Апостол
К Солуняном Первое Послание Святаго Апостола Павла.
Зачало: 262 263 264 265 266 267 268 269 270 271 272 273
Послание к солуняном первое, зачало 262.
1 Фес 1:1–5
В понедельник 23-я недели.
Па́вел и Силуа́н, и Тимофе́й це́ркви Солу́нстей о Бо́зе Отце́ и Го́споде Иису́се Христе́: благода́ть вам и мир от Бо́га Отца́ на́шего и Го́спода Иису́са Христа́. Благодари́м Бо́га всегда́ о всех вас, помина́ние ва́ше творя́ще в моли́твах на́ших, непреста́нно помина́юще ва́ше де́ло ве́ры, и труд любве́, и терпе́ние упова́ния Го́спода на́шего Иису́са Христа́, пред Бо́гом и Отце́м на́шим, ве́дяще, бра́тие возлю́бленная, от Бо́га избра́ние ва́ше, я́ко благовествова́ние на́ше не бысть к вам в сло́ве то́чию, но и си́лою, и Ду́хом Святы́м, и во извеще́нии мно́зе, я́коже и ве́сте, какови́ бы́хом в вас ра́ди вас.
Послание к солуняном первое, зачало 263.
1 Фес 1:6–10
Во вторник 23-я недели.
Бра́тие, вы подо́бницы бы́сте нам и Го́споду, прие́мше сло́во в ско́рби мно́зе с ра́достию Ду́ха Свята́го, я́ко бы́ти вам о́браз всем ве́рующым в Македо́нии и Аха́ии. От вас бо промче́ся сло́во Госпо́дне не то́кмо в Македо́нии и Аха́ии, но и во вся́ко ме́сто ве́ра ва́ша, я́же к Бо́гу, изы́де, я́ко не тре́бовати нам глаго́лати что. Ти́и бо о нас возвеща́ют, како́в вход име́хом к вам, и ка́ко обрати́стеся к Бо́гу от и́дол, рабо́тати Бо́гу жи́ву и и́стинну и жда́ти Сы́на Его́ с небе́с, Его́же воскреси́ из ме́ртвых, Иису́са, избавля́ющаго нас от гне́ва гряду́щаго.
Послание к солуняном первое, зачало 264.
1 Фес 2:1–8
В среду 23-я недели.
Бра́тие, ве́сте вход наш и́же к вам, я́ко не вотще́ бысть, но предпострада́вше и досажде́ни бы́вше, я́коже ве́сте, в Фили́ппех, дерзну́хом о Бо́зе на́шем глаго́лати к вам благовествова́ние Бо́жие со мно́гим по́двигом. Утеше́ние бо на́ше не от пре́лести, ни от нечистоты́, ни ле́стию, но я́коже искуси́хомся от Бо́га ве́рни бы́ти прия́ти благовествова́ние, та́ко глаго́лем, не а́ки челове́ком угожда́юще, но Бо́гу искуша́ющему сердца́ на́ша. Никогда́же бо в словеси́ ласка́ния бы́хом к вам, я́коже ве́сте, ниже́ вино́ю лихоима́ния, Бог свиде́тель! Ни и́щуще от челове́к сла́вы, ни от вас, ни от ине́х, могу́ще в тяготе́ бы́ти, я́коже Христо́вы Апо́столи, но бы́хом ти́си посреде́ вас, я́коже дои́лица гре́ет своя́ ча́да. Та́ко жела́юще вас, благоволи́хом пода́ти вам не то́чию благовествова́ние Бо́жие, но и ду́шы своя́, зане́же возлю́блени бы́сте нам.
Послание к солуняном первое, зачало 265.
1 Фес 2:9–14А
В четверток 23-я недели.
Бра́тие, по́мните труд наш и по́двиг: нощь бо и день де́лающе, да не отяготи́ти ни еди́наго от вас, пропове́дахом вам благовествова́ние Бо́жие. Вы свиде́тели и Бог, я́ко преподо́бно и пра́ведно, и непоро́чно вам ве́рующым бы́хом, я́коже ве́сте, зане́ еди́наго кого́ждо вас, я́коже оте́ц ча́да своя́, моля́ще и утеша́юще вас, и свиде́тельствующе вам ходи́ти досто́йно Бо́гу, призва́вшему вы во Свое́ Ца́рство и сла́ву. Сего́ ра́ди и мы благодари́м Бо́га непреста́нно, я́ко прие́мше сло́во слы́шания Бо́жия от нас, прия́сте не а́ки сло́во челове́ческо, но я́коже есть вои́стинну сло́во Бо́жие, е́же и де́йствуется в вас ве́рующих. Вы бо подо́бницы бы́сте, бра́тие, це́рквам Бо́жиим су́щым во Иуде́и о Христе́ Иису́се.
Послание к солуняном первое, зачало 266.
1 Фес 2:14–19
В пяток 23-я недели.
