Триодь Цветная
Неделя Седмая, Святых 318,
Богоносных Отец, Иже в Никеи
В Субботу Вечера,
На Малей Вечерни
На Го́споди воззва́х: поставим стихи 4.
И поем стихиры воскресны, глас 6:
Побе́ду име́я, Христе́, ю́же на а́да,/ на Крест возше́л еси́,/ да во тьме сме́рти седя́щия воскреси́ши с Собо́ю,/ И́же в ме́ртвых Свобо́дь,/ Источа́яй живо́т от Своего́ све́та,/ Всеси́льне Спа́се, поми́луй нас. [Дважды.]
Днесь Христо́с смерть попра́в,/ я́коже рече́, воскре́се,/ и ра́дование мiрови дарова́,/ да вси взыва́юще, песнь та́ко рцем:/ Исто́чниче жи́зни, Непристу́пный Све́те,/ Всеси́льне Спа́се, поми́луй нас.
Тебе́, Го́споди, Су́щаго по всей тва́ри,/ гре́шнии ка́мо бежи́м;/ на Небеси́ Сам живе́ши,/ во а́де попра́л еси́ смерть./ Во глубины́ морски́я;/ та́мо рука́ Твоя́, Влады́ко./ К Тебе́ прибега́ем,/ Тебе́ припа́дающе мо́лимся:/ Воскресы́й из ме́ртвых, поми́луй нас.
Слава, глас тойже: Та́йныя днесь Ду́ха трубы́,/ богоно́сныя отцы́ восхва́лим/ песнопе́вшия посреде́ Це́ркве песнь сли́чную богосло́вия,/ Тро́ицу еди́ну непреме́нную,/ Существо́ же и Божество́,/ низложи́тели А́риевы, и правосла́вных побо́рники,/ моля́щияся всегда́ Го́споду,/ поми́ловатися душа́м на́шим.
И ныне, Богородичен, глас тойже: Досто́йно есть я́ко вои́стинну,/ блажи́ти Тя, Богоро́дицу,/ в Твое́ бо пречи́стое вшед чре́во всех Соде́тель, плоть бысть,/ не преложи́вся естество́м, ниже́ мечта́вся о смотре́нии,/ но восприя́тей из Тебе́ слове́сно одушевле́нней пло́ти соедини́вся, по ипоста́си./ Отону́дуже благоче́стно во обои́х естества́х явля́ющихся ра́знство твори́м./ Того́ моли́, Честна́я Пресвята́я,/ низпосла́ти нам мир и ве́лию ми́лость.
На стиховне стихира воскресная, глас 6:
Воскресе́ние Твое́, Христе́ Спа́се,/ А́нгели пою́т на Небесе́х,/ и нас на земли́ сподо́би,/ чи́стым се́рдцем/ Тебе́ сла́вити.
Таже, настоящия стихиры
подобны Пресвятыя Богородицы, глас 6.
Подобен: Всю отложи́вше:
Стих: Помяну́ и́мя Твое́/ во вся́ком ро́де и ро́де.
Кля́твою, я́ко обеща́ Твоему́ пра́отцу дре́вле, Бог преле́тный,/ в после́дняя времена́ соверши́,/ произше́д Пречи́стая от чре́ва Твоего́ боже́ственнаго./ И́бо вои́стинну возсия́ от Тебе́ Госпо́дь,/ дла́нию содержа́й концы́,/ Его́же и мне благоуве́тлива сотвори́ в час су́дный Де́во блаже́нная,/ Того́ Ца́рствия мя получи́ти доброде́телей возвыше́нием,/ и страсте́й умерщвле́нием.
Стих: Слы́ши Дщи и виждь,/ и приклони́ у́хо Твое́.
Ума́ чистото́ю Иса́иа,/ Де́во издале́ча прорече́,/ роди́ти иму́щую Созда́теля всея́ тва́ри/ Тя, Честна́я Пречи́стая,/ Ты бо яви́лася еси́ еди́на во ве́ки, Всенепоро́чная./ Те́мже Тя молю́:/ оскверне́ную очи́сти ду́шу мою́,/ и све́тлости Боже́ственныя о́бщника мя покажи́,/ и Боже́ственнаго Твоего́ Сы́на стоя́ния десна́го,/ егда́ ся́дет, я́коже пи́сано есть,/ суди́ти ми́ру всему́.
Стих: Лицу́ Твоему́ помо́лятся/ бога́тии лю́дстии.
Сме́рти разруше́ние Рождество́м Твои́м яви́ся,/ Ты бо еси́ Отрокови́це живота́ нетле́ннаго пребыва́лище./ Те́мже Тя молю́,/ в ме́стех а́довых страсте́й мои́х лежа́ща Ты возста́ви,/ и к весе́лию мя оживи́, Де́во./ Руково́дствуй ко блаже́нному возда́нию,/ и ве́чныя и боже́ственныя сподо́би ра́дости,/ иде́же сла́дость присносу́щная,/ иде́же свет невече́рний.
Слава, отцем, глас 4: Моле́бную па́мять днесь богоно́сных отце́в,/ от всея́ вселе́нныя собра́вшихся,/ в све́тлем гра́де Нике́йстем,/ правосла́вных собра́ния, благоче́ствующе ве́рно пра́зднуим./ Си́и бо лю́таго А́риа безбо́жное веле́ние благочестному́дренне низложи́ша,/ и от кафоли́ческия Це́ркве собо́рне того́ изгна́ша,/ и я́сно Сы́на Бо́жия/ единосу́щна и соприсносу́щна, пре́жде век су́ща,/ всех научи́ша испове́дати во изображе́нии ве́ры,/ изве́стно и благоче́стно сие́ изложи́вше./ Те́мже и мы боже́ственным их повеле́нием после́дствующе,/ изве́стно ве́рующе слу́жим,/ со Отце́м Сы́ну, и Ду́ху Всесвято́му, во еди́ном Божестве́,/ Тро́ице Единосу́щней.
И ныне, празднику, глас тойже: Го́споди, та́инство е́же от веко́в сокрове́нное и от родо́в/ испо́лнив, я́ко Благ,/ прише́л еси́ со ученики́ Твои́ми на го́ру Елео́нскую,/ име́я Ро́ждшую Тя Творца́ и всех Соде́теля,/ Той бо в стра́сти Твое́й ма́терски па́че всех боле́зновавшей,/ подоба́ше и сла́вою пло́ти Твоея́,/ премно́гия наслади́тися ра́дости./ Ея́же и мы причаща́ющеся,/ е́же на небеса́ восхо́дом Твои́м, Влады́ко,/ вели́кую Твою́ ми́лость на нас бы́вшую сла́вим.
