Апостол
К Колоссаем Послание Святаго Апостола Павла.
Зачало: 249 249 от полу́ 250 251 252 253 254 255 256 257 258 259 260 260 от полу́ 261
Послание к колоссаем, зачало 249.
Кол 1:1–2; 7–11
Во вторник 21-я недели.
Па́вел, Апо́стол Иису́с Христо́в во́лею Бо́жиею, и Тимофе́й брат, су́щым в Колосса́ех святы́м и ве́рным бра́тиям о Христе́ Иису́се.
Я́коже и уве́десте от Епафра́са, возлю́бленнаго срабо́тника на́шего, и́же есть ве́рен о вас служи́тель Христо́в, и́же и яви́ нам ва́шу любо́вь в ду́се. Сего́ ра́ди и мы, от него́же дне слы́шахом, не престае́м о вас моля́щеся и прося́ще, да испо́лнитеся в ра́зуме во́ли Его́, во вся́кой прему́дрости и ра́зуме духо́внем, я́ко ходи́ти вам досто́йне Бо́гу во вся́ком угожде́нии и вся́ком де́ле бла́зе, плодонося́ще и возраста́юще в ра́зуме Бо́жии, вся́кою си́лою возмога́юще по держа́ве сла́вы Его́, во вся́ком терпе́нии и долготерпе́нии с ра́достию.
Послание к колоссаем, зачало 249: от полу́.
Кол 1:3–6
В субботу 21-я недели.
Бра́тие, благода́ть вам и мир от Бо́га Отца́ на́шего, и Го́спода Иису́са Христа́. Благодари́м Бо́га и Отца́ Го́спода на́шего Иису́са Христа́, всегда́ о вас моля́щеся, слы́шавше ве́ру ва́шу, я́же о Христе́ Иису́се и любо́вь, ю́же и́мате ко всем святы́м, за упова́ние отложе́нное вам на небесе́х, е́же пре́жде слы́шасте в словеси́ и́стины благовествова́ния, су́щаго в вас, я́коже и во всем ми́ре: и есть плодоно́сно и расти́мо, я́коже и в вас, от него́же дне слы́шасте и разуме́сте благода́ть Бо́жию во и́стине.
Послание к колоссаем, зачало 250.
Кол 1:12–18
Неделя 28-я.
Бра́тие, благодаря́ще Бо́га и Отца́, призва́вшаго вас в прича́стие насле́дия святы́х во све́те. И́же изба́ви нас от вла́сти те́мныя и преста́ви в Ца́рство Сы́на любве́ Своея́, о Не́мже и́мамы избавле́ние Кро́вию Его́ и оставле́ние грехо́в. И́же есть о́браз Бо́га неви́димаго, перворожде́н всея́ тва́ри. Я́ко о Нем создана́ бы́ша вся́ческая, я́же на небеси́, и я́же на земли́, ви́димая и неви́димая, а́ще престо́ли, а́ще госпо́дствия, а́ще нача́ла, а́ще вла́сти, вся́ческая Тем и о Нем созда́шася. И Той есть пре́жде всех, и вся́ческая в Нем состоя́тся. И Той есть глава́ те́лу Це́ркве, И́же есть нача́ток, перворожде́н из ме́ртвых, я́ко да бу́дет во всех Той пе́рвенствуя.
Послание к колоссаем, зачало 251.
Кол 1:18–23
В среду 21-я недели.
Бра́тие, Христо́с есть глава́ те́лу Це́ркве, И́же есть нача́ток, перворожде́н из ме́ртвых, я́ко да бу́дет во всех Той пе́рвенствуя. Я́ко в Нем благоизво́ли всему́ исполне́нию всели́тися, и Тем примири́ти вся́ческая к Себе́, умиротвори́в Кро́вию креста́ Его́, чрез Него́, а́ще земна́я, а́ще ли небе́сная. И вас, иногда́ су́щих очужде́нных и враго́в помышле́ньми в де́лех лука́вых, ны́не же примири́ в те́ле Пло́ти Его́ сме́ртию Его́, предста́вити вас свя́ты и непоро́чны и непови́нны пред Собо́ю, а́ще у́бо пребыва́ете в ве́ре основа́ни и тве́рди, и неподви́жими от упова́ния благовествова́ния, е́же слы́шасте, пропове́данное всей тва́ри поднебе́сней, ему́же бых аз Па́вел служи́тель.
