Минеи Богослужебные.
Богослужебные тексты Русскаго разсѣянія.
ПА́МЯТЬ И́ЖЕ ВО СВЯТЫ́ХЪ ОТЦА́ НА́ШЕГО АВГУСТИ́НА, ЕПИ́СКОПА ИППОНІ́ЙСКАГО.
(Твореніе архим. Амвросія (Погодина). Одобрена РПЦЗ 15 мая 1955 г.)
НА ВЕЛИЦѢЙ ВЕЧЕРНИ.
По предначина́тельномъ псалмѣ́, пое́мъ Блаже́нъ му́жъ.., 1-й антифо́нъ. На Го́споди воззва́хъ.., стихи́ры на 8, гла́съ 8. Подо́бенъ: О, пресла́внаго чудесе́.
Отче святи́телю Августи́не, по и́мени твоему́ бы́сть житіе́ твое́: вели́чіе Бо́жіе проповѣ́далъ еси́, вели́чіемъ дѣ́лъ украси́лся еси́, вели́чіемъ по́двига вѣнча́лся еси́, вели́чіемъ любве́, я́же ко Христу́, просвѣти́лся еси́. Тѣ́мже и на́мъ, чту́щимъ тя́, моли́ дарова́ти ве́лія ми́лости. Два́жды.
Отче святи́телю Августи́не, а́ще и молчи́тъ Иппонíйская страна́, но мы́ тя́ прославля́емъ, я́ко ересе́й потреби́теля, я́ко вѣ́ры правосла́вныя утвержде́ніе, я́ко мона́шествующихъ вели́кую похвалу́, я́ко святи́телей украше́ніе, я́ко нищелю́бія люби́теля, я́ко Писа́ній изъясни́теля, я́ко моле́бника те́пла за ны́. Моли́ся дарова́ти на́мъ ве́лія ми́лости.
Боже́ственными глаго́лы Амвро́сія ороси́вся, прозя́блъ еси́ стори́чествующій кла́съ добродѣ́телей, и бы́лъ еси́ красота́ церко́вная, свѣти́льникъ горя́щій, пла́мя, опаля́ющее ересе́й и сердца́ вѣ́рныхъ согрѣва́ющее, Иппонíйскаго гра́да предсѣда́тель, о́тче святи́телю блаже́нне, и ны́нѣ на́мъ, чту́щимъ тя́, испроси́ отъ Христа́ ве́лію ми́лость.
Кíими похва́льными вѣнцы́ увязе́мъ святи́теля? Ангела земна́го и небе́снаго человѣ́ка, Це́ркве Христо́вы іера́рха велича́йшаго, Иппонíйскаго предсѣда́теля и вселе́нныя украше́ніе, любве́ Христо́вы испо́лненна и му́дрости высо́кія, догма́товъ изъясни́теля, вѣ́ры утвержде́ніе, мона́шествующихъ наста́вника неле́стна, его́же вѣнча́ Христо́съ Бо́гъ на́шъ, имѣ́яй ве́лію ми́лость. Два́жды.
Кíими честны́ми вѣнцы́ ублажи́мъ наста́вника на́шего? Его́же вѣща́ніе про́йде во всю́ вселе́нную, его́же боговѣща́нная уста́ испо́лнишася Ду́ха и не покры́ я́ хода́тай забве́нія гро́бъ, но и ны́нѣ глаго́лютъ медото́чная уче́нія и, я́же къ жи́зни, пу́ть указу́юща. Его́же вѣнча́ Христо́съ Бо́гъ на́шъ, имѣ́яй ве́лію ми́лость.
Кíими украше́нными вѣнцы́ вѣнча́имъ іера́рха Амвро́сія честну́ю похвалу́? Вселе́нныя свѣти́льника изя́щна, па́стыря преди́вна Це́ркве, скорбя́щихъ утѣ́шителя те́пла, коле́блющихся утвержде́ніе незы́блемое, Пела́гія противоста́теля тве́рда и ересе́й коне́чное искорене́ніе, чистоты́ церко́вныя рачи́теля бди́тельна, его́же вѣнча́ Христо́съ Бо́гъ на́шъ, имѣ́яй ве́лію ми́лость.