Тропарь воскресен, глас 6:
А́нгельския Си́лы на гро́бе Твое́м,/ и стрегу́щии омертве́ша;/ и стоя́ше Мари́я во гро́бе,/ и́щущи Пречи́стаго Те́ла Твоего́./ Плени́л еси́ ад, не искуси́вся от него́;/ сре́тил еси́ Де́ву, да́руяй живо́т./ Воскресы́й из ме́ртвых, Го́споди, сла́ва Тебе́.
Слава, и ныне, тропарь праздника, глас 4:
Возне́слся еси́ во сла́ве, Христе́ Бо́же наш,/ ра́дость сотвори́вый ученико́м,/ обетова́нием Свята́го Ду́ха,/ извеще́нным им бы́вшим благослове́нием,/ я́ко Ты еси́ Сын Бо́жий, Изба́витель ми́ра.
Ектении, и отпуст.
На Велицей Вечерни
Блаже́н муж: На Го́споди воззва́х: поставим стихов 10, и поем воскресны 3, и Вознесению 3, и отцем 4.
Стихиры воскресны, глас 6:
Побе́ду име́я, Христе́, ю́же на а́да,/ на Крест возше́л еси́,/ да во тьме сме́рти седя́щия воскреси́ши с Собо́ю,/ И́же в ме́ртвых Свобо́дь,/ Источа́яй живо́т от Своего́ све́та,/ Всеси́льне Спа́се, поми́луй нас.
Днесь Христо́с смерть попра́в,/ я́коже рече́, воскре́се,/ и ра́дование мiрови дарова́,/ да вси взыва́юще, песнь та́ко рцем:/ Исто́чниче жи́зни, Непристу́пный Све́те,/ Всеси́льне Спа́се, поми́луй нас.
Тебе́, Го́споди, Су́щаго по всей тва́ри,/ гре́шнии ка́мо бежи́м;/ на Небеси́ Сам живе́ши,/ во а́де попра́л еси́ смерть./ Во глубины́ морски́я;/ та́мо рука́ Твоя́, Влады́ко./ К Тебе́ прибега́ем,/ Тебе́ припа́дающе мо́лимся:/ Воскресы́й из ме́ртвых, поми́луй нас.
Ины самогласны, Вознесения, глас тойже:
Госпо́дь вознесе́ся на небеса́,/ да по́слет Уте́шителя ми́ру,/ небеса́ угото́ваша престо́л Его́,/ о́блацы восхожде́ние Его́./ А́нгели дивя́тся, Челове́ка зря́ще превы́ше себе́./ Отец ждет, Его́же в не́драх и́мать соприсносу́щна,/ Дух же Святы́й вели́т всем а́нгелом Его́:/ возьми́те врата́ кня́зи ва́ша,/ вси язы́цы восплещи́те рука́ми,/ я́ко взы́де Христо́с, иде́же бе пе́рвее.
Го́споди, Твоему́ вознесе́нию удиви́шася херуви́ми,/ зря́ще Тебе́, Бо́га на о́блацех восходя́ща,/ на них седя́щаго,/ и сла́вим Тя, я́ко бла́га ми́лость Твоя́,/ сла́ва Тебе́.
На гора́х святы́х зря́ще Твое́ вознесе́ние, Христе́,/ сия́ние сла́вы О́тчи,/ воспева́ем Твой светообра́зный лица́ зрак,/ кла́няемся страсте́м Твои́м,/ почита́ем воскресе́ние,/ сла́вное вознесе́ние сла́вяще: поми́луй нас.
Ины стихиры святым отцем. Глас 6.
Подобен: Отча́янная:
Из чре́ва роди́лся еси́ пре́жде денни́цы,/ от Отца́ безма́терен пре́жде век,/ а́ще и А́рий тварь Тя, а не Бо́га сла́вит,/ де́рзостию смеша́я Тя, Зижди́теля, тва́рем безу́мно,/ вещество́ огня́ ве́чнаго себе́ сокро́вищствуяй./ Но собо́р и́же в Нике́и,/ Сы́на Бо́жия Тя пропове́да, Го́споди,/ Отцу́ и Ду́ху сопресто́льна.
Кто Твою́, Спа́се, ри́зу раздра́?/ А́рий, Ты рекл еси́,/ и́же Тро́ицы пресече́ единоче́стное нача́ло в разделе́ния,/ сей отве́рже Тя бы́ти еди́наго от Тро́ицы,/ сей и Несто́риа учи́т Богоро́дицу не глаго́лати./ Но собо́р, и́же в Нике́и,/ Сы́на Бо́жия Тя пропове́да, Го́споди,/ Отцу́ и Ду́ху сопресто́льна.
В брег па́дает греха́ А́рий,/ возненави́девый све́та ви́дети,/ и боже́ственною растерза́ется у́дицею вну́тренних,/ все изда́ти существо́ и ду́шу ну́ждно,/ други́й Иу́да быв нра́вом и о́бразом./ Но собо́р, и́же в Нике́и,/ Сы́на Бо́жия Тя пропове́да, Го́споди,/ Отцу́ и Ду́ху сопресто́льна.
А́рий безу́мный/ Пресвяты́я Тро́ицы пресече́ единонача́лие,/ в три беззако́нная же и несра́сленная существа́./ Те́мже отцы́ богоно́снии соше́дшеся усе́рдно,/ ре́вностию разжиза́еми, я́коже Фесви́тянин Илиа́,/ духо́вным посека́ют мече́м студу́ научи́вшаго ху́льника,/ я́коже Дух веща́ше.
Слава, глас 6: Та́йныя днесь Ду́ха трубы́,/ богоно́сныя отцы́ восхва́лим/ песнопе́вшия посреде́ Це́ркве песнь сли́чную богосло́вия,/ Тро́ицу еди́ну непреме́нную,/ Существо́ же и Божество́,/ низложи́тели А́риевы, и правосла́вных побо́рники,/ моля́щияся всегда́ Го́споду,/ поми́ловатися душа́м на́шим.
И ныне, Богородичен: Кто Тебе́ не ублажи́т, Пресвята́я Де́во?/ Кто ли не воспое́т Твоего́ Пречи́стаго Рождества́?/ Безле́тно бо от Отца́ возсия́вый Сын Единоро́дный,/ То́йже от Тебе́ Чи́стыя про́йде,/ неизрече́нно вопло́щься,/ естество́м Бог сый,/ и естество́м быв Челове́к нас ра́ди,/ не во двою́ лицу́ разделя́емый,/ но во двою́ естеству́/ несли́тно познава́емый./ Того́ моли́ Чи́стая Всеблаже́нная,/ поми́ловатися душа́м на́шим.
