздержи́тся: и они́ у́бо да истлѣ́ненъ вѣне́цъ пріи́мутъ, мы́ же неистлѣ́ненъ. Азъ у́бо та́ко теку́, не я́ко безвѣ́стно, та́ко подвиза́юся, не я́ко возду́хъ бія́й. Но умерщвля́ю тѣ́ло мое́ и порабоща́ю, да не ка́ко ины́мъ проповѣ́дуя, са́мъ неключи́мь бу́ду.
Бра́тіе, не хощу́ ва́съ не вѣ́дѣти, я́ко отцы́ на́ши вси́ подъ о́блакомъ бы́ша и вси́ сквозѣ́ мо́ре проидо́ша. И вси́ въ Моисе́я крести́шася во о́блацѣ и въ мо́ри: И вси́ то́жде бра́шно духо́вное ядо́ша. И вси́ то́жде пи́во духо́вное пи́ша, пія́ху бо отъ духо́внаго послѣ́дующаго ка́мене, ка́мень же бѣ́ Христо́съ.
Аллилу́ія, гла́съ 6: Отры́гну се́рдце мое́ сло́во бла́го, глаго́лю а́зъ дѣла́ моя́ царе́ви. Сти́хъ: Красе́нъ добро́тою па́че сыно́въ человѣ́ческихъ.
Въ пя́тое на́десять лѣ́то влады́чества Тиве́рія ке́саря, облада́ющу Понтíйскому Пила́ту Іуде́ею, и четвертовла́ствующу Галиле́ею Ироду, Фили́ппу же, бра́ту его́ четвертовла́ствующу Тирíею и Трахони́тскою страно́ю, и Лиса́нію Авилинíею четвертовла́ствующу, при архіере́и Аннѣ и Каіа́фѣ, бы́сть глаго́лъ Бо́жій ко Іоа́нну, Заха́ріину сы́ну, въ пусты́ни. И пріи́де во всю́ страну́ Іорда́нскую, проповѣ́дая креще́ніе покая́нія во оставле́ніе грѣхо́въ. Якоже е́сть пи́сано въ кни́зѣ слове́съ Иса́іи проро́ка, глаго́люща: гла́съ вопію́щаго въ пусты́ни, угото́вайте пу́ть Госпо́день, пра́вы твори́те стези́ Его́. Вся́ка де́брь испо́лнится, и вся́ка гора́ и хо́лмъ смири́тся: и бу́дутъ стропо́тная въ пра́вая и о́стріи въ пути́ гла́дки. И у́зритъ вся́ка пло́ть спасе́ніе Бо́жіе. Глаго́лаше же исходя́щимъ наро́домъ крести́тися отъ него́: порожде́нія ехи́днова, кто́ сказа́ ва́мъ бѣжа́ти отъ гряду́щаго гнѣ́ва? Сотвори́те у́бо плоды́ досто́йны покая́нія, и не начина́йте глаго́лати въ себѣ́: отца́ и́мамы Авраа́ма. Глаго́лю бо ва́мъ, я́ко мо́жетъ Бо́гъ отъ ка́менія сего́ воздви́гнути ча́да Авраа́му. Уже́ бо и сѣки́ра при ко́рени дре́ва лежи́тъ: вся́ко у́бо дре́во, не творя́щее плода́ добра́, посѣка́ется и во о́гнь вмета́ется. И вопроша́ху его́ наро́ди, глаго́люще: что́ у́бо сотвори́мъ? Отвѣща́въ же глаго́ла и́мъ: имѣ́яй двѣ́ ри́зѣ, да пода́стъ не иму́щему, и имѣ́яй бра́шна, та́кожде да твори́тъ. Пріидо́ша же и мытари́ крести́тися отъ него́, и рѣ́ша къ нему́: учи́телю, что́ сотвори́мъ? Онъ же рече́ къ ни́мъ: ничто́же бо́ле отъ повелѣ́ннаго ва́мъ твори́те. Вопроша́ху же его́ и во́ини, глаго́люще: и мы́ что́ сотвори́мъ? И рече́ къ ни́мъ: никого́же оби́дите, ни оклеветава́йте: и дово́льни бу́дите обро́ки ва́шими. Ча́ющимъ же лю́демъ, и помышля́ющимъ всѣ́мъ въ сердца́хъ свои́хъ о Іоа́ннѣ, еда́ то́й е́сть Христо́съ, отвѣщава́ше Іоа́ннъ всѣ́мъ глаго́ля: а́зъ у́бо водо́ю креща́ю вы́; гряде́тъ же Крѣ́плій мене́, Ему́же нѣ́смь досто́инъ отрѣши́ти реме́нь сапогу́ Его́. То́й вы́ крести́тъ Ду́хомъ Святы́мъ и огне́мъ. Ему́же лопа́та въ руку́ Его́, и потреби́тъ гумно́ Свое́, и собере́тъ пщени́цу въ жи́тницу Свою́, пле́вы же сожже́тъ огне́мъ негаса́ющимъ. Мно́га же у́бо и и́на, утѣша́я благовѣствова́ше лю́демъ.