Послание к колоссаем, зачало 252.
Кол 1:24–29
В четверток 21-я недели.
Бра́тие, ны́не ра́дуюся во страда́ниих мои́х о вас, я́ко исполня́ю лише́ние скорбе́й Христо́вых во пло́ти мое́й за Те́ло Его́, е́же есть Це́рковь. Е́йже бых аз служи́тель по смотре́нию Бо́жию, да́нному мне в вас, испо́лнити сло́во Бо́жие, та́йну сокрове́нную от век и от родо́в, ны́не же яви́ся святы́м Его́, И́мже восхоте́ Бог сказа́ти, ко́е бога́тство сла́вы та́йны сея́ во язы́цех, и́же есть Христо́с в вас, упова́ние сла́вы, Его́же мы пропове́дуем, наказу́юще вся́каго челове́ка и уча́ще вся́кой прему́дрости, да предста́вим вся́каго челове́ка соверше́нна о Христе́ Иису́се, в Не́мже и тружда́юся и подвиза́юся по де́йству Его́ де́йствуемому во мне си́лою.
Послание к колоссаем, зачало 253.
Кол 2:1–7
В пяток 21-я недели.
Бра́тие, хощу́ вас ве́дети, коли́к по́двиг и́мам о вас и о су́щих в Лаодики́и и во Иерапо́ли, и ели́цы не ви́деша ли́ца моего́ во пло́ти, да уте́шатся сердца́ их, сне́мшихся в любви́ и во вся́ком бога́тстве извеще́ния ра́зума, в позна́ние та́йны Бо́га и Отца́ и Христа́, в Не́мже суть вся сокро́вища прему́дрости и ра́зума сокрове́нна. Сие́ же глаго́лю, да никто́же вас прельсти́т в словопре́нии. А́ще бо и пло́тию отстою́, но ду́хом с ва́ми есмь, ра́дуяся и ви́дя ваш чин и утвержде́ние ва́шея ве́ры, я́же во Христа́. Я́коже у́бо прия́сте Христа́ Иису́са Го́спода, та́коже в Нем ходи́те, укорене́ни и назда́ни в Нем и изве́ствовани ве́рою, я́коже научи́стеся, избы́точествующе в ней благодаре́нием.
Послание к колоссаем, зачало 254.
Кол 2:8–12
На Обрезание Господне.
Бра́тие, блюди́теся, да никто́же вас бу́дет прельща́я филосо́фиею и тще́тною ле́стию, по преда́нию челове́ческому, по стихи́ам ми́ра, а не по Христе́. Я́ко в том живе́т вся́ко исполне́ние Божества́ теле́сне. И да бу́дете в Нем испо́лнени, и́же есть глава́ вся́кому нача́лу и вла́сти; о Не́мже и обре́зани бы́сте обре́занием нерукотворе́нным, в совлече́нии те́ла грехо́внаго пло́ти, во обре́зании Христо́ве, спогре́бшеся Ему́ креще́нием; о Не́мже и совоста́сте ве́рою, де́йством Бо́га, воскреси́вшаго Его́ из ме́ртвых.
Послание к колоссаем, зачало 255.
Кол 2:13–20
В понедельник 22-я недели.
Бра́тие, Бог вы ме́ртвы су́щя в прегреше́ниих и в необре́зании пло́ти ва́шея, сооживи́л есть со Христо́м, дарова́в нам вся прегреше́ния, истреби́в е́же на нас рукописа́ние уче́ньми, е́же бе сопроти́вно нам, и то взят от среды́, пригвозди́в е́ на Кресте́, совле́к нача́ла и вла́сти, изведе́ в позо́р дерзнове́нием, изобличи́в их в Себе́. Да никто́же у́бо вас осужда́ет о яде́нии, или́ о питии́, или́ о ча́сти пра́здника, или́ о новоме́сячиих, или́ о суббо́тах, я́же суть стень гряду́щих, те́ло же Христо́во. Никто́же вас да прельща́ет изволе́нным ему́ смиреному́дрием и слу́жбою А́нгельскою, я́же не уве́де учя́, без ума́ дмя́ся от ума́ пло́ти своея́, а не держя́ главы́, из нея́же все те́ло, соста́вы и соу́зы подае́мо и сне́млемо, расти́т возраще́ние Бо́жие. А́ще у́бо умро́сте со Христо́м от стихи́й ми́ра, почто́ а́ки живу́ще в ми́ре стяза́етеся?