Вход. Прокимен дне, и чтения.
Бытия чтение (глава 14):
Слы́шав Авра́м, я́ко плене́н бысть Лот, брата́нич его́, сочте́ свои́х си домоча́дец три́ста и осмна́десять и погна́ во след их да́же до Да́на. И нападе́ на ня но́щию сам и о́троцы его́ с ним; и порази́ их, и гони́ их до Хова́ла, е́же есть ошу́юю Дама́ска. И возврати́ вся́каго коня́ Содо́мскаго, и Ло́та, брата́нича своего́, возврати́, и вся име́ния его́, и жены́, и лю́ди. Изы́де же царь Содо́мский в сре́тение ему́, повнегда́ возврати́тися ему́ от се́ча ходоллогомо́рскаго и с царьми́, и́же с ним, во удо́ль Сави́ну, сие́ же бя́ше по́ле царе́во. И Мелхиседе́к, царь Сали́мский, изнесе́ хле́бы и вино́, бя́ше же свяще́нник Бо́га Вы́шняго. И благослови́ Авра́ма, и рече́: благослове́н Авра́м Бо́гу Вы́шнему, И́же созда́ Не́бо и зе́млю, и благослове́н Бог Вы́шний, И́же предаде́ враги́ твоя́ под ру́ки тебе́.
Втораго закона чтение (глава 1):
Во днех о́нех рече́ Моисе́й к сыно́м Изра́илевым: ви́дите, преда́х пред лице́м ва́шим зе́млю, вше́дше, насле́дуйте ю, ю́же кля́тся Госпо́дь отце́м ва́шим, Авраа́му, и Исаа́ку, и Иа́кову, да́ти им и се́мени их по них. И реко́х к вам во вре́мя о́но, глаго́ля: не возмогу́ еди́н води́ти вас. Госпо́дь Бог ваш умно́жил вы есть, и се есте́ днесь, я́ко зве́зды небе́сныя, мно́жеством. Госпо́дь Бог оте́ц на́ших да приложи́т вам, я́ко да бу́дете ты́сящами сугу́бо, и да благослови́т вас, я́коже глаго́ла вам. И взях от вас му́жи му́дры, и све́домы, и смы́сленны, и поста́вих их владе́ти над ва́ми, тысященача́льники, и стонача́льники, и пятьдесятонача́льники, и десятонача́льники, и письмоводи́тели судия́м ва́шим. И запове́дах судия́м ва́шим во вре́мя о́но, глаго́ля: разслу́шайте посреде́ бра́тий ва́ших и суди́те пра́ведно посреде́ му́жа, и посреде́ бра́та его́, и посреде́ прише́льца его́. Да не позна́ете лица́ в суде́, ма́лому и вели́кому су́диши и не устыди́шися лица́ челове́ческа, я́ко суд Бо́жий есть.
Втораго закона чтение (глава 10):
Во днех о́нех рече́ Моисе́й к сыно́м Изра́илевым: се Го́спода Бо́га твоего́ не́бо и не́бо небесе́, земля́ и вся, ели́ка суть на ней. Оба́че отцы́ ва́ша произво́ли Госпо́дь люби́ти их и избра́ се́мя их по них, вас, па́че всех язы́к, в день сей. И обре́жите жестокосе́рдие ва́ше, и вы́я ва́ша не ожесточи́те ктому́. И́бо Госпо́дь Бог ваш, Сей Бог бого́в и Госпо́дь господе́й, Бог вели́кий, и кре́пкий, и стра́шный, И́же не диви́тся лицу́, ниже́ взе́млет дар. Творя́й суд прише́льцу, и си́ру, и вдови́це и лю́бит прише́льца, да́ти ему́ хлеб и ри́зу. И возлюби́те прише́льца, прише́льцы бо бе́сте в земли́ Еги́петстей. Го́спода Бо́га твоего́ да убои́шися, и Тому́ еди́ному послу́жиши, и к Нему́ прилепи́шися, и И́менем Его́ клене́шися. Той хвала́ твоя́, и Той Бог твой, и́же сотвори́л ти есть вели́кая и сла́вная сия́, я́же ви́десте о́чи твои́.
На литии стихира праздника, глас 1:
Возше́д на небеса́, отону́дуже и соше́л еси́,/ не оста́ви нас си́рых, Го́споди,/ да прии́дет Твой Дух, нося́ мир ми́рови,/ покажи́ сыно́м челове́ческим дела́ си́лы Твоея́,/ Го́споди Человеколю́бче.
Слава, отцем, глас 3: Апо́стольских преда́ний/ изве́стнии храни́телие бы́сте святи́и отцы́,/ Святы́я бо Тро́ицы единосу́щное правосла́вно научи́вше,/ А́риево хуле́ние собо́рне низложи́сте,/ с ним же и Македо́ниа духобо́рца обличи́вше,/ осуди́сте Несто́риа, Евти́хиа и Диоско́ра,/ Саве́ллиа же и Севи́ра безгла́внаго,/ и́хже пре́лести испроси́те изба́витися нам,/ нескве́рну на́шему житию́ в ве́ре сохрани́тися, мо́лимся.
И ныне, празднику, глас 6: Го́споди, смотре́ния соверши́в та́инство,/ пои́м Твоя́ ученики́ на го́ру Елео́нскую,/ возноси́лся еси́,/ и се твердь небе́сную проше́л еси́,/ мене́ ра́ди обнища́вый по мне,/ и возше́д отону́дуже не разлучи́лся еси́,/ Всесвята́го Твоего́ Ду́ха низпосли́,/ просвеща́юща ду́ши на́ша.
На стиховне стихира воскресная, глас 6:
Воскресе́ние Твое́, Христе́ Спа́се,/ А́нгели пою́т на Небесе́х,/ и нас на земли́ сподо́би,/ чи́стым се́рдцем/ Тебе́ сла́вити.
Ины стихиры по алфавиту.
Стих: Госпо́дь воцари́ся,/ в ле́поту облече́ся.
Врата́ сокруши́в ме́дная,/ и вереи́ а́довы сотры́й,/ я́ко Бог всеси́лен,/ род челове́ческий па́дший воскреси́л еси́./ Сего́ ра́ди и мы согла́сно вопие́м:/ Воскресы́й из ме́ртвых, Го́споди, сла́ва Тебе́.
Стих: И́бо утверди́ вселе́нную,/ я́же не подви́жется.
