Минеи Богослужебные.
Святы́хъ му́ченикъ Се́ргія и Ва́кха.
ВЕЧЕРЪ.
На Го́споди воззва́хъ: стихи́ры на 6, гла́съ 6. Подо́бенъ: Все́ отло́жше.
Все́ презрѣ́вше/ земно́е могу́тство/ и пло́ть возненави́дѣвше,/ Бо́га Свята́го возлюби́сте,/ и, одѣя́ніе безче́стное руга́тельнѣ нося́ще,/ съ небесе́ прія́сте свѣ́та оде́жду/ и ри́зу нерастерза́емую,/ съ не́юже лику́юще,/ вѣнцено́сцы пребога́тіи,/ покро́въ на́мъ всѣ́мъ бу́дите и одѣя́ніе,/ жи́зни обнаже́ннымъ/ зміи́нымъ прельще́ніемъ.
Се́ргіе пресла́вный/ и прехва́льный Ва́кхо,/ сосу́ди Ду́ха,/ пото́цы, источа́юще всѣ́мъ цѣле́нія,/ на́ши храни́теліе/ и крѣ́пцыи побо́рницы Це́ркве бы́вше,/ самово́льныя же́ртвы/ и заколе́нія честна́я,/ свѣти́льницы, озаря́юще/ свѣ́томъ благоче́стія концы́,/ разрѣши́те тму́ належа́щую душа́мъ на́шимъ/ и мра́къ зло́бный ве́сь отжени́те.
Незаходи́мая селе́нія,/ и разу́мное весе́ліе,/ и свѣ́тъ невече́рній,/ и жи́знь безпеча́льную и неги́блемую,/ отъ тлѣ́ннаго тѣлесе́ страда́льцы сла́вніи изше́дше, воспрія́сте./ Но моли́теся си́хъ и на́мъ улучи́ти,/ стра́сти умертви́вшимъ/ и грѣха́ укло́ншимся,/ Се́ргіе и Ва́кхе,/ предста́теле и приста́нища вѣ́рныхъ,/ со дерзнове́ніемъ моля́щеся/ о душа́хъ на́шихъ.
Се́ргій и Ва́кхъ, свѣ́тлая му́чениковъ и сугу́бая заря́, мучи́телей бо свирѣ́пство низложи́сте, и́дольскую же ле́сть упраздни́сте и богоразу́мія соверше́нную та́йну, свѣ́тлымъ гла́сомъ высоковѣща́юще, проповѣ́дасте. Ихже моли́твами, Христе́, си́хъ Законода́вче, Подвигополо́жниче же и Вѣнцеда́телю, и на́съ сподо́би на неви́димыя и лука́выя си́лы держа́вно увязти́ся.
Распина́ема Христа́ Человѣколю́бца/ ви́дящи, Пречи́стая,/ и ре́бра ископова́ема копіе́мъ,/ пла́чущи, вопія́ше:/ что́ сіе́, Сы́не Мо́й?/ Что́ Ти безблагода́тніи лю́діе возда́ша,/ за я́же сотвори́лъ еси́ до́брая и́мъ?/ И тщи́шися безча́дствовати Мя́, Вселюбе́знѣйшій?/ Удивля́юся, Благоутро́бне,/ Твоему́ во́льному распя́тію.
Укрѣпи́ся Христо́выхъ му́ченикъ на враги́ ополче́ніе, въ ни́хже, я́ко свѣти́льницы мірстíи, свѣ́тятъ, благосла́вніи и изря́днѣйшіи страстоте́рпцы, Се́ргій и Ва́кхъ. Си́мъ обрати́ плещи́ лука́вое ополче́ніе де́монское. Си́мъ почуди́шася мучи́теліе, и удиви́шася а́нгели, ви́дяще безпло́тнаго отъ пло́тныхъ попира́ема. Вѣ́рныхъ же Це́рковь, всепра́зднственный пра́здникъ и мірску́ю ра́дость соверша́ющи, вопіе́тъ: Иже не́мощію плотско́ю Связавы́й крѣ́пкаго, моли́твами святы́хъ Твои́хъ, спаси́ ду́ши на́ша.
