Апостол
К Галатом Послание Святаго Апостола Павла.
Зачало: 198 199 200 201 202 203 204 205 206 207 208А 208Б 209 210А 210Б 210 от полу́ 211 212 213 214 215 215 от полу́
Послание к галатом, зачало 198.
Гал 1:1–10; 1:20–2:5
В четверток 14-я недели.
Па́вел, Апо́стол ни от челове́к, ни челове́ком, но Иису́с Христо́м и Бо́гом Отце́м воскреси́вшим Его́ из ме́ртвых, и и́же со мно́ю вся бра́тия, це́рквам Галати́йским: благода́ть вам и мир от Бо́га Отца́ и Го́спода на́шего Иису́са Христа́, да́вшаго Себе́ по гресе́х на́ших, я́ко да изба́вит ны от настоя́щаго ве́ка лука́ваго, по во́ли Бо́га и Отца́ на́шего, Ему́же сла́ва во ве́ки веко́в, ами́нь. Чужду́ся, я́ко та́ко ско́ро прелага́етеся от зва́вшаго вы благода́тию Христо́вою, во и́но благовествова́ние: е́же несть и́но, то́чию не́цыи суть смуща́ющии вы и хотя́щии преврати́ти благовествова́ние Христо́во. Но и а́ще мы, или́ А́нгел с небесе́ благовести́т вам па́че, е́же благовести́хом вам, ана́фема да бу́дет. Я́коже предреко́хом, и ны́не па́ки глаго́лю: а́ще кто вам благовести́т па́че, е́же прия́сте, ана́фема да бу́дет. Ны́не бо челове́ки препира́ю, или́ Бо́га, или́ ищу́ челове́ком угожда́ти? А́ще бо бых еще́ челове́ком угожда́л, Христо́в раб не бых у́бо был.
А я́же пишу́ вам, се пред Бо́гом, я́ко не лгу. Пото́м же приидо́х в страны́ Си́рския и Килики́йския. Бех же не зна́емь лице́м це́рквам иуде́йским, я́же о Христе́, то́чию же слы́шаще бя́ху, я́ко гоня́й нас иногда́, ны́не благовеству́ет ве́ру, ю́же иногда́ разруша́ше, и сла́вляху о мне Бо́га. Пото́м же по четырена́десяти ле́тех па́ки взыдо́х во Иерусали́м с Варна́вою, пое́м с собо́ю и Ти́та. Взыдо́х же по открове́нию, и возложи́х им благовествова́ние, е́же пропове́дую во язы́цех, наедине́ же мни́мым, да не ка́ко вотще́ теку́, или́ теко́х. Но ни Тит, и́же со мно́ю, е́ллин сый, ну́жден бысть обре́затися. И за привше́дшую лжебра́тию, и́же привнидо́ша согля́дати свобо́ды на́шея, ю́же и́мамы о Христе́ Иису́се да нас порабо́тят. И́мже ни к часу́ повину́хомся в покоре́ние, да и́стина благове́стия пребу́дет в вас.
Послание к галатом, зачало 199.
Гал 1:3–10
В субботу 25-ю.
Бра́тие, благода́ть вам и мир от Бо́га Отца́ и Го́спода на́шего Иису́са Христа́, да́вшаго Себе́ по гресе́х на́ших, я́ко да изба́вит ны от настоя́щаго ве́ка лука́ваго, по во́ли Бо́га и Отца́ на́шего, Ему́же сла́ва во ве́ки веко́в, ами́нь. Чужду́ся, я́ко та́ко ско́ро прелага́етеся от зва́вшаго вы благода́тию Христо́вою, во и́но благовествова́ние: е́же несть и́но, то́чию не́цыи суть смуща́ющии вы и хотя́щии преврати́ти благовествова́ние Христо́во. Но и а́ще мы, или́ А́нгел с небесе́ благовести́т вам па́че, е́же благовести́хом вам, ана́фема да бу́дет. Я́коже предреко́хом, и ны́не па́ки глаго́лю: а́ще кто вам благовести́т па́че, е́же прия́сте, ана́фема да бу́дет. Ны́не бо челове́ки препира́ю, или́ Бо́га, или́ ищу́ челове́ком угожда́л? А́ще бо бых еще́ челове́ком угожда́л, Христо́в раб не бых у́бо был.
