Минеи Богослужебные.

Изъ архива Русскаго Пантелеимонова монастыря на Аѳонѣ.

Мѣ́сяца Ма́рта въ 12-й де́нь.
Святи́теля Григо́рія Двоесло́ва, па́пы Ри́мскаго.

ВЕЧЕРЪ.

На Го́споди воззва́хъ: стихи́ры, гла́съ 6. Подо́бенъ: Все́ отло́жше.

Святи́тельства одѣ́янъ оде́ждею, треблаже́нне,/ вше́лъ еси́ во свята́я святы́хъ,/ хвалу́ Влады́цѣ твоему́/ усе́рдно, всему́дре, чи́стыми устна́ми возсыла́я, я́коже а́нгелъ,/ и, просвѣща́емь богодѣ́тельными свѣтлостьми́,/ лю́ди вѣ́рная наста́вилъ еси́/ богосло́вію вѣ́ры, Григо́ріе богосвѣ́тле,/ я́ко Ри́ма боже́ственный па́стырь,/ я́ко Це́ркве учи́тель,/ я́ко таи́нникъ Бо́жія благода́ти. Два́жды.

Го́споду прилѣпля́яся вы́ну, іера́рше,/ и Боже́ственному Углю чи́стѣ соединя́емь,/ священнодѣ́йственникъ Литургíи бы́лъ еси́,/ преждесвяще́нныхъ честны́хъ Даро́въ,/ лю́ди, преподо́бне, вѣ́рныя,/ во дни́ поста́ тѣ́ми освяща́я/ и изыма́я си́хъ ко́зней сопроти́внаго,/ ко огра́дѣ небе́сней до́брѣ ве́лъ еси́,/ сто́лпъ о́гненъ явля́яся/ сія́ніемъ благоче́стія/ и Боже́ственныхъ уче́ній озаре́ньми,/ о́тче богоно́се Григо́ріе. Два́жды.

Непоро́чно соблю́лъ еси́/ святи́тельства пома́заніе свято́е,/ свяще́нне Григо́ріе,/ и того́ дарова́нія, я́ко тала́нты,/ возрасти́лъ еси́ благода́тію Христо́вою/ въ любви́, и кро́тости,/ и теплотѣ́ вѣ́ры,/ въ щедро́тахъ же и моле́ніихъ,/ и во всѣ́хъ, и́миже благоугожда́ется/ Еди́ный сла́вы Госпо́дь,/ отону́дуже, богоглаго́ливе,/ благоче́стно упа́слъ еси́/ слове́сное Христо́во ста́до/ на па́жити спаси́тельней. Два́жды.

Яко со́лнце, ны́нѣ возсія́/ боже́ственная па́мять твоя́/ мíра конце́мъ, всече́стне,/ вѣ́рныхъ всѣ́хъ та́йными сія́ньми/ ра́достно озаря́ющи,/ ю́же, собра́вшеся, почита́емъ/ свяще́нными псалмы́ и пѣ́сньми,/ прося́ще тя́ Христу́ моли́тися/ о воспѣва́ющихъ тебе́, богосла́вне. Два́жды.

Сла́ва, гла́съ 3:

Прія́въ отъ Христа́, Григо́ріе, корми́ло Ри́мскія Це́ркве, кора́бль ея́ упра́вилъ еси́ во спаси́тельное приста́нище и спа́слъ еси́ ю́ отъ вра́жіихъ обурева́ній уче́ніемъ богому́дрыхъ слове́съ твои́хъ, святи́телю великоимени́те, дерзнове́ніе у́бо имѣ́я, моли́ся приле́жно ко Го́споду о ми́рѣ мíра и спасе́ніи ду́шъ на́шихъ.

И ны́нѣ, богоро́диченъ.
Вхо́дъ. Проки́менъ дне́. Чте́нія три́.

При́тчей чте́ніе. Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе. Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе. Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На стихо́внѣ стихи́ры, гла́съ 4. Подо́бенъ: Яко до́бля.

Вѣ́ры Правосла́вныя побо́рника,/ благоче́стія учи́теля,/ ве́тхаго Ри́ма архипа́стыря,/ святи́телей украше́ніе,/ христіа́нъ утѣ́шителя,/ ни́щихъ помо́щника и пита́теля,/ неду́гующихъ врача́,/ восхва́лимъ дне́сь достосла́внаго Григо́рія.