Пріиди́те, мона́шествующихъ мно́жества, ублажи́мъ наста́вника на́шего и почти́мъ святу́ю его́ па́мять, мо́лится бо при́сно о на́съ, соверша́ющихъ всечестну́ю па́мять его́ и любо́вію вопію́щихъ ему́: моли́ о на́съ всеще́драго Бо́га, Ему́же всегда́ рабо́талъ еси́, Его́же ни́ву воздѣ́лалъ еси́, Его́же о́вцы упа́слъ еси́, Его́же тала́нтъ умно́жилъ еси́, Ему́же за ны́ при́сно моли́ся, святи́телю Августи́не, поми́ловатися душа́мъ на́шимъ.
Кто́ Тебе́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.
Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Яко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.
Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.
Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.
Иже яви́выйся въ вертогра́дѣ Марíи и отгна́вый отъ нея́ рыда́ніе сле́зъ, и тебѣ́ явля́ется въ вертогра́дѣ и повелѣва́етъ отве́рсти Писа́нія и чести́. И проче́тъ, чу́дный пу́ть жи́зни показа́лъ еси́, его́же и на́мъ слѣ́довати помоли́ся Христу́, да и мы́ упра́влени бу́демъ въ Ца́рство небе́сное.
Сти́хъ: Свяще́нницы Твои́ облеку́тся въ пра́вду и преподо́бніи Твои́ возра́дуются.
Ма́ти у́бо твоя́ зѣло́ пла́каше, егда́ ви́дѣ тя́ погиба́юща, и прилѣ́жно моля́шеся во е́же спасти́ся тебѣ́, и не можа́ше пло́дъ таковы́хъ моли́твъ поги́бнути. Тѣ́мже словесы́ Боже́ственными огласи́вся, отъ пути́ широ́каго коне́чнѣ устрани́лся еси́ и, путе́мъ мона́шескимъ ше́ствуя, святи́телей ве́рхъ показа́лся еси́, и уче́ній Боже́ственныхъ сокро́вище, и цѣвни́ца духо́вная, таи́нникъ догма́товъ и Це́ркве Христо́вы похвала́.
Сти́хъ: Восхва́лятся преподо́бніи во сла́вѣ и возра́дуются на ло́жахъ свои́хъ.
Сокро́вище собира́я духо́вное, мірско́е тре́бующимъ расточи́лъ еси́, и облобыза́въ ра́бство свобо́дное, и́ноческій чи́нъ воспрія́лъ еси́, и бы́лъ еси́ святи́телей о́бразъ, и мона́шествующихъ пра́вило, и добродѣ́телей мѣ́ра, и ча́до, любве́ испо́лнено, и кро́тости учи́тель и́стиннѣйшій, Августи́не о́тче блаже́нне, моли́ о душа́хъ на́шихъ.
Ѳага́стъ твои́мъ рожде́ніемъ хва́лится, но и Мада́връ и Карѳаге́нъ тобо́ю велича́ются, Ри́мъ же тобо́ю весели́тся, но па́че тобо́ю Медіола́нъ хва́лится, я́ко въ не́мъ духо́внѣ роди́лся еси́, велича́йшая же епа́рхія Иппонíйская и́мать тя́ предсѣда́теля и па́стыря до́бра, вселе́нная же вся́ почита́етъ тя́ учи́теля че́стна, и вожда́ крѣ́пка, и моли́твенника те́пла о душа́хъ на́шихъ.
Хра́мъ и две́рь еси́, пала́та и престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й Пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ.
Дне́сь вселе́нная ра́дуется, па́мять твою́ пра́зднующи, и въ не́й восхваля́етъ по́двиги твоя́, и́миже труди́лся еси́, возвѣща́ютъ же любо́вь твою́ ко Христу́ дѣя́нія твоя́: е́реси бо попра́лъ еси́, и Манихе́еву ле́сть обличи́лъ еси́, и бы́лъ еси́ свѣти́льникъ Це́ркве, святи́телю о́тче Августи́не, моли́ Христа́ Бо́га спасти́ся душа́мъ на́шимъ.
НА УТРЕНИ.
На Бо́гъ Госпо́дь.., тропа́рь святи́теля, гла́съ 4: Дне́сь вселе́нная ра́дуется.., два́жды. Сла́ва, и ны́нѣ, богоро́диченъ, гла́съ то́йже:
Еже отъ вѣ́ка утае́ное, и а́нгеломъ несвѣ́домое та́инство, Тобо́ю, Богоро́дице, су́щимъ на земли́ яви́ся Бо́гъ, въ несли́тномъ соедине́ніи воплоща́емь, и Кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.