Тле́ния нас дре́вняго Христо́с испра́вити хотя́,/ на Кресте́ пригвожда́ется,/ и во гро́бе полага́ется./ Его́же мироно́сицы жены́ со слеза́ми иска́ху, пла́чуща глаго́лаху:/ увы́ нам, Спа́се всех,/ ка́ко изво́лил еси́ во гро́бе всели́тися;/ Всели́выйся же хотя́, ка́ко укра́ден был еси́;/ ка́ко преложи́лся еси́;/ ко́е же ме́сто Твое́ Живоно́сное сокры́ Те́ло;/ но, Влады́ко, я́ко обеща́лся еси́ нам яви́ся,/ и утоли́ от нас рыда́ние слез./ Пла́чущимся же им, А́нгел к ним возопи́:/ от пла́ча преста́вша Апо́столом рцы́те, я́ко воскре́се Госпо́дь,/ мiрови да́руя очище́ние и ве́лию ми́лость.
Стих: До́му Твоему́ подоба́ет святы́ня,/ Го́споди, в долготу́ дний.
Распны́йся я́ко восхоте́л еси́, Христе́,/ и смерть погребе́нием Твои́м Плени́вый,/ тридне́вен воскре́сл еси́, я́ко Бог, со сла́вою,/ мiрови да́руя безконе́чную жизнь,/ и ве́лию ми́лость.
Слава, отцем, глас 4: Моле́бную па́мять днесь богоно́сных отце́в,/ от всея́ вселе́нныя собра́вшихся,/ в све́тлем гра́де Нике́йстем,/ правосла́вных собра́ния, благоче́ствующе ве́рно пра́зднуим./ Си́и бо лю́таго А́риа безбо́жное веле́ние благочестному́дренне низложи́ша,/ и от кафоли́ческия Це́ркве собо́рне того́ изгна́ша,/ и я́сно Сы́на Бо́жия/ единосу́щна и соприсносу́щна, пре́жде век су́ща,/ всех научи́ша испове́дати во изображе́нии ве́ры,/ изве́стно и благоче́стно сие́ изложи́вше./ Те́мже и мы боже́ственным их повеле́нием после́дствующе,/ изве́стно ве́рующе слу́жим,/ со Отце́м Сы́ну, и Ду́ху Всесвято́му, во еди́ном Божестве́,/ Тро́ице Единосу́щней.
И ныне, празднику, глас тойже: Го́споди, та́инство е́же от веко́в сокрове́нное и от родо́в/ испо́лнив, я́ко Благ,/ прише́л еси́ со ученики́ Твои́ми на го́ру Елео́нскую,/ име́я Ро́ждшую Тя Творца́ и всех Соде́теля,/ Той бо в стра́сти Твое́й ма́терски па́че всех боле́зновавшей,/ подоба́ше и сла́вою пло́ти Твоея́,/ премно́гия наслади́тися ра́дости./ Ея́же и мы причаща́ющеся,/ е́же на небеса́ восхо́дом Твои́м, Влады́ко,/ вели́кую Твою́ ми́лость на нас бы́вшую сла́вим.
Таже, Ны́не отпуща́еши: Трисвятое, и по О́тче наш:
Тропарь отцев дважды, глас 8:
Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый,/ и те́ми ко и́стинней ве́ре вся ны наста́вивый,/ Многоблагоутро́бне, сла́ва Тебе́.
И тропарь праздника единожды, глас 4:
Возне́слся еси́ во сла́ве, Христе́ Бо́же наш,/ ра́дость сотвори́вый ученико́м,/ обетова́нием Свята́го Ду́ха,/ извеще́нным им бы́вшим благослове́нием,/ я́ко Ты еси́ Сын Бо́жий, Изба́витель ми́ра.
И благословение хлебов, и чтение Деяний святых апостол. Аще ли несть бдения, тропарь воскресен: А́нгельския си́лы: Сла́ва: отцев: И ны́не: Вознесения. На Повечерии кондак отцев: Сла́ва, и ны́не: Вознесения. На Полунощнице поем канон Троичный Октоиха гласа, и прочее яко обычно. И отпуст.
На Утрени
На Бог Госпо́дь: тропарь воскресен, глас 6:
А́нгельския Си́лы на гро́бе Твое́м,/ и стрегу́щии омертве́ша;/ и стоя́ше Мари́я во гро́бе,/ и́щущи Пречи́стаго Те́ла Твоего́./ Плени́л еси́ ад, не искуси́вся от него́;/ сре́тил еси́ Де́ву, да́руяй живо́т./ Воскресы́й из ме́ртвых, Го́споди, сла́ва Тебе́. [Дважды.]
Слава, отцев, глас 8:
Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый,/ и те́ми ко и́стинней ве́ре вся ны наста́вивый,/ Многоблагоутро́бне, сла́ва Тебе́.
И ныне, тропарь Вознесения, глас 4:
Возне́слся еси́ во сла́ве, Христе́ Бо́же наш,/ ра́дость сотвори́вый ученико́м,/ обетова́нием Свята́го Ду́ха,/ извеще́нным им бы́вшим благослове́нием,/ я́ко Ты еси́ Сын Бо́жий, Изба́витель ми́ра.
По 1-м стихословии, седален, глас 6.
Гро́бу отве́рсту, а́ду пла́чущуся,/ Мари́я вопия́ше ко скры́вшимся апо́столом:/ изыди́те виногра́да де́лателие,/ пропове́дите воскресе́ния сло́во:/ воскре́се Госпо́дь, подая́ ми́рови ве́лию ми́лость.
Стих: Воскресни́ Го́споди Бо́же мой, да вознесе́тся рука́ Твоя́,/ не забу́ди убо́гих Твои́х до конца́.
Го́споди, предстоя́ше гро́бу Твоему́ Мари́я Магдали́на,/ и пла́каше вопию́щи, вертогра́даря Тя мня́щи, глаго́лаше:/ где сокры́л еси́ ве́чный живо́т?/ Где положи́л еси́, И́же на престо́ле херуви́мстем;/ стрегу́щии бо сего́, от стра́ха омертве́ша./ Или́ Го́спода моего́ дади́те ми,/ или́ со мно́ю возопи́йте:/ И́же в ме́ртвых быв, и ме́ртвыя воскреси́в, сла́ва Тебе́.
Слава, и ныне, Богородичен: Благослове́нную нареки́й Твою́ Ма́терь,/ прише́л еси́ на страсть во́льным хоте́нием,/ возсия́в на Кресте́, взыска́ти хотя́ Ада́ма,/ глаго́ля а́нгелом: сра́дуйтеся Мне, я́ко обре́теся поги́бшая дра́хма./ Вся му́дре устро́ивый Бо́же наш, сла́ва Тебе́.