Что́ зри́мое видѣ́ніе,/ е́же Мои́ма очи́ма ви́дится, о Влады́ко?/ Содержа́й всю́ тва́рь/ на дре́во воздви́женъ бы́въ/ и умира́еши, всѣ́мъ дая́й жи́знь? —/ Богоро́дица, пла́чущися, глаго́лаше,/ егда́ узрѣ́ на Крестѣ́ возноси́ма/ изъ Нея́ неизрече́нно возсія́вшаго/ Бо́га и Человѣ́ка.
Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.
Удобре́ніе Христо́выхъ страстоте́рпецъ и о́чи Христо́вы Це́ркве, о́чи просвѣти́те ду́шъ на́шихъ, Се́ргіе многострада́льне и Ва́кхе пресла́вне: моли́теся ко Го́споду, я́ко да убѣжи́мъ тмы́ грѣхо́вныя и свѣ́та яви́мся о́бщницы невече́рняго моли́твами ва́шими, святíи.
НА УТРЕНИ.
Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяномъ пу́ть глубины́ новосодѣ́лавшая.
Се́ргіе, уго́дниче Христо́въ, смоле́бника пріи́мъ и спомо́щника Ва́кха приснопа́мятнаго, съ ни́мже стра́сти богому́дренно соверши́лъ еси́, сло́во мнѣ́ му́дрости, ва́съ пою́щу, да́руйте.
На недви́жимѣмъ Христо́вы ка́мени вѣ́ры, святíи му́ченицы, положи́вше основа́ніе, на тве́рдѣмъ степе́ни утвержде́ни, забра́ло и столпи́ благоче́стія яви́стеся.
Глаго́ломъ вѣ́ровавше Христо́вымъ и къ Нему́ неукло́нно взира́юще, все́ оплева́сте преходя́щее благосла́віе, святíи, сла́вы же присносу́щныя уя́звени бы́сте раче́ніемъ.
Ро́да, и оте́чества, и че́сти Христа́ ра́ди обнажи́вшеся, веселя́стеся, и, одѣ́яни въ женолѣ́пное одѣя́ніе, мужему́дренно нетлѣ́нія оде́ждею свѣ́тло облеко́стеся.
Богоро́диченъ: Ми́лостива бы́ти вѣ́рнымъ и благоувѣ́тлива, Богома́ти, умоли́ Сло́ва, Его́же родила́ еси́ тѣле́сно, къ на́мъ прише́дшаго: Тя́ бо предста́тельницу и спасе́ніе стяжа́хомъ.
Ирмо́съ: Еди́не Вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й: одушевле́нный хра́ме неизрече́нныя сла́вы Твоея́, Человѣколю́бче.
Еди́нъ Вѣ́дый, я́ко Бо́гъ, вся́ пре́жде бытія́, къ Нему́ ва́ша ны́нѣ ви́дѣвъ предложе́нія, му́дрости сло́вомъ, и боже́ственнаго зна́нія, и тве́рдаго смы́сла оби́льно испо́лни, я́ко Своя́ во́ини, блаже́нніи.
Зако́нно уго́дницы Христу́ пострада́ти изво́ливше, тлѣ́ющую сла́ву и теку́щую, и мíра всего́, и міроде́ржца по́мысломъ богому́дрымъ страстоте́рпцы му́ченицы возненави́дѣсте, любо́вію Зижди́теля.
Пречи́стыми ума́ приложе́ніи Го́споду предстоя́ще, и отъ та́мо су́щія зари́ исполня́еми, и неизрече́ннаго блаже́нства я́вѣ наслажда́ющеся, ва́съ чту́щія отъ напа́стей, страстоте́рпцы, изба́вите.