Собери́теся, мона́ховъ мно́жества, въ па́мять святи́теля на́шего и почти́мъ его́ пѣ́сньми честны́ми, но па́че просла́вимъ его́ житіе́мъ на́шимъ, и́щетъ бо спасе́нія ча́дъ свои́хъ, моле́бникъ те́плый явля́яся о чту́щихъ па́мять его́. Никто́же бо да отпаде́тъ отъ ли́ка блаже́ннаго, никто́же да преда́стся пути́ па́губному, никто́же да небреже́тъ спасе́нія своего́, вси́ бо есмы́ ча́да святи́теля блаже́ннаго. Два́жды.
Ка́ко досто́йно воспою́ Тя́, ка́ко просла́влю Тя́, Влады́чице на́ша? недоумѣ́юся и ужаса́юся! Страшу́ся дерзнове́нія, но бою́ся и молча́нія, оба́че пріими́ обы́чнымъ милосе́рдіемъ Твои́мъ похвалу́ на́шу и низпосли́ бога́тую ми́лость пѣвце́мъ твои́мъ.
Вѣтíю духо́внаго, Правосла́вія наста́вника, святи́теля Августи́на вси́ восхва́лимъ, то́й бо е́реси порази́ и ста́до Христо́во до́брѣ упасе́, то́й бо и лю́ди безчи́сленны приведе́ во оби́тели небе́сныя, то́й бо и ны́нѣ то́читъ исцѣле́нія вѣ́рою соверша́ющимъ па́мять его́. Два́жды.
Гавріи́лъ у́бо арха́нгелъ принесе́ Ти́: ра́дуйся! Мы́ же, земнíи, что́ Ти́ принесе́мъ, пѣ́снь духо́вную ка́ко воспои́мъ, ка́ко просла́вимъ, ко́е благодаре́ніе принесе́мъ? Оба́че по глаго́лу Твоему́ ублажа́юще, вопіе́мъ Ти́: ра́дуйся, Благода́тная, Госпо́дь с Тобо́ю.
Велича́емъ тя́, святи́телю о́тче Августи́не, и чте́мъ святу́ю па́мять твою́, ты́ бо мо́лиши за на́съ Христа́, Бо́га на́шего.
Услы́шите сія́, вси́ язы́цы, внуши́те, вси́, живу́щіи по вселе́ннѣй. 2-й ли́къ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ. 1-й: Пріиди́те ча́да, послу́шайте мене́, стра́ху Госпо́дню научу́ ва́съ. 2-й: Благовѣсти́хъ пра́вду въ це́ркви вели́цѣй. 1-й: Истину Твою́ и спасе́ніе Твое́ рѣ́хъ. 2-й: Повѣ́мъ и́мя Твое́ бра́тіи мое́й, посредѣ́ це́ркве воспою́ Тя́. 1-й: Услы́шати ми́ гла́съ хвалы́ Твоея́ и повѣ́дати вся́ чудеса́ Твоя́. 2-й: Го́споди, возлюби́хъ благолѣ́піе до́му Твоего́ и мѣ́сто селе́нія сла́вы Твоея́. 1-й: Возненави́дѣхъ це́рковь лука́внующихъ и съ нечести́выми не ся́ду. 2-й: Яко сохрани́хъ пути́ Госпо́дни и не нече́ствовахъ отъ Бо́га моего́. 1-й: Уста́ пра́веднаго поуча́тся прему́дрости, и язы́къ его́ возглаго́летъ су́дъ. 2-й: Пра́вда Его́ пребыва́етъ въ вѣ́къ вѣ́ка. 1-й: Свяще́нницы Твои́ облеку́тся пра́вдою, и преподо́бніи Твои́ возра́дуются. 2-й: Блаже́ни, живу́щіи въ дому́ Твое́мъ, въ вѣ́ки вѣко́въ восхва́лятъ Тя́.
Красоту́ небе́сную зря́ще и земну́ю добро́ту созерца́я, прилѣпи́лся еси́ всѣ́мъ се́рдцемъ къ Творцу́ вся́ческихъ и вся́ небре́гъ, Его́ Еди́наго возжелѣ́лъ еси́. Тѣ́мже, расточи́въ имѣ́нія твоя́ ни́щимъ, бога́тство духо́вное стяжа́лъ еси́ и бы́лъ еси́ и́нокъ иску́сенъ, вку́пѣ и святи́тель, и сокро́вище догма́товъ вели́кое. Два́жды.