И по ря́ду Боже́ственная литургíя вели́каго Васи́лія. Вмѣ́сто Досто́йна... пое́мъ: О Тебѣ́ ра́дуется... Кинони́къ: Хвали́те Го́спода съ небе́съ...
И по заамво́ннѣй моли́твѣ а́біе исхо́димъ вси́ ко свяще́нной купѣ́ли въ притво́ръ или́ на исто́чники ца́рскими враты́. Игу́менъ или́ старѣ́йшій іере́й, нося́й на главѣ́ честны́й кре́стъ, предыду́щимъ ему́ свѣщено́сцемъ и діа́кономъ съ кади́лы. И полага́етъ честны́й кре́стъ на благоукраше́нномъ столѣ́, идѣ́же и водѣ́, угото́ваннѣй въ ча́шѣ, и свѣща́мъ о́крестъ стоя́щимъ, и даю́тся свѣщи́ бра́тіямъ, и настоя́тель кади́тъ о́крестъ стола́, та́же о́бразы, и пра́здника на анало́гіи, и свяще́нниковъ, и ли́ки по чи́ну, предходя́щу ему́ діа́кону со свѣще́ю, кли́рикомъ же пою́щимъ тропари́ сія́,
Гла́съ Госпо́день на вода́хъ вопіе́тъ, глаго́ля:/ пріиди́те, пріими́те вси́/ Ду́ха прему́дрости,/ Ду́ха ра́зума,/ Ду́ха стра́ха Бо́жія,/ я́вльшагося Христа́. Три́жды.
Дне́сь во́дъ освяща́ется естество́,/ и раздѣля́ется Іорда́нъ,/ и свои́хъ во́дъ возвраща́етъ струи́,/ Влады́ку зря́ креща́ема. Два́жды.
Яко Человѣ́къ, на рѣку́ прише́лъ еси́, Христе́ Царю́,/ и ра́бское креще́ніе прія́ти тщи́шися, Бла́же,/ отъ Предте́чеву руку́/ грѣ́хъ ра́ди на́шихъ, Человѣколю́бче. Два́жды.
Ко гла́су вопію́щаго въ пусты́ни:/ угото́вайте пу́ть Госпо́день,/ прише́лъ еси́, Го́споди, зра́къ ра́бій пріи́мъ,/ креще́нія прося́, не вѣ́дый грѣха́./ Ви́дѣша Тя́ во́ды и убоя́шася./ Тре́петенъ бы́сть Предте́ча и возопи́, глаго́ля:/ ка́ко просвѣти́тъ свѣти́льникъ Свѣ́та?/ Ка́ко ру́ку положи́тъ ра́бъ на Влады́ку?/ Освяти́ мене́ и во́ды, Спа́се, взе́мляй мíра грѣ́хъ.
Та́ко глаго́летъ Госпо́дь: да возвесели́тся пусты́ня жа́ждущая, да возра́дуется пусты́ня и процвѣте́тъ, я́ко кри́нъ, и да прозя́бнетъ, и вся́ возвеселя́тся. И возра́дуются пусты́нная Іорда́нова, и сла́ва Лива́нова дана́ бы́сть е́й и че́сть Карми́лова, и лю́діе Мои́ у́зрятъ сла́ву Госпо́дню и высоту́ Бо́жію. Укрѣпи́теся, ру́ки осла́бленныя, и, колѣ́на разсла́бленная, утѣ́шитеся, и рцы́те малоду́шнымъ мы́слію: укрѣпи́теся и не бо́йтеся, се́ Бо́гъ на́шъ су́дъ воздае́тъ, То́й пріи́детъ и спасе́тъ на́съ. Тогда́ отве́рзутся очеса́ слѣпы́хъ, и ушеса́ глухи́хъ услы́шатъ, тогда́ ско́читъ хро́мый, я́ко еле́нь, и я́сенъ бу́детъ язы́къ гугни́выхъ, я́ко прорази́ся въ пусты́ни вода́ и де́брь въ земли́ жа́ждущей. И бу́детъ безво́дная въ бла́та, и въ жа́ждущей земли́ исто́чникъ воды́ бу́детъ. Та́мо бу́детъ весе́ліе пти́цъ, водворе́ніе си́риновъ, и тро́стій, и бла́та. Та́мо бу́детъ пу́ть чи́стъ, и пу́ть свя́тъ нарече́тся И не мимои́детъ та́мо нечи́стъ, ниже́ бу́детъ та́мо пу́ть нечи́стый, разсѣ́янніи же по́йдутъ по нему́ и не заблу́дятъ. И не бу́детъ та́мо льва́, ниже́ отъ звѣре́й лю́тыхъ взы́детъ на́нь, ниже́ обря́щется та́мо, но по́йдутъ по нему́ изба́вленніи и со́бранніи отъ Го́спода, и обратя́тся, и пріи́дутъ въ Сіо́нъ съ весе́ліемъ и ра́достію, и весе́ліе вѣ́чное надъ главо́ю и́хъ. Хвала́, и ра́дованіе, и весе́ліе пости́гнетъ и́хъ, отбѣже́ болѣ́знь, печа́ль и воздыха́ніе.
