Триодь Цветная
Неделя Шестая по Пасце, о Слепом
В Субботу На Малей Вечерни
На Го́споди воззва́х: стихиры воскресны, глас 5.
Честны́м Твои́м Кресто́м, Христе́,/ диа́вола посрами́л еси́,/ и Воскресе́нием Твои́м жало грехо́вное притупи́л еси́,/ и спасл еси́ ны от врат сме́ртных,/ сла́вим Тя, Единоро́дне.
Воскресе́ние дая́й ро́ду челове́ческому,/ я́ко овча́ на заколе́ние веде́ся,/ устраши́шася сего́ кня́зи а́дстии,/ и взя́шася врата́ плаче́вная./ Вни́де бо Царь сла́вы Христо́с,/ глаго́ля су́щим во у́зах, изыди́те,/ и су́щим во тьме, откры́йтеся.
Ве́лие чу́до,/ неви́димых Соде́тель, за человеколю́бие пло́тию пострада́в,/ воскре́се Безсме́ртный./ Прииди́те оте́чествия язы́к, Тому́ поклони́мся,/ благоутро́бием бо Его́ от пре́лести изба́вльшеся,/ в Трие́х Ипоста́сех Еди́наго Бо́га пе́ти навыко́хом.
Вече́рнее поклоне́ние/ прино́сим Тебе́, Невече́рнему Све́ту,/ на коне́ц веко́в, я́ко в зерца́ле пло́тию возсия́вшему мiрови,/ и да́же до а́да низше́дшему,/ и та́мо су́щую тьму разруши́вшему,/ и свет Воскресе́ния язы́ком показа́вшему,/ Светода́вче Го́споди, сла́ва Тебе́.
Слава, глас 5: Го́споди, мимоходя́ путе́м,/ обре́л еси́ челове́ка сле́па от рожде́ния,/ и удивле́ни бы́вше ученицы́, вопроша́ху Тя глаго́люще:/ Учи́телю, кто согреши́, сей ли,/ или́ роди́тели его́, да слеп роди́ся?/ Ты же Спа́се мой возопи́л еси́ к ним:/ ни сей согреши́, ни роди́тели его́,/ но да явя́тся дела́ Бо́жия на нем./ Мне подоба́ет де́лати дела́ Посла́вшаго Мя,/ я́же никто́же мо́жет де́лати./ И сия́ рек, плю́нув до́лу, и бре́ние сотво́рь,/ пома́зал еси́ о́чи его́, рек к нему́:/ иди́, умы́йся в Силоа́мстей купе́ли./ Он же умы́вся здрав бысть, и вопия́ше к Тебе́:/ ве́рую, Го́споди, и поклони́ся Тебе́./ Те́мже вопие́м и мы, поми́луй нас.
И ныне, Богородичен настоящий, догматик, глас 5:
Боголе́пную и честну́ю Отрокови́цу почти́м,/ честне́йшую херуви́мов,/ Соде́тель бо всех вочелове́читися восхоте́вый,/ в Ню всели́ся несказа́нно./ О стра́нных веще́й, и пресла́вных та́инств!/ Кто бы не удививи́лся, сие́ слы́шав,/ я́ко Бог Челове́к быва́ет, и премене́ния в Нем не бысть?/ И де́вства врата́ отве́рзл,/ умале́ния в Ней не оста́вися,/ я́коже проро́к глаго́лет:/ челове́к сия́ не про́йдет когда́,/ то́кмо еди́н Госпо́дь Бог Изра́илев,/ име́яй ве́лию ми́лость.
На стиховне стихира воскресна, глас 5:
Тебе́, Воплоще́ннаго Спа́са Христа́,/ и Небе́с неразлучи́вшася,/ во гла́сех пе́ний велича́ем,/ я́ко Крест и смерть прия́л еси́ за род наш,/ я́ко Человеколю́бец Госпо́дь,/ испрове́ргий а́дова врата́,/ тридне́вно воскре́сл еси́,/ спаса́я ду́ши на́ша.
Таже настоящия стихиры подобны,
Пресвятыя Богородицы, глас 5.
Подобен: Ра́дуйся по́стником:
Стих: Помяну́ и́мя Твое́/ во вся́ком ро́де и ро́де.
Ра́дуйся проро́ков печа́те,/ богоглаго́ливых апо́столов пропове́дание,/ Бо́га бо вои́стинну су́щаго,/ воплоще́нна нам па́че ума́ и сло́ва, родила́ еси́./ И́мже дре́внее восприи́мше благоро́дие,/ и ра́йския сла́дости улучи́вше,/ Тебе́ вино́вницу сицевы́я све́тлости пе́сньми почита́ем,/ и моли́твенницею благоприя́тною Тобо́ю, Всесвята́я, богатя́щеся,/ присносу́щнаго получе́ния жи́зни Сы́на Твоего́,/ подаю́щаго бога́тно ве́лию ми́лость.
Стих: Слы́ши Дщи и виждь,/ и приклони́ у́хо Твое́.
Ра́дуйся слове́сное не́бо,/ в не́мже Бог воплоти́вся всели́ся,/ ру́чко Боже́ственныя ма́нны, све́щниче со́лнца, Бо́жия горо́ приосене́нная,/ черто́же боговмести́тельный, живопода́тельная трапе́зо,/ златы́й свети́льниче, светоно́сный раю́,/ купино́ неопали́мая, ковче́же святы́ни,/ ле́ствице небе́сная, о́блаче одушевле́нный,/ же́зле от ко́рене Де́во Иессе́ова возра́стшая,/ Христа́ моли́,/ душа́м на́шим да́тися ве́лией ми́лости.
Стих: Лицу́ Твоему́ помо́лятся/ бога́тии лю́дстии.
Ра́дуйся Сы́на Бо́жия несказа́нно заче́ншая, Всенепоро́чная,/ и Сего́ ро́ждшая,/ плоть по нам вои́стинну от крове́й Твои́х прии́мшаго,/ ду́шу у́мную же и самовла́стную иму́щаго,/ неоску́дно же во Ада́ма обле́кшагося,/ ми́лости ра́ди и бла́гости неизрече́нныя,/ отону́дуже во двою́ естеству́ нам возвеща́ется,/ обои́х показу́я в Себе́ де́йство, Христо́с./ Его́же моли́, пою́щим Тя/ да́ти ве́лию ми́лость.
Слава, глас 8: Пра́вды со́лнце мы́сленное Христе́ Бо́же,/ из утро́бы све́та лише́ннаго,/ Твои́м пречи́стым прикоснове́нием просвети́вшее обою́ду,/ и на́ша о́чи душе́вныя озари́вшее,/ сы́ны дне покажи́,/ да ве́рою вопие́м Ти:/ мно́гое Твое́ и неизрече́нное, е́же на нас благоутро́бие,/ Человеколю́бче, сла́ва Тебе́.
И ныне, глас 5: Храм и дверь еси́,/ пала́та и престо́л Царе́в,/ Де́во Всечестна́я,/ Е́юже Изба́витель мой, Христо́с Госпо́дь,/ во тьме спя́щим яви́ся,/ со́лнце сый пра́вды,/ просвети́ти хотя́, я́же созда́ по о́бразу Своему́ руко́ю Свое́ю./ Те́мже Всепе́тая,/ я́ко ма́тернее дерзнове́ние к Нему́ стяжа́вшая,/ непреста́нно моли́ спасти́ся душа́м на́шим.
По Трисвятом тропарь, глас 5:
Собезнача́льное Сло́во Отцу́ и Ду́хови,/ от Де́вы ро́ждшееся на Спасе́ние на́ше,/ воспои́м, ве́рнии, и поклони́мся;/ я́ко благоволи́ Пло́тию взы́ти на Крест,/ и смерть претерпе́ти,/ и воскреси́ти уме́ршия/ сла́вным воскресе́нием Свои́м.
И прочее обычно.
На Велицей Вечерни
Поставим стихов 10. И поем стихиры воскресны 3, восточны {анатолиевы} 4, и два самогласна о слепце, повторяюще един.
Стихиры воскресны, глас 5:
Честны́м Твои́м Кресто́м, Христе́,/ диа́вола посрами́л еси́,/ и Воскресе́нием Твои́м жало грехо́вное притупи́л еси́,/ и спасл еси́ ны от врат сме́ртных:/ сла́вим Тя, Единоро́дне.
Воскресе́ние дая́й ро́ду челове́ческому,/ я́ко овча́ на заколе́ние веде́ся,/ устраши́шася сего́ кня́зи а́дстии,/ и взя́шася врата́ плаче́вная./ Вни́де бо Царь сла́вы Христо́с,/ глаго́ля су́щим во у́зах, изыди́те:/ и су́щим во тьме, откры́йтеся.
Ве́лие чу́до,/ неви́димых Соде́тель, за человеколю́бие пло́тию пострада́в,/ воскре́се Безсме́ртный./ Прииди́те оте́чествия язы́к, Тому́ поклони́мся:/ благоутро́бием бо Его́ от пре́лести изба́вльшеся,/ в Трие́х Ипоста́сех Еди́наго Бо́га пе́ти навыко́хом.
Ины стихиры Анатолиевы, глас тойже.
Вече́рнее поклоне́ние/ прино́сим Тебе́, Невече́рнему Све́ту,/ на коне́ц веко́в, я́ко в зерца́ле пло́тию возсия́вшему мiрови,/ и да́же до а́да низше́дшему,/ и та́мо су́щую тьму разруши́вшему,/ и свет Воскресе́ния язы́ком показа́вшему:/ Светода́вче Го́споди, сла́ва Тебе́.
Нача́льника спасе́ния на́шего,/ Христа́ славосло́вим:/ Тому́ бо из ме́ртвых воскре́сшу,/ мiр от пре́лести спасе́н бысть./ Ра́дуется лик А́нгельский,/ бе́гает де́монов пре́лесть,/ Ада́м пады́й воста́,/ диа́вол упраздни́ся.
И́же от кустоди́и науче́ни быва́ху от беззако́нник,/ покры́йте Христо́во Воста́ние,/ и приими́те сре́бреники, и рцы́те/ я́ко нам спя́щим, из гро́ба укра́ден бысть Ме́ртвый./ Кто ви́де, кто слы́ша, мертвеца́ укра́дена когда́,/ па́че же пома́зана и на́га,/ оста́вльша и во гро́бе погреба́льная Своя́?/ Не прельща́йтеся иуде́е,/ навы́кните рече́нием проро́ческим, и уразуме́йте,/ я́ко Той есть вои́стинну Изба́витель мiра, и Всеси́льный.
Го́споди, ад плени́вый,/ и смерть попра́вый, Спа́се наш,/ просвети́вый мiр Кресто́м честны́м,/ поми́луй нас.
Ины стихиры самогласны, о слепом. Глас 2:
Слепы́й роди́выйся, в свое́м по́мысле глаго́лаше:/ еда́ аз грех ра́ди роди́тельных роди́хся без о́чию?/ Еда́ аз за неве́рие язы́ков роди́хся во обличе́ние?/ Не домышля́юся вопроша́ти,/ когда́ нощь, когда́ день?/ Не терпи́та ми но́зе ка́меннаго претыка́ния,/ не ви́дех бо со́лнца сия́юща,/ ниже́ во о́бразе мене́ Созда́вшаго./ Но молю́ Ти ся, Христе́ Бо́же,/ при́зри на мя и поми́луй мя. [Дважды.]
Мимоходя́ Иису́с от святи́лища,/ обре́те челове́ка сле́па от рожде́ния,/ и умилосе́рдився положи́ бре́ние на о́чию его́, и рече́ к нему́:/ иди́ умы́йся в Силоа́ме,/ и умы́вся прозре́, сла́ву возсыла́я Бо́гу./ Сосе́ди же его́ глаго́лаху ему́:/ кто твои́ зе́ницы отве́рзе,/ и́хже никто́же от зря́щих исцели́ти возмо́же?/ Он же возопи́в, рече́:/ Челове́к Иису́с глаго́лемый,/ Он ми рече́, умы́йся в Силоа́ме, и прозре́х./ Той есть вои́стинну,/ Его́же рече́ Моисе́й в зако́не, Христа́ Месси́ю,/ Той есть Спас душ на́ших.
Слава, глас 5: Го́споди, мимоходя́ путе́м,/ обре́л еси́ челове́ка сле́па от рожде́ния,/ и удивле́ни бы́вше ученицы́, вопроша́ху Тя глаго́люще:/ Учи́телю, кто согреши́: сей ли,/ или́ роди́тели его́, да слеп роди́ся?/ Ты же Спа́се мой возопи́л еси́ к ним:/ ни сей согреши́, ни роди́тели его́,/ но да явя́тся дела́ Бо́жия на нем./ Мне подоба́ет де́лати дела́ Посла́вшаго Мя,/ я́же никто́же мо́жет де́лати./ И сия́ рек, плю́нув до́лу, и бре́ние сотво́рь,/ пома́зал еси́ о́чи его́, рек к нему́:/ иди́, умы́йся в Силоа́мстей купе́ли./ Он же умы́вся здрав бысть, и вопия́ше к Тебе́:/ ве́рую Го́споди, и поклони́ся Тебе́./ Те́мже вопие́м и мы, поми́луй нас.
И ныне, Богородичен: В Чермне́м мо́ри,/ Неискусобра́чныя Неве́сты о́браз написа́ся иногда́./ Та́мо Моисе́й, раздели́тель воды́,/ зде же Гаврии́л, служи́тель чудесе́./ Тогда́ глубину́ ше́ствова немо́кренно Изра́иль;/ ны́не же Христа́ роди́ безсе́менно Де́ва./ Мо́ре по проше́ствии Изра́илеве пребы́сть непрохо́дно,/ Непоро́чная по Рождестве́ Эмману́илеве пребы́сть Нетле́нна./ Сый и пре́жде Сый,/ явле́йся, я́ко Челове́к,/ Бо́же поми́луй нас.
Вход. Прокимен дне.
На литии стихира храма.
Слава, глас 4: Все житие́ слепы́й нощь помышля́я,/ возопи́ к Тебе́:/ Го́споди, отве́рзи ми зе́ницы,/ Сы́не Дави́дов, Спа́се наш,/ да со все́ми и аз воспою́ Твою́ силу.
И ныне, Богородичен, глас тойже: При́зри на моле́ния Твои́х раб, Всенепоро́чная,/ утоля́ющи лю́тая на ны воста́ния,/ вся́кия ско́рби нас изменя́ющи,/ Тя бо еди́ну, тве́рдое и изве́стное утвержде́ние и́мамы,/ и Твое́ предста́тельство стяжа́хом./ Да не постыди́мся, Влады́чице, Тя призыва́ющии./ Потщи́ся на умоле́ние, Тебе́ ве́рно вопию́щих:/ ра́дуйся, Влады́чице, всех по́моще,/ ра́досте и покро́ве,/ и спасе́ние душ на́ших.
На стиховне стихира воскресна, глас 5:
Тебе́, Воплоще́ннаго Спа́са Христа́,/ и Небе́с неразлучи́вшася,/ во гла́сех пе́ний велича́ем,/ я́ко Крест и смерть прия́л еси́ за род наш,/ я́ко Человеколю́бец Госпо́дь,/ испрове́ргий а́дова врата́,/ тридне́вно воскре́сл еси́,/ спаса́я ду́ши на́ша.
Таже стихиры Пасце с припевы их. Глас 5.
Стих: Да воскре́снет Бог,/ и расточа́тся врази́ Его́.
Па́сха/ свяще́нная нам днесь показа́ся;/ Па́сха но́ва свята́я;/ Па́сха та́инственная;/ Па́сха всечестна́я./ Па́сха Христо́с Изба́витель;/ Па́сха непоро́чная;/ Па́сха вели́кая;/ Па́сха ве́рных./ Па́сха две́ри ра́йския нам отверза́ющая./ Па́сха всех освяща́ющая ве́рных.
Стих: Я́ко исчеза́ет дым,/ да исче́знут.
Прииди́те/ от виде́ния жены́ благове́стницы,/ и Сио́ну рцы́те:/ приими́/ от нас ра́дости благове́щения, Воскресе́ния Христо́ва:/ красу́йся, лику́й/ и ра́дуйся, Иерусали́ме,/ Царя́ Христа́ узре́в из гро́ба,/ я́ко жениха́ происходя́ща.
Стих: Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.
Мироно́сицы жены́,/ у́тру глубоку́,/ предста́вша гро́бу Живода́вца,/ обрето́ша А́нгела/ на ка́мени седя́ща,/ и той провеща́в им,/ си́це глаго́лаше:/ что и́щете Жива́го с ме́ртвыми;/ что пла́чете Нетле́ннаго во тли?/ Ше́дше, пропове́дите ученико́м Его́.
Стих: Сей день, его́же сотвори Госпо́дь,/ возра́дуемся и возвесели́мся в онь.
Па́сха кра́сная,/ Па́сха, Госпо́дня Па́сха!/ Па́сха всечестна́я/ нам возсия́. Па́сха,/ ра́достию друг дру́га обы́мем./ О Па́сха!/ Избавле́ние ско́рби,/ и́бо из гро́ба днесь,/ я́ко от черто́га/ возсия́в Христо́с,/ жены́ ра́дости испо́лни, глаго́ля:/ пропове́дите апо́столом.
Слава, глас 8: Пра́вды со́лнце мы́сленное, Христе́ Бо́же,/ из утро́бы све́та лише́ннаго,/ Твои́м пречи́стым прикоснове́нием просвети́вшее обою́ду,/ и на́ши о́чи душе́вныя озари́вшее,/ сы́ны дне покажи́,/ да ве́рою вопие́м Ти:/ мно́гое Твое́ и неизрече́нное, е́же на нас благоутро́бие,/ Человеколю́бче, сла́ва Тебе́.
И ныне, глас 5: Воскресе́ния день,/ и просвети́мся торжество́м,/ и друг дру́га обы́мем./ Рцем бра́тие,/ и ненави́дящим нас,/ прости́м вся Воскресе́нием,/ и та́ко возопии́м:/ Христо́с воскре́се из ме́ртвых,/ сме́ртию смерть попра́в,/ и су́щим во гробе́х живо́т дарова́в.