По 2-м стихословии, седален, глас тойже.
Живо́т во гро́бе возлежа́ше, и печа́ть на ка́мени надлежа́ше,/ я́ко царя́ спя́ща во́ини стрежа́ху Христа́,/ и враги́ Своя́ неви́димо порази́вый, воскре́се Госпо́дь.
Стих: Испове́мся Тебе́ Го́споди всем се́рдцем мои́м,/ пове́м вся чудеса́ Твоя́.
Во́льною сме́ртию живо́т безсме́ртный/ обрето́хом, Всеси́льне и еди́не всех Спа́се,/ Ты бо в честно́м Твое́м воста́нии вся воззва́л еси́,/ разруши́вый а́дову побе́ду и сме́рти жа́ло.
Слава, и ныне, Богородичен: Богоро́дице Де́во, моли́ Сы́на Твоего́,/ во́лею пригвожде́ннаго на Кресте́,/ и воскре́сшаго из ме́ртвых Христа́ Бо́га на́шего,/ спасти́ся душа́м на́шим.
По Непорочнах, Благослове́н еси́ Го́споди: А́нгельский собо́р:
И абие ипакои, глас 6:
Во́льною и животворя́щею Твое́ю сме́ртию, Христе́,/ врата́ а́дова сокруши́в, я́ко Бог,/ отве́рзл еси́ нам дре́вний рай, и воскре́с из ме́ртвых,/ изба́вил еси́ от тле́ния живо́т наш.
Степенна, глас 6. Антифон 1:
На не́бо о́чи мои́ возвожу́, к Тебе́, Сло́ве,/ уще́дри мя, да живу́ Тебе́.
Поми́луй нас уничиже́нных,/ устроя́я благопотре́бныя Твоя́ сосу́ды, Сло́ве.
Слава: Свято́му Ду́ху, вся́кая всеспаси́тельная вина́,/ а́ще ко́ему сей по достоя́нию дхнет,/ ско́ро взе́млет от земны́х: восперя́ет, возраща́ет, устроя́ет горе́.
И ныне, тойже.
Антифон 2:
А́ще не Госпо́дь бы был в нас,/ никто́же от нас проти́ву возмо́гл бы вра́жиим бра́нем одоле́ти:/ побежда́ющии бо от зде возно́сятся.
Зубы́ их да не я́та бу́дет душа́ моя́ я́ко птене́ц, Сло́ве:/ увы́ мне, ка́ко и́мам от врага́ избы́ти, грехолюби́в сый!
Слава: Святы́м Ду́хом обоже́ние всем,/ благоволе́ние, ра́зум, мир и благослове́ние:/ равноде́телен бо есть Отцу́ и Сло́ву.
И ныне, тойже.
Антифон 3:
Наде́ющиися на Го́спода враго́м стра́шни, и всем ди́вни:/ горе́ бо зрят.
В беззако́ния рук свои́х, пра́ведных жре́бий,/ помо́щника Тя име́я, Спа́се, не простира́ет.
Слава: Свята́го Ду́ха держа́ва на всех,/ Ему́же Вы́шняя во́инства покланя́ются,/ со вся́ким дыха́нием до́льным.
И ныне, тойже.
Прокимен, глас 6:
Го́споди, воздви́гни си́лу Твою́,/ и прииди́ во е́же спасти́ нас. Стих: Пасы́й Изра́иля вонми́, наставля́яй я́ко овча́ Ио́сифа.
Таже другий прокимен: Вся́кое дыха́ние/ да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.
Евангелие 10 воскресно, от Иоанна,
зачало 66. [Ин. 21, 1 – 14.]
Во вре́мя о́но, яви́ся Иису́с ученико́м Свои́м, воста́в от ме́ртвых, на мо́ри Тивериа́дстем. яви́ся же си́це. Бя́ху вку́пе Си́мон Петр, и Фома́ нарица́емый Близне́ц, и Нафана́ил, и́же бе от Ка́ны Галиле́йския, и сы́на Зеведе́ова, и и́на от учени́к Его́ два. Глаго́ла им Си́мон Петр: иду́ ры́бы лови́ти. Глаго́лаша ему́: и́дем и мы с тобо́ю. Изыдо́ша же и вседо́ша а́бие в кора́бль, и в ту нощь не я́ша ничесо́же. У́тру же бы́вшу, ста Иису́с при бре́зе: не позна́ша же ученицы́, я́ко Иису́с есть. Глаго́ла же им Иису́с: де́ти, еда́ что сне́дно и́мате? Отвеща́ша Ему́: ни. Он же рече́ им: вве́рзите мре́жу о десну́ю страну́ корабля́ и обря́щете. Вверго́ша же, и ктому́ не можа́ху привлещи́ ея́ от мно́жества рыб. Глаго́ла же учени́к той, его́же любля́ше Иису́с, Петро́ви: Госпо́дь есть. Си́мон же Петр слы́шав, я́ко Госпо́дь есть, епенди́том препоя́сася, бе бо наг, и вве́ржеся в мо́ре. А друзи́и ученицы́ кораблеце́м приидо́ша, [не бе́ша бо дале́че от земли́, но я́ко две сте лакте́й,] влеку́ще мре́жу рыб. Я́коже излезо́ша на зе́млю, ви́деша огнь лежа́щь, и ры́бу на нем лежа́щу и хлеб. И глаго́ла им Иису́с: принеси́те от рыб, я́же я́сте ны́не. Влез же Си́мон Петр, извлече́ мре́жу на зе́млю, по́лну вели́ких рыб, сто и пятьдеся́т, и три: и толи́ко су́щим, не прото́ржеся мре́жа. Глаго́ла им Иису́с: прииди́те, обе́дуйте. Ни еди́н же сме́яше от учени́к истяза́ти Его́, Ты кто еси́; ве́дяще, я́ко Госпо́дь есть. Прии́де же Иису́с, и прия́т хлеб, и даде́ им, и ры́бу та́кожде. Се уже́ тре́тие яви́ся Иису́с ученико́м Свои́м, воста́в от ме́ртвых.
Таже глаголем:
Воскресе́ние Христо́во ви́девше,/ поклони́мся Свято́му Го́споду Иису́су,/ еди́ному безгре́шному,/ Кресту́ Твоему́ покланя́емся, Христе́,/ и свято́е Воскресе́ние Твое́ пое́м и сла́вим./ Ты бо еси́ Бог наш,/ ра́зве Тебе́ ино́го не зна́ем,/ и́мя Твое́ имену́ем./ Прииди́те вси ве́рнии,/ поклони́мся Свято́му Христо́ву Воскресе́нию,/ се бо прии́де Кресто́м ра́дость всему́ ми́ру./ Всегда́ благословя́ще Го́спода,/ пое́м Воскресе́ние Его́:/ распя́тие бо претерпе́в,/ сме́ртию смерть разруши́.