Та́ко глаго́летъ Госпо́дь: жа́ждущіи, на во́ду иди́те, и, ели́цы не и́мате сребра́, ше́дше, купи́те, и яди́те и пíйте безъ сребра́ и цѣны́ вино́ и ту́къ. Вску́ю цѣните́ сребро́ не въ хлѣ́бы и тру́дъ ва́шъ не въ сы́тость? Послу́шайте Мене́ и снѣ́сте блага́я, и наслади́тся во благи́хъ душа́ ва́ша. Внима́йте уши́ма ва́шима и послѣ́дуйте путе́мъ Мои́мъ, услы́шите Мене́, и жива́ бу́детъ во благи́хъ душа́ ва́ша. И завѣща́ю вамъ завѣ́тъ вѣ́ченъ, преподо́бная Дави́дова вѣ́рная. Се свидѣ́тельство во язы́цѣхъ, да́хъ Его́ Кня́зя и Повели́теля во язы́цѣхъ. Се язы́цы, и́же не вѣ́дяху Тя́, призову́тъ Тя́, и лю́діе, и́же не позна́ша Тя́, къ Тебѣ́ прибѣ́гнутъ, ра́ди Го́спода Твоего́ и Свята́го Изра́илева, я́ко просла́вихъ Тя́. Взыщи́те Бо́га, и внегда́ ва́мъ обрѣсти́ Его́, призови́те. Егда́ же а́ще прибли́жится ва́мъ, да оста́витъ нечести́вый пути́ своя́ и му́жъ беззако́нный совѣ́ты своя́. И обрати́теся ко Го́споду Бо́гу ва́шему и поми́ловани бу́дете, я́ко помно́гу оста́витъ грѣхи́ ва́ша. Не су́ть бо совѣ́ти Мои́, я́коже совѣ́ти ва́ши, ниже́ я́коже путіе́ ва́ши, путіе́ Мои́, — глаго́летъ Госпо́дь. — Но я́коже отстои́тъ не́бо отъ земли́, та́ко отстои́тъ пу́ть Мо́й отъ путе́й ва́шихъ, и размышле́нія ва́ша отъ мы́сли Моея́. Якоже бо а́ще сни́детъ до́ждь или́ снѣ́гъ съ небесе́ и не возврати́тся отту́ду, до́ндеже упои́тъ зе́млю, и роди́тъ, и прозя́бнетъ, и да́стъ сѣ́мя сѣ́ющему и хлѣ́бъ въ снѣ́дь, та́ко бу́детъ глаго́лъ Мой, и́же а́ще изы́детъ изъ у́стъ Мои́хъ и не обрати́тся ко Мнѣ́ то́щь, до́ндеже а́ще сконча́етъ вся́, ели́ка восхотѣ́хъ, и поспѣшу́ пути́ Моя́ и повелѣ́нія Моя́. Весе́ліемъ бо изы́дете и ра́достію научи́теся, го́ры бо и хо́лми ско́чатъ, жду́ще ва́съ въ ра́дости, и вся́ древеса́ се́льная воспле́щутъ вѣ́твьми. И вмѣ́сто дра́чія взы́детъ кипари́съ, вмѣ́сто же кропи́вы взы́детъ мѵрси́на. И бу́детъ Госпо́дь во и́мя и въ зна́меніе вѣ́чное и не оскудѣ́етъ.
Та́ко глаго́летъ Госпо́дь: почерпи́те во́ду съ весе́ліемъ отъ исто́чниковъ спасе́нія. И рече́ши въ де́нь о́нъ: исповѣ́дайтеся Го́сподеви и призови́те и́мя Его́. Возвѣсти́те во язы́цехъ сла́ву Его́, помяни́те, я́ко вознесе́ся и́мя Его́. По́йте и́мя Госпо́дне, я́ко высо́кая сотвори́. Возвѣсти́те сія́ по все́й земли́, ра́дуйтеся и весели́теся, живу́щіи въ Сіо́нѣ, я́ко вознесе́ся Святы́й Изра́илевъ посредѣ́ его́.
Проки́менъ, гла́съ 3: Госпо́дь просвѣще́ніе мое́ и Спаси́тель мо́й,/ кого́ убою́ся? Сти́хъ: Госпо́дь Защи́титель живота́ моего́, отъ кого́ устрашу́ся?
Бра́тіе, не хощу́ ва́съ не вѣ́дѣти, я́ко отцы́ на́ши вси́ подъ о́блакомъ бы́ша и вси́ сквозѣ́ мо́ре проидо́ша. И вси́ въ Моисе́я крести́шася во о́блацѣ и въ мо́ри, и вси́ то́жде бра́шно духо́вное ядо́ша, и вси́ то́жде пи́во духо́вное пи́ша. Пія́ху бо отъ духо́внаго послѣ́дующаго ка́мене, ка́мень же бѣ́ Христо́съ.
Аллилу́ія, гла́съ 4: Гла́съ Госпо́день на вода́хъ. Сти́хъ: Бо́гъ сла́вы возгремѣ́, Госпо́дь на вода́хъ мно́гихъ.
Во вре́мя о́но пріи́де Іису́съ отъ Назаре́та Галиле́йскаго и крести́ся отъ Іоа́нна во Іорда́нѣ. И а́біе восходя́ отъ воды́, ви́дѣ разводя́щася небеса́ и Ду́хъ, я́ко го́лубь, сходя́щь На́нь. И гла́съ бы́сть съ небесе́: Ты́ еси́ Сы́нъ Мо́й возлю́бленный, о Не́мже благоволи́хъ.
