Минеи Богослужебные.
Предпра́зднство Благовѣ́щенія Пресвяты́я Богоро́дицы.
ВЕЧЕРЪ.
Обы́чная каѳи́сма. На Го́споди, воззва́хъ: тріо́ди самогла́сенъ дне́, два́жды, и му́чениченъ, и подо́бны три́, и предпра́зднства на 4, гла́съ 4. Подо́бенъ: Яко до́бля.
Сокрове́нное та́инство,/ и а́нгеломъ невѣ́домое,/ Гавріи́лъ увѣря́етъ арха́нгелъ/ и къ Тебѣ́ ны́нѣ пріи́де, еди́нѣй нетлѣ́ннѣй/ и до́брѣй голуби́цѣ,/ ро́да на́шего воззва́нію,/ и вопіе́тъ Тебѣ́, Пресвята́я,/ е́же ра́дуйся:/ угото́вися сло́вомъ, Бо́га Сло́ва/ Твои́ми ложесна́ми прія́ти. Два́жды.
Свѣтоно́сная пала́та/ угото́вася Тебѣ́, Влады́ко,/ утро́ба Чи́стая Богоотрокови́цы,/ гряди́ къ Се́й и сни́ди,/ уще́дри созда́ніе Твое́,/ за́вистно бра́нь пріе́мшее,/ и рабо́тою удержа́нное льсти́ваго,/ и добро́ту пе́рвую погуби́вшее,/ и Твоего́ спаси́тельнаго ча́ющее соше́ствія.
Гавріи́лъ арха́нгелъ/ къ Тебѣ́, Всенепоро́чная, явле́нно пріи́детъ/ и возопіе́тъ Тебѣ́:/ ра́дуйся, кля́твы разрѣше́ніе,/ па́дшихъ воста́ніе;/ ра́дуйся, еди́на избра́нная Бо́гу бы́вшая;/ ра́дуйся, колесни́це Со́лнца сла́вы:/ пріими́ Безпло́тнаго,/ во утро́бѣ Твое́й всели́тися хотя́щаго.
Благовѣству́етъ Гавріи́лъ Благода́тнѣй дне́сь: ра́дуйся, неневѣ́стная Ма́ти и неискусобра́чная! Не удивля́йся стра́нному моему́ зра́ку, ни ужаса́йся, арха́нгелъ бо е́смь. Змíй прелсти́ Еву иногда́, ны́нѣ же благовѣству́ю Тебѣ́ ра́дость, и пребу́деши нетлѣ́нна, и роди́ши Го́спода, Пречи́стая.
Сла́ва, и ны́нѣ, предпра́зднства, гла́съ 2:
Еже отъ вѣ́ка та́инство открыва́ется дне́сь, и Сы́нъ Бо́жій Сы́нь человѣ́чь быва́етъ, да, ху́ждшее воспріе́мь, пода́стъ ми́ лу́чшее. Солга́ся дре́вле Ада́мъ, и Бо́гъ возжелѣ́въ бы́ти, не бы́сть: Человѣ́къ быва́етъ Бо́гъ, да бога Ада́ма содѣ́лаетъ. Да весели́тся тва́рь, да ликовству́етъ естество́, я́ко арха́нгелъ Дѣ́вѣ со стра́хомъ предстои́тъ, и — е́же, ра́дуйся — прино́ситъ, печа́ли сопроти́вное. За милосе́рдіе ми́лости вочеловѣ́чивыйся, Бо́же на́шъ, сла́ва Тебѣ́.
НА УТРЕНИ.
Аллилу́ія и тро́ичны гла́са.
Аще ли случи́тся въ суббо́ту или недѣ́лю, на Бо́гъ Госпо́дь.., тропа́рь, гла́съ 4:
Дне́сь всемíрныя ра́дости нача́тки предпра́зднственное воспѣ́ти повелѣва́ютъ: се́ бо Гавріи́лъ прихо́дитъ, Дѣ́вѣ нося́ благовѣ́стіе, и къ Не́й вопіе́тъ: ра́дуйся, Благода́тная, Госпо́дь, съ Тобо́ю.
Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.