Псалом 50: И прочее, обычно.
Канон воскресен, со ирмосом на 4: и Вознесения на 4: и святых отец на 6.
Канон воскресен, глас 6.
Песнь 1.
Ирмос: Я́ко по су́ху, пешеше́ствовав Изра́иль/ по без́дне стопа́ми,/ гони́теля фарао́на/ ви́дя потопля́ема,/ Бо́гу/ побе́дную песнь/ пои́м, вопия́ше.
Распросте́ртыма дла́ньма на кресте́,/ оте́ческаго испо́лнил еси́ благоволе́ния, благи́й Иису́се, вся́ческая./ те́мже побе́дную песнь Тебе́ вси пои́м.
Стра́хом к Тебе́, я́ко рабы́ня, смерть/ повеле́на приступи́ Влады́це живота́,/ то́ю подаю́щему нам безконе́чный живо́т и воскресе́ние.
Богородичен: Своего́ прие́мши Соде́теля, я́ко Сам восхоте́,/ от безсе́меннаго Твоего́ чре́ва, па́че ума́ воплоща́ема, Чи́стая,/ тва́рей вои́стинну яви́лася еси́, Влады́чица.
Канон Вознесению, глас 5.
Песнь 1.
Ирмос: Спаси́телю Бо́гу:
Воспои́м вси лю́дие,/ на ра́мех херуви́мских возне́сшуся со сла́вою Христу́,/ и спосади́вшему нас одесну́ю Отца́,/ песнь побе́дную: я́ко просла́вися.
Хода́тая Бо́гу и челове́ком Христа́,/ ли́цы а́нгельстии ви́девше, с пло́тию в вы́шних удивля́хуся,/ согла́сно же воспева́ху песнь побе́дную: я́ко просла́вися.
Я́вльшемуся Бо́гу на горе́ Сина́йстей,/ и зако́н да́вшему богови́дцу Моисе́ю,/ от горы́ Елео́нския возне́сшемуся пло́тию,/ Тому́ вси воспои́м: я́ко просла́вися.
Богородичен: Пречи́стая Ма́ти Бо́жия,/ Воплоще́ннаго от Тебе́, и от недр Роди́теля не отсту́пльшаго Бо́га/ непреста́нно моли́,/ от вся́каго обстоя́ния спасти́, я́же созда́.
Канон святым отцем, глас 6.
[Егоже краестрочие: Пе́рвое воспою́ сосло́вие па́стырей.]
Песнь 1.
Ирмос: Я́ко по су́ху пешеше́ствовав Изра́иль:
Святы́х оте́ц восхваля́я всесвяты́й Собо́р,/ всесвято́е того́ во мне прорица́ние, вопия́:/ молю́ Тя, Христе́, сохрани́тися мне. [Дважды.]
Богоно́снии отцы́, я́ко мо́лния соше́дшеся днесь,/ Тебе́, Христе́, единоро́дна, Отцу́ собезнача́льна/ Сы́на испове́даша я́сно, и единосу́щна.
Слава: Неве́сты Твоея́, Це́ркве,/ благосла́внии невестокраси́телие, Влады́ко,/ ве́ры я́ве определе́ние изложи́вше злато́е,/ я́ко у́тварию боголе́пною сию́ украси́ша.
И ныне, Богородичен: Преукраше́нна сла́вою Боже́ственною Честна́я Цари́ца,/ Сы́ну Своему́ и Бо́гу предстои́т,/ нам спасе́ние душе́вное прося́щи.
Катавасия: Боже́ственным покрове́н,/ медленоязы́чный мра́ком,/ извити́йствова Богопи́санный зако́н,/ ти́ну бо оттря́с очесе́ у́мнаго,/ ви́дит Су́щаго,/ и науча́ется Ду́ха ра́зуму,/ хваля́ Боже́ственными пе́сньми.
Песнь 3.
Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.
Бо́га распина́ема пло́тию зря́щи тварь, растаява́шеся стра́хом,/ но содержи́тельною дла́нию нас ра́ди Распя́таго, кре́пко держи́ма бе.
Сме́ртию смерть разоре́на лежи́т окая́нная без дыха́ния,/ Живота́ бо не терпя́щи боже́ственнаго прираже́ния,/ умерщвля́ется кре́пкий, и да́руется всем воскресе́ние.
Богородичен: Боже́ственнаго рождества́ Твоего́, Чи́стая,/ вся́кий естества́ чин превосхо́дит чу́до,/ Бо́га бо преесте́ственне зачала́ еси́ во чре́ве,/ и ро́ждши пребыва́еши при́сно Де́ва.
Ин. Ирмос: Си́лою Креста́ Твоего́ Христе́:
Возше́л еси́ Жизнода́вче Христе́ ко Отцу́,/ и возне́сл еси́ род наш, Человеколю́бче,/ неизрече́нным благоутро́бием Твои́м.
Чи́ни а́нгельстии, Спа́се,/ челове́ческое естество́ ви́девше совосходя́щее Тебе́,/ непреста́нно удивля́еми воспева́ху Тя.
Ужаса́хуся а́нгельстии ли́цы, Христе́,/ зря́ще Тя с телесе́м возне́сшася,/ и воспева́ху свято́е Твое́ вознесе́ние.
Богородичен: Моли́ непреста́нно, Чи́стая,/ Произше́дшаго от ложе́сн Твои́х,/ изба́витися пре́лести диа́воли,/ пою́щим Тя, Ма́терь Бо́жию.
Ин. Ирмос: Несть свят, я́коже Ты Го́споди:
Ток и страсть и сече́ние,/ А́рий безу́мный Рождеству́ Боже́ственному/ злоче́стно нечести́вый прилага́я,/ сечи́тельным оте́ческим мече́м отсека́ется. [Дважды.]
Я́коже дре́вле боже́ственный Авраа́м,/ вво́инившеся вси всечестни́и богоглаго́ливии,/ враги́ Твоя́, Бла́же, неи́стовныя,/ Твое́ю си́лою кре́пко погуби́ша. [Дважды.]
Слава: Пе́рвое собра́ние собра́вшееся Твои́х свяще́нных,/ единосу́щна Тя, Спа́се, безнача́льному Отцу́,/ и Творца́ всех, ро́ждшагося благоче́стно пропове́даша.