Послание к галатом, зачало 200.
Гал 1:11–19
Неделя 20-я.
Сие же и в неделю по Рождестве Христове.
Бра́тие, сказу́ю вам, Благовествова́ние благовеще́нное от мене́, я́ко несть по челове́ку. Ни бо аз от челове́ка прия́х е́, ниже́ научи́хся, но явле́нием Иису́с Христо́вым. Слы́шасте бо мое́ житие́ иногда́ в жидо́встве, я́ко попремно́гу гони́х Це́рковь Бо́жию и разруша́х ю́, и преспева́х в жидо́встве па́че мно́гих све́рстник мои́х в ро́де мое́м, и́злиха ревни́тель сый оте́ческих мои́х преда́ний. Егда́ же благоволи́ Бог, Избра́вый мя от чре́ва ма́тере моея́ и призва́вый благода́тию Свое́ю, яви́ти Сы́на Своего́ во мне, да благовеству́ю Его́ во язы́цех, а́бие не приложи́хся пло́ти и кро́ви, ни взыдо́х во Иерусали́м к пре́дним мене́ апо́столом, но идо́х во Арави́ю, и па́ки возврати́хся в Дама́ск. Пото́м же по трие́х ле́тех взыдо́х во Иерусали́м согля́дати Петра́, и пребы́х у него́ дний пятьна́десять. Ино́го же от апо́стол не ви́дех, то́кмо Иа́кова бра́та Госпо́дня.
Послание к галатом, зачало 201.
Гал 2:6–10
В пяток 14-я недели.
Бра́тие, от мня́щихся бы́ти что, якови́ не́когда бе́ша, ничто́же ми ра́знствует: лица́ Бог челове́ча не прие́млет. Мне бо мни́мии ничто́же привозложи́ша, но сопроти́вное, уразуме́вше, я́ко уве́рено ми бысть благове́стие необре́зания, я́коже Петру́ обре́зания. И́бо Споспе́шествовавый Петру́ в посла́ние обре́зания, поспе́шествова и мне во язы́ки. И позна́вше благода́ть да́нную ми, Иа́ков и Ки́фа и Иоа́нн, мни́мии столпи́ бы́ти, де́сная да́ша мне и Варна́ве обще́ния, да мы во язы́ки, они́ же во обре́зание, то́чию ни́щих да по́мнима, е́же и потща́хся сие́ и́стое сотвори́ти.
Послание к галатом, зачало 202.
Гал 2:11–16
В понедельник 15-я недели.
Бра́тие, егда́ прии́де Петр во Антиохи́ю, в лице́ ему́ проти́вустах, я́ко зазо́рен бе. Пре́жде бо да́же не приити́ не́ким от Иа́кова, с язы́ки ядя́ше, егда́ же приидо́ша, опря́ташеся и отлуча́шеся, боя́ся су́щих от обре́зания. И лицеме́ришася с ним и про́чии иуде́и, я́ко и Варна́ве приста́ти лицеме́рству их. Но егда́ ви́дех, я́ко не пра́во хо́дят ко и́стине Благовествова́ния, реко́х Петру́ пред все́ми: а́ще ты, иуде́й сый, язы́чески, а не иуде́йски живе́ши, почто́ язы́ки ну́диши иуде́йски жи́тельствовати? Мы естество́м иуде́и, а не от язы́к гре́шницы. Уве́девше же, я́ко не оправди́тся челове́к от дел зако́на, но то́кмо ве́рою Иису́с Христо́вою, и мы во Христа́ Иису́са ве́ровахом, да оправди́мся от ве́ры Христо́вы, а не от дел зако́на, зане́ не оправди́тся от дел зако́на вся́ка плоть.