И прочее, якоже предписася в мимошедшия Недели.
Таже отпустительный тропарь, глас 5:
Собезнача́льное Сло́во Отцу́ и Ду́хови,/ от Де́вы ро́ждшееся на Спасе́ние на́ше,/ воспои́м, ве́рнии, и поклони́мся,/ я́ко благоволи́ Пло́тию взы́ти на Крест,/ и смерть претерпе́ти,/ и воскреси́ти уме́ршия/ сла́вным воскресе́нием Свои́м.
Богородичен: Ра́дуйся, Две́ре Госпо́дня непроходи́мая,/ ра́дуйся, стено́ и покро́ве притека́ющим к Тебе́./ Ра́дуйся, необурева́емое приста́нище и неискусобра́чная,/ ро́ждшая пло́тию Творца́ Твоего́ и Бо́га./ Моля́щи не оскудева́й о воспева́ющих/ и кла́няющихся рождеству́ Твоему́.
В Неделю на Полунощнице поем канон Троичен во Октоихе гласа. Таже, Досто́йно есть: и прочее, яко обычай, и отпуст.
На Утрени
На Бог Госпо́дь:
тропарь воскресен дважды, глас 5:
Собезнача́льное Сло́во Отцу́ и Ду́хови,/ от Де́вы ро́ждшееся на Спасе́ние на́ше,/ воспои́м, ве́рнии, и поклони́мся,/ я́ко благоволи́ Пло́тию взы́ти на Крест,/ и смерть претерпе́ти,/ и воскреси́ти уме́ршия/ сла́вным воскресе́нием Свои́м.
Слава, и ныне: Богородичен: Ра́дуйся, Две́ре Госпо́дня непроходи́мая,/ ра́дуйся, стено́ и покро́ве притека́ющим к Тебе́./ Ра́дуйся, необурева́емое приста́нище и неискусобра́чная,/ ро́ждшая пло́тию Творца́ Твоего́ и Бо́га./ Моля́щи не оскудева́й о воспева́ющих/ и кла́няющихся рождеству́ Твоему́.
По 1-м стихословии,
седальны воскресны, глас 5:
Крест Госпо́день похва́лим,/ погребе́ние Свято́е пе́сньми почти́м,/ и Воскресе́ние Его́ препросла́вим,/ я́ко совозста́ви ме́ртвыя от гроб, я́ко Бог,/ плени́в сме́рти держа́ву, и кре́пость диа́волю,/ и су́щим во а́де свет возсия́.
Стих: Воскресни́ Го́споди Бо́же мой, да вознесе́тся рука́ Твоя́,/ не забу́ди убо́гих Твои́х до конца́.
Го́споди мертв наре́клся еси́, умертви́вый смерть,/ во гро́бе положи́лся еси́, истощи́вый гро́бы:/ горе́ во́ини гро́ба стрежа́ху,/ до́ле от ве́ка ме́ртвыя воскреси́л еси́./ Всеси́льне и Непостижи́ме Го́споди, сла́ва Тебе́.
Слава, и ныне, Богородичен: Ра́дуйся, Свята́я Горо́ и Богопрохо́дная,/ ра́дуйся, одушевле́нная купино́ и неопали́мая./ Ра́дуйся, Еди́на к Бо́гу мiрови Мо́сте,/ преводя́й сме́ртныя к Ве́чному Животу́./ Ра́дуйся, Нетле́нная Отрокови́це,/ неискусому́жно ро́ждшая Спасе́ние душ на́ших.
По 2-м стихословии седален, глас 5:
Го́споди, посреде́ Тя осужде́нных пригвозди́ша беззако́ннии,/ и копие́м ребро́ Твое́ прободо́ша./ О Ми́лостиве!/ Погребе́ние бо прия́л еси́,/ разруши́вый а́дова врата́, и воскре́сл еси́ тридне́вно./ Притеко́ша жены́ ви́дети Тя, и возвести́ша апо́столом воста́ние./ Превозноси́мый Спа́се, Его́же пою́т а́нгели, благослове́нный Го́споди, сла́ва Тебе́.
Стих: Испове́мся Тебе́ Го́споди всем се́рдцем мои́м,/ пове́м вся чудеса́ Твоя́.
Стра́нное Твое́ Спа́се мой, та́инство, ми́рови спасе́ние бысть:/ воскре́с бо от гро́ба боголе́пно,/ истле́вших совоздви́гл еси́ я́ко Бог,/ всех Животе́, Го́споди, сла́ва Тебе́.
Слава, и ныне, Богородичен: Неискусобра́чная Неве́сто Богороди́тельнице,/ Я́же Е́вину печа́ль радостотвори́вшая,/ воспева́ем ве́рнии и покланя́емся Тебе́,/ я́ко возвела́ еси́ нас от дре́вния кля́твы,/ и ны́не моли́ непреста́нно, Всепе́тая, Пресвята́я,/ во е́же спасти́ся нам.
И чтение в толковании Евангелиа, еже от Иоанна, слово 56, 57, и 58: По Непорочнах тропари: А́нгельский собо́р: и прочее яко обычно.
И абие ипакои, глас 5:
А́нгельским зра́ком ум смуща́юща,/ и Боже́ственным воста́нием душе́ю просвеща́емы,/ мvроно́сицы апо́столом благовествова́ху:/ возвести́те во язы́цех Воскресе́ние,/ Го́споду соде́йствующу чудесы́,/ подаю́щему нам ве́лию ми́лость.
Степенна, глас 5.
Антифон 1:
Внегда́ скорбе́ти мне,/ Дави́дски пою́ Тебе́, Спа́се мой:/ изба́ви ду́шу мою́ от язы́ка льсти́ваго.
Пусты́нным живо́т блаже́н есть,/ Боже́ственным раче́нием воскриля́ющимся.
Слава: Святы́м Ду́хом одержа́тся вся,/ ви́димая же с неви́димыми:/ Самодержа́вен бо сый,/ Тро́ицы Еди́н есть нело́жно.
И ныне, тойже.
Антифон 2:
На го́ры душе́, воздви́гнемся,/ гряди́ та́мо, отню́дуже по́мощь и́дет.
Десна́я Твоя́ рука́, и мене́, Христе́, каса́ющися,/ от ле́сти вся́кия да сохрани́т.
Слава: Свято́му Ду́ху богосло́вяще рцем:/ Ты еси́ Бог, Живо́т, Раче́ние, Свет, Ум:/ Ты Благосты́ня, Ты ца́рствуеши во ве́ки.
И ныне, тойже.
Антифон 3:
О ре́кших мне: во дворы́ вни́дем Госпо́дня:/ ра́дости мно́гия испо́лнен быв, моли́твы возсыла́ю.
В дому́ Дави́дове стра́шная соверша́ются:/ огнь бо та́мо паля́ всяк сра́мный ум.
Слава: Свято́му Ду́ху живонача́льное досто́инство,/ от Него́же вся́кое живо́тно одушевля́ется,/ я́ко во Отце́, ку́пно же и Сло́ве.
И ныне, тойже.
Прокимен, глас 5:
Воскресни́, Го́споди Бо́же мой, да вознесе́тся рука́ Твоя́,/ я́ко Ты ца́рствуеши во ве́ки. Стих: Испове́мся Тебе́, Го́споди, всем се́рдцем мои́м, пове́м вся чудеса́ Твоя́.
Таже другий прокимен: Вся́кое дыха́ние/ да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.
Евангелие воскресно утреннее 8-е,
от Иоанна, зачало 64. [Ин. 20, 11–18.]
Во вре́мя о́но, Мари́я стоя́ше у гро́ба вне пла́чущи. Я́коже пла́кашеся, прини́че во гроб и ви́де два а́нгела в бе́лых ри́зах седя́ща, еди́наго у главы́ и еди́наго у ногу́, иде́же бе лежа́ло те́ло Иису́сово. И глаго́ласта ей о́на: же́но, что пла́чешися? Глаго́ла и́ма: я́ко взя́ша Го́спода моего́, и не вем, где положи́ша Его́. И сия́ ре́кши обрати́ся вспять и ви́де Иису́са стоя́ща, и не ве́дяше, я́ко Иису́с есть. Глаго́ла ей Иису́с: же́но, что пла́чеши, кого́ и́щеши? Она́ же мня́щи, я́ко вертогра́дарь есть, глаго́ла Ему́: го́споди, а́ще ты еси́ взял Его́, пове́ждь ми, где еси́ положи́л Его́, и аз возму́ Его́. Глаго́ла ей Иису́с: Мари́е. Она́ же обра́щшися глаго́ла Ему́: Раввуни́, е́же глаго́лется, Учи́телю. Глаго́ла ей Иису́с: не прикаса́йся Мне, не у бо взыдо́х ко Отцу́ Моему́: иди́ же ко бра́тии Мое́й и рцы им: восхожду́ ко Отцу́ Моему́ и Отцу́ ва́шему, и Бо́гу Моему́ и Бо́гу ва́шему. Прии́де же Мари́я Магдали́на пове́дающи ученико́м, я́ко ви́де Го́спода, и сия́ рече́ ей.
Таже глаголем трижды:
Воскресе́ние Христо́во ви́девше,/ поклони́мся Свято́му Го́споду Иису́су,/ еди́ному безгре́шному,/ Кресту́ Твоему́ покланя́емся, Христе́,/ и свято́е Воскресе́ние Твое́ пое́м и сла́вим./ Ты бо еси́ Бог наш,/ ра́зве Тебе́ ино́го не зна́ем,/ и́мя Твое́ имену́ем./ Прииди́те вси ве́рнии,/ поклони́мся Свято́му Христо́ву Воскресе́нию,/ се бо прии́де Кресто́м ра́дость всему́ ми́ру./ Всегда́ благословя́ще Го́спода,/ пое́м Воскресе́ние Его́:/ распя́тие бо претерпе́в,/ сме́ртию смерть разруши́.
Псалом 50. И целование Евангелиа.
Таже глаголем
по 50-м псалме, по обычаю:
Слава: Моли́твами апо́столов,/ Ми́лостиве, очи́сти/ мно́жества согреше́ний на́ших.
И ныне: Моли́твами Богоро́дицы,/ Ми́лостиве, очи́сти/ мно́жества согреше́ний на́ших.
Таже, глас 6: Поми́луй мя, Бо́же,/ по вели́цей ми́лости Твое́й/ и по мно́жеству щедро́т Твои́х/ очи́сти беззако́ние мое́.
Посем стихира: Воскре́с Иису́с от гро́ба,/ я́коже прорече́,/ даде́ нам живо́т ве́чный/ и ве́лию ми́лость.
Таже, Спаси́ Бо́же лю́ди Твоя́:
Канон Пасце, со ирмосы и с Богородичнами на 8, и слепаго на 6.
Канон Пасхи. Глас 1.
Песнь 1.
Ирмос: Воскресе́ния день,/ просвети́мся, лю́дие./ Па́сха, Госпо́дня Па́сха,/ от сме́рти бо к жи́зни,/ и от земли́ к небеси́,/ Христо́с Бог нас преведе́,/ побе́дную пою́щия.
Припев: Христо́с воскре́се из ме́ртвых.
Очи́стим чу́вствия, и у́зрим/ непристу́пным све́том/ Воскресе́ния, Христа́/ блиста́ющася,/ и ра́дуйтеся, реку́ща,/ я́сно да услы́шим,/ побе́дную пою́ще.
Припев: Христо́с воскре́се из ме́ртвых.
Небеса́ у́бо досто́йно да веселя́тся,/ земля́ же да ра́дуется,/ да пра́зднует же мир,/ ви́димый же весь и неви́димый:/ Христо́с бо воста́,/ весе́лие ве́чное.
Иный канон Богородичен, подобен.
Егоже краестрочие на первых тропарех: Феофа́нус. Глас тойже.
Припев: Пресвята́я Богоро́дице, спаси́ нас.
Умерщвле́ния преде́л сломи́ла еси́,/ ве́чную жизнь ро́ждшая Христа́,/ из гро́ба возсия́вшаго днесь,/ Де́во Всенепоро́чная,/ и мир просвети́вшаго.
Припев: Пресвята́я Богоро́дице, спаси́ нас.
Воскре́сшаго ви́девши Сы́на Твоего́ и Бо́га,/ ра́дуйся со апо́столы Богоблагода́тная Чи́стая:/ и е́же ра́дуйся пе́рвее,/ я́ко всех ра́дости вина́, восприя́ла еси́,/ Богома́ти Всенепоро́чная.
Другий канон слепаго, глас 5.
Песнь 1.
Ирмос: Зе́млю, на ню́же не возсия́, ни ви́де со́лнце когда́,/ бе́здну, ю́же не ви́де на́гу, широта́ небе́сная,/ Изра́иль про́йде невла́жно, Го́споди,/ и ввел еси́ его́ в го́ру святы́ни Твоея́,/ хва́ляща и пою́ща побе́дную песнь.
Распя́тие во́льное восприи́м, Спа́се, пло́тию,/ источи́л еси́ благослове́ние, и жизнь ми́рови, Влады́ко,/ еди́не Всеблагослове́нне, и всех Соде́телю./ Те́мже благослови́м Тя, пое́м и сла́вим, пою́ще,/ воспева́юще побе́дную песнь.
В ро́ве Тя преиспо́днейшем ме́ртва бы́вша, Христе́,/ положи́ благообра́зный Ио́сиф,/ и привали́ к две́рем гро́ба ка́мень, Долготерпели́ве./ Но воскре́сл еси́ сла́вне, и мiр совозста́вил еси́ пою́щий,/ воспева́ющий побе́дную песнь.
Мv́ра что прино́сите со слеза́ми вы,/ глаго́лаше честны́м жена́м А́нгел явле́йся?/ Христо́с воста́,/ те́кше рцы́те богови́дцем ученико́м, рыда́ющим и пла́чущим,/ я́ко да взыгра́ют и ликовству́ют све́тло.
Чудеса́ пресла́вная сотворя́я, Изба́витель/ исцели́ и сле́па от рожде́ния,/ бре́нием пома́зав, и рек:/ иди́ умы́йся в Силоа́ме,/ я́ко да позна́еши Мя, Бо́га,/ по земли́ ше́ствующа, плоть нося́ща,/ за милосе́рдие щедро́т.
Слава, Троичен: Еди́но Триипоста́сное Существо́ почита́юще ве́рнии,/ просла́вим Отца́, и Сы́на, и Ду́ха пра́ваго,/ Творца́, и Го́спода, и Изба́вителя всех, еди́наго несозда́ннаго Бога,/ со безпло́тными взыва́юще:/ Свят, Свят, Свят еси́ Царю́.
И ныне, Богородичен: Во утро́бу неискусобра́чную Твою́/ всели́ся, Чи́стая, Госпо́дь, за милосе́рдие щедро́т,/ спасти́ хотя́ челове́ка истле́вшаго козньми́ вра́жиими./ Того́ у́бо моли́, град сей спасти́/ от вся́каго плене́ния и враго́в наше́ствия.
Катавасия: Спаси́телю Бо́гу,/ в мо́ри лю́ди немо́крыми нога́ми наста́вльшему,/ и фарао́на со всево́инством пото́пльшему,/ Тому́ еди́ному пои́м,/ я́ко просла́вися.
Песнь 3.
Ирмос: Прииди́те, пи́во пие́м но́вое,/ не от ка́мене непло́дна чудоде́емое,/ но нетле́ния исто́чник/ из гро́ба одожди́вша Христа́,/ в Не́мже утвержда́емся.
Припев: Христо́с воскре́се из ме́ртвых.
Ны́не вся испо́лнишася све́та,/ не́бо же и земля́, и преиспо́дняя:/ да пра́зднует у́бо вся тварь/ воста́ние Христо́во,/ в не́мже утвержда́ется.
Припев: Христо́с воскре́се из ме́ртвых.
Вчера́ спогребо́хся Тебе́ Христе́,/ совостаю́ днесь/ воскре́сшу Тебе́,/ сраспина́хся Тебе́ вчера́,/ Сам мя спросла́ви Спа́се во Ца́рствии Твое́м.
Припев: Пресвята́я Богоро́дице, спаси́ нас.
На нетле́нную жизнь прихожду́ днесь/ бла́гостию ро́ждшагося из Тебе́, Чи́стая,/ и всем конце́м свет облиста́вшаго.
Припев: Пресвята́я Богоро́дице, спаси́ нас.
Бо́га, Его́же родила́ еси́ пло́тию,/ из ме́ртвых, я́коже рече́,/ воста́вша ви́девши, Чи́стая, лику́й,/ и Сего́ я́ко Бо́га Пречи́стая возвелича́й.
Ин. Ирмос: Дви́жимое се́рдце мое́, Го́споди,/ волна́ми жите́йскими,/ утверди́, во приста́нище ти́хое/ наставля́я я́ко Бог.
Коле́блющихся сердца́ утверди́л еси́,/ зе́млю всю поколеба́в, Долготерпели́ве,/ честны́м распя́тием Твои́м/ е́же претерпе́л еси́ пло́тию.
В но́вем гро́бе Тебе́ положи́, Ще́дре, Ио́сиф благообра́зный,/ воскре́сл же еси́ из ме́ртвых тридне́вен, новосотвори́вый нас.
Что я́ко ме́ртва и́щете Го́спода?/ Воскре́се, я́коже рече́,/ А́нгел жена́м веща́ше,/ блиста́яся боже́ственным зра́ком.
Сле́па иногда́ от рожде́ния, присту́пльша к Тебе́/ исцели́л еси́ Всеще́дре,/ сла́вяща смотре́ние Твое́ и чудеса́.
Слава, Троичен: Бо́гу Отцу́ покланя́емся пребезнача́льному, и Сы́ну, и Боже́ственному Ду́ху,/ тринесозда́нному Естеству́, Триипоста́сному, еди́ному Бо́гу всех.