Бра́тие, вы подо́бницы бы́сте це́рквам Бо́жиим су́щым во Иуде́и о Христе́ Иису́се. Зане́ та́яжде и вы пострада́сте от свои́х сплеме́нник, я́коже и ти́и от иуде́й, уби́вших и Го́спода Иису́са и Его́ проро́ки, и нас изгна́вших, и Бо́гу не угоди́вших, и всем челове́ком проти́вящихся, и возбраня́ющих нам глаго́лати язы́ком, да спасу́тся, во е́же испо́лнити им грехи́ своя́ всегда́, пости́же же на них гнев до конца́. Мы же, бра́тие, осироте́вше от вас ко вре́мени часа́ лице́м, а не се́рдцем, ли́шше тща́хомся лице́ ва́ше ви́дети мно́гим жела́нием. Те́мже хоте́хом приити́ к вам, аз у́бо Па́вел, еди́ною и два́жды, и возбрани́ нам сатана́. Кто бо нам упова́ние или́ ра́дость, или́ вене́ц похвале́ния? Не и вы ли пред Го́сподем на́шим Иису́с Христо́м во прише́ствии Его́?
Послание к солуняном первое, зачало 267.
1 Фес 2:20–3:8
В понедельник 24-я недели.
Бра́тие, вы есте́ сла́ва на́ша и ра́дость. Те́мже уже́ не терпя́ще, благоволи́хом оста́тися во Афи́нех еди́ни, и посла́хом Тимофе́а, бра́та на́шего и служи́теля Бо́жия и споспе́шника на́шего во благове́стии Христо́ве, утверди́ти вас и уте́шити о ве́ре ва́шей, я́ко ни еди́ному смуща́тися в ско́рбех сих, са́ми бо ве́сте, я́ко на сие́ и́стое лежи́м. И́бо егда́ у вас бе́хом, предреко́хом вам, я́ко и́мамы скорбе́ти, е́же и бысть, и ве́сте. Сего́ ра́ди и аз ктому́ не терпя́, посла́х разуме́ти ве́ру ва́шу, да не ка́ко искуси́л вы бу́дет искуша́яй, и вотще́ бу́дет труд наш. Ны́не же прише́дшу Тимофе́ю к нам от вас и благовести́вшу нам ве́ру ва́шу и любо́вь, и я́ко и́мате па́мять о нас бла́гу, всегда́ жела́юще нас ви́дети, я́коже и мы вас. Сего́ ра́ди уте́шихомся, бра́тие, о вас, во вся́кой ско́рби и ну́жде на́шей, ва́шею ве́рою. Я́ко мы ны́не жи́ви есмы́, а́ще вы стоите́ о Го́споде.
Послание к солуняном первое, зачало 268.
1 Фес 3:9–13
Вторник 24-я недели.
Бра́тие, ко́е благодаре́ние Бо́гу мо́жем возда́ти о вас, о вся́кой ра́дости, е́юже ра́дуемся вас ра́ди пред Бо́гом на́шим, нощь и день преизли́ха моля́щеся ви́дети лице́ ва́ше и соверши́ти лише́ние ве́ры ва́шея? Сам же Бог и Оте́ц наш и Госпо́дь наш Иису́с Христо́с да испра́вит путь наш к вам. Вас же Госпо́дь да умно́жит и да избы́точествит любо́вию друг ко дру́гу и ко всем, я́коже и мы к вам, во е́же утверди́ти сердца́ ва́ша непоро́чна в святы́ни пред Бо́гом и Отце́м на́шим, в прише́ствие Го́спода на́шего Иису́са Христа́ со все́ми святы́ми Его́. Ами́нь.
Послание к солуняном первое, зачало 269.
1 Фес 4:1–12
В среду 24-я недели.
Бра́тие, про́сим вы и мо́лим о Христе́ Иису́се да я́коже прия́сте от нас, ка́ко подоба́ет вам ходи́ти и угожда́ти Бо́гови, я́коже и ходи́те, да избы́точествуете па́че, ве́сте бо, какова́ повеле́ния да́хом вам Го́сподем Иису́сом. Сия́ бо есть во́ля Бо́жия, свя́тость ва́ша, храни́ти себе́ саме́х от блуда́, и ве́дети кому́ждо от вас свой сосу́д стяжава́ти во святы́ни и че́сти, а не в стра́сти по́хотней, я́коже и язы́цы не ве́дящии Бо́га. И е́же не преступа́ти и лихои́мствовати в ве́щи бра́та своего́, зане́ мсти́тель есть Госпо́дь о всех сих, я́коже и пре́жде реко́хом к вам и засвиде́тельствовахом. Не призва́ бо нас Бог на нечистоту́, но во свя́тость. Те́мже у́бо отмета́яй не челове́ка отмета́ет, но Бо́га, да́вшаго Дух Свой Святы́й в нас. О братолю́бии же, не тре́буете, да пи́шется к вам, са́ми бо вы Бо́гом уче́ни есте́, е́же люби́ти друг дру́га, и́бо творите́ то ко всей бра́тии, су́щей во всей Македо́нии. Мо́лим же вы, бра́тие, избы́точествовати па́че, и любе́зно прилежа́ти, е́же безмо́лвствовати и де́яти своя́ и де́лати свои́ми рука́ма, я́коже повеле́хом вам, да хо́дите благообра́зно ко вне́шним и ни еди́наго же тре́бовати.