Сти́хъ: Уста́ моя́ возглаго́лютъ прему́дрость/ и поуче́ніе се́рдца моего́ ра́зумъ.

Поста́вленный о Ду́сѣ Свя́тѣ/ смире́нія ра́ди твоего́, преподо́бне,/ на высо́комъ свѣ́щницѣ архіере́йства,/ свѣтоза́рный бы́лъ еси́ свѣти́льникъ Це́ркве,/ уясни́въ тоя́ благолѣ́піе* свѣ́тлыми дѣя́ніи и боже́ственными уче́ніи,/ пѣ́сньми же и моли́твами ко Го́споду/ въ че́сть преждеосвяще́нныхъ небе́сныхъ Даро́въ Его́.

Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

Огнь любве́ къ Бо́гу и бли́жнимъ/ имѣ́я при́сно въ се́рдцѣ свое́мъ,/ гото́въ сы́й положи́ти ду́шу/ за ста́до Христо́во усе́рднѣйше,/ показа́лся еси́ христоподража́тель/ и единонра́венъ вои́стинну/ всехва́льнымъ, свя́те, апо́столомъ,/ верхо́внаго бы́въ прее́мникъ досто́йнѣйшій.

Сла́ва, гла́съ 2:

По́стническими по́двиги украси́вся и па́стырскими, о́тче Григо́ріе, обои́ми воскрили́лся еси́, я́ко голуби́ца златоза́рная, и къ жела́емому Христу́ душе́ю воспари́лъ еси́. Да пода́стъ у́бо и на́мъ всѣ́хъ Влады́ка твои́мъ, богоизбра́нне, хода́тайствомъ по́двигомъ до́брымъ подвиза́тися и прича́стниками жи́зни вѣ́чныя бы́ти вели́кія ра́ди Того́ ми́лости.

И ны́нѣ, богоро́диченъ:

Моли́твы Твои́хъ ра́бъ пріими́, Богоро́дице, Засту́пнице на́ша и прибѣ́жище; къ кому́ бо прибѣ́гнемъ, ра́звѣ Тебе́, Влады́чице? Ты́ покро́въ и стѣна́ необори́мая, и предста́тельствомъ Твои́мъ отъ бѣ́дъ сохраня́емся. И ны́нѣ не оста́ви на́съ, о Всеблага́я, на Тя́ бо упова́ніе по Бо́зѣ возложи́хомъ, Благослове́нная.

Тропа́рь, гла́съ 4:

Иже отъ Бо́га свы́ше Боже́ственную благода́ть воспріе́мь, сла́вне Григо́ріе, и Того́ си́лою укрѣпля́емь, ева́нгельски ше́ствовати изво́лилъ еси́. Отону́дуже у Христа́ возме́здіе трудо́въ прія́лъ еси́, всеблаже́нне, Его́же моли́, да спасе́тъ ду́ши на́ша.

Сла́ва, и ны́нѣ, богоро́диченъ.

НА УТРЕНИ.

По 1-мъ стихосло́віи сѣда́ленъ, гла́съ 4. Подо́бенъ: Вознесы́йся.

Госпо́дня благосла́внаго іера́рха въ пѣ́снехъ свяще́нныхъ восхваля́емъ, соше́дшіися вси́, вопію́ще къ нему́: спаса́й моли́твами твои́ми почита́ющія тя́, сокруши́ шата́ніе злосла́вныхъ папи́стовъ и ми́рное испроси́ житіе́ правосла́внымъ, Григо́ріе всему́дре. Два́жды.

Сла́ва, и ны́нѣ, богоро́диченъ:

Те́плое заступле́ніе су́щимъ въ бѣда́хъ и Помо́щницу на́шу и къ Бо́гу премѣне́ніе, Еюже тли́ изба́вихомся, Богоро́дицу, вѣ́рніи, ублажа́емъ.

По 2-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Зрѣ́ніе у́мное очи́стивъ души́, зрѣ́лъ еси́ та́инства Бо́жія, и си́мъ научи́лъ еси́ вся́ благочести́выя, и, возводя́ тѣ́хъ къ высотѣ́ зрѣ́нія, наста́вилъ еси́ почита́ти Бо́га въ Тро́ицѣ, треблаже́нне. Два́жды.