И ныне, Богородичен: Из чре́ва деви́ческа родила́ еси́ Бо́га воплоще́нна,/ Ему́же моли́ся, Всесвята́я Влады́чице, уще́дрити нас.
Катавасия: Си́лою Креста́ Твоего́, Христе́,/ утверди́ мое́ помышле́ние,/ во е́же пе́ти и сла́вити/ спаси́тельное Твое́ Вознесе́ние.
Кондак и икос Пасце, глас 8:
А́ще и во гроб снизше́л еси́, Безсме́ртне,/ но а́дову разруши́л еси́ си́лу,/ и воскре́сл еси́, я́ко победитель, Христе́ Бо́же,/ жена́м мироно́сицам веща́вый: ра́дуйтеся,/ и Твои́м апо́столом мир да́руяй,/ па́дшим подая́й воскресе́ние.
Икос: Е́же пре́жде со́лнца Со́лнце заше́дшее иногда́ во гроб,/ предвари́ша ко у́тру, и́щущия я́ко дне мvроно́сицы де́вы,/ и друга́ ко друзе́й вопия́ху:/ о други́ни! Прииди́те, воня́ми пома́жем те́ло живоно́сное и погребе́ное,/ плоть воскреси́вшаго па́дшаго Ада́ма, лежа́щую во гро́бе./ И́дем, потщи́мся я́коже волсви́, и поклони́мся,/ и принесе́м мv́ра я́ко да́ры, не в пелена́х, но в плащани́це обви́тому,/ и пла́чим, и возопии́м: о Влады́ко, воста́ни,/ па́дшим подая́й воскресе́ние.
Таже седален, глас 8:
Подобен: Прему́дрости:
Всех Влады́ка и Творе́ц преходя́,/ обре́те на пути́ сле́па седя́ща, пла́чуща и глаго́люща:/ не ви́дех в житии́ со́лнца сия́юща,/ ниже́ луны́ све́та озаря́ющаго./ Те́мже вопию́ Ти:/ рожде́йся от Де́вы, просвеще́й вся́ческая,/ просвети́ мя, я́ко благоутро́бен,/ да зову́ припа́дая Тебе́, Влады́ко Христе́ Бо́же:/ прегреше́ний оставле́ние да́руй,/ за мно́жество ми́лости нам, Человеколю́бче.
Слава, и ныне: тойже. И чтение.
Песнь 4.
Ирмос: На Боже́ственней стра́жи/ богоглаго́ливый Авваку́м/ да ста́нет с на́ми и пока́жет/ светоно́сна А́нгела/ я́сно глаго́люща:/ днесь спасе́ние ми́ру,/ я́ко воскре́се Христо́с,/ я́ко всеси́лен.
Припев: Христо́с воскре́се из ме́ртвых.
Му́жеский у́бо пол,/ я́ко разве́рзый де́вственную утро́бу,/ яви́ся Христо́с,/ я́ко челове́к же,/ А́гнец нарече́ся,/ непоро́чен же,/ я́ко невку́сен скве́рны,/ на́ша Па́сха,/ и я́ко Бог и́стинен/ соверше́н рече́ся.
Припев: Христо́с воскре́се из ме́ртвых.
Я́ко единоле́тный а́гнец,/ благослове́нный нам вене́ц Христо́с,/ во́лею за всех закла́н бысть,/ Па́сха чисти́тельная,/ и па́ки из гро́ба кра́сное/ пра́вды нам возсия́ Со́лнце.
Припев: Христо́с воскре́се из ме́ртвых.
Богооте́ц у́бо Дави́д/ пред се́нным ковче́гом скака́ше игра́я,/ лю́дие же Бо́жии святи́и,/ образо́в сбытие́ зря́ще,/ весели́мся Боже́ственне,/ я́ко воскре́се Христо́с,/ я́ко Всеси́лен.
Припев: Пресвята́я Богоро́дице, спаси́ нас.
Созда́вый Ада́ма, Твоего́ пра́отца, Чи́стая,/ зи́ждется от Тебе́,/ и сме́ртное жили́ще разори́ Свое́ю сме́ртию днесь,/ и озари́ вся/ боже́ственными блиста́ньми воскресе́ния.
Припев: Пресвята́я Богоро́дице, спаси́ нас.
Его́же родила́ еси́ Христа́,/ прекра́сно из ме́ртвых возсия́вша, Чи́стая, зря́щи,/ до́брая и непоро́чная в жена́х и кра́сная,/ днесь во спасе́ние всех,/ со апо́столы ра́дующися, Того́ прославля́й.
Ин. Ирмос: Услы́шах, Го́споди, слух Твой и убоя́хся,/ разуме́х смотре́ние Твое́ и просла́вих Тя,/ еди́не Человеколю́бче.
Уме́рша мя дре́вом, пожре́н быв, Спа́се мой,/ жизнь сый, оживи́л еси́ за вели́кую ми́лость,/ сего́ ра́ди, Сло́ве, сла́влю Тя.
Ученико́м, Го́споди, соводворя́яся пресла́вно,/ сим глаго́лал еси́: иди́те,/ пропове́дите всю́ду Мое́ Воскресе́ние.
Уверя́я, Го́споди, воста́ние Твое́, е́же из гро́ба,/ лю́бящим Тя, Христе́,/ во дни мно́ги соводвори́лся еси́, ра́дость творя́ им.
Воочи́л еси́, Го́споди, сле́па из утро́бы рожде́нна, рек:/ иди́, умы́йся, и прозри́, Мое́ сла́вя Божество́.
Слава, Троичен: Единоче́стная, безнача́льная Тро́ице,/ неразде́льная Существо́м, разде́льна Ипоста́сьми,/ спаса́й вся, ве́рно Тя стра́хом сла́вящия.
И ныне, Богородичен: Рождество́ Твое́, Чи́стая е́же па́че естества́/ славосло́вим, блажа́ще ве́рно Тебе́, Пренепоро́чная,/ я́ко Бо́га всех Роди́тельницу.
Катавасия: Услы́шах слух си́лы Креста́,/ я́ко рай отве́рзеся им,/ и возопи́х:/ сла́ва си́ле Твое́й, Го́споди.
Песнь 5.
Ирмос: У́тренюем у́треннюю глубоку́,/ и вме́сто ми́ра песнь принесе́м Влады́це,/ и Христа́ у́зрим/ пра́вды Со́лнце,/ всем жизнь возсия́юща.
Припев: Христо́с воскре́се из ме́ртвых.
Безме́рное Твое́ благоутро́бие,/ а́довыми у́зами содержи́мии зря́ще,/ к све́ту идя́ху, Христе́,/ весе́лыми нога́ми,/ Па́сху хва́ляще ве́чную.
Припев: Христо́с воскре́се из ме́ртвых.
Присту́пим свещено́снии,/ исходя́щу Христу́ из гро́ба, я́ко жениху́,/ и спра́зднуем любопра́зднственными чи́нми/ Па́сху Бо́жию спаси́тельную.
Припев: Пресвята́я Богоро́дице, спаси́ нас.
Просвеща́ется боже́ственными луча́ми и живоно́сными/ воскресе́ния Сы́на Твоего́,/ Богома́ти Пречи́стая,/ и ра́дости исполня́ется благочести́вых собра́ние.
Припев: Пресвята́я Богоро́дице, спаси́ нас.
Не разве́рзл еси́ врата́ де́вства в воплоще́нии,/ гро́ба не разруши́л еси́ печа́тей, Царю́ созда́ния,/ отону́дуже воскре́сшаго Тя зря́щи, Ма́ти, ра́довашеся.
Ин. Ирмос: Окая́нную ду́шу мою́, нощеборю́щуюся со тьмо́ю страсте́й,/ предвари́в уще́дри, и возсия́й мы́сленное со́лнце,/ днесве́тлыя звезды́ во мне,/ во е́же раздели́ти нощь от све́та.
Возне́слся еси́ на Дре́во, Ще́дре,/ и совозне́сл еси́ вся челове́ки,/ и бори́теля зми́я умертви́л еси́,/ и оживи́л еси́ созда́ние рук Твои́х, я́ко еди́н Бог всех.
Положи́лся еси́ во гро́бе во́лею, Царю́ Безсме́ртне,/ и ца́рствия а́дова вся истощи́л еси́,/ ме́ртвыя Воскресе́нием Твои́м воздви́гнув.
Чудеса́ ве́лия соде́ловающаго, Сло́ве, на земли́,/ лю́дие уби́ша Тя, беззако́ннии,/ но Сам Го́споди, еди́н всеси́лен сый, я́коже предре́кл еси́,/ из ме́ртвых воскре́сл еси́, Христе́.
О́чи отве́рзл неви́девшаго свет чу́вственный,/ души́ просвети́л еси́ зе́ницы,/ и сла́вити сотвори́л еси́ сего́, позна́вша Тя, Творца́,/ за благоутро́бие яви́вшася челове́ка.
Слава, Троичен: Тро́ицу во Еди́нице,/ и в Тро́ице Еди́ницу, ве́рнии, славосло́вим вси,/ Отца́ и Сы́на, и Ду́ха Пра́ваго,/ еди́наго Бо́га, Соде́теля всех вои́стинну.
И ныне, Богородичен: Ка́ко родила́ еси́, богоблагода́тная Де́во, Ма́ти Чи́стая,/ не позна́вши иску́са му́жеска?/ Ка́ко пита́еши Пита́ющаго всю тварь?/ Я́коже един весть Сам, всех Творе́ц и Бог.
Катавасия: У́тренююще вопие́м Ти:/ Го́споди, спаси́ ны,/ Ты бо еси́ Бог наш,/ ра́зве бо Тебе́ ино́го не зна́ем.
Песнь 6.
Ирмос: Снизше́л еси́ в преиспо́дняя земли́,/ и сокруши́л еси́ вереи́ ве́чныя,/ содержа́щия свя́занныя, Христе́,/ и тридне́вен, я́ко от ки́та Ио́на,/ воскре́сл еси́ от гро́ба.
Припев: Христо́с воскре́се из ме́ртвых.
Сохрани́в це́ла зна́мения Христе́,/ воскре́сл еси́ от гро́ба,/ ключи́ Де́вы не вреди́вый в рождестве́ Твое́м,/ и отве́рзл еси́ нам ра́йския две́ри.
Припев: Христо́с воскре́се из ме́ртвых.
Спа́се мой,/ живо́е же и неже́ртвенное заколе́ние,/ я́ко Бог Сам Себе́/ во́лею приве́л Отцу́,/ совоскреси́л еси́ всеро́днаго Ада́ма,/ воскре́с от гро́ба.
Припев: Пресвята́я Богоро́дице, спаси́ нас.
Возведе́ся дре́вле держи́мое сме́ртию и тле́нием,/ воплоти́вшимся от Твоего́ пречи́стаго чре́ва,/ к нетле́нней и присносу́щней жи́зни,/ Богоро́дице Де́во.
Припев: Пресвята́я Богоро́дице, спаси́ нас.
Сни́де в преиспо́дняя земли́,/ в ложесна́ Твоя́, Чи́стая, сше́дый,/ и всели́выйся и воплоти́выйся па́че ума́,/ и воздви́же с Собо́ю Ада́ма,/ воскре́с от гро́ба.
Ин. Ирмос: Я́коже проро́ка от зве́ря изба́вил еси́, Го́споди,/ и мене́ из глубины́ несодержи́мых страсте́й возведи́, молю́ся,/ да приложу́ призре́ти ми ко хра́му свято́му Твоему́.
Распны́йся с разбо́йники, Влады́ко,/ изба́вил еси́ от разбо́йник лука́вых, душетле́нных страсте́й, Человеколю́бче Го́споди,/ вся пою́щия Твое́ распя́тие и воста́ние согла́сно.
Положи́ша без дыха́ния Тебе́ ме́ртва, Христе́, во гро́бе,/ всем ме́ртвым вдыха́юща жизнь,/ воскре́сл же еси́, Го́споди, вся истощи́вый, Сло́ве, гро́бы,/ Боже́ственною Твое́ю си́лою.
По воста́нии, Христе́, друго́м глаго́лал еси́:/ седи́те у́бо во Иерусали́ме,/ до́ндеже облече́теся си́лою свы́ше непобеди́мою, и изве́стною по́мощию.
Бре́ние сотво́рь, о́чи слепа́го от рожде́ния пома́зал еси́,/ и дарова́л еси́ ему́ прозре́ти,/ пою́щу Твою́, Сло́ве, неизрече́нную си́лу, е́юже спасл еси́ мир.
Слава, Троичен: Триипоста́сная Еди́нице,/ О́тче нерожде́нне, Сы́не рожде́нне и Ду́ше исхо́дне,/ Трисвяты́й Го́споди, еди́но Существо́ и си́ла,/ спаса́й вся лю́ди Твоя́.
И ныне, Богородичен: Вели́чия Твоя́, Чи́стая, кто испове́сть?/ Бо́га бо пло́тию родила́ еси́ преесте́ственно,/ мир Тобо́ю избавля́ющаго, Де́во Всенепоро́чная, от вся́каго греха́.
Катавасия: Обы́де мя бе́здна,/ гроб мне кит бысть,/ аз же возопи́х к Тебе́, Человеколю́бцу,/ и спасе́ мя десни́ца Твоя́, Го́споди.
Кондак, глас 4.
Подобен: Яви́лся еси́ днесь:
Душе́вныма очи́ма ослепле́н,/ к Тебе́, Христе́, прихожду́,/ я́коже слепы́й от рожде́ния,/ покая́нием зову́ Ти:/ Ты су́щих во тьме Свет пресве́тлый.
Икос: Струю́ ми да́руй, Христе́, прему́дрости неизрече́нныя и ра́зума го́рняго,/ све́те су́щих во тьме, и прельща́емых наста́вниче,/ да возмогу́ чудеса́ Твоя́ пове́дати, окая́нный,/ я́же боже́ственная кни́га научи́ Ева́нгелиа ми́ра,/ си́есть, слепа́го чудотворе́ние,/ я́ко от рожде́ния слеп сый,/ о́чи чу́вственныя прие́млет и душе́вныя, ве́рою взыва́я:/ Ты су́щих во тьме свет пресве́тлый.
Синаксарь Минеи. Таже Триоди.
Песнь 7.
Ирмос: О́троки от пе́щи изба́вивый,/ быв Челове́к,/ стра́ждет я́ко сме́ртен,/ и стра́стию сме́ртное,/ в нетле́ния облачи́т благоле́пие,/ Еди́н благослове́н/ отце́в Бог, и препросла́влен.
Припев: Христо́с воскре́се из ме́ртвых.
Жены́ с ми́ры богому́дрыя в след Тебе́ теча́ху,/ Его́же, я́ко ме́ртва, со слеза́ми иска́ху,/ поклони́шася ра́дующияся Живо́му Бо́гу,/ и Па́сху та́йную/ Твои́м, Христе́, ученико́м благовести́ша.
Припев: Христо́с воскре́се из ме́ртвых.
Сме́рти пра́зднуем умерщвле́ние,/ а́дово разруше́ние,/ ино́го жития́ ве́чнаго нача́ло,/ и игра́юще пое́м Вино́внаго,/ Еди́наго благослове́ннаго/ отце́в Бо́га, и препросла́вленнаго.
Припев: Христо́с воскре́се из ме́ртвых.
Я́ко вои́стинну свяще́нная,/ и всепра́зднственная сия́ спаси́тельная нощь,/ и светоза́рная,/ светоно́снаго дне,/ воста́ния су́щи провозве́стница,/ в не́йже безле́тный Свет из гро́ба пло́тски всем возсия́.
Припев: Пресвята́я Богоро́дице, спаси́ нас.
Умертви́в Сын Твой смерть, Всенепоро́чная, днесь,/ всем сме́ртным пребыва́ющий живо́т/ во ве́ки веко́в дарова́,/ еди́н благослове́нный/ отце́в Бог и препросла́вленный.
Припев: Пресвята́я Богоро́дице, спаси́ нас.
Всем ца́рствуяй созда́нием, быв челове́к,/ всели́ся в Твою́, Богоблагода́тная, утро́бу,/ и распя́тие претерпе́в и смерть,/ воскре́се боголе́пно,/ совозста́вив нас я́ко всеси́лен.
Ин. Ирмос: Огня́ гаси́лище отроко́в моли́тва, ороша́ющая пещь,/ пропове́дница чудесе́, не опаля́ющи, ниже́ сожига́ющи,/ песносло́вцы Бо́га оте́ц на́ших.
Возди́жену Тебе́ на Дре́во, Спа́се,/ погасе́ со́лнце, земля́ волну́яшеся, колеба́шеся тварь вся,/ и от гроб ме́ртвии востая́ху.
Воста́вшу Ти из ме́ртвых, Царю́,/ ду́ши совозста́ша та́мо спя́щия,/ сла́вящия си́лу Твою́./ Е́юже сме́ртныя у́зы разреши́шася.
Ра́но миропома́зати Тя же́нский прии́де лик,/ уве́девше же, Го́споди, воста́вша Тя,/ ра́довахуся со свяще́нными ученики́,/ и́миже пода́ждь нам очище́ние зол.
Бре́нием пома́зал еси́ о́чи слепа́го,/ и сему́ повеле́л еси́ к Силоа́му ити́,/ омы́вся же, прозре́,/ песносло́вя Тя, Христе́, Царю́ всех.
Слава, Троичен: Отца́ безначальна, собезначальна же Сы́на и Ду́ха Пресвятаго песнословим:/ Свят, Свят, Свят еси́, Бо́же, Царю́ всех.
И ныне, Богородичен: По рождестве́ Де́ва яви́лася еси́, Чи́стая,/ Бо́га бо родила́ еси́,/ обнови́вшаго естества́, Пречи́стая, си́лою Свое́ю,/ Его́же моли́ спасти́ся всем нам.
Катавасия: В пещи́ о́гненней/ песносло́вцы спасы́й о́троки,/ благослове́н Бог оте́ц на́ших.
Песнь 8.