Тя́, изба́вльшую отъ кля́твы пра́отца и приве́дшую въ ра́й человѣ́чество, воспѣва́емъ вси́, Богоро́дице Дѣ́во, и мо́лимъ Тя́ при́сно, раби́ Твои́: моли́ Всеще́драго Бо́га прегрѣше́ній оставле́ніе дарова́ти и милосе́рдіемъ Свои́мъ спасти́ ны́, на Тя́ надѣ́ющихся, Препѣ́тая Дѣ́во.
Степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость/ и поуче́ніе се́рдца моего́ ра́зумъ. Сти́хъ: Уста́ пра́веднаго поуча́тся прему́дрости, и язы́къ его́ возглаго́летъ су́дъ. Вся́кое дыха́ніе... Ева́нгеліе отъ Іоа́нна, зача́ло 36.
Пріиди́те, святи́теля па́мять почти́мъ, вопію́ще ему́ вѣ́рно: о́тче святи́телю Августи́не, Це́ркве вели́кая похвало́, наста́вниче вселе́нныя ди́вный, учи́телю мона́ховъ и́стиннѣйшій. Ты́ и ны́нѣ, предстоя́й престо́лу Го́спода, назира́й ны́, ча́да твоя́, и не оста́ви на́съ, лю́бящихъ тя́, возопи́ противоборю́щимъ ны́: а́зъ е́смь съ ва́ми и никто́же на вы́.
Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.
Святи́телю блаже́нне, дне́сь соверша́ющихъ твое́ торжество́ помяни́ во святы́хъ твои́хъ моли́твахъ, да и мы́ про́чее отложи́мъ мірско́е попече́ніе и па́губный пу́ть, и напра́ви стопы́ на́ша въ Ца́рствіе Бо́жіе.
Вели́чіе нося́ и́мени, вели́чіе Пресвяты́я Тро́ицы я́сно въ души́ твое́й запечатлѣ́лъ еси́, Ея́же и сокрове́нную та́йну, ели́ко мо́щно, простра́нно изъясни́лъ еси́, Юже моли́ вели́кое мно́жество грѣхо́въ на́шихъ поми́ловати.
Яже уму́ тлѣ́нному непристу́пна, то́, вѣ́рою прини́къ, я́сно проповѣ́далъ еси́, о́тче Августи́не, и во вся́ концы́ вселе́нныя возгремѣ́лъ еси́, вели́чіе догма́товъ извѣству́я . Проси́ и на́мъ, чту́щимъ тя́, просвѣще́нія духо́внаго и ве́лія ми́лости.
Богоро́диченъ: Тя́ воспѣва́емъ, Приснодѣ́во, ро́да на́шего похвалу́, Тобо́ю бо Бо́гъ прише́дъ, всели́ся въ ны́, да спасе́тъ отъ грѣхо́въ человѣ́ка, и спаса́ема, просла́витъ Божество́мъ Свои́мъ и обожи́тъ да́ромъ благода́ти Своея́.
Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.
Иппо́нъ имѣ́ тя́ свѣти́льника че́стна, но ны́нѣ вся́ вселе́нная красу́ется въ па́мяти твое́й, о Августи́не: бы́лъ бо еси́ Правосла́вія тверды́ня и Це́ркве утвержде́ніе, пра́вило жи́зни и зако́нъ добродѣ́тели честнѣ́йшій.
Твоя́ уста́ не покры́ хода́тай забве́нія — гро́бъ, умолча́ Иппо́нъ, но вѣща́етъ вся́ вселе́нная твоя́ исправле́нія и боре́нія, воспѣва́етъ труды́, и́миже труди́лся еси́, уча́, и наказу́я, и предлага́я Боже́ственная уче́нія, и́миже напое́нъ бы́лъ еси́.
Егда́ на́йде на тя́ Боже́ственное раче́ніе, святи́телю, тогда́ вся́ мірска́я отве́рглъ еси́, и разда́въ тлѣ́нное бога́тство, сокро́вище стяжа́лъ еси́, я́же на небесѣ́хъ, и оста́вивъ вся́ сро́дники своя́, а́нгеловъ ли́ки смоле́бники прія́лъ еси́.
Богоро́диченъ: Любо́вію чту́ще, ублажа́емъ Тя́, цвѣ́те прекра́сный нетлѣ́ннаго рая́, вѣ́нче неувяда́емый цѣлому́дрія, престо́ле вели́кій Вседержи́теля, сла́во ро́да христіа́нскаго и а́нгеловъ вели́кое удивле́ніе.