Мíръ обра́дованно весели́тся, я́ко ощути́въ Госпо́дне соше́ствіе на Тя́: за милосе́рдіе бо ми́лости съ небе́съ схо́дитъ во утро́бу Дѣ́вы всели́тися.
Се́ Тебѣ́, Цари́цѣ, посыла́ется боже́ственный арха́нгелъ Царя́ всѣ́хъ и Бо́га провозвѣсти́ти прише́ствіе и возгласи́ти Тебѣ́: ра́дуйся, воззва́ніе пра́отца.
Ста́мна свѣтоза́рная и всезлата́я, угото́вися на прія́тіе, ма́нны живо́тныя: на Тя́ бо пріи́детъ гла́сомъ а́нгеловымъ, въ Тя́ па́че естества́ вселя́яся.
Во утро́бу Твою́ чи́стую всели́тися хо́щетъ Госпо́дь, живы́й при́сно на небеси́, онебеси́ти бо гряде́тъ земноро́дныхъ смѣше́ніе, въ сіе́ му́дрѣ обо́лкся.
Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.
Земля́, я́же те́рніе страсте́й печа́льнѣ израсти́вшая, взыгра́я, лику́й: се́ бо Земледѣ́латель Безсме́ртный, кля́твы изыма́я тя́, ны́нѣ прихо́дитъ.
Боже́ственное руно́, гото́вися, Дѣ́во нескве́рная: на Тя́ бо Бо́гъ, я́ко до́ждь, сни́детъ изсуши́ти пото́ки преступле́нія.
Сви́тче боже́ственный, благоукраси́ся: пе́рстомъ бо Отчимъ напи́шется въ Тебѣ́ Боже́ственное Сло́во, вопло́щся, безслове́сія моего́ разрѣша́я преступле́ніе.
Златы́й свѣти́льниче, подыми́ Огнь Божества́, возсія́ющій Тобо́ю, и свѣ́тъ мíрови да́руя, и́мже зо́лъ на́шихъ тма́ разори́тся.
Наше́ствіемъ Ду́ха Всесвята́го, Отцу́ Сопресто́льнаго и Единосу́щнаго, гла́сомъ арха́нгеловымъ зачала́ еси́, Богороди́тельнице, Ада́мово воззва́ніе.
Дне́сь вся́ тва́рь ра́дуется, я́ко — е́же ра́дуйся, — Тебѣ́ вопіе́тъ а́нгелъ, благослове́нная Маріа́мъ и Пречи́стая Ма́ти Христа́ Бо́га. Дне́сь зміи́но омрача́ется шата́ніе, кля́твы бо пра́отчи разрѣши́ся соу́зъ. Тѣ́мже и по всему́ вопіе́мъ Ти́: ра́дуйся, Обра́дованная.
Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.
Та́инство, дре́вле пре́жде вѣ́къ предопредѣле́нное, явле́ніе начина́етъ пріима́ти. Земля́ и небе́сная, согла́сно возвесели́теся и ра́достно воскли́кните.
Пала́та вели́каго Царя́, слу́ховъ отве́рзи боже́ственныя вхо́ды, уже́ бо прихо́дитъ Христо́съ и́стина и всели́тся посреди́ Тебе́.
Прама́тернее поползнове́ніе исправля́яй, Изба́витель яви́тся, въ неискусобра́чную утро́бу вселя́яся, Тому́ воспои́мъ: сла́ва си́лѣ Твое́й, Го́споди.
Авваку́мъ Тя́ пронарече́ го́ру дре́вле, добродѣ́тельми присѣ́нну, изъ нея́же яви́тися хо́щетъ Бо́гъ на́шъ, Дѣ́во Всенепоро́чная, еди́на человѣ́комъ исправле́ніе.
Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.
О, нескве́рная Агнице! Агнецъ бо Бо́га на́шего во утро́бу Твою́ вни́ти тщи́тся, взе́мляй на́ша согрѣше́нія.
Же́злъ та́йный пома́лѣ процвѣте́тъ, я́коже пи́шетъ, Боже́ственный цвѣ́тъ отъ ко́рене Іессе́ева на́мъ явля́ющися.