Ми́ромъ Го́споду помо́лимся.
О свы́шнѣмъ ми́рѣ, и спасе́ніи ду́шъ на́шихъ, Го́споду помо́лимся.
О ми́рѣ всего́ мíра, благостоя́ніи святы́хъ Бо́жіихъ церкве́й, и соедине́ніи всѣ́хъ, Го́споду помо́лимся.
О святѣ́мъ хра́мѣ се́мъ, и съ вѣ́рою, благоговѣ́ніемъ и стра́хомъ Бо́жіимъ входя́щихъ въ о́нь, Го́споду помо́лимся.
О Святѣ́йшемъ Прави́тельствующемъ Сѵно́дѣ, (и о митрополи́тѣ на́шемъ имяре́къ, его́же о́бласть), честнѣ́мъ пресви́терствѣ, во Христѣ́ діа́конствѣ, о все́мъ при́чтѣ и лю́дѣхъ, Го́споду помо́лимся.
О Благочести́вѣйшемъ, Самодержа́внѣйшемъ, Вели́комъ Госуда́рѣ на́шемъ Импера́торѣ имяре́къ всея́ Россíи; о Супру́гѣ Его́, Благочести́вѣйшей Госуда́рынѣ Императри́цѣ имяре́къ; о Ма́тери Его́, Благочести́вѣйшей Госуда́рынѣ Императри́цѣ имяре́къ, Го́споду помо́лимся.
О Наслѣ́дникѣ Его́, Благовѣ́рномъ Госуда́рѣ, Цесаре́вичѣ и Вели́комъ Кня́зѣ имяре́къ, и о все́мъ Ца́рствующемъ До́мѣ, о все́й пала́тѣ, и во́инствѣ Ихъ, Го́споду помо́лимся.
О пособи́ти и покори́ти подъ но́зѣ Ихъ вся́каго врага́ и супоста́та, Го́споду помо́лимся.
О гра́дѣ се́мъ, (аще въ монастырѣ́: О святѣ́й оби́тели се́й,) вся́комъ гра́дѣ и странѣ́, и вѣ́рою живу́щихъ въ ни́хъ, Го́споду помо́лимся.
О благорастворе́ніи возду́ховъ, о изоби́ліи плодо́въ земны́хъ, и вре́менѣхъ ми́рныхъ, Го́споду помо́лимся.
О пла́вающихъ, путеше́ствующихъ, неду́гующихъ, стра́ждущихъ, плѣне́нныхъ, и о спасе́ніи и́хъ, Го́споду помо́лимся.
О е́же освяти́тися вода́мъ си́мъ си́лою, и дѣ́йствіемъ, и наи́тіемъ Свята́го Ду́ха, Го́споду помо́лимся.
О е́же снизходи́ти на во́ды сія́ очисти́тельному Пресу́щныя Тро́ицы дѣ́йству, Го́споду помо́лимся.
О е́же дарова́тися и́мъ благода́ти избавле́нія, благослове́нію Іорда́нову си́лою, и дѣ́йствомъ, и наи́тіемъ Свята́го Ду́ха, Го́споду помо́лимся.
О е́же сокруши́тися сатанѣ́ подъ нога́ма на́шима вско́рѣ и разори́тися вся́кому совѣ́ту лука́вому, дви́жимому на ны́, Го́споду помо́лимся.
Яко да Госпо́дь Бо́гъ и́зметъ на́съ отъ вся́каго навѣ́та и искуше́нія сопроти́вника и досто́йны содѣ́лаетъ обѣща́нныхъ бла́гъ, Го́споду помо́лимся.
О е́же просвѣти́тися на́мъ просвѣще́ніемъ ра́зума и благоче́стія, наи́тіемъ Свята́го Ду́ха, Го́споду помо́лимся.
О е́же низпосла́ти Го́споду Бо́гу благослове́ніе Іорда́ново и освяти́ти во́ды сія́, Го́споду помо́лимся.
О е́же бы́ти водѣ́ се́й освяще́нія да́ру, грѣхо́въ избавле́нію, во исцѣле́ніе души́ и тѣ́ла и на вся́кую по́льзу изря́дную, Го́споду помо́лимся.
О е́же бы́ти водѣ́ се́й приводя́щей въ жи́знь вѣ́чную, Го́споду помо́лимся.
О е́же яви́тися се́й отгна́нію вся́каго навѣ́та ви́димыхъ и неви́димыхъ вра́гъ, Го́споду помо́лимся.
О че́рплющихъ и е́млющихъ во освяще́ніе домо́въ, Го́споду помо́лимся.
О е́же бы́ти се́й во очище́ніе ду́шъ и тѣле́съ всѣ́мъ, вѣ́рою и че́рплющимъ же и причаща́ющимся отъ нея́, Го́споду помо́лимся.
О е́же сподо́битися на́мъ испо́лнитися освяще́нія во́дъ си́хъ прича́щеніемъ, неви́димымъ явле́ніемъ Свята́го Ду́ха, Го́споду помо́лимся.