Богоро́диченъ: Сме́ртію держи́мь пе́рвѣе Ада́мъ, ны́нѣ изба́вися Твои́мъ Рождество́мъ, Еди́на Богоневѣ́сто: Жи́знь бо и́стинно Ѵпоста́сную, соедине́ну пло́ти, Чи́стая, по Ѵпоста́си па́че естества́ и сло́ва родила́ еси́.
Мучениколю́бцы, пріиди́те, разу́мныя би́серы Госпо́дни и страстоте́рпцы Се́ргія почти́мъ и Ва́кха святы́я, я́ко вра́жію ле́сть му́жески попра́вшія и и́дольскую всю́ крѣ́пость разори́вшія, тѣ́мже досто́йно съ небесе́ вѣнцы́ побѣ́ды пріе́мше, со а́нгелы лику́ютъ. Къ ни́мже вси́ возопіе́мъ: моли́те Христа́ Бо́га прегрѣше́ній оставле́ніе дарова́ти чту́щимъ любо́вію святу́ю па́мять ва́шу. Два́жды.
Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихъ Ти ся, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.
Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя Стра́сти Твоя́.
Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.
Свѣти́ла два́ отъ за́пада возсія́вша, проти́вно зе́млю тогда́ держа́щу нечести́вому, творя́ща ше́ствіе, къ Твоему́ же восто́ку пріидо́ша свѣтоно́сному, Христе́, и спаси́тельному.
Ни о́гнь, ни ме́чь, ни гоне́нія, ниже́ ра́ны благочести́ваго ра́зума о Бо́зѣ разлучи́ ва́съ, жи́знь бо преоби́дѣсте конча́емую, Его́ ра́ди, достосла́вніи, и прія́сте блаже́нную сла́дость и неги́блющую.
Свѣти́льницы и́стинно неле́стніи тве́рдь Це́ркве Христо́вы озаря́ютъ свѣ́томъ Боже́ственнаго сія́нія и ду́ши благочести́выхъ возвеселя́ютъ, чуде́съ зари́ испуща́юще.
Ва́кхъ боже́ственный и преизя́щный Се́ргій, лѣ́тнымъ премѣне́ніемъ благоче́стія рачи́тели и мучениколю́бцы духо́вно на пи́ршество призыва́ютъ, до́блести своя́ предлага́юще.
Богоро́диченъ: Ору́жіе, две́ри Еде́мскія храня́щее, уступа́етъ ны́нѣ вѣ́рнымъ и пріе́млетъ свѣ́тло честно́ю кро́вію изъ Твоего́ чре́ва Ро́ждшагося, Всенепоро́чная, зна́менаныя ви́дящее и благода́тію.
Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія правосла́вно пою́щихъ Тя́.
Прогна́вше ле́сть и́стины ору́жіемъ, и мучи́телей ра́ны крѣ́пко претерпѣ́вше, и побѣди́теле бы́сте, отъ Христа́ вѣнча́вшеся, и ны́нѣ досто́йно веселите́ся.
Укрѣпля́еми непобѣди́мою си́лою и благода́тію Тро́ицы, дво́ица му́ченикъ низложи́ тмы́ кня́зя и тому́ порабоще́ныя, тѣ́мъ че́стно ублажа́ются.
Терпѣ́ніемъ, и душе́внымъ му́жествомъ, и крѣ́постію по́мысла дво́ица му́ченикъ сла́вная превзы́де всю́ гони́телей го́рькую я́рость и со а́нгелы водворя́ется.
Богоро́диченъ: Возсія́ла еси́, Богома́ти, я́ко у́тро, Со́лнце незаходи́мое, соедине́ное пло́тію по Ѵпоста́си, на руку́ нося́щи, и́стинныя пра́вды: тѣ́мъ Тя́ вси́ прославля́емъ.
Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.