Ангеловымъ гла́сомъ утучни́вшися, я́ко виногра́дъ, къ прозябе́нію гото́вися зрѣ́лаго, Дѣ́во, и нетлѣ́ннаго Гро́зда.
Велича́йшій проро́ковъ Иса́ія, возвесели́ся: Дѣ́ва бо, о Не́йже проре́клъ еси́, во чре́вѣ зачина́етъ Совѣ́та Вели́каго Ангела.
Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.
Ра́дуйся, — Тебѣ́ Гавріи́лъ арха́нгелъ вѣща́етъ, — ра́дость бо во чре́вѣ Твое́мъ пріи́меши несказа́нно, ю́же Ева преступле́ніемъ, Дѣ́во, погуби́.
Не опали́тъ, не ужаса́йся отню́дъ, утро́бы Твоея́ Огнь Божества́, Отрокови́це: купина́ бо дре́вле Тя́ вообража́ше, горя́щи, ника́коже опаля́ема, Всечи́стая.
Гора́, ю́же Даніи́лъ прови́дѣ Ду́хомъ, ра́дуйся, Дѣ́во, изъ Тебе́ бо мы́сленный Ка́мень усѣче́тся и сокруши́тъ де́моновъ безду́шная тре́бища.
Ми́ра Ца́рь къ Тебѣ́ пріи́детъ и Тобо́ю примири́тъ поборе́нныя и прельще́нныя, Богома́ти, лука́вымъ совѣ́томъ зміи́нымъ.
Всѣ́мъ земны́мъ нача́ло спасе́нія на́шего Ты́ еси́, Богоро́дице Дѣ́во, Бо́жій бо служи́тель съ небе́съ по́сланъ предста́ти Тебѣ́, вели́кій чинонача́льникъ Гавріи́лъ, ра́дость обра́дованную Ти́ принесе́. Тѣ́мъ вси́ зове́мъ Ти́: ра́дуйся, Невѣ́сто неневѣ́стная.
Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.
Киво́тъ слове́сный, его́же и́стинный Законополо́жникъ возлюби́въ, въ Тебѣ́ хо́щетъ селе́ніе сотвори́ти, благово́нія испо́лнися, Тобо́ю бо истлѣ́вшіяся обнови́тъ.
Проро́ческій боже́ственный ли́къ, я́коже ощути́въ, Отрокови́це, е́же на Тя́ Изба́вителя ми́рное прише́ствіе, зове́тъ Тебѣ́: ра́дуйся, всѣ́хъ избавле́ніе, ра́дуйся, Еди́на человѣ́ковъ спасе́ніе.
Не ужаса́йся гла́са, не диви́ся глаго́лющему: Бо́жій слуга́ е́сть. Яви́ти Тебѣ́ пріи́де та́инство, а́нгелы неизрече́нное, неискусобра́чная Дѣ́во благослове́нная.
Зри́ши тва́рь всю́, враго́мъ порабоще́ну, Дѣ́во, поми́ловати же ю́ за милосе́рдіе ми́лости хотя́ Тобо́ю благоволи́вый, да не у́бо словесе́мъ а́нгела не вѣ́руеши.
Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.
Ле́гкій о́блаче Свѣ́та, Неискусобра́чная, угото́вися: се́ Со́лнце свы́ше превозсія́етъ Тебѣ́ незаходи́мое, вма́лѣ у́бо въ Тебѣ́ кры́емо, мíру же явля́емо и рѣша́що зло́бы омраче́ніе.
Ангеловъ пе́рвый служи́тель возопи́ Тебѣ́ гла́съ ра́достенъ, возвѣща́я Тебѣ́, Чи́стая, Вели́каго Совѣ́та Ангела, воплоща́ема изъ Тебе́ за бла́гость, Ему́же вопіе́мъ: благослови́те, вся́ дѣла́ Госпо́дня, Го́спода.
Отца́ одесну́ю сѣдя́й, въ Тебѣ́ селе́ніе хо́щетъ сотвори́ти Пресу́щественный, Чи́стая, я́ко да поста́витъ одесну́ю Себе́ Тя́, бли́жнюю и до́брую я́ко Цари́цу, десни́цу же всѣ́мъ простре́тъ па́дшимъ и спасе́тъ ны́.