Сла́ва, и ны́нѣ, богоро́диченъ:

Препросла́вленная Госпоже́ и Влады́чице! Ты́ еси́ небе́сныхъ си́лъ ра́дость, святи́телей добро́та и всѣ́хъ святы́хъ украше́ніе, христіа́нъ стѣна́, грѣ́шныхъ пу́ть и Пору́чница Тебе́ велича́ющихъ.

По поліеле́и сѣда́ленъ, гла́съ 5. Подо́бенъ: Собезнача́льное Сло́во.

Огне́мъ любве́ всесожига́емь, преждесвяще́нная Свята́я священнодѣ́йствовалъ еси́, патріа́рховъ похвало́, свяще́нне Григо́ріе. Но мо́лимъ тя́ те́плѣ: проси́ и на́мъ низпосла́тися любви́ те́плей и неотъе́млемому освяще́нію, сла́вящимъ тя́. Два́жды.

Сла́ва, и ны́нѣ, богоро́диченъ:

Святы́хъ Свята́я, Дѣ́во Чи́стая, святы́хъ Свята́го родила́ еси́, всѣ́хъ освяща́ющаго Христа́ Изба́вителя, Его́же моли́ очи́стити и спасти́ рабы́ Твоя́.

Степе́нна, 1-й антифо́нъ 4-го гла́са. Проки́менъ: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе Іоа́нна, зача́ло 35 отъ полу́. Псало́мъ 50-й.

По 50-мъ псалмѣ́ стихи́ра, гла́съ 6:

Преподо́бне треблаже́нне, патріа́рха Авраа́ма до́блестемъ подо́бникъ усе́рдный бы́лъ еси́, а́лчныя при́сно пита́я, неиму́щимъ неоску́дна тре́бованія подава́я. И ны́нѣ Христу́ моли́ся дарова́ти на́мъ ве́лію ми́лость.

Кано́нъ, гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты Еги́петскія, я́ко просла́вися.

Христе́ Спа́се, Свѣ́те мíра Незаходи́мый, свѣ́тъ у́мный ниспосли́ ра́зуму моему́ озаря́ющъ, воспѣ́ти Ри́ма предста́теля, боже́ственнаго Григо́рія.

Да твою́ мíру пока́жетъ добродѣ́тель Предвѣ́дый вся́ческая, всему́дре, на ви́димую отвсю́ду высоту́ святи́тельства возведе́ тя.

Яко честно́е и чистѣ́йшее селе́ніе, обрѣ́тши тебе́, богому́дре, всели́ся въ тя́ Тро́ица Пресвята́я и дарова́ній испо́лни Боже́ственныхъ, свя́те Григо́ріе.

Богоро́диченъ: Чи́стое дѣ́вства сокро́вище, Бо́жію Роди́тельницу, избавле́ніе человѣ́ческаго ро́да и ра́дость а́нгеловъ пѣ́сньми прославля́емъ.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Житіе́ твое́ свя́то, о́бразъ боже́ственъ, нра́въ ти́хъ, ра́зумомъ укра́шенъ, сло́во же твое́, богому́дре, растворено́ бы́сть со́лію благода́ти.

Возжже́ тя́ Христо́съ, я́коже свѣти́льникъ, Григо́ріе, свѣтя́й на высотѣ́ Це́ркве, всеблаже́нне, и озаря́яй ю́ луча́ми твои́ми.

Отто́ргнулъ еси́ у́мъ отъ мíра всецѣ́ло, и все́ жела́ніе ко Влады́цѣ просте́ръ, благода́ть Ду́ха привле́клъ еси́, іера́рше Григо́ріе.

Богоро́диченъ: Витíй велегла́сіе умолче́, мудреце́въ же остроу́міе обуя́ рождество́мъ Твои́мъ, Богоневѣ́сто, недоумѣва́ющихъ разумѣ́ти Твое́ та́инство.

Сѣда́ленъ, гла́съ 5. Подо́бенъ: Собезнача́льное Сло́во.