Прему́дрости Боже́ственныя испо́лненъ, уче́нія честна́я Це́ркви возвѣсти́лъ еси́, догма́товъ предложи́въ исправле́нія, Писа́ніе Боже́ственное излага́я, святы́хъ па́мяти словесы́ почита́я, мона́шествующимъ пра́вило начерта́я и житіе́мъ и писа́ніемъ; отню́дуже и возше́дъ на высоту́ богосло́вія и, я́коже Моисе́й, уда́ривъ же́зліемъ Боже́ственныя любы́ въ сокрове́нный и непристу́пный ка́мень богосло́вія, сотвори́лъ еси́ потещи́ исто́чникъ воды́, теку́щій въ живо́тъ вѣ́чный, и́мже оби́льно напои́лъ еси́ лю́ди жа́ждущія. Тѣ́мже и мы́ вопіе́мъ тебѣ́: о́тче святи́телю Августи́не, моли́ Христа́ Бо́га прегрѣше́ній оставле́ніе дарова́ти любо́вію чту́щимъ святу́ю па́мять твою́. Два́жды.
Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.
Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.
Юро́дивыя и бу́ія манихе́и обличи́лъ еси́, и уче́нія и́хъ ле́стная, я́ко пра́хъ, возвѣ́ялъ еси́ вѣ́тромъ уче́ній твои́хъ боже́ственныхъ, и Пела́гіеву горды́ню изнури́лъ еси́, и донати́стовъ собо́ръ къ правосла́внѣй вѣ́рѣ приве́лъ еси́, Августи́не.
Аще и пла́каше блаже́нная Мо́ника, ви́дящи тя́ отъ пути́ пра́ведна заблужда́юща, но моли́тва ея́ не вску́ю приноша́шеся, и проро́чествова епи́скопъ блаже́нный, глаго́ля е́й, — не мо́жетъ пло́дъ таковы́хъ моли́твъ поги́бнути, — святи́теля че́стна тя́ назна́менуя.
Вале́рій епи́скопъ епи́скопа тя́ поставля́етъ и, я́ко сы́на, себѣ́ вмѣня́етъ тя́; ему́же уме́ршу, предсѣда́тельство Иппонíйское прія́лъ еси́, три́десять и пя́ть лѣ́тъ тружда́яся нелѣ́ностно, уча́ и наказу́я, и себе́, я́ко о́бразъ, всѣ́мъ предлага́я добродѣ́тели.
Богоро́диченъ: Господоимени́тая Влады́чице на́ша, Пречи́стая Приснодѣ́во, въ ча́съ обстоя́ній услы́ши ны́ и спаси́, прилѣ́жно моля́щися о на́съ со святи́телемъ въ ча́съ су́дный поми́ловати ны́, и здѣ́ отъ разли́чныхъ обстоя́ній ско́ро изба́вити.
Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.
Услы́ша Бо́гъ моли́тву твою́, святи́телю, и пре́жде плѣне́нія гра́да твоего́ отъ ва́рваръ, къ Себѣ́ восхища́етъ тя́, да́руя ти́ вѣне́цъ сла́вы, я́ко па́стырю до́брому, я́ко дѣ́лателю до́бру виногра́да Христо́ва, я́ко рабу́ вѣ́рну, и́же тала́нтъ господи́на своего́ до́брѣ умно́жи.
Свяще́нное Писа́ніе излага́я та́инственно, Іоа́нново Ева́нгеліе и Посла́ніе пе́рвое па́че возлюби́лъ еси́, но и про́повѣдь Наго́рную я́сно извѣсти́лъ еси́ и псалмы́ Дави́да уясни́лъ еси́ твои́ми свяще́нными толкова́ніи, о́тче богому́дре.
Та́йну любве́ позна́въ Бо́жія, глаго́лалъ еси́: не найти́ ду́ху упокое́нія, до́ндеже обря́щетъ упокое́ніе у Бо́га, созда́вшаго е́. Его́же и обрѣ́тъ, помоли́ся о на́съ и на́мъ обрѣсти́ поко́й о́ный, и́же въ земны́хъ ве́щехъ вла́емыхъ.