Послание к галатом, зачало 203.
Гал 2:16–20
Неделя 21-я.
Бра́тие, уве́девше я́ко не оправди́тся челове́к от дел зако́на, но то́кмо ве́рою Иису́с Христо́вою, и мы во Христа́ Иису́са ве́ровахом, да оправди́мся от ве́ры Христо́вы, а не от дел зако́на, зане́ не оправди́тся от дел зако́на вся́ка плоть. А́ще ли, и́щуще оправди́тися о Христе́, обрето́хомся и са́ми гре́шницы, Христо́с у́бо греху́ ли служи́тель? Да не бу́дет. А́ще бо, я́же разори́х, сия́ па́ки созида́ю, престу́пника себе́ представля́ю. Аз бо зако́ном зако́ну умро́х, да Бо́гови жив бу́ду. Христо́ви сраспя́хся. Живу́ же не ктому́ аз, но живе́т во мне Христо́с. А е́же ны́не живу́ во пло́ти, ве́рою живу́ Сы́на Бо́жия, возлюби́вшаго мене́ и преда́вшаго Себе́ по мне.
Послание к галатом, зачало 204.
Гал 2:21–3:7
Во вторник 15-я недели.
Бра́тие, не отмета́ю благода́ти Бо́жия. А́ще бо зако́ном пра́вда, у́бо Христо́с ту́не у́мре. О, несмы́сленнии Гала́те, кто вы прельсти́л есть не покори́тися и́стине, и́мже пред очи́ма Иису́с Христо́с преднапи́сан бысть, в вас ра́спят? Сие́ еди́но хощу́ уве́дети от вас, от дел ли зако́на Ду́ха прия́сте, или́ от слу́ха ве́ры? Та́ко ли несмы́сленни есте́? Наче́нше ду́хом, ны́не пло́тию скончава́ете? Толи́ка пострада́сте ту́не, а́ще же и ту́не. Подая́й у́бо вам Ду́ха и де́йствуяй си́лы в вас, от дел ли зако́на, или́ от слу́ха ве́ры? Я́коже Авраа́м ве́рова Бо́гу, и вмени́ся ему́ в пра́вду. Разуме́йте у́бо, я́ко су́щии от ве́ры, си́и суть сы́нове Авраа́мли.
Послание к галатом, зачало 205.
Гал 3:8–12
В субботу 26-ю.
Сие же и в субботу пред Рождеством Христовым.
Бра́тие, предуви́девше Писа́ние, я́ко от ве́ры оправда́ет язы́ки Бог, пре́жде благовествова́ Авраа́му, я́ко благословя́тся о тебе́ вси язы́цы. Те́мже су́щии от ве́ры, благословя́тся с ве́рным Авраа́мом. Ели́цы бо от дел зако́на суть, под кля́твою суть. Пи́сано бо есть: про́клят всяк, и́же не пребу́дет во всех пи́санных в кни́зе зако́нней, я́ко твори́ти я́. А я́ко в зако́не никто́же оправда́ется от Бо́га, я́ве, я́ко пра́ведный от ве́ры жив бу́дет. Зако́н же несть от ве́ры, но сотвори́вый та челове́к жив бу́дет в них.
Послание к галатом, зачало 206.
Гал 3:13–14
Во святую и великую Субботу на утрени.
См. Послание к коринфяном первое, зачало 133.
Послание к галатом, зачало 207.
Гал 3:15–22
В среду 15-я недели.