О е́же услы́шати Го́споду Бо́гу гла́съ моле́нія на́съ, грѣ́шныхъ, и поми́ловати на́съ, Го́споду помо́лимся.
О изба́витися на́мъ отъ вся́кія ско́рби, гнѣ́ва и ну́жды, Го́споду помо́лимся.
Заступи́, спаси́, поми́луй и сохрани́ на́съ, Бо́же, Твое́ю благода́тію.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Приснодѣ́ву Марíю, со всѣ́ми святы́ми помяну́вше, са́ми себе́ и другъ дру́га, и ве́сь живо́тъ на́шъ Христу́ Бо́гу предади́мъ.
Го́споди Іису́се Христе́, Единоро́дный Сы́не, сы́й въ нѣ́дрѣ Отчи, и́стинный Бо́же, Исто́чниче жи́зни и безсме́ртія, Свѣ́те отъ Свѣ́та, прише́дый въ міръ, е́же просвѣти́ти его́, озари́ на́шу мысль Святы́мъ Твои́мъ Ду́хомъ и пріими́ на́съ, вели́чество и благодаре́ніе Тебѣ́ принося́щихъ о я́же отъ вѣ́ка ди́вныхъ Твои́хъ великодѣ́йствіихъ и е́же въ послѣ́днія вѣ́ки спаси́тельномъ Твое́мъ смотре́ніи, въ не́мже въ на́ше немощно́е и ни́щее одѣ́явся смѣше́ніе и рабо́тнымъ мѣ́рамъ снизше́дый, Иже всѣ́хъ Царю́, еще́ и ра́бскою руко́ю во Іорда́нѣ крести́тися претерпѣ́лъ еси́, да, водно́е естество́ освяти́въ, Безгрѣ́шне, путесотвори́ши на́мъ е́же водо́ю и Ду́хомъ па́ки рожде́ніе и къ пе́рвому на́съ устро́иши свобожде́нію. Его́же Боже́ственнаго та́инства воспомина́ніе пра́зднующе, мо́лимся Тебѣ́, Влады́ко Человѣколю́бче, воскропи́ и на ны́, недосто́йныя рабы́ Твоя́, по Боже́ственному Твоему́ обѣща́нію во́ду чи́сту, Твоего́ благоутро́бія да́ръ, во е́же надъ водо́ю се́ю проше́нію на́съ, грѣ́шныхъ, благопрія́тну бы́ти Твое́ю бла́гостію и благослове́нію Твоему́ е́ю, на́мъ же и всѣ́мъ вѣ́рнымъ лю́демъ Твои́мъ дарова́тися въ сла́ву Свята́го и покланя́емаго Твоего́ и́мене. Яко подоба́етъ Тебѣ́ вся́кая сла́ва, че́сть и поклоне́ніе со Безнача́льнымъ Твои́мъ Отце́мъ и Пресвяты́мъ, и Благи́мъ, и Животворя́щимъ Твои́мъ Ду́хомъ, ны́нѣ, и при́сно, и во вѣ́ки вѣко́въ. И ре́къ въ себѣ́: Ами́нь.
Ве́лій еси́, Го́споди, и чу́дна дѣла́ Твоя́, и ни еди́но же сло́во дово́льно бу́детъ къ пѣ́нію чуде́съ Твои́хъ. Три́жды.
Ты́ бо, хотѣ́ніемъ отъ не су́щихъ во е́же бы́ти приведы́й вся́ческая, и Твое́ю держа́вою содержи́ши тва́рь, и Твои́мъ про́мысломъ стро́иши мíръ. Ты́, отъ четы́рехъ стихíй тва́рь сочини́вый, четы́рми времены́ кру́гъ лѣ́та вѣнча́лъ еси́. Тебе́ трепе́щутъ у́мныя вся́ си́лы, Тебе́ пое́тъ со́лнце, Тебе́ сла́витъ луна́, Тебѣ́ прису́тствуютъ звѣ́зды, Тебе́ слу́шаетъ свѣ́тъ, Тебе́ трепе́щутъ бе́здны, Тебѣ́ рабо́таютъ исто́чницы. Ты́ просте́рлъ еси́ не́бо, я́ко ко́жу, Ты́ утверди́лъ еси́ зе́млю на вода́хъ, Ты́ огради́лъ еси́ мо́ре песко́мъ, Ты́ ко отдыха́ніемъ возду́хъ пролія́лъ еси́. Ангельскія си́лы Тебѣ́ слу́жатъ, арха́нгельстіи ли́цы Тебѣ́ кла́няются, многоочи́тіи херуви́ми и шестокрила́тіи серафи́ми, о́крестъ стоя́ще и облета́юще, стра́хомъ непристу́пныя сла́вы Твоея́ покрыва́ются. Ты́ бо, Бо́гъ Сы́й Неопи́санный, Безнача́льный же и Неизглаго́ланный, прише́лъ еси́ на зе́млю, зра́къ раба́ пріи́мъ, въ подо́біи человѣ́честемъ бы́въ, не бо терпѣ́лъ еси́, Влады́ко, милосе́рдія ра́ди ми́лости Твоея́, зрѣ́ти отъ діа́вола му́чима ро́да человѣ́ча, но прише́лъ еси́ и спа́слъ еси́ на́съ. Исповѣ́дуемъ благода́ть, проповѣ́дуемъ ми́лость, не таи́мъ благодѣя́нія: естества́ на́шего ро́ды свободи́лъ еси́, дѣ́вственную освяти́лъ еси́ утро́бу рождество́мъ Твои́мъ. Вся́ тва́рь воспѣва́етъ Тя́, я́вльшагося: Ты́ бо, Бо́гъ на́шъ, на земли́ яви́лся еси́ и съ человѣ́ки пожи́лъ еси́, Ты́ Іорда́нскія струи́ освяти́лъ еси́, съ небесе́ низпосла́вый Свята́го Твоего́ Ду́ха, и главы́ та́мо гнѣздя́щихся сокруши́лъ еси́ зміе́въ.