Яко ши́покъ удо́лій чи́стъ, я́ко кри́нъ благово́ненъ, позна́въ Тя́, Зижди́тель на́шъ Госпо́дь ны́нѣ возжела́ Твоея́ добро́ты, Чи́стая, и воплоти́тися изъ Твои́хъ крове́й хо́щетъ, я́ко да прожене́тъ злосмра́діе пре́лести бла́гостію.
Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.
Ева у́бо объя́тъ пло́дъ, сме́рть дѣ́лающь всегуби́тельную, посреди́ же Тебе́ возрасте́тъ Пло́дъ, безсме́ртія хода́тайственъ, Христо́съ — сла́дость на́ша, Влады́чице, Его́же воспѣва́юще, Тя́ сла́вимъ.
Преклони́въ небеса́ Твоя́, къ на́мъ сни́ди, престо́лъ уже́ угото́вася Тебѣ́, Сло́ве, утро́ба Дѣви́ча: на не́мже я́ко Ца́рь крѣпча́йшій сѣ́дъ, воздви́гнеши отъ паде́нія десни́цы Твоея́ созда́ніе.
Ни́ва несѣ́янная, Чи́стая, подыми́ сло́вомъ небе́сное Сло́во, я́ко пшени́цу плодоно́сну, прозяба́ющу изъ Тебе́, и концы́ пита́ющаго хлѣ́бомъ ра́зума, Ему́же покланя́ющеся, Тя́ сла́вимъ.
Возжела́ добро́ты Твоея́ Христо́съ, Всенепоро́чная, и во утро́бу Твою́ всели́ся, я́ко да отъ страсте́й безобра́зія ро́дъ человѣ́ческій изба́витъ и добро́ту дре́внюю да́руетъ, Ему́же покланя́ющеся, Тя́ сла́вимъ.
Гавріи́лъ, съ высоты́ слетѣ́въ, вопія́ше — е́же ра́дуйся, Богоро́дице, я́ко прама́тернюю кля́тву потребив́ъ всю́, су́щихъ изъ Ада́ма благослови́ изъ Нея́ прозябы́й.
Сла́ва, и ны́нѣ, гла́съ 4:
Язы́ка, его́же не вѣ́дяше, услы́ша Богоро́дица: глаго́лаше бо къ Не́й арха́нгелъ благовѣ́щенія глаго́лы; отоню́дуже вѣ́рно, пріи́мше цѣлова́ніе, зача́тъ Тя́ Превѣ́чнаго Бо́га. Тѣ́мже и мы́, ра́дующеся, вопіе́мъ Ти́: изъ Нея́ воплоти́выйся непрело́жно Бо́же, ми́ръ мíрови да́руй, и душа́мъ на́шимъ ве́лію ми́лость.
Въ пято́къ ве́чера и у́тро трезво́нъ въ двои́ ма́лыя ко́локола, каѳи́сма рядова́я. На Го́споди воззва́хъ.., поста́вимъ стихо́въ 10 и пое́мъ Тріо́ди самогла́сенъ дне́, два́жды, и му́ченичны 4, гла́са, и предпра́зднства на 4. Сла́ва, предпра́зднства, гла́съ 2: Благовѣству́етъ Гавріи́лъ... И ны́нѣ, догма́тикъ настоя́щаго гла́са. Вхо́дъ. Свѣ́те Ти́хій... Проки́менъ и чте́нія дне́. И Да испра́вится моли́тва моя́... И про́чее преждесвяще́нныхъ, по обы́чаю. Зри́: Аще ли нѣ́сть преждесвяще́нныя: На Го́споди воззва́хъ... стихи́ры предпра́зднства на 6. Сла́ва, предпра́зднства. И ны́нѣ, богоро́диченъ 1-й, гла́са. Та́же Свѣ́те Ти́хій.., безъ вхо́да. Проки́менъ и чте́ніе дне́. Посе́мъ Сподо́би, Го́споди... И ектенія́: Испо́лнимъ вече́рнюю... На стихо́внѣ самогла́сенъ Тріо́ди, два́жды пи́санъ на Го́споди воззва́хъ..., и му́чениченъ по гла́су его́ отъ Окто́иха. Припѣ́вы же глаго́лемъ обы́чныя: Къ Тебѣ́ возведо́хъ... Сла́ва, и ны́нѣ, предпра́зднства. По Ны́нѣ отпуща́еши... и по Отче на́шъ... тропа́рь предпра́зднства. Та́же ектенія́: Поми́луй на́съ, Бо́же.., и три́ покло́ны вели́кія. Посе́мъ Всесвята́я Тро́ице... Бу́ди и́мя Госпо́дне.., три́жды. Та́же Досто́йно е́сть... И отпу́стъ.