Богоро́диченъ: Иже прибѣга́етъ къ кро́ву Твоему́, о Влады́чице, ско́рое обрѣта́етъ упокое́ніе отъ грѣхо́въ и жите́йскихъ обстоя́ній. Тѣ́мже и на́мъ, прибѣга́ющимъ Ти́, да́руй покро́въ Тво́й честны́й, Помо́щнице христіа́нъ те́плая.
Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.
Наказу́я три́ дни́ епи́скопы, отпа́дшія отъ вѣ́ры правосла́вныя, боже́ственными твои́ми вѣща́ніи просвѣти́лъ еси́. Тѣ́мже, отри́нувше уче́ніе ле́стное, Правосла́віе облобыза́вше усе́рдно, тя я́ко вожда́ спасе́нныхъ показа́ша.
Учи́лъ еси́ дѣ́вство смире́нное почита́ти и облобыза́ти, но и бра́къ у́бо честны́й велича́лъ еси́, и вдовство́ почита́ти вся́чески науча́лъ еси́, о воздержа́ніи же вся́чески пе́клся еси́, уча́ твоя́ ученики́ сему́ слѣ́довати, си́мъ спаса́тися, о́тче треблаже́нне.
Карѳаге́нъ хва́лится ю́ностію твое́ю, Ѳага́стъ же дѣ́тствомъ, Ри́мъ уче́ніемъ твои́мъ, Медіола́нъ покая́ніемъ твои́мъ, но па́че всѣ́хъ Иппонíйскій гра́дъ прославля́ется тобо́ю, я́ко па́стыремъ блаже́ннымъ и предсѣда́телемъ честны́мъ.
Богоро́диченъ: Арха́нгелъ Гавріи́лъ, предста́въ Дѣ́вѣ въ Назаре́тѣ, возвести́ та́йну всемíрную: я́ко Бо́гъ хо́щетъ отъ Жены́ роди́тися, да обожи́тъ человѣ́ки. Тѣ́мже Тя́, я́ко вину́ спасе́нія на́шего, при́сно съ любо́вію велича́емъ.
Богосло́ве святи́телю, Це́ркве Христо́вы похвало́, наста́вниче благоче́стія и вѣ́ры правосла́вныя утвержде́ніе, искорени́телю ересе́й, уче́ній та́инственныхъ сокро́вище, Августи́не о́тче блаже́нне, святи́телю преди́вне, моли́ при́сно о всѣ́хъ на́съ.
Просвѣти́ моя́ те́мныя зѣ́ницы се́рдца, святи́телю, и научи́ досто́йно воспѣ́ти па́мять твою́ и восхвали́ти чу́дное житіе́ твое́, его́же, я́ко а́нгелъ, пожи́лъ еси́; научи́ воспрія́ти уче́нія твоя́, и наста́ви мя́ путе́мъ добродѣ́тели ше́ствовати, и никогда́же отлуча́тися отъ пути́, веду́щаго въ жи́знь вѣ́чную. Покажи́ ми́, что́ ми́ подоба́етъ мы́слити, глаго́лати, твори́ти; свяжи́ ру́цѣ и но́зѣ мои́ стра́хомъ Бо́жіимъ, подви́гни мя́ къ любви́ Христо́вой, при́сно зрѣ́ти и не прельща́тися тлѣ́нными мíра сего́ красота́ми, но укрѣпи́ бу́дущихъ нелѣ́ностно иска́ти, и моли́ при́сно о всѣ́хъ на́съ.
Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.
Никто́же та́ко исповѣ́да грѣхи́ своя́, никто́же и любо́вь та́ко ко Го́споду возвѣсти́ свою́, я́коже ты́, святи́телю, — люблю́ Бо́га моего́, вся́ же земна́я, я́ко пра́хъ, вмѣня́ю; Ему Еди́ному прилѣпи́тися хощу́, — глаго́лалъ еси́.
Образъ бы́лъ еси́ твои́мъ ученико́мъ, о́тче, и прія́въ епи́скопство честно́е, въ по́двизѣхъ не ослабѣ́лъ еси́ и́ноческихъ, но па́че прилѣжа́лъ еси́, подвиза́яся въ по́двизѣхъ и бдѣ́ніихъ, поще́ніихъ и трудѣ́хъ, до́ндеже па́че а́нгелъ, а не человѣ́къ бы́лъ еси́.