Присносла́внаго святи́теля воспои́мъ, Ри́ма па́стыря и боже́ственнаго побо́рника Це́ркве, и со умиле́ніемъ возопіи́мъ къ нему́: моли́ Христа́, богоглаго́ливе Григо́ріе, пода́ти умире́ніе Це́рквамъ, ересе́й и раско́ловъ искорене́ніе и душа́мъ на́шимъ ве́лію ми́лость. Два́жды.

Сла́ва, и ны́нѣ, богоро́диченъ:

Всесвята́я Дѣ́во, поми́луй на́съ, прибѣга́ющихъ вѣ́рою къ Тебѣ́, Благоутро́бнѣй, и прося́щихъ те́плаго Твоего́ заступле́нія, мо́жеши бо, я́ко Блага́я, вся́ спасти́, я́ко су́щи Ма́ти Бо́га Вы́шняго, ма́тернія Твоя́ моли́твы при́сно употребля́ющи.

Пѣ́снь 4.

Ирмо́съ: Услы́шахъ, Го́споди, сла́вное Твое́ смотре́ніе и просла́вихъ, Человѣколю́бче, непостижи́мую Твою́ си́лу.

Блиста́еши, му́дре, чудесы́ и тму́ страсте́й отгоня́еши дале́че боже́ственными моли́твами.

Проповѣ́дуя воплоще́ніе Христо́во, богогла́се, и Божество́ Его́, пле́мя лонгоба́рдовъ посрами́лъ еси́.

Яко Моисе́й, въ незаходи́мый мра́къ вше́дъ, скрижа́ли прія́лъ еси́ Ева́нгелія, блаже́нне Григо́ріе.

Богоро́диченъ: Небе́сную Лѣ́ствицу, Еюже Бо́гъ сни́де и естество́ человѣ́къ возвы́си, Дѣ́ву ублажа́емъ.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Подража́тель Христо́въ, іера́рховъ удобре́ніе, дне́сь вѣ́рныхъ призыва́етъ Григо́рій соверши́ти его́ честну́ю па́мять и благода́ти прія́ти.

Вели́чіе Бо́гови воздава́я вы́ну, достосла́вне, возвели́ченъ еси́ досто́йно отъ Него́, вѣ́сть бо сла́вити Госпо́дь сла́вящія Его́.

Ми́рно житіе́ проше́дъ, къ ми́рнымъ дости́глъ еси́, богопрія́тне, селе́ніемъ, ми́ръ бо, вся́къ у́мъ превосходя́щъ, Христа́, прія́лъ еси́.

Богоро́диченъ: Земля́ неора́нная свята́я, прозя́бшая Кла́съ живота́, показа́лася еси́, Марíе, Его́же яды́й благоче́стно, я́ко жи́зни причаща́яйся, не у́зритъ сме́рти.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Неосла́бно Бо́гу сопребыва́я, озаре́ньми отту́ду яви́лся еси́ сто́лпъ о́гненъ, досточу́дне, лю́ди вѣ́рныя предводя́й.

Мы́сленно невеще́ственнымъ а́нгеломъ совокупля́яся, преподо́бне, съ ни́ми спросла́вился еси́, преста́вився, я́коже и пре́жде кончи́ны бы́лъ еси́ небе́сный.

Устнѣ́ твои́, священнопроповѣ́дниче, я́ко во́ду живу́ю, источи́ша словеса́ Ду́ха и сердца́ веселя́тъ вѣ́рно послѣ́дующихъ тебѣ́.

Богоро́диченъ: Долгорѣши́тельница Евы была́ еси́, Чи́стая, Ты́ бо до́лгъ сея́ изъ Тебе́ возсія́вшимъ Но́вымъ Ада́момъ бога́тно воздала́ еси́.

Конда́къ, гла́съ 3:

Подобонача́льникъ показа́лся еси́ Нача́льника па́стыремъ Христа́, и́ноковъ чреды́, о́тче Григо́ріе, ко огра́дѣ небе́снѣй наставля́я, и отту́ду научи́лъ еси́ ста́до Христо́во за́повѣдемъ Его́, ны́нѣ же съ ни́ми ра́дуешися и лику́еши въ небе́сныхъ кро́вѣхъ.