Ирмос: Сей нарече́нный и святы́й день,/ Еди́н суббо́т Царь и Госпо́дь,/ пра́здников пра́здник/ и торжество́ есть торже́ств,/ во́ньже благослови́м Христа́ во ве́ки.
Припев: Христо́с воскре́се из ме́ртвых.
Прииди́те, но́ваго виногра́да рожде́ния,/ Боже́ственнаго весе́лия,/ в наро́читом дни Воскресе́ния,/ Ца́рствия Христо́ва приобщи́мся,/ пою́ще Его́,/ я́ко Бо́га, во ве́ки.
Припев: Христо́с воскре́се из ме́ртвых.
Возведи́ о́крест о́чи твои́, Сио́не, и виждь:/ се бо приидо́ша к тебе́,/ я́ко богосве́тлая свети́ла,/ от за́пада, и се́вера, и мо́ря,/ и восто́ка ча́да твоя́,/ в тебе́ благословя́щая Христа́ во ве́ки.
Припев: Пресвята́я Тро́ице, Бо́же наш, сла́ва Тебе́.
Троичен: О́тче Вседержи́телю, и Сло́ве, и Ду́ше,/ треми́ соединя́емое во Ипоста́сех Естество́,/ Пресу́щественне и Пребоже́ственне,/ в Тя крести́хомся,/ и Тя благослови́м во вся ве́ки.
Припев: Пресвята́я Богоро́дице, спаси́ нас.
Прии́де Тобо́ю в мир Госпо́дь, Де́во Богоро́дице,/ и чре́во а́дово расто́рг,/ сме́ртным нам воскресе́ние дарова́,/ те́мже благослови́м Его́ во ве́ки.
Припев: Пресвята́я Богоро́дице, спаси́ нас.
Всю низложи́в сме́рти держа́ву Сын Твой, Де́во,/ Свои́м воскресе́нием,/ я́ко Бог кре́пкий совознесе́ нас и обожи́,/ те́мже воспева́ем Его́ во ве́ки.
Ин. Ирмос: Ангелов сонм, человеков собор,/ Царя́ и Зиждителя всех,/ священницы, по́йте, благослови́те, левити,/ лю́дие, превозноси́те во вся ве́ки.
А́нгельстии чи́нове на Кресте́ Тя ви́девше ви́сима, Христе́ Всецарю́,/ и тварь всю изменя́юща стра́хом,/ ужасо́шася, пою́ще Твое́ человеколю́бие.
Ад до́ле Тебе́ ви́дев, стеня́ше,/ и подава́ше ско́ро ме́ртвыя,/ от ве́ка та́мо храни́мыя, Христе́,/ песносло́вящия Твое́ человеколю́бие.
Сотворя́я чудеса́, Христе́, изря́дная,/ во́лею воздви́жен был еси́ на Крест,/ и с ме́ртвыми совокупи́лся еси́, умертви́вый а́да,/ и вся му́жеством отреши́л еси́ у́зники.
Слепа́го воочи́л еси́ к Тебе́ приступи́вша, Христе́,/ сему́ повеле́вый в Силоа́мову купе́ль ити́,/ омы́тися и прозре́ти, и Бо́га Тя пропове́дати,/ пло́тию яви́вшагося во спасе́ние мiра.
Благослови́м Отца́ и Сы́на и Свята́го Ду́ха, Го́спода.
Троичен: Тро́ице неразде́льная, Еди́нице неслия́нная,/ Бо́же вся́ческих и Зижди́телю всех,/ песносло́вящия и ве́рно покланя́ющияся держа́ве Твое́й,/ от вся́ких искуше́ний спаса́й.
И ны́не и при́сно и во ве́ки веко́в, ами́нь.
Богородичен: Де́во Пречи́стая, богоблагода́тная,/ Твоего́ моли́ Сы́на всегда́,/ да не посрами́т мя в день осужде́ния, но сочте́т избра́нным овца́м.
Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Катавасия: Из Отца́ пре́жде век рожде́ннаго Сы́на и Бо́га,/ и в после́дняя ле́та воплоще́ннаго от Де́вы Ма́тере,/ свяще́нницы по́йте,/ лю́дие превозноси́те во вся ве́ки.
Честне́йшую: не поем.
Песнь 9.
Ирмос: Свети́ся, свети́ся,/ но́вый Иерусали́ме,/ сла́ва бо Госпо́дня/ на тебе́ возсия́./ Лику́й ны́не/ и весели́ся, Сио́не./ Ты же, Чи́стая, красу́йся, Богоро́дице,/ о воста́нии Рождества́ Твоего́.
Припев: Христо́с воскре́се из ме́ртвых.
О Боже́ственнаго, о любе́знаго,/ о сладча́йшаго Твоего́ гла́са!/ С на́ми бо нело́жно/ обеща́лся еси́ бы́ти,/ до сконча́ния ве́ка, Христе́,/ Его́же, ве́рнии,/ утвержде́ние наде́жди иму́ще, ра́дуемся.
Припев: Христо́с воскре́се из ме́ртвых.
О Па́сха ве́лия и свяще́ннейшая, Христе́!/ О му́дросте, и Сло́ве Бо́жий, и си́ло!/ Подава́й нам и́стее Тебе́ причаща́тися,/ в невече́рнем дни Ца́рствия Твоего́.
Припев: Пресвята́я Богоро́дице, спаси́ нас.
Согла́сно, Де́во, Тебе́ блажи́м ве́рнии:/ ра́дуйся, две́ре Госпо́дня,/ ра́дуйся, гра́де одушевле́нный,/ ра́дуйся, Ея́же ра́ди нам ны́не возсия́ свет,/ из Тебе́ Рожде́ннаго из ме́ртвых Воскресе́ния.
Припев: Пресвята́я Богоро́дице, спаси́ нас.
Весели́ся и ра́дуйся, боже́ственная две́ре Све́та,/ заше́дый бо Иису́с во гроб возсия́,/ просия́в со́лнца светле́е,/ и ве́рныя вся озари́в,/ Богора́дованная Влады́чице.
Ин. Ирмос: Я́ко сотвори́ Тебе́ вели́чия Си́льный,/ Де́ву явль Тя чи́сту по рождестве́,/ я́ко ро́ждшую без се́мене Своего́ Творца́,/ тем Тя, Богоро́дице, велича́ем.
На Дре́ве кре́стнем пригвозди́лся еси́, Христе́ Бо́же,/ и вся победи́л еси́ вра́жия сопроти́вная нача́ла,/ и пе́рвую кля́тву потреби́л еси́, Спа́се,/ те́мже Тя по до́лгу велича́ем.
Я́ко ви́де Тя, Сло́ве, ад до́ле с душе́ю, воздохну́,/ и вся ме́ртвыя стра́хом отреши́,/ позна́вшия держа́ву вла́сти Твоея́,/ те́мже Тя по до́лгу велича́ем.
Зна́мения сотворя́юща и чудеса́ стра́шная,/ собо́р евре́йский зря, за́вистию уби́,/ плени́вшаго ад Воскресе́нием Свои́м,/ и всех, я́ко си́лен, возставля́ющаго.
Воста́л еси́, я́коже рекл еси́, Животода́вче, из ме́ртвых,/ и яви́лся еси́ святы́м ученико́м по воста́нии,/ зна́мения сотвори́вый, и воочи́вый слепы́я,/ с ни́миже Тя во ве́ки велича́ем.
Слава, Троичен: Свет Отца́ чту, Свет сла́влю и Сы́на, Свет воспева́ю Ду́ха Пра́ваго,/ еди́н Свет неразде́льный, в трие́х Ли́цех разумева́емый,/ Бо́га Царя́ всея́ тва́ри.
И ныне, Богородичен: Яви́вшися простра́ннейшая небе́с, Де́во Чи́стая,/ вмести́ла еси́ пло́тию Бо́га неопи́саннаго,/ и родила́ еси́ всех Избавле́ние,/ ве́рою несумне́нною воспева́ющих Тя.
Катавасия: Тя па́че ума́ и словесе́ Ма́терь Бо́жию,/ в ле́то Безле́тнаго неизрече́нно ро́ждшую,/ ве́рнии единому́дренно велича́ем.
Ексапостиларий праздника. Самогласен:
Пло́тию усну́в,/ я́ко мертв,/ Царю́ и Го́споди,/ тридне́вен воскре́сл еси́,/ Ада́ма воздви́г от тли,/ и упраздни́в смерть,/ Па́сха нетле́ния,/ ми́ра спасе́ние.
Слава, слепаго. Подобен:
У́мныя мои́ о́чи,/ ослепле́нныя, Го́споди, от мра́чнаго греха́, Ты просвети́,/ вложи́в, Ще́дре, смире́ние,/ и покая́ния омы́й слеза́ми.
И ныне:
Подобен: Жены́ услы́шите:
Мимоиды́й Спас наш, обре́те сле́па без о́чию,/ плю́нув на зе́млю и сотвори́в бре́ние, пома́за его́,/ к Силоа́му посла́ ити́ и умы́тися./ Он же умы́вся, прии́де, ви́дя свет Твой, Христе́ мой.
На хвалитех поставим стихов 8.
И поем стихиры воскресны, глас 5:
Го́споди, запеча́тану гро́бу от беззако́нников,/ проше́л еси́ из гро́ба,/ я́коже роди́лся еси́ от Богоро́дицы,/ не уразуме́ша, ка́ко воплоти́лся еси́, безпло́тнии Твои́ а́нгели,/ не чу́вствоваша, когда́ воскре́сл еси́, стрегу́щии Тя во́ини./ Обоя́ бо запечатле́стася испыту́ющим,/ яви́шася же чудеса́ кла́няющимся ве́рою та́инству,/ е́же воспева́ющим,/ возда́ждь нам ра́дость и ве́лию ми́лость.
Го́споди, вереи́ ве́чныя сокруши́в,/ и у́зы растерза́в, от гро́ба воскре́сл еси́,/ оста́вль Твоя́ погреба́льная,/ во свиде́тельство и́стиннаго тридне́внаго Твоего́ погребе́ния,/ и предвари́л еси́ в Галиле́и, в пеще́ре стрего́мый./ Ве́лия Твоя́ ми́лость, Непостижи́ме Спа́се,/ поми́луй и спаси́ нас.
Го́споди, жены́ теко́ша на гроб,/ ви́дети Тя, Христа́, нас ра́ди пострада́вшаго,/ и прише́дша, обрето́ша а́нгела на ка́мени седя́ща,/ стра́хом отва́льшемся,/ и к ним возопи́, глаго́ля:/ воскре́се Госпо́дь, рцы́те ученико́м,/ я́ко воскре́се от ме́ртвых,/ спаса́яй ду́ши на́ша.
Го́споди, я́коже изше́л еси́ от запеча́таннаго гро́ба,/ та́ко вшел еси́ и две́рем заключе́ным ко ученико́м Твои́м,/ показу́я им теле́сная страда́ния,/ я́же подъя́л еси́, Спа́се Долготерпели́вый,/ я́ко от се́мене Дави́дова я́звы претерпе́л еси́,/ я́ко Сын же Бо́жий, мiр свободи́л еси́./ Ве́лия Твоя́ ми́лость, Непостижи́ме Спа́се,/ поми́луй и спаси́ нас.
Ины стихиры Анатолиевы.
Го́споди, Царю́ веко́в и Тво́рче всех,/ нас ра́ди распя́тие и погребе́ние пло́тию прии́мый,/ да нас от а́да свободи́ши всех./ Ты еси́ Бог наш,/ ра́зве Тебе́ ино́го не ве́мы.
Го́споди, пресия́ющая Твоя́ чудеса́ кто испове́сть?/ Или́ кто возвести́т стра́шная Твоя́ та́инства?/ Вочелове́чивыйся бо нас ра́ди, я́ко Сам восхоте́л еси́,/ держа́ву яви́л еси́ си́лы Твоея́,/ Кресто́м бо Твои́м разбо́йнику рай отве́рзл еси́,/ и погребе́нием Твои́м вереи́ а́довы сокруши́л еси́,/ Воскресе́нием же Твои́м вся́ческая обогати́л еси́./ Благоутро́бне Го́споди, сла́ва Тебе́.
Мироно́сицы жены́ гро́ба Твоего́ дости́гше,/ зело́ ра́но иска́ху Тебе́ мv́ры пома́зати,/ Безсме́ртнаго Сло́ва и Бо́га,/ и а́нгела глаго́лы огласи́вшеся,/ возвраща́хуся ра́достию апо́столом возвести́ти я́ве,/ я́ко воскре́сл еси́, Животе́ всех,/ и по́дал еси́ мiрови очище́ние и ве́лию ми́лость.
Стих: При́зри на мя,/ и поми́луй мя.
Самогласен слепаго, глас 8:
За милосе́рдие ми́лости воплоти́выйся, Христе́ Бо́же,/ све́та лише́ннаго от утро́бы,/ милосе́рдием неизре́ченных щедро́т,/ сия́ния Боже́ственнаго сподо́бил еси́,/ сего́ зе́ницам пе́рстию/ созда́тельными пе́рсты Твои́ми прикосну́выйся./ Сам и ны́не, Светода́телю,/ и на́ша озари́ душе́вная чу́вства,/ я́ко еди́н независтнода́тель.
Слава, глас 8: Кто возглаго́лет си́лы Твоя́, Христе́?/ Или́ кто изочте́т чуде́с Твои́х мно́жества?/ Сугу́б бо я́ко ви́ден был еси́ на земли́ за бла́гость,/ сугу́бы и цельбы́ неду́гующим подава́л еси́,/ не то́чию бо теле́сныя о́чи отве́рзл еси́,/ и́же от утро́бы слепо́му,/ но и душе́вныя./ Те́мже Бо́га Тя испове́даше тая́щагося,/ и всем подаю́ща ве́лию ми́лость.
И ныне: Преблагослове́нна еси́: Славословие великое, и отпуст.
Стихира утренняя, глас 8:
Мари́ины сле́зы не всу́е пролива́ются те́пле,/ се бо сподо́бися и уча́щих А́нгелов,/ и виде́ния Самого́ Иису́са./ Но еще́ земна́я му́дрствует, я́ко жена́ немощна́я,/ те́мже и отсыла́ется не прикаса́тися Христу́./ Но оба́че пропове́дница посыла́ется Твои́м ученико́м,/ и́мже благовествова́ние нося́щи,/ е́же ко Оте́ческому жре́бию восхо́д возвеща́ющи./ С не́юже сподо́би и нас явле́ния Твоего́, Влады́ко Го́споди.
На Литургии
Блаженна, гласа его:
Разбо́йник на кресте́ Бо́га Тя бы́ти ве́ровав, Христе́,/ испове́да Тя чи́сте от се́рдца,/ помяни́ мя, Го́споди, вопия́, во Ца́рствии Твое́м.
И́же на Дре́ве Кре́стнем/ жизнь процве́тшаго ро́ду на́шему,/ и изсуши́вша ю́же от дре́ва кля́тву,/ я́ко Спа́са и Соде́теля согла́сно воспои́м.
Распе́ншу Ти ся, Христе́, посреде́ двою́ осужде́нною разбо́йнику,/ еди́н у́бо ху́ля Тя, осужде́н бысть пра́ведне,/ други́й же испове́дая Тя, в рай всели́ся.
Ко апо́столов ли́ку прише́дша жены́ честны́я,/ возопи́ша: Христо́с воскре́се,/ я́ко Влады́це и Соде́телю Тому́ поклони́мся.
И от канона слепаго, песнь 6:
Распны́йся с разбо́йники, Влады́ко,/ изба́вил еси́ от разбо́йник лука́вых, душетле́нных страсте́й, Человеколю́бче Го́споди,/ вся пою́щия Твое́ распя́тие и воста́ние согла́сно.
Положи́ша без дыха́ния Тебе́ ме́ртва, Христе́, во гро́бе,/ всем ме́ртвым вдыха́юща жизнь:/ воскре́сл же еси́, Го́споди, вся истощи́вый, Сло́ве, гро́бы,/ Боже́ственною Твое́ю си́лою.
По воста́нии, Христе́, друго́м глаго́лал еси́:/ седи́те у́бо во Иерусали́ме,/ до́ндеже облече́теся си́лою свы́ше непобеди́мою, и изве́стною по́мощию.
Бре́ние сотво́рь, о́чи слепа́го от рожде́ния пома́зал еси́,/ и дарова́л еси́ ему́ прозре́ти,/ пою́щу Твою́, Сло́ве, неизрече́нную си́лу, е́юже спасл еси́ мир.
Слава: Триипоста́сная Еди́нице,/ О́тче нерожде́нне, Сы́не рожде́нне и Ду́ше исхо́дне,/ Трисвяты́й Го́споди, еди́но Существо́ и си́ла,/ спаса́й вся лю́ди Твоя́.
И ныне: Вели́чия Твоя́, Чи́стая, кто испове́сть?/ Бо́га бо пло́тию родила́ еси́ преесте́ственно,/ мир Тобо́ю избавля́ющаго, Де́во Всенепоро́чная, от вся́каго греха́.
По входе тропарь воскресен, глас 5:
Собезнача́льное Сло́во Отцу́ и Ду́хови,/ от Де́вы ро́ждшееся на Спасе́ние на́ше,/ воспои́м, ве́рнии, и поклони́мся,/ я́ко благоволи́ Пло́тию взы́ти на Крест,/ и смерть претерпе́ти,/ и воскреси́ти уме́ршия/ сла́вным воскресе́нием Свои́м.
Слава: кондак слепаго, глас 4.
Душе́вныма очи́ма ослепле́н,/ к Тебе́, Христе́, прихожду́,/ я́коже слепы́й от рожде́ния,/ покая́нием зову́ Ти:/ Ты су́щих во тьме Свет пресве́тлый.
И ныне: кондак Пасхи, глас 8:
А́ще и во гроб снизше́л еси́, Безсме́ртне,/ но а́дову разруши́л еси́ си́лу,/ и воскре́сл еси́, я́ко победитель, Христе́ Бо́же,/ жена́м мироно́сицам веща́вый: ра́дуйтеся,/ и Твои́м апо́столом мир да́руяй,/ па́дшим подая́й воскресе́ние.