Ника́коже смуща́тися дре́вняго Ри́ма паде́нію науча́лъ еси́, святи́телю: Гра́дъ Бо́жій — Це́рковь Христо́ва, не паде́тъ во вѣ́ки. Ея́же догма́ты простра́нно изъясни́лъ еси́ и ея́ ча́дами бы́ти усе́рдно призыва́лъ еси́ вся́ лю́ди, вѣ́рныя же и невѣ́рныя.
Богоро́диченъ: Паде́ся Ада́мъ, Евинъ совѣ́тъ воспрія́въ во у́ши, но Тобо́ю спасе́нъ, о Отрокови́це, при́сно воспѣва́етъ Ти́ ра́достно: ра́дуйся, ро́да на́шего воззва́ніе; ра́дуйся, сокруше́ніе змíя; ра́дуйся, Евино исправле́ніе преди́вное.
Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.
Ра́дуйся, о́тче! послу́шалъ еси́ боже́ственная словеса́ Амвро́сія вели́каго, и́же тя́ наста́ви и научи́, ше́ствовати до́брый пу́ть показа́въ. О, ма́тере честны́я досто́йный пло́де! О, учи́теля вели́каго велича́йшій учениче́! Моли́ о душа́хъ на́шихъ, Августи́не.
Иже пре́жде спасы́й Па́вла на пути́ Дама́сцѣмъ, То́й же посла́ніемъ того́ тя́ уловля́етъ, глаго́ля: возьми́ и чти́. И проче́тъ, вся́ мірска́я, я́ко уме́ты вмѣни́лъ еси́, Христа́ же, Го́спода на́шего, обрѣ́тъ, я́ко би́серъ честнѣ́йшій, Ему́ невозвра́тною любо́вію прилѣпи́лся еси́.
Науча́лъ еси́ ми́лостыни соверша́тися въ подая́ніи тре́бующимъ и проще́ніи оби́дящимъ; и са́мъ бы́лъ еси́ благíй наста́вникъ сему́, вся́, я́же имѣ́лъ еси́, разда́въ ни́щимъ, кро́тость стяжа́лъ еси́ оби́льную, ю́же кто́ изочте́тъ? и любо́вь твою́ кто́ отъ земны́хъ досто́йно возвѣсти́тъ?
Богоро́диченъ: О, Ма́ти Бо́жія, благи́хъ вина́, милосе́рдуеши о на́съ, въ бѣ́дствіи су́щихъ, и всѣ́мъ твори́ши спасти́ся, любо́вію чту́щихъ Тя́. Предста́ни на́мъ, въ бѣ́дствіяхъ су́щимъ, возьми́ и́го на́ше грѣхо́вное и спаси́ на́съ, Дѣ́во Всепѣ́тая.
Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.
Ше́ствуя путе́мъ добродѣ́тели, взыва́лъ еси́ къ соше́ственникомъ свои́мъ, никогда́же останови́тися, глаго́ля: довлѣ́етъ, и поги́блъ еси́. Но и на́съ, ученико́въ твои́хъ, о́тче, укрѣпи́ доброше́ствовати пу́ть спаси́тельный въ Ца́рство небе́сное.
Августи́не, святи́телю честны́й, свѣти́льниче вселе́нскій, наста́вниче преди́вный, на́съ, соверша́ющихъ дне́сь свято́е твое́ торжество́, укрѣпи́ на стра́сти, помози́ въ бѣ́дствіяхъ, наста́ви на добродѣ́тель, и моли́ся ко Го́споду, дарова́ти на́мъ души́ спасе́ніе.
Егда́ мо́лимся тебѣ́, святи́телю, при́зри на ны́ съ высоты́ небе́сныя и ми́лостивно посѣти́, ви́диши бо зло́, невѣ́ріе и волне́ніе мо́ря жите́йскаго, слы́шиши бо во́пли церкве́й разоре́нныхъ, помози́ на́мъ, немощны́мъ, и́маши бо дерзнове́ніе ко Го́споду, я́ко святи́тель че́стенъ.
Богоро́диченъ: Ма́ти Вседержи́теля, Чи́стая Приснодѣ́во, врата́ жи́зни на́мъ отве́рзшая, при́зри на ны́ и покры́й Твои́мъ честны́мъ покро́вомъ. Заступи́, о Влады́чице, немощна́я ча́да Твоя́, на Тя́ бо надѣ́емся и Тобо́ю хва́лимся при́сно.
Августи́на святи́теля, пріиди́те при́сно вси́ ублажи́мъ, я́ко па́стыря до́бра, я́ко наста́вника му́дра, я́ко свѣти́льника правосла́вныя на́шея вѣ́ры, я́ко моли́твенника о душа́хъ на́шихъ. Два́жды.