Бра́тие, по челове́ку глаго́лю, оба́че челове́ку предутвержде́нна заве́та никто́же отмета́ет или́ приповелева́ет. Авраа́му же рече́ни бы́ша обе́ты, и се́мени его́. Не глаго́лет же: и се́менем, я́ко о мно́зех, но я́ко о еди́ном: и се́мени твоему́, и́же есть Христо́с. Сие́ же глаго́лю, заве́та предутвержде́нна от Бо́га во Христа́, и́же по ле́тех четы́риста и три́десятих бы́вый зако́н не отмета́ет, во е́же разори́ти обетова́ние. А́ще бо от зако́на насле́дие, не ктому́ уже́ от обетова́ния, Авраа́му же обетова́нием дарова́ Бог. Что у́бо зако́н? Преступле́ния ра́ди приложи́ся, до́ндеже прии́дет се́мя, ему́же обетова́ся, вчине́н А́нгелы, руко́ю хода́тая. Хода́тай же еди́наго несть, Бог же еди́н есть. Зако́н ли у́бо проти́ву обетова́нием Бо́жиим? Да не бу́дет. А́ще бо дан бысть зако́н моги́й оживи́ти, вои́стинну от зако́на бы была́ пра́вда. Но затвори́ Писа́ние всех под грехо́м, да обетова́ние от ве́ры Иису́с Христо́вы да́стся ве́рующым.
Послание к галатом, зачало 208А.
Гал 3:23–29
Преподобным женам.
Бра́тие, пре́жде прише́ствия ве́ры, под зако́ном стрего́ми бе́хом, затворе́ни в хотя́щую ве́ру откры́тися. Те́мже зако́н пе́стун нам бысть во Христа́, да от ве́ры оправди́мся. Прише́дши же ве́ре, уже́ не под пе́стуном есмы́. Вси бо вы сы́нове Бо́жии есте́ ве́рою о Христе́ Иису́се: ели́цы бо во Христа́ крести́стеся, во Христа́ облеко́стеся. Несть иуде́й, ни е́ллин, несть раб, ни свобо́дь, несть му́жеский пол, ни же́нский, вси бо вы еди́но есте́ о Христе́ Иису́се. А́ще ли вы Христо́вы, у́бо Авраа́мле се́мя есте́, и по обетова́нию насле́дницы.
Послание к галатом, зачало 208Б.
Гал 3:23–4:5
В четверток 15-я недели.
Бра́тие, пре́жде прише́ствия ве́ры, под зако́ном стрего́ми бе́хом, затворе́ни в хотя́щую ве́ру откры́тися. Те́мже зако́н пе́стун нам бысть во Христа́, да от ве́ры оправди́мся. Прише́дши же ве́ре, уже́ не под пе́стуном есмы́. Вси бо вы сы́нове Бо́жии есте́ ве́рою о Христе́ Иису́се: ели́цы бо во Христа́ крести́стеся, во Христа́ облеко́стеся. Несть иуде́й, ни е́ллин, несть раб, ни свобо́дь, несть му́жеский пол, ни же́нский, вси бо вы еди́но есте́ о Христе́ Иису́се. А́ще ли вы Христо́вы, у́бо Авраа́мле се́мя есте́, и по обетова́нию насле́дницы. Глаго́лю же: в нели́ко вре́мя насле́дник млад есть, ничи́мже лу́чший есть раба́, госпо́дь сый всех, но под повели́тели и приста́вники есть да́же до наро́ка о́тча. Та́кожде и мы, егда́ бе́хом мла́ди, под стихи́ами бе́хом ми́ра порабоще́ни. Егда́ же прии́де кончи́на ле́та, посла́ Бог Сы́на Своего́ Единоро́днаго, ражда́емаго от жены́, быва́ема под зако́ном, да подзако́нныя иску́пит, да всыновле́ние восприи́мем.
Послание к галатом, зачало 209.
Гал 4:4–7
На Рождество Христово.
Бра́тие, егда́ прии́де кончи́на ле́та, посла́ Бог Сы́на Своего́ Eдиноро́днаго, ражда́емаго от жены́, быва́ема под зако́ном, да подзако́нныя иску́пит, да всыновле́ние восприи́мем. Да я́ко eсте́ сы́нове, посла́ Бог Ду́ха Сы́на Своего́ в сердца́ ва́ша, вопию́ща: А́вва, Óтче. Те́мже уже́ не́си раб, но сын, а́ще ли же сын, и насле́дник Бо́жий Иису́с Христо́м.