Икосъ:

Имѣ́я Вели́каго Архіере́я, о іера́рше Григо́ріе, проше́дшаго небеса́, Іису́са, Сы́на Бо́жія, благочести́ваго держа́лся еси́ исповѣ́данія, апо́стольски пра́во пра́вя сло́во и́стины. Ева́нгельски у́бо пожи́въ и да́нный тебѣ́ тала́нтъ до́брѣ возрасти́въ, прише́лъ еси́ съ дерзнове́ніемъ къ Вы́шнему Престо́лу благода́ти и, неизрече́нныя ра́дости сподобля́емь, лику́еши въ небе́сныхъ кро́вѣхъ.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть. Христо́съ же простре́ Богочести́вымъ отроко́мъ ро́су духо́вную, Сы́й благослове́нъ и препросла́вленъ.

Крѣ́пость дарова́ся тебѣ́ отъ Бо́га, я́ко вѣ́рному Его́ служи́телю, сокруша́ти неви́димаго борца́ и спаса́ти ста́до Христо́во невре́дно.

Же́ртву безкро́вную Всеви́дцу принося́, Ааро́на вы́сшій яви́лся еси́, богопрія́тне, не въ кро́ви те́льчей и ко́злей, но Кро́вію Христо́вою освяща́я лю́ди.

Сла́вившу ти́ во все́мъ животѣ́ твое́мъ Тро́ицу Несозда́нную, ны́нѣ со а́нгелы пое́ши То́й и всѣ́ми святы́ми пѣ́снь Трисвяту́ю, му́дре Григо́ріе.

Богоро́диченъ: Прибѣ́жище на́ше непосты́дное еси́, Богороди́тельнице, тѣ́мъ мо́лимъ Тя́ приле́жно: покрыва́й и храни́ отъ зо́лъ сла́вящія Тебе́ рабы́ Твоя́.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Болѣ́зней и страсте́й вра́чь показа́лся еси́ и духо́въ лука́выхъ прогони́тель, преподо́бне, сы́й а́нгеловъ прее́мникъ, и престо́ла, и благода́ти, вѣ́ры же и чистоты́.

Стра́сти и сѣ́ятелей тѣ́хъ побѣди́лъ еси́ воздержа́ніемъ, и безстра́стія дости́гъ, Григо́ріе, Влады́цѣ своему́ пѣ́лъ еси́: благослови́те, вся́ дѣла́ Госпо́дня, Го́спода.

Мѵ́ромъ у́мнымъ пома́занъ, свя́те, мѵ́ра источи́лъ еси́ чу́вственная же и мы́сленная отъ слове́съ твои́хъ богодухнове́нныхъ и отъ ра́ки моще́й твои́хъ, чуде́съ соверши́тель бы́въ.

Богоро́диченъ: Другíй ковче́гъ завѣ́та и до́мъ, по́лнъ сла́вы Бо́жіей, Тя́ вѣ́мы, Дѣ́во, Тебе́ бо избра́ отъ всѣ́хъ родо́въ Пребоже́ственный и въ Тя́ всели́тися боголѣ́пно изво́ли.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Со́нмы, собери́теся, благочести́выхъ, соверши́ти торжество́ боже́ственнаго Григо́рія, подае́тъ бо здра́віе тѣлесе́мъ и душа́мъ свяще́ніе, любо́вію почита́ющимъ его́.

Плѣни́цами содержи́мь безмѣ́рныхъ согрѣше́ній мои́хъ, къ тебѣ́ прибѣга́ю, о́тче, вѣ́рою моля́ся, да пріиму́ свобожде́ніе отъ си́хъ хода́тайствомъ твои́мъ, богопрія́тне.

Возрасти́въ тала́нтъ благода́ти, ра́достно преста́вился еси́, глаго́ля Влады́цѣ: се́ принесо́хъ Ти́ дарова́нное пріумно́жено. Тѣ́мже, я́ко благíй и вѣ́рный ра́бъ, вше́лъ еси́ въ ра́дость Го́спода своего́.

Богоро́диченъ: Ски́ніе Богопросла́вленная, ра́дуйся, Богоневѣ́сто, ра́досте а́нгеловъ и святи́телей красото́, ра́дуйся, вѣ́рныхъ удобре́ніе и человѣ́къ всѣ́хъ похвало́, Всепѣ́тая.