Дѣ́во, христіа́нъ похвало́, защи́тнице озло́бленныхъ, немощны́хъ укрѣпле́ніе и исцѣле́ніе, обремене́нныхъ грѣхи́ ско́рая изба́вительнице, спаси́ на́съ, упова́ющихъ на Тя́.
Что́ тя́ нарече́мъ, святи́телю? Иппонíйскаго ли гра́да украше́ніе? но всея́ вселе́нныя еси́ похвала́; человѣ́ка ли че́стна? но а́нгелъ житіе́мъ бы́лъ еси́; свѣти́льника ли свѣ́тла? но свѣ́тъ тво́й никогда́же угасе́; уста́ ли боговѣща́нная? но не затвори́ я́ хода́тай забве́нія гро́бъ. Вели́кая твоя́ добродѣ́тель, вели́ки и вѣнцы́, и́миже вѣнча́ тя́ Христо́съ. Моли́ спасти́ся душа́мъ на́шимъ.
Что́ тя́ ны́нѣ, Августи́не, провѣща́емъ? святи́теля ли вели́каго или́ сла́ву мона́шествующихъ? па́стыря ли изря́дна или́ по́стника похвалу́? ересе́й ли дерзнове́нна обличи́теля или́ кро́тости наста́вника и́стинна? добродѣ́телей ли начерта́ніе или́ покая́нія пра́вило? любому́дрія ли рачи́теля или́ отше́льниковъ сла́ву? ни́щихъ ли люби́теля изря́дна или́ вся́ мірска́я коне́чнѣ оста́вльша? Мона́шествующихъ красото́ и наста́вниче любому́дрія, моли́ спасти́ся душа́мъ на́шимъ.
Что́ тя́ ны́нѣ, Августи́не, имену́емъ? Амвро́сія ли вели́каго возлю́бленна ученика́? но глубина́ми богосло́вія превозше́лъ еси́ его́; Вале́рія ли ди́внаго прее́мника? но па́че него́ просвѣти́лся еси́; Мо́ники ли святы́я святы́й пло́дъ? но па́че ея́ освяти́лся еси́ и, возше́дъ на высоту́ небе́сную, ра́дости вѣ́чныя вкуси́лъ еси́. Моли́ спасти́ся душа́мъ на́шимъ.
Гра́дъ Бо́жій извѣству́я, его́же граждани́нъ вели́кій бы́лъ еси́ и сказа́тель неизрече́нныхъ Бо́жіихъ та́инъ, Це́ркви Правосла́вныя утверди́лъ еси́, наказу́я и уча́ твои́ми дѣя́ніи и словесы́. И ны́нѣ, я́ко со́лнце на за́падъ заше́дъ, просвѣща́еши на́съ писа́ньми твои́ми, уча́ на́съ благода́ти Христо́вы иска́ти и не му́дрствовати себе́ вели́ки, но па́че Ду́хомъ исполня́тися 2, Его́же дохнове́нію оби́льно причасти́лся еси́ и бы́лъ еси́ таи́нникъ богосло́вія. Моли́ спасти́ся душа́мъ на́шимъ.
Кто́ по достоя́нію воспое́тъ труды́ твоя́, и́миже труди́лся еси́ во все́й Це́ркви, е́реси безбо́жныя отсѣка́я мече́мъ исправле́ній твои́хъ, аріа́ны облича́я, манихе́и низлага́я 3, донати́сты къ вѣ́рѣ правосла́внѣй увѣща́я, Пела́гія де́рзость сокруша́я и Правосла́віе утвержда́я, до́ндеже мно́га ча́да собра́лъ еси́ во оби́тели церко́вныя, и, наставля́я и́хъ и путево́дствуя, во оби́тели небе́сныя вве́лъ еси́. Собери́ и на́съ, заточе́нныхъ лю́то, и приведи́ ко Христу́ Бо́гу на́шему, моля́ Его́ при́сно спасти́ся душа́мъ на́шимъ.
Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.
НА ЛИТУРГІИ.
Блаже́нна, отъ кано́на святи́теля пѣ́снь 3-я и 6-я. Проки́менъ, гла́съ 1: Уста́ моя́ возглаго́лютъ прему́дрость,/ и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе отъ Матѳе́я, зача́ло 11. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.