Повече́ріе вели́кое безъ покло́новъ. По 1-мъ трисвято́мъ вмѣ́сто Просвѣти́ о́чи мои́.., глаго́лемъ тропа́рь предпра́зднства: Дне́сь всемíрныя... По 2-мъ трисвято́мъ тропари́ обы́чныя: Поми́луй на́съ, Го́споди... Кано́нъ Окто́иха ме́ртвенъ. По Досто́йно... конда́къ предпра́зднства.
На у́трени, на Бо́гъ Госпо́дь... тропа́рь предпра́зднства, гла́съ 4: Дне́сь всемíрныя.., три́жды. И обы́чныя каѳи́смы и сѣда́льны Окто́иха. Непоро́чныхъ за упоко́й не пое́мъ. Пѣ́сни же 7-ю и 8-ю глаго́лемъ пре́жде въ пято́къ. Кано́нъ предпра́зднства, со ирмосо́мъ, на 6, ирмо́съ два́жды. По 3-й пѣ́сни сѣда́ленъ предпра́зднства. Сла́ва, и ны́нѣ, другíй. Егда́ же приспѣ́етъ четверопѣ́сно, и пое́мъ кано́нъ предпра́зднства, я́коже предписа́ся, и Тріо́ди на 8. По 6-й пѣ́сни конда́къ предпра́зднства. По 9-й пѣ́сни свѣти́ленъ предпра́зднства. На стихо́внѣ Окто́иха, и́же на хвали́техъ, настоя́щаго гла́са му́ченичны. Послѣ́дній сти́хъ оста́вимъ, припѣ́вы же глаго́лемъ обы́чныя: Испо́лнихомся зау́тра ми́лости Твоея́... И бу́ди свѣ́тлость... Сла́ва, и ны́нѣ, гла́съ 4, предпра́зднства: Язы́ка, его́же не вѣ́дяше.., и про́чая.
На часѣ́хъ, тропа́рь и конда́къ предпра́зднства.
На литургíи, бла́женна предпра́зднества, пѣ́сни 3-я и 6-я. По вхо́дѣ тропа́рь хра́ма Христо́ва, а́ще е́сть, та́же тропа́рь предпра́зднства. Сла́ва, конда́къ хра́ма. И ны́нѣ, предпра́зднства.
Въ суббо́ту, на вели́цѣй вече́рни, на Го́споди воззва́хъ.., стихи́ры воскре́сны 3, Креста́ 4, и предпра́зднства 3. Сла́ва, Креста́. И ны́нѣ, богоро́диченъ 1-й, гла́са. На литíи стихи́ра хра́ма. Сла́ва, Креста́. И ны́нѣ, предпра́зднства пи́сана на Го́споди воззва́хъ... На стихо́внѣ стихи́ры Окто́иха. Сла́ва, Креста́. И ны́нѣ, предпра́зднства пи́сана на у́трени, на стихо́внѣ, гла́съ 4: Язы́ка, его́же не вѣ́дяше... На благослове́ніи хлѣ́бовъ тропа́рь Богоро́дице Дѣ́во, ра́дуйся.., два́жды, и Креста́, еди́ножды. Посе́мъ Бу́ди и́мя Госпо́дне.., три́жды.