Цѣле́ній исто́чники му́ченикъ мо́щи бога́тно источа́ютъ: почерпе́мъ усе́рдно, у́бо вѣ́рніи, и страстоте́рпцы ублажи́мъ, сла́внаго Се́ргія и Ва́кха приснослову́щаго.
Ненави́дяще беззако́нныхъ совселе́нія и пре́лесть упраздня́юще, небе́сное ше́ствіе благостоя́нно, Се́ргій и Ва́кхъ ше́ствоваху и ко Христо́ву достиго́ша приста́нищу невла́емому.
Отверза́ются страстоно́сцемъ му́ченикомъ врата́ небе́сная, благоговѣ́юще стра́сти честнѣ́й, подо́бнѣй Бо́га на́шего благода́тнѣй и прогоня́ющей де́монскія полки́.
Богоро́диченъ: Истинно Тя́, Ма́терь Бо́жію, Пречи́стая, му́дрствующе, возвѣща́емъ: Безнача́льнаго бо Сы́на Единоро́днаго, пре́жде вѣ́къ возсія́вшаго изъ Отца́, несказа́нно, Дѣ́во, родила́ еси́.
Ра́зумъ на враги́ му́жески вооружи́вше, всю́ тѣ́хъ ле́сть разруши́сте, и, побѣ́ду свы́ше пріи́мше, му́ченицы всехва́льніи, единомы́сленно вопію́ще: добро́ и красно́ е́же бы́ти съ Бо́гомъ.
На небесѣ́хъ, Христе́, живу́ще Се́ргій же и Ва́кхъ и Боже́ственнаго свѣ́та отъ Тебе́ исполня́еми, мене́, во тмѣ́ невѣ́дѣнія ходя́щаго, предвари́ ско́ро и страсте́й исхити́, еди́не Безсме́ртне, оде́жду мнѣ́ покая́нія низпосла́въ, я́ко да свѣ́тлымъ умо́мъ свѣтоно́сный си́хъ пра́здникъ воспою́ и возопію́, веселя́ся: добро́ и красно́ е́же бы́ти съ Бо́гомъ.
Ирмо́съ: Тебе́, у́мную, Богоро́дице, пе́щь разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.
Ра́дуйся, дво́ице страстоте́рпцевъ сла́вная; ра́дуйся, побѣди́вшая свѣ́тло мучи́тельская преще́нія; ра́дуйся, соверши́вшая тече́ніе блаже́нное; ра́дуйся, пи́ще, всегда́ вну́трь пребыва́ющая; ра́дуйся, я́снѣ предстоя́щая Бо́гу, богоблаже́нная.
Всесвѣ́тліи на земли́ ходя́ще, де́монская очеса́ и ли́ца гони́телей, му́ченицы, омрачи́сте свѣ́томъ благода́ти и заря́ми страда́нія, хва́льнаго воспѣва́юще Бо́га и пресла́внаго.
Хра́ми Бо́га бы́вше одушевле́нніи Живу́щаго и, живу́ще, страда́льцы, си́лою Бо́жіею укрѣпля́еми и́стинно, полки́ побѣди́сте враго́въ, всеблаже́нніи, крѣ́пкаго во бранѣ́хъ Бо́га пѣ́сньми восхваля́юще.
Богоро́диченъ: Пречи́стый Ты́ хра́мъ была́ еси́ и пресвяты́й киво́тъ, пріе́мши Творца́ неопи́саннаго и непостижи́маго, во утро́бѣ Твое́й вмѣсти́вши, Единоро́днаго Бо́га Сло́ва, Благослове́нная Всечи́стая Влады́чице.
Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.
Иже росо́ю дре́вле отроко́мъ пла́мень Прохлади́вый, стоя́щія въ по́двизѣхъ укрѣпи́ Твоя́ му́ченики, пою́щія: благослови́те вся́ дѣла́ Госпо́дня Го́спода, по́йте и превозноси́те во вся́ вѣ́ки.