Свѣти́ленъ:

Сто́лпъ о́гненъ, съ небесе́ сходя́щь на тя́, Григо́ріе, яви́ тя ри́мляномъ архипа́стыря досто́йнѣйша: ты́ бо, Боже́ственною любо́вію огнепали́мь, яви́лся еси́ свѣти́льникъ Це́ркве въ просвѣще́ніе мно́гихъ и спасе́ніе. Два́жды.

Сла́ва, и ны́нѣ, богоро́диченъ:

Къ Тебѣ́, о Ма́ти Свѣ́та, прибѣга́емъ, вопію́ще: свѣтоза́рнымъ благода́ти Твоея́ сія́ніемъ разрѣши́ темнозра́ченъ о́блакъ страсте́й на́шихъ, да Свѣ́та яви́мся о́бщники невече́рняго Твои́ми, Богоро́дице, моли́твами.

На хвали́техъ стихи́ры, гла́съ 1:

Сокро́вище даро́въ духо́вныхъ,/ свяще́ннѣйшій Ри́ма первостоя́тель,/ труба́ богодухнове́нная,/ Тро́ицы уго́дникъ и́скренній,/ да восхва́лится ны́нѣ Григо́рій. Два́жды.

Тайново́дствуя лю́ди,/ благоче́стно учи́лъ еси́ сло́ву Бо́жію,/ я́ко христотаи́нникъ апо́столовъ/ и свѣтоза́рный богосло́въ Правосла́вія,/ патріа́рховъ похвало́, Григо́ріе.

Отъ вся́кія ско́рби и собла́зновъ,/ отъ неду́говъ душе́вныхъ и тѣле́сныхъ,/ вре́да же враго́въ чу́вственныхъ и мы́сленныхъ/ спаса́й моли́твами твои́ми пою́щія тя́,/ святи́телю Григо́ріе.

Сла́ва, гла́съ 2:

Иже въ по́стническихъ труде́хъ соверше́нна, вѣ́чныя ра́ди жи́зни до́брѣ подвиза́вшася, оби́тели же и хра́мы во сла́ву Бо́жію созда́вшаго, воспои́мъ Григо́рія, глаго́люще: ра́дуйся, лѣ́пото архіере́евъ, вѣ́рныхъ утвержде́ніе, добродѣ́тельми и уче́ньми озари́вый концы́, моли́ Всеблага́го Спа́са о соверша́ющихъ честну́ю па́мять твою́.

И ны́нѣ, гла́съ 5:

На стихо́внѣ тріо́ди. Сла́ва, гла́съ 6:

Тезоиме́нно зва́ніе твое́ бы́сть, Григо́ріе,/ бо́дрствовавъ бо въ себѣ́ при́сно,/ е́же по о́бразу соблю́лъ еси́ невреди́мо,/ отону́дуже па́стырь Ри́ма всеизря́денъ бы́лъ еси́/ и проповѣ́дникъ богосвѣ́телъ благоче́стія,/ боже́ственнаго же священнодѣ́йствія преждесвяще́нныхъ соверши́тель,/ тѣ́мже съ тремя́ вели́кими учи́тели и іера́рхи/ наслѣ́діе прія́лъ еси́ небе́сное,/ съ ни́ми же не преста́й моли́тися/ дарова́ти на́мъ ве́лію ми́лость.

И ны́нѣ, богоро́диченъ:

Препросла́вленная Госпоже́ и Влады́чице, Ты́ еси́ небе́сныхъ си́лъ ра́дость, святи́телей добро́та и всѣ́хъ святы́хъ украше́ніе, христіа́нъ стѣна́, грѣ́шныхъ пу́ть и Пору́чница Тебе́ велича́ющихъ.

НА ЛИТУРГІИ.

Слу́жба святи́телемъ: Блаже́нна, отъ кано́на святи́теля пѣ́снь 3 и 6. Проки́менъ, гла́съ 1: Уста́ моя́ возглаго́лютъ прему́дрость,/ и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Источникъ: Мине́я Ма́ртъ. Ча́сть пе́рвая. — М.: Издательскій совѣтъ Русской Православной Церкви, 2002. — С. 288-297.

/ Къ оглавленію раздѣла /