Прокимен, глас 8:
Помоли́теся и воздади́те/ Го́сподеви Бо́гу на́шему. Стих: Ве́дом во Иуде́и Бог, во Изра́или ве́лие и́мя Его́.
Апостол Деяний, зачало 38. [Деян. 16, 16–34.]
Во дни о́ны, бысть иду́щим апо́столом на моли́тву, отрокови́ца не́кая иму́щая дух пытли́в сре́те нас, я́же стяжа́ние мно́го дая́ше господе́м свои́м волхву́ющи. Та после́довавши Па́влу и нам, взыва́ше глаго́лющи: си́и челове́цы раби́ Бо́га Вы́шняго суть, и́же возвеща́ют нам путь спасе́ния. Се же творя́ше на мно́ги дни. Стужи́в же си Па́вел, и обра́щся, ду́хови рече́: запреща́ю ти и́менем Иису́са Христа́, изы́ди из нея́. И изы́де в том часе́. Ви́девше же госпо́дие ея́, я́ко изы́де наде́жда тяжа́ния их, пое́мше Па́вла и Сил́у, влеко́ша на торг ко князе́м. И вве́дше их к воево́дам, ре́ша: си́и челове́цы возмуща́ют град наш, иуде́е су́ще. И завещава́ют обы́чаи, я́же не досто́ит нам приима́ти, ни твори́ти, ри́мляном су́щим. И сни́деся наро́д на них, и воево́ды растерза́вше им ри́зы, веля́ху па́лицами би́ти их. Мно́ги же да́вше им ра́ны, всади́ша в темни́цу, завеща́вше темни́чному стра́жу тве́рдо стрещи́ их. И́же таково́ завеща́ние прие́м, всади́ их во вну́треннюю темни́цу, и но́ги их заби́ в кла́де. В полу́нощи же Па́вел и Си́ла моля́щася поя́ста Бо́га, послу́шаху же их ю́зницы. Внеза́пу же трус бысть ве́лий, я́ко поколеба́тися основа́нию темни́чному: отверзо́ша же ся а́бие две́ри вся, и всем ю́зы ослабе́ша. Возбу́ждься же темни́чный страж, и ви́дев отве́рсты две́ри темни́цы, извле́к нож, хотя́ше себе́ уби́ти, мня избе́гша ю́зники. Возгласи́ же гла́сом ве́лиим Па́вел, глаго́ля: ничто́же сотвори́ себе́ зла, вси бо есмы́ зде. Проси́в же свещи́, вскочи́, и тре́петен быв, припаде́ к Па́влу и Си́ле. И изве́д их вон, рече́: госпо́дие, что ми подоба́ет твори́ти, да спасу́ся? О́ни же реко́ста: ве́руй в Го́спода Иису́са Христа́, и спасе́шися ты, и весь дом твой. И глаго́ласта ему́ сло́во Госпо́дне, и всем и́же в дому́ его́. И пое́м я́ в той же час но́щи, измы́ от ран, и крести́ся сам и свои́ ему́ вси а́бие. Введ же я́ в дом свой, поста́ви трапе́зу, и возра́довася со всем до́мом свои́м, ве́ровав Бо́гу.
Аллилуиа, глас 8: При́зри на мя, и поми́луй мя. Стих: Стопы́ моя́ напра́ви по словеси́ Твоему́.
Евангелие Иоанна, зачало 34.
[Ин. 9, 1–38.]
Во вре́мя о́но, мимоиды́й Иису́с ви́де челове́ка сле́па от рождества́. И вопроси́ша Его́ ученицы́ Его́, глаго́люще: Равви́, кто согреши́; сей ли, или́ роди́теля его́, да слеп роди́ся? Отвеща́ Иису́с: ни сей согреши́, ни роди́теля его́, но да явя́тся дела́ Бо́жия на нем. Мне подоба́ет де́лати дела́ Посла́вшаго Мя, до́ндеже день есть: прии́дет нощь, егда́ никто́же мо́жет де́лати. Егда́ в ми́ре есмь, свет есмь ми́ру. Сия́ рек, плю́ну на зе́млю, и сотвори́ бре́ние от плюнове́ния, и пома́за о́чи бре́нием слепо́му. И рече́ ему́: иди́, умы́йся в купе́ли Силоа́мсте, е́же сказа́ется по́слан. И́де же, и умы́ся, и прии́де ви́дя. Сосе́ди же и и́же бя́ху ви́дели его́ пре́жде, я́ко слеп бе, глаго́лаху: не сей ли есть седя́й и прося́й? О́вии глаго́лаху, я́ко сей есть: ини́и же глаго́лаху, я́ко подо́бен ему́ есть. Он же глаго́лаше, я́ко аз есмь. Глаго́лаху же ему́: ка́ко ти отверзо́стеся о́чи? Отвеща́ он и рече́: Челове́к нарица́емый Иису́с бре́ние сотвори́, и пома́за о́чи мои́, и рече́ ми: иди́ в купе́ль Силоа́млю, и умы́йся. Шед же и умы́вся, прозре́х. Ре́ша же ему́: кто Той есть? Глаго́ла: не вем. Ведо́ша же его́ к фарисе́ем, и́же бе иногда́ слеп. Бе же суббо́та, егда́ сотвори́ бре́ние Иису́с, и отве́рзе ему о́чи. Па́ки же вопроша́ху его́ и фарисе́е: ка́ко прозре́? Он же рече́ им: бре́ние положи́ мне на о́чи, и умы́хся, и ви́жу. Глаго́лаху же от фарисе́й не́цыи: несть Сей от Бо́га Челове́к, я́ко суббо́ту не храни́т. О́вии глаго́лаху: ка́ко мо́жет челове́к гре́шен сицева́ зна́мения твори́ти? И ра́спря бе в них. Глаго́лаху у́бо слепцу́ па́ки: ты что глаго́леши о Нем, я́ко отве́рзе о́чи твои́? Он же рече́, я́ко проро́к есть. Не я́ша у́бо ве́ры иуде́е о нем, я́ко слеп бе, и прозре́, до́ндеже возгласи́ша роди́теля того́ прозре́вшаго. И вопроси́ша я́, глаго́люще: сей ли есть сын ва́ю, его́же вы глаго́лете, я́ко слеп роди́ся? Ка́ко у́бо ны́не ви́дит? Отвеща́ста же им роди́теля его́, и ре́ста: ве́мы, я́ко сей есть сын на́ю, и я́ко слеп роди́ся. Ка́ко же ны́не ви́дит, не ве́мы: или́ кто отве́рзе ему́ о́чи, мы не ве́мы, сам во́зраст и́мать, самого́ вопроси́те: сам о себе́ да глаго́лет. Сия́ реко́ста роди́теля его́, я́ко боя́стася жидо́в: уже́ бо бя́ху сложи́лися жи́дове, да а́ще кто Его́ испове́сть Христа́, отлуче́н со́нмища да бу́дет. Сего́ ра́ди роди́теля его́ реко́ста: я́ко во́зраст и́мать, самого́ вопроси́те. Возгласи́ша же втори́цею челове́ка, и́же бе слеп, и ре́ша ему́: даждь сла́ву Бо́гу, мы ве́мы, я́ко Челове́к Сей гре́шен есть. Отвеща́ же он, и рече́: а́ще гре́шен есть, не вем: еди́но вем, я́ко слеп бех, ны́не же ви́жу. Ре́ша же ему́ па́ки: что сотвори́ тебе́; ка́ко отве́рзе о́чи твои́? Отвеща́ им: реко́х вам уже́, и не слы́шати: что па́ки хо́щете слы́шати; еда́ и вы ученицы́ Его́ хо́щете бы́ти? Они́ же укори́ша его́, и ре́ша ему́: ты учени́к еси́ Того́, мы же Моисе́овы есмы́ ученицы́. Мы ве́мы, я́ко Моисе́ови глаго́ла Бог: Сего́ же не ве́мы, отку́ду есть. Отвеща́ челове́к, и рече́ им: о сем бо ди́вно есть, я́ко вы не ве́сте, отку́ду есть, и отве́рзе о́чи мои́. Вем же, я́ко гре́шники Бог не послу́шает, но а́ще кто богочте́ц есть, и во́лю Его́ твори́т, того́ послу́шает. От ве́ка несть слы́шано, я́ко кто отве́рзе о́чи сле́пу рожде́ну. А́ще не бы был Сей от Бо́га, не могл бы твори́ти ничесо́же. Отвеща́ша и ре́ша ему́: во гресе́х ты роди́лся еси́ весь, и ты ли ны учи́ши? И изгна́ша его́ вон. Услы́ша Иису́с, я́ко изгна́ша его́ вон, и обре́т его́, рече́ ему́: ты ве́руеши ли в Сы́на Бо́жия? Отвеща́ он, и рече́: и кто есть, Го́споди, да ве́рую в Него́? Рече́ же ему́ Иису́с: и ви́дел еси́ Его́, и глаго́ляй с тобо́ю, Той есть. Он же рече́: ве́рую, Го́споди, и поклони́ся Ему́.
Вместо же Достойно: поем:
А́нгел вопия́ше Благода́тней:/ Чи́стая Де́во, ра́дуйся!/ И па́ки реку́: ра́дуйся!/ Твой Сын воскре́се/ тридне́вен от гро́ба,/ и ме́ртвыя воздви́гнувый:/ лю́дие, весели́теся.
Таже ирмос, глас 1: Свети́ся, свети́ся,/ но́вый Иерусали́ме,/ сла́ва бо Госпо́дня/ на тебе́ возсия́./ Лику́й ны́не/ и весели́ся, Сио́не./ Ты же, Чи́стая, красу́йся, Богоро́дице,/ о воста́нии Рождества́ Твоего́.
Причастный:
Те́ло Христо́во приими́те,/ исто́чника безсме́ртнаго вкуси́те. Другий: Хвали́те Го́спода с Небе́с,/ хвали́те Его́ в вы́шних./ Аллилу́иа. [Трижды.]
Службу святаго случившагося в Неделю сию поем на Повечерии.
Отдание Праздника Пасхи
Во Вторник Шестой Недели По Пасце,
Вечера
По 9-м часе творит священник начало с кадилом и со свещею, царским дверем отверзенным, и поет: Христо́с воскре́се: со стихи. И по стисех псалом: Благослови́ душе́ моя́ Го́спода: И ектениа. Таже кафисма обычная.
На Го́споди воззва́х: поем стихиры самогласны
слепаго, на 6. Глас 2:
Слепы́й роди́выйся, в свое́м по́мысле глаго́лаше:/ еда́ аз грех ра́ди роди́тельных роди́хся без о́чию,/ еда́ аз за неве́рие язы́ков роди́хся во обличе́ние?/ Не домышля́юся вопроша́ти,/ когда́ нощь, когда́ день?/ Не терпи́та ми но́зе ка́меннаго претыка́ния,/ не ви́дех бо со́лнца сия́юща,/ ниже́ во о́бразе мене́ Созда́вшаго./ Но молю́ Ти ся Христе́ Бо́же,/ при́зри на мя и поми́луй мя.
Мимоходя́ Иису́с от святи́лища,/ обре́те челове́ка сле́па от рожде́ния,/ и умилосе́рдився положи́ бре́ние на о́чию его́, и рече́ к нему́:/ иди́ умы́йся в Силоа́ме,/ и умы́вся прозре́, сла́ву возсыла́я Бо́гу./ Сосе́ди же его́ глаго́лаху ему́:/ кто твои́ зе́ницы отве́рзе,/ и́хже никто́же от зря́щих исцели́ти возмо́же?/ Он же возопи́в, рече́:/ Челове́к Иису́с глаго́лемый,/ Он ми рече́, умы́йся в Силоа́ме, и прозре́х./ Той есть вои́стинну,/ Его́же рече́ Моисе́й в зако́не, Христа́ Месси́ю:/ Той есть Спас душ на́ших.
Глас 4: Все житие́ слепы́й нощь помышля́я,/ возопи́ к Тебе́:/ Го́споди, отве́рзи ми зе́ницы,/ Сы́не Дави́дов Спа́се наш,/ да со все́ми и аз воспою́ Твою́ силу.
Глас 5: Го́споди, мимоходя́ путе́м,/ обре́л еси́ челове́ка сле́па от рожде́ния,/ и удивле́ни бы́вше ученицы́, вопроша́ху Тя глаго́люще:/ Учи́телю, кто согреши́: сей ли,/ или́ роди́тели его́, да слеп роди́ся?/ Ты же Спа́се мой возопи́л еси́ к ним:/ ни сей согреши́, ни роди́тели его́,/ но да явя́тся дела́ Бо́жия на нем./ Мне подоба́ет де́лати дела́ Посла́вшаго Мя,/ я́же никто́же мо́жет де́лати./ И сия́ рек, плю́нув до́лу, и бре́ние сотво́рь,/ пома́зал еси́ о́чи его́, рек к нему́:/ иди́, умы́йся в Силоа́мстей купе́ли./ Он же умы́вся здрав бысть, и вопия́ше к Тебе́:/ ве́рую Го́споди, и поклони́ся Тебе́./ Те́мже вопие́м и мы, поми́луй нас.
Глас 8: Пра́вды со́лнце мы́сленное Христе́ Бо́же,/ из утро́бы све́та лише́ннаго,/ Твои́м пречи́стым прикоснове́нием просвети́вшее обою́ду,/ и на́ша о́чи душе́вныя озари́вшее,/ сы́ны дне покажи́,/ да ве́рою вопие́м Ти:/ мно́гое Твое́ и неизрече́нное, е́же на нас благоутро́бие,/ Человеколю́бче, сла́ва Тебе́.
За милосе́рдие ми́лости воплоти́выйся, Христе́ Бо́же,/ све́та лише́ннаго от утро́бы,/ милосе́рдием неизре́ченных щедро́т,/ сия́ния Боже́ственнаго сподо́бил еси́,/ сего́ зе́ницам пе́рстию/ созда́тельными пе́рсты Твои́ми прикосну́выйся:/ Сам и ны́не, Светода́телю,/ и на́ша озари́ душе́вная чу́вства,/ я́ко еди́н независтнода́тель.
Слава, и ныне, глас 8: Кто возглаго́лет си́лы Твоя́, Христе́;/ или́ кто изочте́т чуде́с Твои́х мно́жества?/ Сугу́б бо я́ко ви́ден был еси́ на земли́ за бла́гость,/ сугу́бы и цельбы́ неду́гующим подава́л еси́:/ не то́чию бо теле́сныя о́чи отве́рзл еси́,/ и́же от утро́бы слепо́му,/ но и душе́вныя./ Те́мже Бо́га Тя испове́даше тая́щагося,/ и всем подаю́ща ве́лию ми́лость.
Прокимен дне.
На стиховне стихира, глас 5:
Тебе́ воплоще́ннаго Спа́са Христа́,/ и небес не разлучи́вшася,/ во гла́сех пе́ний велича́ем,/ я́ко крест и смерть прия́л еси́ за род наш,/ я́ко человеколю́бец Госпо́дь,/ испрове́ргий а́дова врата́,/ тридне́вно воскре́сл еси́,/ спаса́я ду́ши на́ша.
Таже стихиры Пасхи с припевы их. Глас 5.
Стих: Да воскре́снет Бог,/ и расточа́тся врази́ Его́.
Па́сха/ свяще́нная нам днесь показа́ся;/ Па́сха но́ва свята́я;/ Па́сха та́инственная;/ Па́сха всечестна́я./ Па́сха Христо́с Изба́витель;/ Па́сха непоро́чная;/ Па́сха вели́кая;/ Па́сха ве́рных./ Па́сха две́ри ра́йския нам отверза́ющая./ Па́сха всех освяща́ющая ве́рных.
Стих: Я́ко исчеза́ет дым,/ да исче́знут.
Прииди́те/ от виде́ния жены́ благове́стницы,/ и Сио́ну рцы́те:/ приими́/ от нас ра́дости благове́щения, Воскресе́ния Христо́ва:/ красу́йся, лику́й/ и ра́дуйся, Иерусали́ме,/ Царя́ Христа́ узре́в из гро́ба,/ я́ко жениха́ происходя́ща.
Стих: Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.
Мироно́сицы жены́,/ у́тру глубоку́,/ предста́вша гро́бу Живода́вца,/ обрето́ша А́нгела/ на ка́мени седя́ща,/ и той провеща́в им,/ си́це глаго́лаше:/ что и́щете Жива́го с ме́ртвыми;/ что пла́чете Нетле́ннаго во тли?/ Ше́дше, пропове́дите ученико́м Его́.
Стих: Сей день, его́же сотвори Госпо́дь,/ возра́дуемся и возвесели́мся в онь.
Па́сха кра́сная,/ Па́сха, Госпо́дня Па́сха!/ Па́сха всечестна́я/ нам возсия́. Па́сха,/ ра́достию друг дру́га обы́мем./ О Па́сха!/ Избавле́ние ско́рби,/ и́бо из гро́ба днесь,/ я́ко от черто́га/ возсия́в Христо́с,/ жены́ ра́дости испо́лни, глаго́ля:/ пропове́дите апо́столом.
Слава, и ныне, глас 5: Воскресе́ния день,/ и просвети́мся торжество́м,/ и друг дру́га обы́мем./ Рцем бра́тие,/ и ненави́дящим нас,/ прости́м вся Воскресе́нием,/ и та́ко возопии́м:/ Христо́с воскре́се из ме́ртвых,/ сме́ртию смерть попра́в,/ и су́щим во гробе́х живо́т дарова́в. единожды.
Таже, Ныне отпущаеши: Трисвятое. И по О́тче наш:
Таже тропарь воскресен, глас 5:
Собезнача́льное Сло́во Отцу́ и Ду́хови,/ от Де́вы ро́ждшееся на Спасе́ние на́ше,/ воспои́м, ве́рнии, и поклони́мся;/ я́ко благоволи́ Пло́тию взы́ти на Крест,/ и смерть претерпе́ти,/ и воскреси́ти уме́ршия/ сла́вным воскресе́нием Свои́м.