Ядови́тая и душевре́дная ласка́нія мучи́тельская у́мно страстоте́рпцы отрази́ша, Христу́ вопію́ще и глаго́люще: благослови́те вся́ дѣла́ Госпо́дня Го́спода, по́йте и превозноси́те во вся́ вѣ́ки.
Дѣйстви́тельны храни́тели на́мъ, Се́ргія и Ва́кха, и́стинно вѣне́чники, Христо́съ показа́, храня́щія и пою́щія: благослови́те вся́ дѣла́ Госпо́дня Го́спода, по́йте и превозноси́те во вся́ вѣ́ки.
Напра́ви мою́, Влады́ко Христе́, моли́твами му́ченикъ стезю́ добродѣ́телей и удо́бно Тебѣ́ взыва́ти сподо́би: благослови́те вся́ дѣла́ Госпо́дня Го́спода, по́йте и превозноси́те во вся́ вѣ́ки.
Богоро́диченъ: Блажу́ Тя́, и́стинную Бо́га на́шего Ма́терь, — ра́дуйся, — со а́нгеломъ принося́ Ти́, Чи́стая, Всенепоро́чная Влады́чице, — Тя́ бо непреста́нно вся́ дѣла́ Госпо́дня пою́тъ и превозно́сятъ во вся́ вѣ́ки.
Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.
Всего́ Христа́ стяжа́ли есте́, мíръ бо ве́сь Того́ ра́ди оста́вили есте́, и ны́нѣ, му́ченицы, въ небе́сныхъ водворя́етеся, ли́ки вы́шнихъ си́лъ и муже́й блаже́нныхъ ви́дяще свѣ́тлости.
Дае́ши сопряже́ніе всеизря́днѣйшее похвале́нія любо́вію Тебѣ́ принося́щимъ, благода́ть свы́ше и прегрѣше́ній оставле́ніе, моля́щи еди́наго Милосе́рдаго, къ Нему́же тща́шеся, низоре́вностныхъ небрегли́ есте́.
Заре́ю Трисія́ннаго Божества́ просвѣще́ни, непобѣди́міи му́ченицы, многобо́жное преле́стное безбо́жіе и мучи́телей стра́хъ отри́нуша, и ны́нѣ нетлѣ́нныя наслажда́ются сла́дости ра́йскія.
Тече́ніе до́брое соверши́вше, благочести́ву же вѣ́ру сохрани́ти потща́вшеся, недви́жимое прія́ти сподо́бистеся Ца́рствіе, пресла́вніи му́ченицы, вѣнце́мъ добро́ты и благолѣ́пія увязе́ни.
Богоро́диченъ: О, па́че ума́ чуде́съ Твои́хъ! Бо́жіе бо Сло́во, пло́ть бы́вшее, еди́на родила́ еси́ преесте́ственно, Ма́ти Дѣ́во, вся́ческая Боже́ственнымъ хотѣ́ніемъ содержа́щаго му́дрѣ и окормля́юща.
Свѣтоза́рную дво́ицу страстоте́рпецъ, Се́ргія и Ва́кха, похва́лимъ: ра́нъ бо стремле́нія претерпѣ́ша и горды́ню низложи́ша всезло́бнаго мучи́теля Тро́ическою си́лою.
Херуви́мъ яви́ся сла́внѣйши и серафи́мъ показа́ся вы́шши, я́ко Бо́га ро́ждши воплоще́нна, земны́мъ же показа́вша стези́ пра́выя наступа́ти, ко спасе́нію приводя́щія.
Дави́дски вопія́ху Се́ргій и Ва́кхъ му́ченицы, — се́ ны́нѣ что́ добро́ или́ что́ красно́, но е́же жи́ти бра́тіи вку́пѣ, — не связу́еми естества́ любо́вію, но вѣ́ры нра́вомъ. Тѣ́мже святíи врага́ попра́ша, и, кре́стъ взе́мше, Христу́ послѣ́доваша, и мо́лятся Царю́ и Бо́гу дарова́ти душа́мъ на́шимъ ве́лію ми́лость. Два́жды.