На у́трени, на Бо́гъ Госпо́дь.., тропа́рь воскре́сенъ, два́жды. Сла́ва, Креста́. И ны́нѣ, предпра́зднства. И про́чее обы́чно. Кано́нъ воскре́сенъ, со ирмосо́мъ, на 4, и Креста́ на 6, и предпра́зднства на 4. Катава́сія: Боже́ственнѣйшій прообрази́... По 3-й пѣ́сни конда́къ предпра́зднства и сѣда́льны Креста́. Сла́ва, и ны́нѣ, предпра́зднства. По 6-й пѣ́сни конда́къ и и́косъ Креста́. По 9-й пѣ́сни свѣти́ленъ воскре́сенъ. Сла́ва, Креста́. И ны́нѣ, предпра́зднства. Про́чее же на хвали́техъ и на литургíи все́, я́коже пи́сано въ недѣ́лю 3-ю поста́, на ряду́ въ 40-цѣ, то́чію на часѣ́хъ тропа́рь воскре́сенъ глаго́лемъ непремѣ́нно. Сла́ва, Креста́ и предпра́зднства глаго́лемъ, премѣня́юще. По Отче на́шъ... кондаки́ на всѣ́хъ часѣ́хъ, Креста́ и предпра́зднства, премѣня́юще глаго́лемъ.
Въ недѣ́лю ве́чера, стихи́ры на 10: Окто́иха покая́нны 4, и Тріо́ди 3, и предпра́зднства 3. Сла́ва, и ны́нѣ, предпра́зднства. Вхо́дъ. Проки́менъ вели́кій. Та́же Сподо́би, Го́споди.., и покло́ны 3. Посе́мъ ектенія́: Испо́лнимъ вече́рнюю... Та́же пое́мъ стихо́вну въ Тріо́ди съ припѣ́вы обы́чными. Сла́ва, и ны́нѣ, предпра́зднства и́же пи́санъ на у́трени на стихо́внѣ, гла́съ 4: Язы́ка, его́же не вѣ́дяше... Посе́мъ Ны́нѣ отпуща́еши... И трисвято́е съ покло́ны. И тропари́ Богоро́дице Дѣ́во, ра́дуйся.., съ покло́ны. И Го́споди, поми́луй, 40 и Небе́сный Царю́... По Честнѣ́йшую... 3 покло́ны. И отпу́стъ.
На у́трени, пое́мъ Аллилу́ія и тро́ичны гла́са. И обы́чныя каѳи́смы. И про́чее пое́мъ на у́трени и на часѣ́хъ, я́коже указа́ся пре́жде въ ряду́ въ 24-й де́нь.
Ве́черъ пое́мъ и зау́тра все́ съ покло́ны. Во вто́рникъ ве́чера каѳи́сма рядова́я. На Го́споди воззва́хъ.., стихи́ры Тріо́ди 3 и предпра́зднства 3. Сла́ва, Креста́. И ны́нѣ, предпра́зднства. Проки́менъ и чте́нія дне. На стихо́внѣ стихи́ры Тріо́ди. Сла́ва, Креста́. И ны́нѣ, предпра́зднства.
На у́трени въ сре́ду кано́нъ Тріо́ди, со ирмосо́мъ, на 6, и предпра́зднства на 4. А идѣ́же трипѣ́снецъ, пое́мъ кано́нъ Креста́, со ирмосо́мъ, на 4, и предпра́зднства на 2 по два́ тропаря́ за еди́нъ, и трипѣ́снца на 8. Послѣди́ ирмо́съ трипѣ́снца. По 3-й пѣ́сни конда́къ предпра́зднства и сѣда́ленъ дне́. Сла́ва, и ны́нѣ, предпра́зднства. По 6-й пѣ́сни конда́къ и и́косъ Креста́. По 9-й пѣ́сни свѣти́ленъ тро́иченъ гла́са. На хвали́техъ стихи́ры Креста́ пи́саны на Го́споди воззва́хъ.., оста́вшія. На стихо́внѣ Тріо́ди. Сла́ва, Креста́. И ны́нѣ, предпра́зднства. На 1-мъ часѣ́ быва́етъ поклоне́ніе Креста́, по обы́чаю.
Си́це пое́мъ слу́жбу предпра́зднства и Креста́ и въ пято́къ, а́ще случи́тся, тоя́жде седми́цы.