Послание к солуняном первое, зачало 270.
1 Фес 4:13–17
Сие же мертвым.
Бра́тие, не хощу́ вас неве́дети о уме́рших, да не скорбите́, я́коже и про́чии не иму́щии упова́ния. А́ще бо ве́руем, я́ко Иису́с у́мре и воскре́се та́ко и Бог уме́ршия во Иису́се приведе́т с Ним. Сие́ бо вам глаго́лем сло́вом Госпо́дним, я́ко мы живу́щии, оста́вшии в прише́ствие Госпо́дне, не и́мамы предвари́ти уме́рших. Я́ко Сам Госпо́дь в повеле́нии, во гла́се Арха́нгелове и в трубе́ Бо́жии сни́дет с небесе́, и ме́ртвии о Христе́ воскре́снут пе́рвее. Пото́м же мы, живу́щии оста́вшии, ку́пно с ни́ми восхище́ни бу́дем на о́блацех в сре́тение Госпо́дне на возду́се и та́ко всегда́ с Го́сподем бу́дем.
Послание к солуняном первое, зачало 271.
1 Фес 5:1–8
В четверток 24-я недели.
Бра́тие, о ле́тех и о времене́х не тре́бе есть вам писа́ти. Са́ми бо вы изве́стно ве́сте, я́ко день Госпо́день, я́коже тать в нощи́, та́ко прии́дет. Егда́ бо реку́т: мир и утвержде́ние, тогда́ внеза́пу нападе́т на них всегуби́тельство, я́коже боле́знь во чре́ве иму́щей, и не и́мут избежа́ти. Вы же, бра́тие, не́сте во тме, да день вас я́коже тать пости́гнет. Вси бо вы сы́нове све́та есте́, и сы́нове дне, не́смы но́щи, ниже́ тмы. Те́мже у́бо да не спим, я́коже и про́чии, но да бо́дрствуим и трезви́мся. Спя́щии бо, в нощи́ спят, и упива́ющиися в нощи́ упива́ются. Мы же, сы́нове су́ще дне, да трезви́мся, обо́лкшеся в броню́ ве́ры и любве́, и шлем упова́ния спасе́ния.
Послание к солуняном первое, зачало 272.
1 Фес 5:9–13; 24–28
В пяток 24-я недели.
Бра́тие, не положи́ нас Бог в гнев, но в получе́ние спасе́ния Го́сподем на́шим Иису́с Христо́м, уме́ршим за нас, да а́ще бдим, а́ще ли спим, ку́пно с Ним и оживе́м. Сего́ ра́ди утеша́йте друг дру́га, и созида́йте ко́йждо бли́жняго, я́коже и творите́. Мо́лим же вы, бра́тие, зна́йте тружда́ющихся у вас, и настоя́телей ва́ших о Го́споде, и наказу́ющих вы, и име́йте я́ по преизли́ха в любви́ за де́ло их, ми́рствуйте в себе́.
Ве́рен Призва́вый вас, И́же и сотвори́т. Бра́тие, моли́теся о нас. Целу́йте бра́тию всю лобза́нием святы́м. Заклина́ю вы Го́сподем, прочести́ посла́ние сие́ пред все́ю свято́ю бра́тиею. Благода́ть Го́спода на́шего Иису́са Христа́ с ва́ми. Ами́нь.
Послание к солуняном первое, зачало 273.
1 Фес 5:14–23
Суббота 32-я.
Бра́тие, мо́лим вы: вразумля́йте безчи́нныя, утеша́йте малоду́шныя, заступа́йте немощны́я, долготерпи́те ко всем. Блюди́те, да никто́же зла за зло кому́ возда́ст, но всегда́ до́брое гони́те, и друг ко дру́гу, и ко всем. Всегда́ ра́дуйтеся, непреста́нно моли́теся, о всем благодари́те, сия́ бо есть во́ля Бо́жия о Христе́ Иису́се в вас. Ду́ха не угаша́йте, проро́чествия не уничижа́йте. Вся же искуша́юще, до́брая держи́те. От вся́кия ве́щи злы́я отгреба́йтеся. Сам же Бог ми́ра да освяти́т вы всесоверше́нны о всем, и всесоверше́н ваш дух, и душа́, и те́ло непоро́чно в прише́ствие Го́спода на́шего Иису́са Христа́ да сохрани́тся.