И ныне, Богородичен: Не мо́жет сло́во земны́х,/ ниже́ язы́к, Де́во, восхвали́ти Тя досто́йно,/ из Тебе́ бо без се́мене/ Жизнода́вец Христо́с воплоти́тися, Пречи́стая, благоволи́.
Катавасия: Разве́рзе утро́бы неча́дствовавшия у́зы,/ доса́ду же неудоботерпи́му благоча́дствующия,/ еди́на моли́тва проро́чицы дре́вле А́нны,/ нося́щия дух сокруше́н,/ к Си́льному, и Бо́гу ра́зумов.
Кондак самогласен, глас 6:
Е́же о нас испо́лнив смотре́ние,/ и я́же на земли́ соедини́в Небе́сным,/ возне́слся еси́ во сла́ве, Христе́ Бо́же наш,/ ника́коже отлуча́яся,/ но пребыва́я неотсту́пный,/ и вопия́ лю́бящим Тя:/ Аз есмь с ва́ми, и никто́же на вы.
Икос: Я́же земли́ на земли́ оста́вившии,/ я́же пе́пельная пе́рсти уступа́ющии, прииди́те воспря́нем,/ и на высоту́ возведе́м о́чи и мы́сли,/ впери́м ви́ды, вку́пе и чу́вства, на небе́сная врата́ сме́ртнии,/ непщу́им бы́ти в Ма́сличной горе́,/ и взира́ти на Избавля́ющаго на о́блацех носи́ма./ Отону́ду бо Госпо́дь на небеса́ востече́,/ и та́мо даролюбе́зны да́ры раздая́ апо́столом Свои́м,/ уте́шив я́ я́ко Оте́ц, и утверди́в я́,/ наста́вив я́ко сыно́в, и рече́ к ним: не разлуча́юся вас,/ Аз есмь с ва́ми, и никто́же на вы.
Таже, седален отцем. Глас 4:
Подобен: Ско́ро предвари́:
Свети́льницы пресве́тлии и́стины Христовы/ ми́ру яви́стеся на земли́ вои́стинну/ блаже́ннейшии отцы́ боговеща́ннии,/ изсуши́вше е́реси ху́льных языковре́дий,/ и угаси́вше пламенови́дная злосла́вных смуще́ния,/ те́мже, я́ко святи́телие Христо́вы,/ моли́теся спасти́ся нам.
Слава, другий, глас тойже:
Подобен: Вознесы́йся:
Нике́йский све́тлый град днесь,/ от всея земли́ к себе́ призва́/ три́ста и осмьна́десять священнонача́льников,/ на глаго́лавшаго хулу́ А́риа,/ и умаля́ющаго еди́наго от Тро́ицы,/ Сы́на и Сло́ва су́щаго Бо́жия,/ его́же А́риа низло́жше, ве́ру утверди́ша.
И ныне, Вознесения. Подобен:
Возше́д на небеса́ со сла́вою,/ и соседы́й Отцу́ одесну́ю,/ ника́коже разлучи́лся еси́, Человеколю́бче Христе́,/ Ду́ха же Свята́го прему́дрым ученико́м Твои́м посла́ти обеща́вый,/ и на́ша озари́вый мы́сли,/ даждь просвеще́ние,/ я́ко да непреста́нно пое́м Тя, Влады́ко.
Песнь 4.
Ирмос: Христо́с моя́ си́ла,/ Бог и Госпо́дь,/ честна́я Це́рковь/ Боголе́пно пое́т, взыва́ющи,/ от смы́сла чи́ста о Го́споде пра́зднующи.
Дре́во процвело́ есть, Христе́, и́стинныя жи́зни,/ крест бо водрузи́ся,/ и напое́н быв кро́вию и водо́ю от нетле́ннаго Твоего́ ребра́,/ живо́т нам прозябе́.
Не ктому́ змий мне ло́жне обоже́ние подлага́ет,/ Христо́с бо богоде́латель челове́ческаго естества́,/ ны́не невозбра́нно стезю́ живота́ мне отве́рзе.
Богородичен: Я́ко вои́стинну неизвеща́нна и непостижи́ма,/ я́же Твоего́ боголе́пнаго, Богоро́дице, суть рождества́,/ су́щим на земли́ и на небеси́, Присноде́во, та́инства.
Ин. Ирмос: Услы́шах слух си́лы Креста́:
Возне́слся еси́ во сла́ве, а́нгелов Царю́,/ Уте́шителя нам от Отца́ посла́в./ Те́мже вопие́м:/ сла́ва, Христе́, вознесе́нию Твоему́.
Я́ко взы́де Спас ко Отцу́ с пло́тию,/ удиви́шася Ему́ а́нгельская во́инства, и возопи́ша:/ сла́ва, Христе́, вознесе́нию Твоему́.
А́нгельския си́лы го́рнейшим вопия́ху:/ врата́ возьми́те, Христу́, на́шему Царю́,/ Его́же воспева́ем вку́пе со Отце́м и Ду́хом.
Богородичен: Де́ва роди́, и ма́терняя не позна́,/ но Ма́ти у́бо есть, Де́вою же пребы́сть,/ Ю́же воспева́юще, ра́дуйся Богоро́дице, взыва́ем.
Ин. Ирмос: Христо́с моя́ си́ла:
Прелюбоде́йствовавый А́рий умо́м неразу́мным правосла́вную ве́ру,/ оте́ческими суды́ изгна́н бысть от Це́ркве,/ я́коже уд гнилы́й, злоимени́тый. [Дважды.]
О Тебе́, Влады́ко, подвиза́вся лик оте́ц,/ Твоя́ враги́ зело́ победи́,/ и соесте́ственна Тя Отцу́ и Ду́ху просла́ви.
Слава: Хода́тай был еси́, Бо́же и Челове́че,/ Бо́гу и челове́ком, Христе́,/ те́мже во двою́ Тя естеству́/ еди́наго зна́юще Сы́на, богому́дрии пропове́даша.
И ныне, Богородичен: Ме́ртва мя показа́ сада́ вкуше́ние,/ жизнь же дре́во из Тебе́ я́вльшееся, Всечи́стая, воскреси́,/ и ра́йския сла́дости насле́дника мя показа́.
Катавасия: Царю́ царе́й,/ Яковы́й от Якова́го еди́н Сло́ве произше́дый,/ от Отца́ безвино́внаго,/ равномо́щнаго Твоего́ Ду́ха апо́столом и́стинно посла́л еси́,/ я́ко Благоде́теля пою́щим:/ сла́ва держа́ве Твое́й Го́споди.
Песнь 5.
Ирмос: Бо́жиим/ све́том Твои́м, Бла́же,/ у́треннюющих Ти ду́ши/ любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.