Слава, и ныне, Богородичен: Ра́дуйся, Две́ре Госпо́дня непроходи́мая;/ ра́дуйся, стено́ и покро́ве притека́ющим к Тебе́./ Ра́дуйся, необурева́емое приста́нище и неискусобра́чная,/ ро́ждшая пло́тию Творца́ Твоего́ и Бо́га./ Моля́щи не оскудева́й о воспева́ющих/ и кла́няющихся рождеству́ Твоему́.
И ектениа: Поми́луй нас Бо́же: И обычный отпуст глаголет иерей без креста: Воскресы́й из ме́ртвых: И святаго дне поминает. И многолетны.
На повечерии по Досто́йно: и по трисвятом, кондак слепаго: Сла́ва, и ны́не: Пасхи: А́ще и во гроб:
Полунощницу же поем по обычаю с кафисмою. По 1-м трисвятом, вместо: Се жени́х гряде́т: глаголем тропарь воскресен: Собезнача́льное сло́во: Сла́ва, и ны́не: Богородичен его. По 2-м трисвятом, вместо: Помяни́ Го́споди я́ко благ: глаголем кондак Пасхи: А́ще и во гроб: Посем, Го́споди поми́луй, 12. И отпуст. Молитвы же: Помяни́ Го́споди, в наде́жди: не глаголем.
В Среду 6-я Седмицы По Пасце,
На Утрени
Начало творит священник: Сла́ва святе́й, и единосу́щней: по обычаю, с кадилом, и со стихи, яко изобразися вечера. И по стисех глаголет настоятель, или чтец: Сла́ва в вы́шних Бо́гу: И шестопсалмие по обычаю:
На Бог Госпо́дь: тропарь воскресен, глас 5:
Собезнача́льное Сло́во Отцу́ и Ду́хови,/ от Де́вы ро́ждшееся на Спасе́ние на́ше,/ воспои́м, ве́рнии, и поклони́мся;/ я́ко благоволи́ Пло́тию взы́ти на Крест,/ и смерть претерпе́ти,/ и воскреси́ти уме́ршия/ сла́вным воскресе́нием Свои́м. Дважды.
Слава, и ныне, Богородичен: Ра́дуйся, Две́ре Госпо́дня непроходи́мая;/ ра́дуйся, стено́ и покро́ве притека́ющим к Тебе́./ Ра́дуйся, необурева́емое приста́нище и неискусобра́чная,/ ро́ждшая пло́тию Творца́ Твоего́ и Бо́га./ Моля́щи не оскудева́й о воспева́ющих/ и кла́няющихся рождеству́ Твоему́.
По 1-м стихословии, седален воскресен, глас 5:
Крест Госпо́день похва́лим,/ погребе́ние Свято́е пе́сньми почти́м,/ и Воскресе́ние Его́ препросла́вим,/ я́ко совозста́ви ме́ртвыя от гроб, я́ко Бог,/ плени́в сме́рти держа́ву, и кре́пость диа́волю,/ и су́щим во а́де свет возсия́.
Стих: Воскресни́ Го́споди Бо́же мой, да вознесе́тся рука́ Твоя́,/ не забу́ди убо́гих Твои́х до конца́.
Го́споди мертв наре́клся еси́, умертви́вый смерть,/ во гро́бе положи́лся еси́, истощи́вый гро́бы:/ горе́ во́ини гро́ба стрежа́ху,/ до́ле от ве́ка ме́ртвыя воскреси́л еси́./ Всеси́льне и Непостижи́ме Го́споди, сла́ва Тебе́.
Слава, и ныне, Богородичен: Ра́дуйся, Свята́я Горо́ и Богопрохо́дная,/ ра́дуйся, одушевле́нная купино́ и неопали́мая./ Ра́дуйся, Еди́на к Бо́гу мiрови Мо́сте,/ преводя́й сме́ртныя к Ве́чному Животу́./ Ра́дуйся, Нетле́нная Отрокови́це,/ неискусому́жно ро́ждшая Спасе́ние душ на́ших.
И чтение Иоанна.
По 2-м стихословии седален, глас 5:
Отцу́ и Ду́хови собезнача́льный,/ и́же све́том я́ко ри́зою одева́яйся,/ человеколю́бно в на́ше естество́ облече́ся,/ и неду́ги челове́ческия отгоня́я я́ко Бог,/ просвети́ и зе́ницы от ложе́сн ма́терних лише́ннаго све́та. [Дважды.]
Таже глаголем трижды:
Воскресе́ние Христо́во ви́девше,/ поклони́мся Свято́му Го́споду Иису́су,/ еди́ному безгре́шному,/ Кресту́ Твоему́ покланя́емся, Христе́,/ и свято́е Воскресе́ние Твое́ пое́м и сла́вим./ Ты бо еси́ Бог наш,/ ра́зве Тебе́ ино́го не зна́ем,/ и́мя Твое́ имену́ем./ Прииди́те вси ве́рнии,/ поклони́мся Свято́му Христо́ву Воскресе́нию,/ се бо прии́де Кресто́м ра́дость всему́ ми́ру./ Всегда́ благословя́ще Го́спода,/ пое́м Воскресе́ние Его́:/ распя́тие бо претерпе́в,/ сме́ртию смерть разруши́.
Псалом 50-й.
Каноны три: Пасце со ирмосы на 6, и слепаго на 4, и предпразднству Вознесения, на 4.
Канон Пасхи. Глас 1.
Песнь 1.
Ирмос: Воскресе́ния день,/ просвети́мся, лю́дие./ Па́сха, Госпо́дня Па́сха,/ от сме́рти бо к жи́зни,/ и от земли́ к небеси́,/ Христо́с Бог нас преведе́,/ побе́дную пою́щия.
Припев: Христо́с воскре́се из ме́ртвых.
Очи́стим чу́вствия, и у́зрим/ непристу́пным све́том/ Воскресе́ния, Христа́/ блиста́ющася,/ и ра́дуйтеся, реку́ща,/ я́сно да услы́шим,/ побе́дную пою́ще.
Припев: Христо́с воскре́се из ме́ртвых.
Небеса́ у́бо досто́йно да веселя́тся,/ земля́ же да ра́дуется,/ да пра́зднует же мир,/ ви́димый же весь и неви́димый:/ Христо́с бо воста́,/ весе́лие ве́чное.
Иный канон Богородичен, подобен.
Егоже краестрочие на первых тропарех: Феофа́нус. Глас тойже.
Припев: Пресвята́я Богоро́дице, спаси́ нас.
Умерщвле́ния преде́л сломи́ла еси́,/ ве́чную жизнь ро́ждшая Христа́,/ из гро́ба возсия́вшаго днесь,/ Де́во Всенепоро́чная,/ и мир просвети́вшаго.
Припев: Пресвята́я Богоро́дице, спаси́ нас.
Воскре́сшаго ви́девши Сы́на Твоего́ и Бо́га,/ ра́дуйся со апо́столы Богоблагода́тная Чи́стая:/ и е́же ра́дуйся пе́рвее,/ я́ко всех ра́дости вина́, восприя́ла еси́,/ Богома́ти Всенепоро́чная.
Другий канон слепаго, глас 5.
Песнь 1.
Ирмос: Зе́млю, на ню́же не возсия́:
Распя́тие во́льное восприи́м, Спа́се, пло́тию,/ источи́л еси́ благослове́ние, и жизнь ми́рови, Влады́ко,/ еди́не Всеблагослове́нне, и всех Соде́телю./ Те́мже благослови́м Тя, пое́м и сла́вим, пою́ще,/ воспева́юще побе́дную песнь.
В ро́ве Тя преиспо́днейшем ме́ртва бы́вша, Христе́,/ положи́ благообра́зный Ио́сиф,/ и привали́ к две́рем гро́ба ка́мень, Долготерпели́ве./ Но воскре́сл еси́ сла́вне, и мiр совозста́вил еси́ пою́щий,/ воспева́ющий побе́дную песнь.
Мv́ра что прино́сите со слеза́ми вы,/ глаго́лаше честны́м жена́м А́нгел явле́йся?/ Христо́с воста́,/ те́кше рцы́те богови́дцем ученико́м, рыда́ющим и пла́чущим,/ я́ко да взыгра́ют и ликовству́ют све́тло.
Чудеса́ пресла́вная сотворя́я, Изба́витель/ исцели́ и сле́па от рожде́ния,/ бре́нием пома́зав, и рек:/ иди́ умы́йся в Силоа́ме,/ я́ко да позна́еши Мя, Бо́га,/ по земли́ ше́ствующа, плоть нося́ща,/ за милосе́рдие щедро́т.
Канон предпразднству Вознесения,
егоже краестрочие, по алфавиту. Глас 5.
Песнь 1.
Ирмос: Коня́ и вса́дника в мо́ре Чермно́е,/ сокруша́яй бра́ни/ мы́шцею высо́кою,/ Христо́с истрясе́,/ Изра́иля же спасе́,/ побе́дную песнь пою́ща.
Горе́ ко Отцу́ Христо́с восхо́дит,/ и прино́сит плоть, ю́же от нас восприя́т,/ Того́ воспои́м в похвале́нии днесь,/ побе́дную песнь пою́ще. [Дважды.]
Слава: Кни́ги Писа́ний Боже́ственных,/ и про́поведи прему́дрых богоглаго́льник,/ коне́ц я́ве прия́ша,/ по воста́нии бо Влады́ка,/ восхо́дит со сла́вою в Небе́сная.
И ныне: Земля́ та́йно лику́ет,/ и небе́сная весе́лия исполня́ются о вознесе́нии Христа́,/ дре́вле разстоя́щаяся соедини́вшаго благода́тию,/ и Е́вино прегражде́ние разори́вшаго.
Катавасия: Спаси́телю Бо́гу,/ в мо́ри лю́ди немо́крыми нога́ми наста́вльшему,/ и фарао́на со всево́инством пото́пльшему,/ Тому́ еди́ному пои́м,/ я́ко просла́вися.
Песнь 3.
Ирмос: Прииди́те, пи́во пие́м но́вое,/ не от ка́мене непло́дна чудоде́емое,/ но нетле́ния исто́чник/ из гро́ба одожди́вша Христа́,/ в Не́мже утвержда́емся.
Припев: Христо́с воскре́се из ме́ртвых.
Ны́не вся испо́лнишася све́та,/ не́бо же и земля́, и преиспо́дняя:/ да пра́зднует у́бо вся тварь/ воста́ние Христо́во,/ в не́мже утвержда́ется.
Припев: Христо́с воскре́се из ме́ртвых.
Вчера́ спогребо́хся Тебе́ Христе́,/ совостаю́ днесь/ воскре́сшу Тебе́,/ сраспина́хся Тебе́ вчера́,/ Сам мя спросла́ви Спа́се во Ца́рствии Твое́м.
Припев: Пресвята́я Богоро́дице, спаси́ нас.
На нетле́нную жизнь прихожду́ днесь/ бла́гостию ро́ждшагося из Тебе́, Чи́стая,/ и всем конце́м свет облиста́вшаго.
Припев: Пресвята́я Богоро́дице, спаси́ нас.
Бо́га, Его́же родила́ еси́ пло́тию,/ из ме́ртвых, я́коже рече́,/ воста́вша ви́девши, Чи́стая, лику́й,/ и Сего́ я́ко Бо́га Пречи́стая возвелича́й.
Ин, слепаго. Ирмос: Дви́жимое се́рдце мое́:
Коле́блющихся сердца́ утверди́л еси́,/ зе́млю всю поколеба́в, Долготерпели́ве,/ честны́м распя́тием Твои́м/ е́же претерпе́л еси́ пло́тию.
В но́вем гро́бе Тебе́ положи́, Ще́дре, Ио́сиф благообра́зный,/ воскре́сл же еси́ из ме́ртвых тридне́вен, новосотвори́вый нас.
Что я́ко ме́ртва и́щете Го́спода?/ Воскре́се, я́коже рече́,/ А́нгел жена́м веща́ше,/ блиста́яся боже́ственным зра́ком.
Сле́па иногда́ от рожде́ния, присту́пльша к Тебе́/ исцели́л еси́ Всеще́дре,/ сла́вяща смотре́ние Твое́ и чудеса́.
Ин, предпразднству. Ирмос: Водрузи́вый на ничесо́мже зе́млю повеле́нием Твои́м,/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х,/ Це́рковь Твою́ утверди́, Еди́не Бла́же и Человеколю́бче.
Связа́в Свое́ю сме́ртию Сло́ве смерть,/ из ме́ртвых воскре́сл еси́ я́ве тридне́вен,/ и к Небе́сным Спа́се возше́л еси́ со сла́вою,/ песносло́вящим безпло́тным Твое́ смотре́ние неизрече́нное.
Слава: Прише́л еси́ к земны́м Христе́ кроме́ те́ла, и обле́кся в плоть,/ Крест претерпе́л еси́, и воскре́с из ме́ртвых,/ возше́л еси́ со сла́вою к началосве́тному Отцу́ Твоему́,/ умиротвори́вый вся́ческая.
И ныне: Поиска́в, Христе́, на земли́ заблу́ждшее овча́,/ незаблу́дным Сло́ве, сие́ счини́л еси́,/ и возне́сся к Небесе́м,/ сел еси́ во сла́ве одесну́ю Твоего́ Роди́теля./ Сла́ва мно́гому благоутро́бию Твоему́.
Катавасия: Си́лою Креста́ Твоего́, Христе́,/ утверди́ мое́ помышле́ние,/ во е́же пе́ти и сла́вити/ спаси́тельное Твое́ Вознесе́ние.
Кондак слепаго, глас 4.
Подобен: Яви́лся еси́ днесь:
Душе́вныма очи́ма ослепле́н,/ к Тебе́, Христе́, прихожду́,/ я́коже слепы́й от рожде́ния,/ покая́нием зову́ Ти:/ Ты су́щих во тьме Свет пресве́тлый.
Икос: Струю́ ми да́руй, Христе́, прему́дрости неизрече́нныя, и ра́зума го́рняго,/ све́те су́щих во тьме, и прельща́емых наста́вниче,/ да возмогу́ чудеса́ Твоя́ пове́дати, окая́нный,/ я́же боже́ственная кни́га научи́ Ева́нгелиа ми́ра,/ си́есть, слепа́го чудотворе́ние,/ я́ко от рожде́ния слеп сый,/ о́чи чу́вственныя прие́млет и душе́вныя, ве́рою взыва́я:/ Ты су́щих во тьме свет пресве́тлый.
Таже седален, глас 1.
Подобен: Гроб твой спасе:
Воочи́л еси́ Христе́ от утро́бы рожде́ннаго без оче́с,/ показа́вый Иуде́ем, Спа́се мой, сла́ву Твою́ неизрече́нную,/ и я́ко свет всех еси́,/ но за́вистию Тя ослепле́ннии умо́м наве́тующе,/ живота́ Пода́теля умертви́ти поуща́хуся.
Слава, и ныне. Подобен: Роди́лся еси́, я́ко Ты, Спа́се мой, восхоте́вый,/ яви́лся же па́ки еси́, я́ко Ты восхоте́л еси́,/ и пострада́л еси́ я́ко челове́к,/ я́ко Бог же воскре́сл еси́./ На Небеса́ со сла́вою возше́л еси́,/ и возве́л еси́ челове́ческое существо́,/ и сла́вою удобри́л еси́.
Песнь 4.
Ирмос: На Боже́ственней стра́жи/ богоглаго́ливый Авваку́м/ да ста́нет с на́ми и пока́жет/ светоно́сна А́нгела/ я́сно глаго́люща:/ днесь спасе́ние ми́ру,/ я́ко воскре́се Христо́с,/ я́ко всеси́лен.
Припев: Христо́с воскре́се из ме́ртвых.
Му́жеский у́бо пол,/ я́ко разве́рзый де́вственную утро́бу,/ яви́ся Христо́с,/ я́ко челове́к же,/ А́гнец нарече́ся,/ непоро́чен же,/ я́ко невку́сен скве́рны,/ на́ша Па́сха,/ и я́ко Бог и́стинен/ соверше́н рече́ся.
Припев: Христо́с воскре́се из ме́ртвых.
Я́ко единоле́тный а́гнец,/ благослове́нный нам вене́ц Христо́с,/ во́лею за всех закла́н бысть,/ Па́сха чисти́тельная,/ и па́ки из гро́ба кра́сное/ пра́вды нам возсия́ Со́лнце.
Припев: Христо́с воскре́се из ме́ртвых.
Богооте́ц у́бо Дави́д/ пред се́нным ковче́гом скака́ше игра́я,/ лю́дие же Бо́жии святи́и,/ образо́в сбытие́ зря́ще,/ весели́мся Боже́ственне,/ я́ко воскре́се Христо́с,/ я́ко Всеси́лен.
Припев: Пресвята́я Богоро́дице, спаси́ нас.
Созда́вый Ада́ма, Твоего́ пра́отца, Чи́стая,/ зи́ждется от Тебе́,/ и сме́ртное жили́ще разори́ Свое́ю сме́ртию днесь,/ и озари́ вся/ боже́ственными блиста́ньми воскресе́ния.
Припев: Пресвята́я Богоро́дице, спаси́ нас.
Его́же родила́ еси́ Христа́,/ прекра́сно из ме́ртвых возсия́вша, Чи́стая, зря́щи,/ до́брая и непоро́чная в жена́х и кра́сная,/ днесь во спасе́ние всех,/ со апо́столы ра́дующися, Того́ прославля́й.
Ин, слепаго. Ирмос: Услы́шах, Го́споди:
Уме́рша мя дре́вом, пожре́н быв, Спа́се мой,/ жизнь сый, оживи́л еси́ за вели́кую ми́лость,/ сего́ ра́ди, Сло́ве, сла́влю Тя.
Ученико́м, Го́споди, соводворя́яся пресла́вно,/ сим глаго́лал еси́: иди́те,/ пропове́дите всю́ду Мое́ Воскресе́ние.