Послание к галатом, зачало 210А.
Гал 4:8–21
В пяток 15-я недели.
Бра́тие, не ве́дуще Бо́га служи́сте не по естеству́ су́щым бого́м. Ны́не же, позна́вше Бо́га, па́че же позна́ни бы́вше от Бо́га, ка́ко возвраща́етеся па́ки на немощны́я и худы́я стихи́и, и́мже па́ки свы́ше служи́ти хо́щете? Дни смотря́ете, и ме́сяцы, и времена́, и ле́та. Бою́ся о вас, еда́ ка́ко всу́е труди́хся в вас. Бу́дите я́коже аз, зане́ и аз, я́коже вы, бра́тие, молю́ вы. Ничи́мже мене́ оби́десте. Ве́сте же, я́ко за не́мощь пло́ти благовести́х вам пе́рвее. И искуше́ния моего́, е́же во пло́ти мое́й, не уничижи́сте, ни оплева́сте, но я́коже А́нгела Бо́жия прия́сте мя, я́ко Христа́ Иису́са. Ко́е у́бо бя́ше блаже́нство ва́ше, свиде́тельствую бо вам, я́ко а́ще бы бы́ло мо́щно, очеса́ ва́ша изверте́вше да́ли бы́сте ми. Те́мже враг вам бых, и́стину вам глаго́ля? Ревну́ют по вам не до́бре, но отлучи́ти вас хотя́т, да им ревну́ете. Добро́ же, е́же ревнова́ти всегда́ в до́бром, и не то́чию внегда́ приходи́ти ми к вам. Ча́дца моя́, и́миже па́ки боле́зную, до́ндеже вообрази́тся Христо́с в вас. Хоте́х же приити́ к вам ны́не и измени́ти глас мой, я́ко не домышля́юся о вас. Глаго́лите ми, и́же под зако́ном хотя́щии бы́ти, зако́на ли не слу́шаете?
Послание к галатом, зачало 210Б.
Гал 4:8–14
О болящих.
Бра́тие, не ве́дуще Бо́га служи́сте не по естеству́ су́щым бого́м. Ны́не же, позна́вше Бо́га, па́че же позна́ни бы́вше от Бо́га, ка́ко возвраща́етеся па́ки на немощны́я и худы́я стихи́и, и́мже свы́ше па́ки служи́ти хо́щете? Дни смотря́ете, и ме́сяцы, и времена́, и ле́та. Бою́ся о вас, еда́ ка́ко всу́е труди́хся в вас. Бу́дите я́коже аз, зане́ и аз, я́коже вы, бра́тие, молю́ вы. Ничи́мже мене́ оби́десте. Ве́сте же, я́ко за не́мощь пло́ти благовести́х вам пе́рвее. И искуше́ния моего́, е́же во пло́ти мое́й, не уничижи́сте, ни оплева́сте, но я́коже А́нгела Бо́жия прия́сте мя, я́ко Христа́ Иису́са.
Послание к галатом, зачало 210: от полу́.
Гал 4:22–31
Септемвриа 9, святому Иоакиму и Анне.
Бра́тие, Авраа́м два сы́на име́: еди́наго от рабы́, а друга́го от свобо́дныя. Но и́же от рабы́, по пло́ти роди́ся, а и́же от свобо́дныя, по обетова́нию. Я́же еста́ иносказа́ема, сия́ бо еста́ два заве́та: еди́н у́бо от горы́ Сина́йския, в рабо́ту ражда́яй, и́же есть Ага́рь. Ага́рь бо, Сина́ гора́ есть во Арави́и, прилага́ется же ны́нешнему Иерусали́му, рабо́тает же с ча́ды свои́ми. А вы́шний Иерусали́м свобо́дь есть, и́же есть ма́ти всем нам. Пи́сано бо есть: возвесели́ся, непло́ды, не ражда́ющая, расто́ргни и возопи́, неболя́щая, я́ко мно́га ча́да пусты́я па́че, не́жели иму́щия му́жа. Мы же, бра́тие, по Исаа́ку обетова́ния ча́да есмы́. Но я́коже тогда́ по пло́ти роди́выйся гоня́ше духо́внаго, та́ко и ны́не. Но что глаго́лет Писа́ние? Изжени́ рабу́ и сы́на ея́, не и́мать бо насле́довати сын рабы́нин с сы́ном свобо́дныя. Те́мже, бра́тие, не́смы рабы́нина ча́да, но свобо́дныя.