Послание к колоссаем, зачало 256.
Кол 2:20–3:3
Во вторник 22-я недели.
Бра́тие, а́ще умро́сте со Христо́м от стихи́й ми́ра, почто́ а́ки живу́ще в ми́ре стяза́етеся? Не косни́ся, ниже́ вкуси́, ни осяжи́; я́же суть вся во истле́ние употребле́нием, по за́поведем и уче́нием челове́ческим; я́же суть сло́во у́бо иму́ще прему́дрости в самово́льней слу́жбе, и смиреному́дрии и непощаде́нии те́ла, не в че́сти ко́ей к сы́тости пло́ти. А́ще у́бо воскресну́сте со Христо́м, вы́шних ищи́те, иде́же есть Христо́с одесну́ю Бо́га седя́; го́рняя му́дрствуйте, а не земна́я. Умро́сте бо, и живо́т ваш сокрове́н есть со Христо́м в Бо́зе.
Послание к колоссаем, зачало 257.
Кол 3:4–11
Неделя 29-я.
Сие же и в неделю праотцем.
Бра́тие, егда́ Христо́с яви́тся, живо́т ваш, тогда́ и вы с Ним явите́ся в сла́ве. Умертви́те у́бо у́ды ва́ша, я́же на земли́, блуд, нечистоту́, страсть, по́хоть злу́ю, и лихоима́ние, е́же есть идолослуже́ние. И́хже ра́ди гряде́т гнев Бо́жий на сы́ны противле́ния. В ни́хже и вы иногда́ ходи́сте, егда́ живя́сте в них. Ны́не же отложи́те и вы та вся: гнев, я́рость, зло́бу, хуле́ние, срамосло́вие от уст ва́ших. Не лжи́те друг на дру́га, совле́кшеся ве́тхаго челове́ка с дея́ньми его́. И обле́кшеся в но́ваго, обновля́емаго в ра́зум, по о́бразу созда́вшаго его́. Иде́же несть е́ллин, ни иуде́й, обре́зание, и необре́зание, ва́рвар и скиф, раб и свобо́дь, но вся́ческая и во всех Христо́с.
Послание к колоссаем, зачало 258.
Кол 3:12–16
Неделя 30-я.
Сие же и преподобным.
Бра́тие, облецы́теся у́бо, я́коже избра́ннии Бо́жии, свя́ти и возлю́бленни, во утро́бы щедро́т, бла́гость, смиреному́дрие, кро́тость и долготерпе́ние, прие́млюще друг дру́га и проща́юще себе́, а́ще кто на кого́ и́мать порече́ние, я́коже и Христо́с прости́л есть вам, та́ко и вы. Над все́ми же си́ми стяжи́те любо́вь, я́же есть соу́з соверше́нства. И мир Бо́жий да водворя́ется в сердца́х ва́ших, во́ньже и зва́ни бы́сте во еди́ном те́ле, и благода́рни быва́йте. Сло́во Христо́во да вселя́ется в вас бога́тно, во вся́кой прему́дрости, уча́ще и вразумля́юще себе́ саме́х во псалме́х и пе́ниих и пе́снех духо́вных, во благода́ти пою́ще в сердца́х ва́ших Го́сподеви.
Послание к колоссаем, зачало 259.
Кол 3:17–4:1
В среду 22-я недели.
Бра́тие, все е́же а́ще что твори́те сло́вом или́ делом, вся во и́мя Го́спода Иису́са Христа́, благодаря́ще Бо́га и Отца́ Тем. Жены́, повину́йтеся свои́м муже́м, я́коже подоба́ет о Го́споде. Му́жие, люби́те жены́ ва́ша, и не огорча́йтеся к ним. Ча́да, послу́шайте роди́телей свои́х во всем, сие́ бо уго́дно есть Го́сподеви. Отцы́, не раздража́йте чад ва́ших, да не уныва́ют. Раби́, послу́шайте по всему́ плотски́х госпо́дий ва́ших, не пред очи́ма то́чию рабо́тающе а́ки человекоуго́дницы, но в простоте́ се́рдца, боя́щеся Бо́га. И вся́ко, е́же а́ще что творите́, от души́ де́лайте, я́коже Го́споду, а не челове́ком, ве́дяще, я́ко от Го́спода прии́мете воздая́ние достоя́ния, Го́споду бо Христу́ рабо́таете. А оби́дяй восприи́мет, е́же оби́де, и несть лица́ обинове́ния. Госпо́дие, пра́вду и уравне́ние рабо́м подава́йте, ве́дяще, я́ко и вы и́мате Го́спода на небесе́х.