Ты́ у́бо, Человеколю́бче Царю́, пріиди́ и ны́нѣ наи́тіемъ Свята́го Твоего́ Ду́ха и освяти́ во́ду сію́. Сіе́ глаго́ли три́жды.
И да́ждь е́й благода́ть избавле́нія, благослове́ніе Іорда́ново, сотвори́ ю́ нетлѣ́нія исто́чникъ, освяще́нія да́ръ, грѣхо́въ разрѣше́ніе, неду́говъ исцѣле́ніе, де́моновъ всегуби́тельство, сопроти́внымъ си́ламъ непристу́пную, а́нгельскія крѣ́пости испо́лненную, да вси́, почерпа́ющіи и причаща́ющіися, имѣ́ютъ ю́ ко очище́нію ду́шъ и тѣле́съ, ко исцѣле́нію страсте́й, ко освяще́нію домо́въ и ко вся́кой по́льзѣ изря́дну. Ты́ бо еси́ Бо́гъ на́шъ, Иже водо́ю и Ду́хомъ обнови́вый обетша́вшее грѣхо́мъ естество́ на́ше. Ты́ еси́ Богъ на́шъ, водо́ю потопи́вый при Но́и грѣ́хъ. Ты́ еси́ Бо́гъ на́шъ, Иже мо́ремъ свободи́вый отъ рабо́ты фара́они Моисе́омъ ро́дъ евре́йскій. Ты́ бо еси́ Бо́гъ на́шъ, разрази́вый ка́мень въ пусты́ни, и потеко́ша во́ды, и пото́цы наводни́шася, и жа́ждущія лю́ди Твоя́ насы́тивый. Ты́ еси́ Бо́гъ на́шъ, Иже водо́ю и огне́мъ премѣни́вый Иліе́ю Изра́иля отъ пре́лести Ваа́ловы.
Са́мъ и ны́нѣ, Влады́ко, освяти́ во́ду сію́ Ду́хомъ Твои́мъ Святы́мъ. Три́жды.
Да́ждь же всѣ́мъ, прикаса́ющимся е́й, и причаща́ющимся, и ма́жущимся е́ю, освяще́ніе, здра́віе, очище́ніе и благослове́ніе.
И спаси́, Го́споди, Раба́ Твоего́ Благочести́вѣйшаго, Самодержа́внѣйшаго, Вели́каго Госуда́ря на́шего Импера́тора имяре́къ всея́ Россíи. Три́жды.
И Супру́гу Его́, Благочести́вѣйшую Госуда́рыню Императри́цу имяре́къ; Ма́терь Его́, Благочести́вѣйшую Госуда́рыню Императри́цу имяре́къ; Наслѣ́дника Его́, Благовѣ́рнаго Госуда́ря, Цесаре́вича и Вели́каго Кня́зя имяре́къ и ве́сь Ца́рствующій До́мъ.
Спаси́, Го́споди, и поми́луй Святѣ́йшій Прави́тельствующій Всероссíйскій Сѵно́дъ, и сохрани́ и́хъ подъ кро́вомъ Твои́мъ въ ми́рѣ, покори́ и́мъ вся́каго врага́ и супоста́та, да́руй и́мъ вся́, я́же ко спасе́нію проше́нія, и жи́знь вѣ́чную, да и стихíями, и человѣ́ки, и а́нгелы, и ви́димыми, и неви́димыми сла́вится Твое́ пресвятое́ и́мя, со Отце́мъ и Святы́мъ Ду́хомъ, ны́нѣ, и при́сно, и во вѣ́ки вѣко́въ, ами́нь.
Приклони́, Го́споди, у́хо Твое́ и услы́ши ны́, Иже во Іорда́нѣ крести́тися изво́ливый и освяти́вый во́ды, благослови́ всѣ́хъ на́съ, и́же приклоне́ніемъ своея́ вы́и назна́менующихъ рабо́тное воображе́ніе, и сподо́би на́съ испо́лнитися освяще́нія Твоего́ причаще́ніемъ воды́ сея́, и да бу́детъ на́мъ, Го́споди, во здра́віе души́ и тѣ́ла.