Послание к галатом, зачало 211.
Гал 4:28–5:10
В понедельник 16-я недели.
Бра́тие, мы по Исаа́ку обетова́ния ча́да есмы́. Но я́коже тогда́ по пло́ти роди́выйся гоня́ше духо́внаго, та́ко и ны́не. Но что глаго́лет Писа́ние? Изжени́ рабу́ и сы́на ея́, не и́мать бо насле́довати сын рабы́нин с сы́ном свобо́дныя. Те́мже, бра́тие, не́смы рабы́нина ча́да, но свобо́дныя. Свобо́дою у́бо, е́юже Христо́с нас свободи́, сто́йте, и не па́ки под и́гом рабо́ты держи́теся. Се аз Па́вел глаго́лю вам, я́ко а́ще обре́заетеся, Христо́с вас ничто́же по́льзует. Свиде́тельствую же па́ки вся́кому челове́ку обре́зающемуся, я́ко до́лжен есть весь зако́н твори́ти. Упраздни́стеся от Христа́, и́же зако́ном оправда́етеся, от благода́ти отпадо́сте. Мы бо ду́хом от ве́ры упова́ния пра́вды ждем. О Христе́ бо Иису́се ни обре́зание что мо́жет, ни необре́зание, но ве́ра любо́вию поспешеству́ема. Теча́сте до́бре, кто вам возбрани́ не покаря́тися и́стине? Препре́ние не от Призва́вшаго вы. Мал квас все смеше́ние ква́сит. Аз наде́юся о вас о Го́споде, я́ко ничто́же и́но разуме́ти бу́дете, смуща́яй же вас понесе́т грех, и́же а́ще есть.
Послание к галатом, зачало 212.
Гал 5:11–21
Во вторник 16-я недели.
Бра́тие, а́ще обре́зание еще́ пропове́дую, почто́ еще́ гони́мь есмь? У́бо упраздни́ся собла́зн креста́. О, дабы́ отсе́чени бы́ли развраща́ющии вас. Вы бо на свобо́ду зва́ни бы́сте, бра́тие, то́чию да не свобо́да ва́ша в вину́ пло́ти, но любо́вию рабо́тайте друг дру́гу. И́бо весь зако́н в еди́ном словеси́ исполня́ется, во е́же возлю́биши бли́жняго твоего́ я́коже себе́. А́ще же друг дру́га угрыза́ете и снеда́ете, блюди́теся, да не друг от дру́га истребле́ни бу́дете. Глаго́лю же: ду́хом ходи́те, и по́хоти плотски́я не соверша́йте, плоть бо похотству́ет на ду́ха, дух же на плоть, сия́ же друг дру́гу проти́вятся, да не я́же хо́щете, сия́ творите́. А́ще ли ду́хом води́ми есте́, не́сте под зако́ном. Явле́на же суть дела́ плотска́я, я́же суть прелюбодея́ние, блуд, нечистота́, студодея́ние, идолослуже́ние, чародея́ния, вражды́, рве́ния, зави́ды, я́рости, разжже́ния, ра́спри, собла́зны, е́реси, за́висти, уби́йства, пия́нства, безчи́нны кли́чи и подо́бная сим, я́же предглаго́лю вам, и предреко́х, я́ко такова́я творя́щии Ца́рствия Бо́жия не насле́дят.
Послание к галатом, зачало 213.
Гал 5:22–6:2
В субботу 27-ю.