Послание к колоссаем, зачало 260.
Кол 4:2–9
В четверток 22-я недели.
Бра́тие, в моли́тве терпи́те, бо́дрствующе в ней со благодаре́нием. Моля́щеся и о нас вку́пе, да Бог отве́рзет нам две́ри сло́ва, проглаго́лати та́йну Христо́ву, ея́же ра́ди и свя́зан есмь, да явлю́ ю́, я́коже подоба́ет ми глаго́лати. В прему́дрости ходи́те ко вне́шним, вре́мя искупу́юще. Сло́во ва́ше да быва́ет всегда́ во благода́ти, со́лию растворе́но, ве́дети, ка́ко подоба́ет вам еди́ному кому́ждо отвещава́ти. А я́же о мне, вся ска́жет вам Тихи́к, возлю́бленный брат и ве́рен служи́тель и срабо́тник о Го́споде, его́же посла́х к вам на се и́стое, я́ко да разуме́ет я́же о вас и уте́шит сердца́ ва́ша, со Они́симом, ве́рным и возлю́бленным бра́том на́шим, и́же есть от вас, вся вам ска́жут, я́же зде.
Послание к колоссаем, зачало 260: от полу́.
Кол 4:5–9; 14; 18
Луке Евангелисту.
Бра́тие, в прему́дрости ходи́те ко вне́шним, вре́мя искупу́юще. Сло́во ва́ше да быва́ет всегда́ во благода́ти, со́лию растворе́но, ве́дети, ка́ко подоба́ет вам еди́ному кому́ждо отвещава́ти. А я́же о мне, вся ска́жет вам Тихи́к, возлю́бленный брат и ве́рен служи́тель, и срабо́тник о Го́споде, его́же посла́х к вам на се и́стое, я́ко да разуме́ет я́же о вас и уте́шит сердца́ ва́ша, со Они́симом, ве́рным и возлю́бленным бра́том на́шим, и́же есть от вас, вся вам ска́жут, я́же зде.
Целу́ет вы Лука́ врачь возлю́бленный, и Дима́с.
Целова́ние мое́ю руко́ю Па́влею. Помина́йте моя́ у́зы. Благода́ть со все́ми ва́ми. Ами́нь.
Послание к колоссаем, зачало 261.
Кол 4:10–18
В пяток 22-я недели.
Бра́тие, целу́ет вы Ариста́рх спле́нник мой, и Ма́рко анепсе́й Варна́вин, о не́мже прия́сте за́поведи, а́ще прии́дет к вам, приими́те его́, и Иису́с нарече́нный Иу́ст, су́щии от обре́зания: си́и еди́ни споспе́шницы во Ца́рство Бо́жие, и́же бы́ша ми утеше́ние. Целу́ет вы Епафра́с, и́же от вас, раб Иису́са Христа́, всегда́ подвиза́яйся о вас в моли́твах, да бу́дете соверше́ни и испо́лнени во вся́кой во́ли Бо́жией. Свиде́тельствую бо о нем, я́ко и́мать ре́вность мно́гу и боле́знь о вас и о су́щих в Лаодики́и и во Иерапо́ли. Целу́ет вы Лука́ врачь возлю́бленный, и Дима́с. Целу́йте бра́тию су́щую в Лаодики́и, и Нимфа́на, и дома́шнюю его́ це́рковь. И егда́ прочте́тся посла́ние сие́ у вас, сотвори́те, да и в Лаодики́йстей це́ркви прочте́но бу́дет, и напи́саное от Лаодики́и да и вы прочте́те. И рцы́те Архи́ппу: блюди́ служе́ние, е́же прия́л еси́ о Го́споде, да доверши́ши е́. Целова́ние мое́ю руко́ю Па́влею. Помина́йте моя́ у́зы. Благода́ть со все́ми ва́ми. Ами́нь.