Возглаше́ніе: Ты́ бо еси́ освяще́ніе на́ше, и Тебѣ́ сла́ву, и благодаре́ніе, и поклоне́ніе возсыла́емъ со Безнача́льнымъ Твои́мъ Отце́мъ, и Пресвяты́мъ, и Благи́мъ, и Животворя́щимъ Твои́мъ Ду́хомъ, ны́нѣ, и при́сно, и во вѣ́ки вѣко́въ. Ами́нь.
И а́біе, благословля́я во́ду крестови́дно честны́мъ кресто́мъ, погружа́етъ его́ пра́во, низводя́ въ во́ду и возводя́, держа́ его́ обѣ́ма рука́ма, поя́ настоя́щій тропа́рь, во гла́съ пе́рвый:
Во Іорда́нѣ креща́ющуся Тебѣ́, Го́споди,/ Тро́ическое яви́ся поклоне́ніе:/ Роди́телевъ бо гла́съ свидѣ́тельствоваше Тебѣ́,/ возлю́бленнаго Тя́ Сы́на имѣну́я,/ и Ду́хъ въ ви́дѣ голуби́нѣ/ извѣ́ствоваше словесе́ утвержде́ніе./ Явле́йся Христе́ Бо́же/ и мíръ просвѣще́й, сла́ва Тебѣ́.
И въ другíй та́кожде кресто́мъ зна́менуетъ во́ду, и въ тре́тій та́кожде, то́йже тропа́рь поя́, са́мъ настоя́тель, спою́щимъ ему́ и про́чимъ свяще́нникомъ; та́же пою́тъ и ли́ки то́йже тропа́рь. Настоя́тель же, взе́мъ свяще́нную во́ду на блю́до и обратя́ся на за́падъ лице́мъ, въ лѣ́вой руцѣ́ держа́ честны́й кре́стъ, а въ пра́вой васильки́, кропи́тъ крестообра́зно на вся́ страны́. И прихо́дятъ пре́жде къ настоя́телю свяще́нницы, два́ два́, и цѣлу́ютъ честны́й кре́стъ, и зна́менуетъ и́хъ василько́мъ по лицу́ со свяще́нною водо́ю крестообра́зно; по тому́же чи́ну и вся́ бра́тія. Пое́тся же тогда́ тропа́рь отъ всѣ́хъ, мно́гажды, до́ндеже освятя́тся вся́ бра́тія водны́мъ кропле́ніемъ и причаще́ніемъ. И а́біе вхо́димъ во хра́мъ, и пое́мъ стихи́ру.
Воспои́мъ, вѣ́рніи,/ е́же о на́съ Бо́жія благодѣя́нія вели́чество:/ о на́шемъ бо прегрѣше́ніи бы́въ Человѣ́къ,/ на́шимъ очище́ніемъ очища́ется во Іорда́нѣ,/ Еди́нъ Чи́стый и Нетлѣ́нный,/ освяща́яй мене́ и во́ды/ и главы́ зміе́въ сокруша́яй въ водѣ́/ Почерпе́мъ у́бо во́ду съ весе́ліемъ, бра́тіе:/ благода́ть бо Ду́ха вѣ́рно почерпа́ющимъ/ неви́димо подава́ется отъ Христа́ Бо́га/ и Спа́са ду́шъ на́шихъ.
Та́же: Бу́ди и́мя Госпо́дне благослове́но отъ ны́нѣ и до вѣ́ка Три́жды.. И псало́мъ 33-й: Благословлю́ Го́спода на вся́кое вре́мя... И дае́тся анти́доръ отъ іере́я, и отпу́стъ.
По отпу́стѣ или́ е́сть литургíя, или́ нѣ́сть, поставля́ется свѣ́щникъ среди́ це́ркве. Кли́рицы же, ста́вше о́ба ли́ка вку́пѣ, пою́тъ тропа́рь пра́здника. Сла́ва, и ны́нѣ, конда́къ. По сконча́ніи же кондака́ многолѣ́тствуютъ Импера́тора, и Сѵно́дъ, и архіере́я, и настоя́теля.
И вхо́димъ въ трапе́зу, и яди́мъ съ древянома́сліемъ, испива́емъ же и вина́. Сы́ра же, и подо́бныхъ ему́, и ры́бъ ника́коже де́рзнемъ я́сти: возбране́но бо е́сть боже́ственными пра́вилы.
Си́це быва́етъ слу́жба, по́стному дню́ су́щу, въ на́вечеріи Просвѣще́нія.
Яко нѣ́цыи, су́ть отлуча́юще себе́ отъ святы́я воды́ вкуше́нія ра́ди, не до́брѣ творя́тъ, и́бо благода́ти ра́ди Бо́жія дана́ бы́сть на освяще́ніе мíру и все́й тва́ри. Тѣ́мже во вся́кихъ мѣ́стѣхъ, и ска́редныхъ, и всю́ду кропи́тся, я́же и подъ нога́ми на́шими су́ть. И гдѣ́ си́хъ ра́зумъ, е́же не пи́ти сея́? Но да вѣ́си, я́ко не вкуше́нія ра́ди я́стія нечистота́ въ на́съ е́сть, но отъ скве́рныхъ дѣ́лъ на́шихъ: очище́ни же отъ си́хъ, піе́мъ безъ сомнѣ́нія сію́ святу́ю во́ду.