Уверя́я, Го́споди, воста́ние Твое́, е́же из гро́ба,/ лю́бящим Тя, Христе́,/ во дни мно́ги соводвори́лся еси́, ра́дость творя́ им.
Воочи́л еси́, Го́споди, сле́па из утро́бы рожде́нна, рек:/ иди́, умы́йся, и прозри́, Мое́ сла́вя Божество́.
Ин, предпразднству. Ирмос: Боже́ственное Твое́ разуме́в истоща́ние/ прозорли́во, Авваку́м, Христе́, со тре́петом вопия́ше Тебе́:/ во Спасе́ние люде́й Твои́х/ спасти́ пома́занныя Твоя́ прише́л еси́.
Пре́жде грехо́м осужде́нное естество́ на́ше Всецарю́,/ Твои́м прия́тием поми́ловася,/ песносло́вящее Твое́ со стра́хом воста́ние, и Боже́ственное Вознесе́ние.
Дивя́тся безпло́тных чи́ни,/ смотря́юще Тя Христе́ нося́ща те́ло земно́е,/ и возше́дша на о́блак, и к небе́сным восходя́ща.
Слава: Ви́девше очервле́ны ри́зы Твоя́, Христе́ Всецарю́,/ Твои́м восхо́дом ужасо́шася а́нгельския си́лы,/ и стра́хом, и ра́достию поклони́шася.
И ныне: Воспле́щим рука́ма, Госпо́дь воста́в из ме́ртвых,/ на Небеса́ взы́де, повину́вшимся Ему́ а́нгелом,/ я́ко Творцу́ и Бо́гу на́шему.
Катавасия: Услы́шах слух си́лы Креста́,/ я́ко рай отве́рзеся им,/ и возопи́х:/ сла́ва си́ле Твое́й Го́споди.
Песнь 5.
Ирмос: У́тренюем у́треннюю глубоку́,/ и вме́сто ми́ра песнь принесе́м Влады́це,/ и Христа́ у́зрим/ пра́вды Со́лнце,/ всем жизнь возсия́юща.
Припев: Христо́с воскре́се из ме́ртвых.
Безме́рное Твое́ благоутро́бие,/ а́довыми у́зами содержи́мии зря́ще,/ к све́ту идя́ху, Христе́,/ весе́лыми нога́ми,/ Па́сху хва́ляще ве́чную.
Припев: Христо́с воскре́се из ме́ртвых.
Присту́пим свещено́снии,/ исходя́щу Христу́ из гро́ба, я́ко жениху́,/ и спра́зднуем любопра́зднственными чи́нми/ Па́сху Бо́жию спаси́тельную.
Припев: Пресвята́я Богоро́дице, спаси́ нас.
Просвеща́ется боже́ственными луча́ми и живоно́сными/ воскресе́ния Сы́на Твоего́,/ Богома́ти Пречи́стая,/ и ра́дости исполня́ется благочести́вых собра́ние.
Припев: Пресвята́я Богоро́дице, спаси́ нас.
Не разве́рзл еси́ врата́ де́вства в воплоще́нии,/ гро́ба не разруши́л еси́ печа́тей, Царю́ созда́ния,/ отону́дуже воскре́сшаго Тя зря́щи, Ма́ти, ра́довашеся.
Ин, слепаго. Ирмос: Окая́нную ду́шу мою́:
Возне́слся еси́ на Дре́во, Ще́дре,/ и совозне́сл еси́ вся челове́ки,/ и бори́теля зми́я умертви́л еси́,/ и оживи́л еси́ созда́ние рук Твои́х, я́ко еди́н Бог всех.
Положи́лся еси́ во гро́бе во́лею, Царю́ Безсме́ртне,/ и ца́рствия а́дова вся истощи́л еси́,/ ме́ртвыя Воскресе́нием Твои́м воздви́гнув.
Чудеса́ ве́лия соде́ловающаго, Сло́ве, на земли́,/ лю́дие уби́ша Тя, беззако́ннии,/ но Сам Го́споди, еди́н всеси́лен сый, я́коже предре́кл еси́,/ из ме́ртвых воскре́сл еси́, Христе́.
О́чи отве́рзл неви́девшаго свет чу́вственный,/ души́ просвети́л еси́ зе́ницы,/ и сла́вити сотвори́л еси́ сего́, позна́вша Тя, Творца́,/ за благоутро́бие яви́вшася челове́ка.
Ин, предпразднству. Ирмос: Одея́йся Све́том, я́ко ри́зою,/ к Тебе́ у́треннюю, и Тебе́ зову́:/ ду́шу мою́ просвети́ омраче́нную, Христе́,/ я́ко Еди́н Благоутро́бен.
Разреши́в осужде́ние челове́чества,/ Христо́с воскре́се и вознесе́ся к Небе́сным,/ О́тчим соседе́нием поче́т, и́хже возлюби́. [Дважды.]
Слава: По воскресе́нии радостнотвори́вый Христе́ ученики́ Твоя́,/ возше́л еси́ горе́, к Твоему́ Роди́телю,/ Его́же не разлучи́лся еси́, а́ще и Челове́ком бесе́довал еси́.
И ныне: Зако́ну предсе́ния,/ и пропове́дания богоглаго́ливых испо́лнив, Христе́,/ возше́л еси́, о́блаку Тя подъе́мшу, Спа́се, к небе́сным.
Катавасия: У́тренююще вопие́м Ти:/ Го́споди, спаси́ ны,/ Ты бо еси́ Бог наш,/ ра́зве бо Тебе́ ино́го не зна́ем.
Песнь 6.
Ирмос: Снизше́л еси́ в преиспо́дняя земли́,/ и сокруши́л еси́ вереи́ ве́чныя,/ содержа́щия свя́занныя, Христе́,/ и тридне́вен, я́ко от ки́та Ио́на,/ воскре́сл еси́ от гро́ба.
Припев: Христо́с воскре́се из ме́ртвых.
Сохрани́в це́ла зна́мения Христе́,/ воскре́сл еси́ от гро́ба,/ ключи́ Де́вы не вреди́вый в рождестве́ Твое́м,/ и отве́рзл еси́ нам ра́йския две́ри.
Припев: Христо́с воскре́се из ме́ртвых.
Спа́се мой,/ живо́е же и неже́ртвенное заколе́ние,/ я́ко Бог Сам Себе́/ во́лею приве́л Отцу́,/ совоскреси́л еси́ всеро́днаго Ада́ма,/ воскре́с от гро́ба.
Припев: Пресвята́я Богоро́дице, спаси́ нас.
Возведе́ся дре́вле держи́мое сме́ртию и тле́нием,/ воплоти́вшимся от Твоего́ пречи́стаго чре́ва,/ к нетле́нней и присносу́щней жи́зни,/ Богоро́дице Де́во.
Припев: Пресвята́я Богоро́дице, спаси́ нас.
Сни́де в преиспо́дняя земли́,/ в ложесна́ Твоя́, Чи́стая, сше́дый,/ и всели́выйся и воплоти́выйся па́че ума́,/ и воздви́же с Собо́ю Ада́ма,/ воскре́с от гро́ба.
Ин, слепаго. Ирмос: Я́коже проро́ка от зве́ря:
Распны́йся с разбо́йники, Влады́ко,/ изба́вил еси́ от разбо́йник лука́вых, душетле́нных страсте́й, Человеколю́бче Го́споди,/ вся пою́щия Твое́ распя́тие и воста́ние согла́сно.
Положи́ша без дыха́ния Тебе́ ме́ртва, Христе́, во гро́бе,/ всем ме́ртвым вдыха́юща жизнь,/ воскре́сл же еси́, Го́споди, вся истощи́вый, Сло́ве, гро́бы,/ Боже́ственною Твое́ю си́лою.
По воста́нии, Христе́, друго́м глаго́лал еси́:/ седи́те у́бо во Иерусали́ме,/ до́ндеже облече́теся си́лою свы́ше непобеди́мою, и изве́стною по́мощию.
Бре́ние сотво́рь, о́чи слепа́го от рожде́ния пома́зал еси́,/ и дарова́л еси́ ему́ прозре́ти,/ пою́щу Твою́, Сло́ве, неизрече́нную си́лу, е́юже спасл еси́ мир.
Ин, предпразднству. Ирмос: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́,/ и от тли возведи́ мя, я́ко Благоутро́бен.
Стра́нное виде́ние яви́лся еси́ а́нгелом,/ челове́чь зрак нося́,/ восхо́дом Твои́м стра́шным Человеколю́бче,/ те́мже со стра́хом воспева́ем Тя. [Дважды.]
Слава: Всех Госпо́дь со сла́вою восхо́дит све́тло/ к Своему́ Безнача́льному Роди́телю,/ вся тварь ны́не пра́зднует лику́ющи.
И ныне: Всяк язы́к днесь да вопие́т:/ в воскликнове́нии, Христо́с взы́де,/ и в трубы́ Боже́ственном гла́се к небесе́м, и́хже не оста́ви.
Катавасия: Обы́де мя бе́здна,/ гроб мне кит бысть,/ аз же возопи́х к Тебе́, Человеколю́бцу,/ и спасе́ мя десни́ца Твоя́, Го́споди.
Кондак Пасце, глас 8:
А́ще и во гроб снизше́л еси́, Безсме́ртне,/ но а́дову разруши́л еси́ си́лу,/ и воскре́сл еси́, я́ко победитель, Христе́ Бо́же,/ жена́м мироно́сицам веща́вый: ра́дуйтеся,/ и Твои́м апо́столом мир да́руяй,/ па́дшим подая́й воскресе́ние.
Икос: Е́же пре́жде со́лнца Со́лнце заше́дшее иногда́ во гроб,/ предвари́ша ко у́тру, и́щущия я́ко дне мvроно́сицы де́вы,/ и друга́ ко друзе́й вопия́ху:/ о други́ни! Прииди́те, воня́ми пома́жем те́ло живоно́сное и погребе́ное,/ плоть воскреси́вшаго па́дшаго Ада́ма, лежа́щую во гро́бе./ И́дем, потщи́мся я́коже волсви́, и поклони́мся,/ и принесе́м мv́ра я́ко да́ры, не в пелена́х, но в плащани́це обви́тому,/ и пла́чим, и возопии́м: о Влады́ко, воста́ни,/ па́дшим подая́й воскресе́ние.
Синаксарь минеи.
Песнь 7.
Ирмос: О́троки от пе́щи изба́вивый,/ быв Челове́к,/ стра́ждет я́ко сме́ртен,/ и стра́стию сме́ртное,/ в нетле́ния облачи́т благоле́пие,/ Еди́н благослове́н/ отце́в Бог, и препросла́влен.
Припев: Христо́с воскре́се из ме́ртвых.
Жены́ с ми́ры богому́дрыя в след Тебе́ теча́ху,/ Его́же, я́ко ме́ртва, со слеза́ми иска́ху,/ поклони́шася ра́дующияся Живо́му Бо́гу,/ и Па́сху та́йную/ Твои́м, Христе́, ученико́м благовести́ша.
Припев: Христо́с воскре́се из ме́ртвых.
Сме́рти пра́зднуем умерщвле́ние,/ а́дово разруше́ние,/ ино́го жития́ ве́чнаго нача́ло,/ и игра́юще пое́м Вино́внаго,/ Еди́наго благослове́ннаго/ отце́в Бо́га, и препросла́вленнаго.
Припев: Христо́с воскре́се из ме́ртвых.
Я́ко вои́стинну свяще́нная,/ и всепра́зднственная сия́ спаси́тельная нощь,/ и светоза́рная,/ светоно́снаго дне,/ воста́ния су́щи провозве́стница,/ в не́йже безле́тный Свет из гро́ба пло́тски всем возсия́.
Припев: Пресвята́я Богоро́дице, спаси́ нас.
Умертви́в Сын Твой смерть, Всенепоро́чная, днесь,/ всем сме́ртным пребыва́ющий живо́т/ во ве́ки веко́в дарова́,/ еди́н благослове́нный/ отце́в Бог и препросла́вленный.
Припев: Пресвята́я Богоро́дице, спаси́ нас.
Всем ца́рствуяй созда́нием, быв челове́к,/ всели́ся в Твою́, Богоблагода́тная, утро́бу,/ и распя́тие претерпе́в и смерть,/ воскре́се боголе́пно,/ совозста́вив нас я́ко всеси́лен.
Ин, слепаго. Ирмос: Огня́ гаси́лище отроко́в моли́тва, ороша́ющая пещь,/ пропове́дница чудесе́, не опаля́ющи, ниже́ сожига́ющи,/ песносло́вцы Бо́га оте́ц на́ших.
Возди́жену Тебе́ на Дре́во, Спа́се,/ погасе́ со́лнце, земля́ волну́яшеся, колеба́шеся тварь вся,/ и от гроб ме́ртвии востая́ху.
Воста́вшу Ти из ме́ртвых, Царю́,/ ду́ши совозста́ша та́мо спя́щия,/ сла́вящия си́лу Твою́./ Е́юже сме́ртныя у́зы разреши́шася.
Ра́но миропома́зати Тя же́нский прии́де лик,/ уве́девше же, Го́споди, воста́вша Тя,/ ра́довахуся со свяще́нными ученики́,/ и́миже пода́ждь нам очище́ние зол.
Бре́нием пома́зал еси́ о́чи слепа́го,/ и сему́ повеле́л еси́ к Силоа́му ити́,/ омы́вся же, прозре́,/ песносло́вя Тя, Христе́, Царю́ всех.
Ин, предпразднству. Ирмос: Превозноси́мый отце́в Госпо́дь/ пла́мень угаси́, о́троки ороси́, согла́сно пою́щия:/ Бо́же, благослове́н еси́.
Растерза́в средосте́ние вражды́, Го́споди, Кресто́м и стра́стию Твое́ю,/ о́блаком носи́мь возше́л еси́ со сла́вою к Безнача́льному Отцу́.
Тре́петни взыва́ху Си́лы: возьми́те врата́,/ прии́де Христо́с те́ло земно́е нося́,/ и Боже́ственною стра́стию велиа́ра умертви́в.
Слава: Что Твоя́ ри́зы червле́ны, Человеколю́бче?/ Си́лам Боже́ственным вопроша́ющим:/ точи́ло ны́не изгнето́х, Христо́с восходя́ вопия́ше.
И ныне: Пе́сньми Твое́ распя́тие, Христе́,/ и воста́ние согла́сно сла́вим,/ све́тло пра́зднующе о вознесе́нии честне́м Твое́м во ве́ки.
Катавасия: В пещи́ о́гненней/ песносло́вцы спасы́й о́троки,/ благослове́н Бог оте́ц на́ших.
Песнь 8.
Ирмос: Сей нарече́нный и святы́й день,/ Еди́н суббо́т Царь и Госпо́дь,/ пра́здников пра́здник/ и торжество́ есть торже́ств,/ во́ньже благослови́м Христа́ во ве́ки.
Припев: Христо́с воскре́се из ме́ртвых.
Прииди́те, но́ваго виногра́да рожде́ния,/ Боже́ственнаго весе́лия,/ в наро́читом дни Воскресе́ния,/ Ца́рствия Христо́ва приобщи́мся,/ пою́ще Его́,/ я́ко Бо́га, во ве́ки.
Припев: Христо́с воскре́се из ме́ртвых.
Возведи́ о́крест о́чи твои́, Сио́не, и виждь:/ се бо приидо́ша к тебе́,/ я́ко богосве́тлая свети́ла,/ от за́пада, и се́вера, и мо́ря,/ и восто́ка ча́да твоя́,/ в тебе́ благословя́щая Христа́ во ве́ки.
Припев: Пресвята́я Тро́ице, Бо́же наш, сла́ва Тебе́.
Троичен: О́тче Вседержи́телю, и Сло́ве, и Ду́ше,/ треми́ соединя́емое во Ипоста́сех Естество́,/ Пресу́щественне и Пребоже́ственне,/ в Тя крести́хомся,/ и Тя благослови́м во вся ве́ки.
Припев: Пресвята́я Богоро́дице, спаси́ нас.
Прии́де Тобо́ю в мир Госпо́дь, Де́во Богоро́дице,/ и чре́во а́дово расто́рг,/ сме́ртным нам воскресе́ние дарова́,/ те́мже благослови́м Его́ во ве́ки.
Припев: Пресвята́я Богоро́дице, спаси́ нас.
Всю низложи́в сме́рти держа́ву Сын Твой, Де́во,/ Свои́м воскресе́нием,/ я́ко Бог кре́пкий совознесе́ нас и обожи́,/ те́мже воспева́ем Его́ во ве́ки.
Ин, слепаго. Ирмос: Ангелов сонм:
А́нгельстии чи́нове на Кресте́ Тя ви́девше ви́сима, Христе́ Всецарю́,/ и тварь всю изменя́юща стра́хом,/ ужасо́шася, пою́ще Твое́ человеколю́бие.
Ад до́ле Тебе́ ви́дев, стеня́ше,/ и подава́ше ско́ро ме́ртвыя,/ от ве́ка та́мо храни́мыя, Христе́,/ песносло́вящия Твое́ человеколю́бие.
Сотворя́я чудеса́, Христе́, изря́дная,/ во́лею воздви́жен был еси́ на Крест,/ и с ме́ртвыми совокупи́лся еси́, умертви́вый а́да,/ и вся му́жеством отреши́л еси́ у́зники.
Слепа́го воочи́л еси́ к Тебе́ приступи́вша, Христе́,/ сему́ повеле́вый в Силоа́мову купе́ль ити́,/ омы́тися и прозре́ти, и Бо́га Тя пропове́дати,/ пло́тию яви́вшагося во спасе́ние мiра.
Ин, предпразднству. Ирмос: Тебе́, Вседе́телю,/ в пещи́ о́троцы, всеми́рный лик спле́тше, поя́ху:/ дела́ вся́кая, Го́спода по́йте/ и превозноси́те во вся ве́ки.
Свет Тя от Све́та су́щий,/ о́блак све́тел подъя́т от горы́ ма́сличныя,/ всем зря́щим Боже́ственным ученико́м Твои́м,/ и Тебе́ воспева́ющим во вся ве́ки.