Въ сре́ду ве́чера, на Го́споди воззва́хъ.., стихи́ры на 10: Тріо́ди на 6 и предпра́зднства на 4. Сла́ва, Креста́, гла́съ 8: Дне́сь неприкоснове́нный... И ны́нѣ, предпра́зднства. Та́же вхо́дъ, и про́чая преждесвяще́нныхъ.
На у́трени же пое́мъ все́, я́коже указа́ся на ряду́ въ 24-й де́нь.
И предпра́зднства Благовѣ́щенія пое́мъ слу́жбу, стихи́ры и кано́нъ, въ понедѣ́льникъ на ряду́, Мине́и же свята́го пое́мъ на повече́ріи.
И пое́мъ слу́жбу предпра́зднства, стихи́ры и кано́нъ, напреди́ въ сре́ду на ряду́ вели́каго ра́ди кано́на. Рядова́го же свята́го слу́жбу та́кожде пое́мъ на повече́ріи.
На вели́цѣй вече́рни, стихи́ры воскре́сны 3, и восто́чны Анато́ліевы 3, и предпра́зднства 4. Сла́ва, предпра́зднства. И ны́нѣ, богоро́диченъ 1-й, гла́са. И про́чее по обы́чаю.
На у́трени, тропа́рь воскре́сенъ, два́жды. Сла́ва, и ны́нѣ, предпра́зднства. И про́чее воскре́сно. Кано́нъ воскре́сенъ, со ирмосо́мъ, на 4, и Богоро́дицы на 2, и Тріо́ди на 4, и предпра́зднства на 4. Катава́сія: Отве́рзу уста́ моя́... По 3-й пѣ́сни конда́къ предпра́зднства и сѣда́ленъ Тріо́ди. Сла́ва, и ны́нѣ, предпра́зднства. По 6-й пѣ́сни конда́къ воскре́сенъ и и́косъ. По 9-й пѣ́сни свѣти́ленъ воскре́сенъ. Сла́ва, и ны́нѣ, предпра́зднства. И про́чее, по обы́чаю, воскре́сно и Тріо́ди.
На 1-мъ часѣ́, тропа́рь воскре́сенъ. Сла́ва, предпра́зднства. И ны́нѣ, богоро́диченъ часо́въ.
Святы́хъ же слу́жбы, Іоа́нна Лѣ́ствичника и Марíи Еги́птяныни, въ сія́ недѣ́ли оставля́ются и пою́тся, егда́ екклисіа́рхъ разсу́дитъ.
Въ пято́къ ве́чера, на Го́споди воззва́хъ.., пое́мъ стихи́ры Тріо́ди, самогла́сенъ дне́, два́жды, и му́чениченъ, и ака́ѳиста на 4, и предпра́зднства 3. Сла́ва, предпра́зднства. И ны́нѣ, ака́ѳиста. Вхо́дъ. Проки́менъ и чте́ніе дне́. Да испра́вится моли́тва моя́... И про́чее преждесвяще́нныхъ.
Зри́: Четверопѣ́снецъ же Тріо́ди пое́мъ на повече́ріи.
На у́трени, на Бо́гъ Госпо́дь.., тропа́рь ака́ѳиста, два́жды. Сла́ва, и ны́нѣ, предпра́зднства. И обы́чныя каѳи́смы. Кондаки́ и и́косы ака́ѳиста, по чи́ну и́хъ. Кано́нъ предпра́зднства, со ирмосо́мъ, на 6 и ака́ѳиста на 8. Катава́сія: Отве́рзу уста́ моя́... По 3-й и по 6-й пѣ́сни кондаки́ и и́косы, по обы́чаю. По 9-й пѣ́сни свѣти́ленъ ака́ѳиста, два́жды. Сла́ва, и ны́нѣ, предпра́зднства. На хвали́техъ стихи́ры ака́ѳиста на 4, гла́съ 4. Подо́бенъ: Яко до́бля... Сла́ва, и ны́нѣ, гла́съ 4: Язы́ка, его́же не вѣ́дяше... Славосло́віе вели́кое и отпу́стъ.
Пое́тся предпра́зднства слу́жба пре́жде въ четверто́къ тоя́же седми́цы, я́коже указа́ся сего́ мѣ́сяца въ 24-й де́нь.
Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 114 – 120.