О се́й водѣ́, небе́сная о́на слове́сная ла́стовица, зла́тослове́сный вселе́нскій учи́тель Іоа́ннъ, Константиногра́да Патріа́рхъ, въ сло́вѣ свое́мъ, о е́же сходи́тися христіа́номъ во святу́ю Бо́жію це́рковь и о Креще́ніи, его́же нача́ло: Вси́ вы́ въ благоду́шіи есте́ дне́сь, а́зъ же въ печа́ли еди́нъ болѣ́зную.., свидѣ́тельствуетъ, глаго́ля: Но у́бо чесо́ ра́ди не де́нь, въ о́ньже роди́ся, но де́нь, въ о́ньже крести́ся, явле́ніе глаго́лется? Сíй бо е́сть де́нь, въ о́ньже крести́ся и во́дъ освяти́ естество́.
Сего́ ра́ди и въ полу́нощи на пра́здникъ се́й вси́, поче́рпше, въ домы́ во́ду отно́сятъ, и соблюда́ютъ, и чрезъ лѣ́то всецѣ́лое храня́тъ, поне́же де́нь освяще́нныхъ во́дъ. И зна́меніе быва́етъ я́вственное: не растлѣва́ющуся водъ о́ныхъ естеству́ до́лгото́ю вре́мене, но на лѣ́то всецѣ́лое, и два́, и три́ мно́гащи лѣ́та, дне́сь почерпне́нной водѣ́ цѣ́лой и но́вой пребыва́ющей и по толи́цѣмъ вре́мени ны́нѣ отъ исто́чниковъ е́млемымъ вода́мъ сравня́ющейся.
Яко а́ще случи́тся на́вечеріе свята́го Богоявле́нія въ суббо́ту и́ли недѣ́лю, по́стъ не быва́етъ. Литургíя же быва́етъ Златоу́стаго, во свое́ вре́мя, по обы́чаю, я́коже и всегда́.
И по отпуще́ніи литургíи въ трапе́зу не хо́димъ, но въ притво́рѣ церко́внѣмъ сѣ́дшимъ на́мъ, тра́пезарь дае́тъ по уло́мку хлѣ́ба коему́ждо или́ по ма́лу хлѣ́бцу пшени́чному, и ма́ло смо́квій и фи́никовъ, и по еди́ной ча́шѣ вина́, я́ко да нарече́тся по́стъ; ожида́емъ же вече́рняго собо́раПо се́мъ, отше́дше въ ке́лліи своя́, безмо́лвствуемъ до вре́мене вече́рняго.
Вели́каго же Васи́лія литургíя соверша́ется въ са́мый пра́здникъ; вмѣ́сто же Досто́йно.., пое́мъ ирмо́съ 9-я пѣ́сни пра́здника.
При ча́сѣ же вече́рнемъ дне́, зна́менуетъ въ вели́кое и пото́мъ во вся́ тя́жкая. И, собра́вшимся на́мъ во хра́мъ и благослови́вшу іере́ю, пое́мъ вече́рню, по обы́чаю. Псало́мъ: Благослови́, душе́ моя́, Го́спода... Аще въ суббо́ту ве́чера, пое́мъ Блаже́нъ му́жъ... каѳи́сму всю́. Аще же въ недѣ́лю ве́чера, пое́мъ 1-й антифо́нъ. На Го́споди воззва́хъ.., пое́мъ стихи́ры пра́здника, на 8, гла́съ 2: Просвѣти́теля на́шего... Сла́ва, и ны́нѣ, гла́съ то́йже: Приклони́лъ еси́ главу́ Предте́чи... Та́же, вхо́дъ со Ева́нгеліемъ. Свѣ́те Ти́хій... Проки́менъ дне́ и чте́нія по чи́ну и́хъ, съ тропари́ и со стихи́ и́хъ. Трисвято́е же не пое́мъ, зане́же не соверша́ется Боже́ственная литургíя. По чте́ніи же паремíй, ектенія́ ма́лая и по возгла́сѣ проки́менъ, Апо́столъ и Ева́нгеліе, я́ко предписа́ся. Ектенія́: Рце́мъ вси́... и Сподо́би, Го́споди... и Испо́лнимъ вече́рнюю моли́тву... Іере́й возгла́съ. И исхо́димъ ко крести́льницѣ, идѣ́же угото́ванъ сто́лъ, и дѣ́йствуетъ настоя́тель или́ іере́й по чи́ну, я́коже указа́ся пре́жде, по́юще тропари́: Гла́съ Госпо́день на вода́хъ... И про́чее быва́етъ возслѣ́дованіе освяще́нія воды́ неизмѣ́нно. По кропле́ніи же освяще́нныя воды́ вхо́димъ во хра́мъ и пое́мъ стихи́ру: Сла́ва, и ны́нѣ, гла́съ 6: Воспои́мъ, вѣ́рніи... И отпу́стъ. Пото́мъ тропа́рь пра́здника. Сла́ва, и ны́нѣ, конда́къ: Яви́лся еси́ дне́сь... И, пи́вше свяще́нную во́ду, вхо́димъ въ трапе́зу, и яди́мъ соверше́нно съ древянома́сліемъ, и піе́мъ вино́.
Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 74 – 85 об.