Рука́ми псало́мски воспле́щим,/ воскре́се Христо́с Бог наш,/ и взы́де, отону́дуже сни́де к нам человеколю́бно,/ умиротвори́вый дре́вле разстоя́щаяся.
Благослови́м Отца́ и Сы́на и Свята́го Ду́ха, Го́спода.
Поя́ Дави́д вопие́т:/ Христо́с взы́де на Херуви́мех Свои́х,/ и возлете́ я́ве на крилу́ У́мных Чино́в./ Его́же превозно́сим во вся ве́ки.
И ны́не и при́сно и во ве́ки веко́в, ами́нь.
Яви́лся еси́ ученико́м воскре́с от гро́ба,/ и сих возве́л еси́ на го́ру ма́сличную,/ отону́дуже о́блак све́тел подъе́м,/ взят к го́рним, Христе́, Тебе́ со сла́вою.
Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Катавасия: Из Отца́ пре́жде век рожде́ннаго Сы́на и Бо́га,/ и в после́дняя ле́та воплоще́ннаго от Де́вы Ма́тере,/ свяще́нницы по́йте,/ лю́дие превозноси́те во вся ве́ки.
Честне́йшую: не поем, но поем припевы Пасхи.
Песнь 9.
Вели́чит душа́ моя́/ Воскре́сшаго тридне́вно от гро́ба,/ Христа́ Жизнодавца.
Вели́чит душа́ моя́/ во́лею страда́вша, и погребе́на,/ и Воскре́сшаго тридне́вно от гро́ба.
И ирмос: Свети́ся, свети́ся,/ но́вый Иерусали́ме,/ сла́ва бо Госпо́дня/ на тебе́ возсия́./ Лику́й ны́не/ и весели́ся, Сио́не./ Ты же, Чи́стая, красу́йся, Богоро́дице,/ о воста́нии Рождества́ Твоего́.
Христо́с но́вая Па́сха,/ Же́ртва жива́я,/ А́гнец Бо́жий,/ взе́мляй грехи́ ми́ра.
А́нгел вопия́ше Благода́тней:/ Чи́стая Де́во, ра́дуйся!/ И па́ки реку́: ра́дуйся!/ Твой Сын воскре́се/ тридне́вен от гро́ба,/ и ме́ртвыя воздви́гнувый:/ лю́дие, весели́теся.
Возбуди́л еси́ усну́в ме́ртвыя от ве́ка,/ ца́рски рыка́вый я́ко от Иу́ды лев.
О, Боже́ственнаго, о любе́знаго,/ о сладча́йшаго Твоего́ гла́са!/ С на́ми бо нело́жно/ обеща́лся еси́ бы́ти,/ до сконча́ния ве́ка Христе́:/ Его́же, ве́рнии,/ утвержде́ние наде́жди иму́ще, ра́дуемся.
Магдали́на Мари́я притече́ ко гро́бу,/ и Христа́ ви́девши,/ я́ко вертогра́даря вопроша́ше.
А́нгел облиста́яй жена́м вопия́ше:/ преста́ните от слез, я́ко Христо́с воскре́се.
Христо́с воскре́се, смерть попра́вый,/ и ме́ртвыя воздви́гнувый,/ лю́дие весели́теся.
Днесь вся́ка тварь весели́тся и ра́дуется,/ я́ко Христо́с воскре́се, и ад плени́ся.
Днесь Влады́ка плени́ а́да,/ воздви́гнувый ю́зники, я́же от ве́ка имя́ше лю́те одержи́мыя.
О, Па́сха ве́лия и свяще́ннейшая, Христе́!/ О му́дросте, и Сло́ве Бо́жий, и си́ло!/ Подава́й нам и́стее Тебе́ причаща́тися,/ в невече́рнем дни Ца́рствия Твоего́.
Вели́чит душа́ моя́/ Триипоста́снаго и Неразде́льнаго Божества́ держа́ву.
Согла́сно Де́во, Тебе́ блажи́м ве́рнии:/ ра́дуйся, Две́ре Госпо́дня,/ ра́дуйся, Гра́де одушевле́нный,/ ра́дуйся, Ея́же ра́ди нам ны́не возсия́ свет,/ из Тебе́ Рожде́ннаго из ме́ртвых Воскресе́ния.
Ра́дуйся, Де́во, ра́дуйся,/ ра́дуйся, Благослове́нная,/ ра́дуйся, Препросла́вленная!/ Твой бо Сын воскре́се тридне́вен от гро́ба.
Весели́ся и ра́дуйся боже́ственная Две́ре Све́та,/ заше́дый бо Иису́с во гроб возсия́,/ просия́в со́лнца светле́е,/ и ве́рныя вся озари́в,/ Богора́дованная Влады́чице.
Ин, слепаго. Ирмос: Я́ко сотвори́ Тебе́ вели́чия Си́льный,/ Де́ву явль Тя чи́сту по рождестве́,/ я́ко ро́ждшую без се́мене Своего́ Творца́,/ тем Тя, Богоро́дице, велича́ем.
На Дре́ве кре́стнем пригвозди́лся еси́, Христе́ Бо́же,/ и вся победи́л еси́ вра́жия сопроти́вная нача́ла,/ и пе́рвую кля́тву потреби́л еси́, Спа́се,/ те́мже Тя по до́лгу велича́ем.
Я́ко ви́де Тя, Сло́ве, ад до́ле с душе́ю, воздохну́,/ и вся ме́ртвыя стра́хом отреши́,/ позна́вшия держа́ву вла́сти Твоея́,/ те́мже Тя по до́лгу велича́ем.
Зна́мения сотворя́юща и чудеса́ стра́шная,/ собо́р евре́йский зря, за́вистию уби́,/ плени́вшаго ад Воскресе́нием Свои́м,/ и всех, я́ко си́лен, возставля́ющаго.
Воста́л еси́, я́коже рекл еси́, Животода́вче, из ме́ртвых,/ и яви́лся еси́ святы́м ученико́м по воста́нии,/ зна́мения сотвори́вый, и воочи́вый слепы́я,/ с ни́миже Тя во ве́ки велича́ем.
Ин, предпразднству. Ирмос: Иса́ие, лику́й,/ Де́ва име́ во чре́ве/ и роди́ Сы́на Емману́ила,/ Бо́га же и Челове́ка,/ Восто́к и́мя Ему́,/ Его́ же велича́юще,/ Де́ву ублажа́ем.
Свяще́нное торжество́ вся тварь прино́сит я́ве/ Вознесе́нию Твоему́, Сло́ве Бо́жий,/ и́мже прине́сл еси́ Отцу́ Твоему́,/ е́же от нас естество́ восприя́л еси́ па́че сло́ва неизме́нне.
Я́ко Бог стерл еси́ врата́ а́дова, Спа́се, и вереи́,/ и воскре́с из ме́ртвых,/ к Небе́сным восте́кл еси́ Чино́м А́нгельским,/ врата́ возьми́те, вопию́щим со удивле́нием.
Твоему́ Боже́ственному восхо́ду дивя́щимся Боже́ственным ученико́м,/ предста́ша я́вственно а́нгели, тем вопию́ще:/ Его́же ви́дите восходя́ща на Небеса́,/ сей прии́дет со сла́вою суди́ти всем.
Слава: Е́же Христе́ дарова́л еси́ мир ученико́м, к го́рним дре́вле восходя́./ Той и нам бога́тно низпосли́, в любви́ всех содержа́я,/ я́ко да согла́сно Тебе́, Спа́са, велича́ем.
И ныне: Светоно́сная колесни́ца Со́лнца Мы́сленнаго,/ Ты была́ еси́ вои́стинну, нескве́рная Чи́стая,/ и́мже седя́щии во тьме/ ви́деша свет позна́ния, по до́лгу Тя сла́вяще.
Катавасия: Тя па́че ума́ и словесе́ Ма́терь Бо́жию,/ в ле́то Безле́тнаго неизрече́нно ро́ждшую,/ ве́рнии единому́дренно велича́ем.
Ексапостиларий праздника. Самогласен:
Пло́тию усну́в,/ я́ко мертв,/ Царю́ и Го́споди,/ тридне́вен воскре́сл еси́,/ Ада́ма воздви́г от тли,/ и упраздни́в смерть,/ Па́сха нетле́ния,/ ми́ра спасе́ние. Дважды.
И слепаго. Подобен:
У́мныя мои́ о́чи,/ ослепле́нныя, Го́споди, от мра́чнаго греха́, Ты просвети́,/ вложи́в, Ще́дре, смире́ние,/ и покая́ния омы́й слеза́ми.
На хвалитех поставим стихов 8.
И поем стихиры самогласны, слепаго 4, глас 2:
Слепы́й роди́выйся, в свое́м по́мысле глаго́лаше:/ еда́ аз грех ра́ди роди́тельных роди́хся без о́чию,/ еда́ аз за неве́рие язы́ков роди́хся во обличе́ние?/ Не домышля́юся вопроша́ти,/ когда́ нощь, когда́ день?/ Не терпи́та ми но́зе ка́меннаго претыка́ния,/ не ви́дех бо со́лнца сия́юща,/ ниже́ во о́бразе мене́ Созда́вшаго./ Но молю́ Ти ся Христе́ Бо́же,/ при́зри на мя и поми́луй мя.
Мимоходя́ Иису́с от святи́лища,/ обре́те челове́ка сле́па от рожде́ния,/ и умилосе́рдився положи́ бре́ние на о́чию его́, и рече́ к нему́:/ иди́ умы́йся в Силоа́ме,/ и умы́вся прозре́, сла́ву возсыла́я Бо́гу./ Сосе́ди же его́ глаго́лаху ему́:/ кто твои́ зе́ницы отве́рзе,/ и́хже никто́же от зря́щих исцели́ти возмо́же?/ Он же возопи́в, рече́:/ Челове́к Иису́с глаго́лемый,/ Он ми рече́, умы́йся в Силоа́ме, и прозре́х./ Той есть вои́стинну,/ Его́же рече́ Моисе́й в зако́не, Христа́ Месси́ю:/ Той есть Спас душ на́ших.
Глас 4: Все житие́ слепы́й нощь помышля́я,/ возопи́ к Тебе́:/ Го́споди, отве́рзи ми зе́ницы,/ Сы́не Дави́дов Спа́се наш,/ да со все́ми и аз воспою́ Твою́ силу.
Глас 5: Го́споди, мимоходя́ путе́м,/ обре́л еси́ челове́ка сле́па от рожде́ния,/ и удивле́ни бы́вше ученицы́, вопроша́ху Тя глаго́люще:/ Учи́телю, кто согреши́: сей ли,/ или́ роди́тели его́, да слеп роди́ся?/ Ты же Спа́се мой возопи́л еси́ к ним:/ ни сей согреши́, ни роди́тели его́,/ но да явя́тся дела́ Бо́жия на нем./ Мне подоба́ет де́лати дела́ Посла́вшаго Мя,/ я́же никто́же мо́жет де́лати./ И сия́ рек, плю́нув до́лу, и бре́ние сотво́рь,/ пома́зал еси́ о́чи его́, рек к нему́:/ иди́, умы́йся в Силоа́мстей купе́ли./ Он же умы́вся здрав бысть, и вопия́ше к Тебе́:/ ве́рую Го́споди, и поклони́ся Тебе́./ Те́мже вопие́м и мы, поми́луй нас.
Таже стихиры Пасхи с припевы их. Глас 5.
Стих: Да воскре́снет Бог,/ и расточа́тся врази́ Его́.
Па́сха/ свяще́нная нам днесь показа́ся;/ Па́сха но́ва свята́я;/ Па́сха та́инственная;/ Па́сха всечестна́я./ Па́сха Христо́с Изба́витель;/ Па́сха непоро́чная;/ Па́сха вели́кая;/ Па́сха ве́рных./ Па́сха две́ри ра́йския нам отверза́ющая./ Па́сха всех освяща́ющая ве́рных.
Стих: Я́ко исчеза́ет дым,/ да исче́знут.
Прииди́те/ от виде́ния жены́ благове́стницы,/ и Сио́ну рцы́те:/ приими́/ от нас ра́дости благове́щения, Воскресе́ния Христо́ва:/ красу́йся, лику́й/ и ра́дуйся, Иерусали́ме,/ Царя́ Христа́ узре́в из гро́ба,/ я́ко жениха́ происходя́ща.
Стих: Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.
Мироно́сицы жены́,/ у́тру глубоку́,/ предста́вша гро́бу Живода́вца,/ обрето́ша А́нгела/ на ка́мени седя́ща,/ и той провеща́в им,/ си́це глаго́лаше:/ что и́щете Жива́го с ме́ртвыми;/ что пла́чете Нетле́ннаго во тли?/ Ше́дше, пропове́дите ученико́м Его́.
Стих: Сей день, его́же сотвори Госпо́дь,/ возра́дуемся и возвесели́мся в онь.
Па́сха кра́сная,/ Па́сха, Госпо́дня Па́сха!/ Па́сха всечестна́я/ нам возсия́. Па́сха,/ ра́достию друг дру́га обы́мем./ О Па́сха!/ Избавле́ние ско́рби,/ и́бо из гро́ба днесь,/ я́ко от черто́га/ возсия́в Христо́с,/ жены́ ра́дости испо́лни, глаго́ля:/ пропове́дите апо́столом.
Слава, и ныне, глас 5: Воскресе́ния день,/ и просвети́мся торжество́м,/ и друг дру́га обы́мем./ Рцем бра́тие,/ и ненави́дящим нас,/ прости́м вся Воскресе́нием,/ и та́ко возопии́м:/ Христо́с воскре́се из ме́ртвых,/ сме́ртию смерть попра́в,/ и су́щим во гробе́х живо́т дарова́в.
И славословие великое.
Тропарь воскресен, глас 5:
Собезнача́льное Сло́во Отцу́ и Ду́хови,/ от Де́вы ро́ждшееся на Спасе́ние на́ше,/ воспои́м, ве́рнии, и поклони́мся;/ я́ко благоволи́ Пло́тию взы́ти на Крест,/ и смерть претерпе́ти,/ и воскреси́ти уме́ршия/ сла́вным воскресе́нием Свои́м.
Слава, и ныне, Богородичен: Ра́дуйся, Две́ре Госпо́дня непроходи́мая;/ ра́дуйся, стено́ и покро́ве притека́ющим к Тебе́./ Ра́дуйся, необурева́емое приста́нище и неискусобра́чная,/ ро́ждшая пло́тию Творца́ Твоего́ и Бо́га./ Моля́щи не оскудева́й о воспева́ющих/ и кла́няющихся рождеству́ Твоему́.
Ектениа и отпуст без креста. И святаго на отпусте поминает, егоже будет день.
И час 1, в притворе. На 1-м часе глаголем псалмы обычныя. На Сла́ва: тропарь: Собезнача́льное Сло́во: И ны́не: Богородичен: Что Тя нарече́м: По Трисвятом кондак: Душе́вныма очи́ма: И конечный отпуст по обычаю, и прочия часы пред литургиею глаголем трипсалмнии.
На Литургии
Начало литургии, якоже на самую Пасху. На литургии изобразительная, и от канона Пасце песнь 3-я и 6-я.
По входе тропарь, глас 5:
Собезнача́льное Сло́во Отцу́ и Ду́хови,/ от Де́вы ро́ждшееся на Спасе́ние на́ше,/ воспои́м, ве́рнии, и поклони́мся;/ я́ко благоволи́ Пло́тию взы́ти на Крест,/ и смерть претерпе́ти,/ и воскреси́ти уме́ршия/ сла́вным воскресе́нием Свои́м.
Слава: кондак слепаго, глас 4.
Подобен: Яви́лся еси́ днесь:
Душе́вныма очи́ма ослепле́н,/ к Тебе́, Христе́, прихожду́,/ я́коже слепы́й от рожде́ния,/ покая́нием зову́ Ти:/ Ты су́щих во тьме Свет пресве́тлый.
И ныне: кондак Пасце, глас 8:
А́ще и во гроб снизше́л еси́, Безсме́ртне,/ но а́дову разруши́л еси́ си́лу,/ и воскре́сл еси́, я́ко победитель, Христе́ Бо́же,/ жена́м мироно́сицам веща́вый: ра́дуйтеся,/ и Твои́м апо́столом мир да́руяй,/ па́дшим подая́й воскресе́ние.
И прочая.
Прокимен Пасхи, глас 8: Сей день, его́же сотвори́ Госпо́дь,/ возра́дуемся и возвесели́мся в онь. Стих: Испове́дайтеся Го́сподеви, я́ко благ, я́ко в век ми́лость Его́.
Аллилуиа Пасхи, глас 4: Ты воскре́с, уще́дриши Сио́на. Стих: Госпо́дь с небесе́ на зе́млю призре́.
Апостол и Евангелие дне. И прочая служба воскресна вся.
Вместо же Достойно: поем:
А́нгел вопия́ше Благода́тней:/ Чи́стая Де́во, ра́дуйся!/ И па́ки реку́: ра́дуйся!/ Твой Сын воскре́се/ тридне́вен от гро́ба,/ и ме́ртвыя воздви́гнувый:/ лю́дие, весели́теся.
Таже ирмос, глас 1: Свети́ся, свети́ся,/ но́вый Иерусали́ме,/ сла́ва бо Госпо́дня/ на тебе́ возсия́./ Лику́й ны́не/ и весели́ся, Сио́не./ Ты же, Чи́стая, красу́йся, Богоро́дице,/ о воста́нии Рождества́ Твоего́.
Причастен:
Те́ло Христо́во приими́те,/ исто́чника безсме́ртнаго вкуси́те./ Аллилу́иа. [Трижды.]
Глаголем же и псалом 33: Благословлю́ Го́спода: Таже иерей творит отпуст Пасхи со крестом, и прочее все поем конец литургии, якоже указася на самую Пасху. И тако отдается праздник святаго и живоноснаго Христова Воскресения.
На трапезе бывает братии утешение великое, сиречь елеем, рыбою и вином.