Сие же и преподобным.
Бра́тие, плод духо́вный есть любы́, ра́дость, мир, долготерпе́ние, бла́гость, милосе́рдие, ве́ра, кро́тость, воздержа́ние: на таковы́х несть зако́на. А и́же Христо́вы суть, плоть распя́ша со страстьми́ и похотьми́. А́ще живе́м ду́хом, ду́хом и да хо́дим. Не быва́им тщесла́вни, друг дру́га раздража́юще, друг дру́гу зави́дяще. Бра́тие, а́ще и впаде́т челове́к в не́кое прегреше́ние, вы духо́внии исправля́йте такова́го ду́хом кро́тости: блюды́й себе́, да не и ты искуше́н бу́деши. Друг дру́га тяготы́ носи́те, и та́ко испо́лните зако́н Христо́в.
Послание к галатом, зачало 214.
Гал 6:2–10
В среду 16-я недели.
Бра́тие, друг дру́га тяготы́ носи́те, и та́ко испо́лните зако́н Христо́в. А́ще бо кто мнит себе́ бы́ти что, ничто́же сый, умо́м льстит себе́. Де́ло же свое́ да искуша́ет ко́йждо, и тогда́ в себе́ то́чию хвале́ние да и́мать, а не во ино́м. Ко́йждо бо свое́ бре́мя понесе́т. Да обща́ется же учя́йся словеси́ уча́щему во всех благи́х. Не льсти́теся, Бог поруга́емь не быва́ет. Е́же бо а́ще се́ет челове́к, то́жде и по́жнет. Я́ко се́яй в плоть свою́, от пло́ти по́жнет истле́ние, а се́яй в дух, от ду́ха по́жнет живо́т ве́чный. До́брое же творя́ще, да не стужа́ем си, во вре́мя бо свое́ по́жнем, не ослабе́юще. Те́мже у́бо, до́ндеже вре́мя и́мамы, да де́лаим благо́е ко всем, па́че же к при́сным в ве́ре.
Послание к галатом, зачало 215.
Гал 6:11–18
Неделя 22-я.
Бра́тие, ви́дите коли́цеми кни́гами писа́х вам мое́ю руко́ю. Ели́цы хотя́т хвали́тися по пло́ти, си́и ну́дят вы обре́затися, то́чию да не Кресто́м Христо́вым го́нятся. Ни бо обре́зающиися са́ми зако́н храня́т, но хотя́т вам обре́зоватися, да в ва́шей пло́ти похва́лятся. Мне же да не бу́дет хвали́тися, то́кмо о Кресте́ Го́спода на́шего Иису́са Христа́, и́мже мне мир распя́ся, и аз ми́ру. О Христе́ бо Иису́се ни обре́зание что мо́жет, ни необре́зание, но нова́ тварь. И ели́цы пра́вилом сим жи́тельствуют, мир на них и ми́лость, и на Изра́или Бо́жии. Про́чее, труды́ да никто́же ми дае́т: аз бо я́звы Го́спода Иису́са на те́ле мое́м ношу́. Благода́ть Го́спода на́шего Иису́са Христа́ со ду́хом ва́шим, бра́тие. Ами́нь.
Послание к галатом, зачало 215: от полу́.
Гал 6:14–18
В Великий Пяток, на первом часе.
Бра́тие, мне да не бу́дет хвали́тися, то́кмо о Кресте́ Го́спода на́шего Иису́са Христа́, и́мже мне мир распя́ся, и аз ми́ру. О Христе́ бо Иису́се ни обре́зание что мо́жет, ни необре́зание, но нова́ тварь. И ели́цы пра́вилом сим жи́тельствуют, мир на них и ми́лость, и на Изра́или Бо́жии. Про́чее, труды́ да никто́же ми дае́т: аз бо я́звы Го́спода Иису́са на те́ле мое́м ношу́. Благода́ть Го́спода на́шего Иису́са Христа́ со ду́хом ва́шим, бра́тие. Ами́нь.