Проро́чески святы́мъ, соше́дшеся, пѣ́снь возопіи́мъ, — се́ ны́нѣ что́ добро́ или́ что́ красно́, но е́же пребыва́ти бра́тіи вку́пѣ, — не сро́дства послѣ́дствомъ, но вѣ́ры совокупле́ніемъ Свята́го Ду́ха, тлѣ́нная бо отверго́ша вся́, взе́мше кре́стъ на ра́мена, и послѣ́доваша Христу́ Се́ргій и Ва́кхъ, до́бліи му́ченицы. На небесѣ́хъ же дерзнове́ніе иму́ще, мо́лятся всегда́ о на́съ дарова́ти на́мъ ве́лію ми́лость.
Обу́выйся Се́ргій во угото́ваніе ева́нгельскаго мíра, гвозде́й обуве́нія, кро́вію отъ но́гъ теку́щею, змíя, наблюда́ющаго пя́ту на́шу, ослѣпи́ и свидѣ́тельства вѣне́цъ прія́. Тѣ́мъ моли́твами и́хъ, Христе́ Бо́же, пригвозди́ стра́ху Твоему́ пло́ти на́ша и поми́луй на́съ.
Ко́ль добро́ и ко́ль красно́, самобра́тная мы́сль му́ченикъ Твои́хъ, Го́споди, и́хже бо естество́ плотско́е бра́тій не сотвори́, сія́ вѣ́ра братолю́бная му́дрствовати до кро́ве сотвори́. Тѣ́хъ моли́твами, Христе́ Бо́же, поми́луй на́съ.
Ору́жіе се́рдце Твое́ про́йде, Пречи́стая, егда́ Сы́на Твоего́ на Крестѣ́ ви́дѣла еси́ и вопія́ла еси́: не безча́дну Мя́ покажи́, Сы́не Мо́й и Бо́же Мо́й, соблюды́й Мя́ по Рождествѣ́ Дѣ́ву.
Ви́дящи дре́вле Це́рковь Бо́жія ва́ша по́двиги, му́ченицы всемíрніи, дне́сь свѣ́тло украша́ется и вѣ́рно пра́зднуетъ въ па́мяти ва́шей, я́ко у́тварь ца́рскую, нося́щи срамоту́, на боже́ственныя ва́ша вы́я наложе́нную руга́тельнѣ, е́юже сла́вы сподо́бистеся небе́сныя и безконе́чнаго блаже́нства.
Егда́ нескве́рная Агница ви́дѣ Своего́ Агнца, на заколе́ніе, я́ко человѣ́ка, во́лею влеко́ма, пла́чущи, глаго́лаше: безча́дствовати Мя́ ны́нѣ тщи́шися, Христе́, Ро́ждшую Тя́, что́ сіе́ сотвори́лъ еси́, Изба́вителю вся́ческихъ? Оба́че воспѣва́ю и сла́влю Твою́, ю́же па́че ума́ и сло́ва, кра́йнюю бла́гость, Человѣколю́бче.
НА ЛИТУРГІИ.
Блаже́нна окто́иха на 4 и святы́хъ пѣ́снь 3-я на 4. Проки́менъ, гла́съ 4: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, я́ко одесну́ю мене́ е́сть, да не подви́жуся. Апо́столъ къ Евре́омъ, зача́ло 330. Аллилу́ія, гла́съ 2. Сти́хъ: Се́ что́ добро́, или́ что́ красно́, но е́же жи́ти бра́тіи вку́пѣ. Ева́нгеліе Луки́, зача́ло 106. Прича́стенъ: Ра́дуйтеся пра́ведніи о Го́сподѣ, пра́вымъ подоба́етъ похвала́.
Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 73 – 78 об.