Уступа́ют мне херуви́ми ны́не,/ и пла́менное ору́жие, Влады́ко, плещи́ мне дае́т,/ Тя ви́девше, Сло́ве Бо́жий, и́стиннаго Бо́га,/ разбо́йнику путь сотво́ршаго в рай.
Не ктому́ бою́ся, е́же в зе́млю, Влады́ко Христе́, возвраще́ния,/ Ты бо от земли́ мя возве́л еси́ забве́нна,/ благоутро́бия ра́ди мно́гаго,/ к высоте́ нетле́ния воскресе́нием Твои́м.
Богородичен: И́же Богоро́дицу Тя от души́, Влады́чице ми́ра блага́я,/ испове́дающих спаси́,/ Тебе́ бо предста́тельство непобори́мое и́мамы,/ и́стинную Богороди́тельницу.
Ин. Ирмос: У́тренююще вопие́м Ти, Го́споди:
Испо́лнив весе́лия вся́ческая Ми́лостиве,/ к го́рним си́лам с пло́тию прише́л еси́.
А́нгельския си́лы взе́млема Тебе́ ви́девше,/ врата́, взыва́ху Царю́ на́шему, возьми́те.
Апо́столи ви́девше возвыша́ема Спа́са,/ с тре́петом взыва́ху Царю́ на́шему: сла́ва Тебе́.
Богородичен: Де́ву по рождестве́ пое́м Тя, Богоро́дице,/ Ты бо Бо́га Сло́ва пло́тию ми́рови родила́ еси́.
Ин. Ирмос: Бо́жиим све́том:
Кра́сны но́ги я́ко вои́стинну, ны́не пропове́дающих Тя/ мир всяк ум преиму́щий, всех а́нгелов и челове́ков, Христе́,/ и мно́жеством ми́ра мiр совокупля́ющий. [Дважды.]
Прему́дрость, си́лу, О́тчее Сло́во ипоста́сное, Христе́,/ Тебе́ соше́дшеся пропове́даша,/ всесвята́го свяще́нства че́стно зако́ном печа́тавше,/ боже́ственнии учи́телие. [Дважды.]
Слава: Вод струя́ми чи́стыми уче́ния,/ Правосла́вную Це́рковь напои́вшии,/ на вода́х поко́я ны́не наслажда́етеся ве́чно ра́дующеся.
И ныне, Богородичен: Све́щник Пречи́стая све́тлый,/ всем озаря́ющий Христа́, пра́вды Со́лнце,/ Тебе́ ве́дуще, еди́на Богороди́тельнице Чи́стая,/ Твое́ ны́не заступле́ние призыва́ем.
Катавасия: Реши́тельное очище́ние грехо́в,/ огнедохнове́нную приими́те Ду́ха ро́су,/ о ча́да светообра́зная церко́вная./ Ны́не от Сио́на бо изы́де зако́н,/ языкоогнеобра́зная Ду́ха благода́ть.
Песнь 6.
Ирмос: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.
Распина́емь, Влады́ко, гвоздьми́ у́бо,/ кля́тву ю́же на нас потреби́л еси́,/ копие́м же пробода́емь в ребро́,/ ада́мово рукописа́ние растерза́в, мир свободи́л еси́.
Ада́м низведе́ся, ле́стию запя́т быв, ко а́дове про́пасти,/ но и́же естество́м Бог же и ми́лостив,/ сшел еси́ на взыска́ние,/ и на ра́му поне́с, совоскреси́л еси́.
Богородичен: Пречи́стая Влады́чице,/ ро́ждшая челове́ком ко́рмчию Го́спода,/ страсте́й мои́х непостоя́нное и лю́тое утоли́ смуще́ние,/ и тишину́ пода́ждь се́рдцу моему́.
Ин. Ирмос: Обы́де мя бе́здна:
Взыгра́шася апо́столи,/ зря́ще на высоту́ днесь Зижди́теля взе́млема,/ упова́нием Ду́ха,/ и стра́хом зовя́ху: сла́ва восхо́ду Твоему́.
Предста́ша а́нгели,/ вопию́ще, Христе́, ученико́м Твои́м:/ и́мже о́бразом ви́десте Христа́ восходя́ща с пло́тию,/ па́ки прии́дет Пра́ведный всех Судия́.
Я́ко ви́деша Тя, Спа́се наш, небе́сныя си́лы,/ на высоту́ взе́млема с те́лом, взыва́ху, глаго́люще:/ вели́ко, Влады́ко, человеколю́бие Твое́.
Богородичен: Купину́ Тя неопали́мую и го́ру,/ и ле́ствицу одушевле́нную, и дверь небе́сную/ досто́йно сла́вим, Мари́е сла́вная, правосла́вных похвало́.
Ин. Ирмос: Жите́йское мо́ре:
Утаи́тися не возмо́же пле́велов се́ятель, про́мысла неизрече́ннаго,/ неи́стовству тезоимени́т нарече́нный,/ Иу́де бо поревнова́в, я́коже он разсе́деся вселука́вый. [Дважды.]
Боже́ственное собра́ние оте́ц честно́е, единоро́дное озаре́ние,/ от существа́ возсия́вшее О́тча, пропове́дует Тя, Влады́ко,/ и пре́жде всех век рожде́нна Сы́на.
Слава: Чре́во растерза́ется по словеси́,/ исто́чник му́тный и непи́тный ересе́й, источи́вший злочести́вых,/ ра́лом моли́твы свяще́нник боже́ственных промы́сленнее.
И ныне, Богородичен: Вели́кий преднаписа́ во проро́цех Моисе́й, Тебе́,/ ковче́г и трапе́зу, и све́щник, и ру́чку,/ обра́зно зна́менуя воплоще́ние Вы́шняго из Тебе́, Ма́ти Де́во.
Катавасия: Очище́ние нам, Христе́,/ и спасе́ние, Влады́ко,/ возсия́л еси́ от Де́вы,/ да я́ко проро́ка/ от зве́ря морска́го пе́рсей Ио́ну,/ от тли исхити́ши всего́ Ада́ма всеро́дна па́дшаго.
Кондак отцем, глас 8.
Подобен: Я́ко начатки:
Апо́стол пропове́дание и оте́ц догма́ты/ Це́ркви еди́ну ве́ру запечатле́ша,/ я́же и ри́зу нося́щи и́стины,/ истка́ну от е́же свы́ше богосло́вия,/ исправля́ет и сла́вит благоче́стия вели́кое та́инство.
Икос: Высо́ким пропове́данием,/ Бо́жию Це́рковь услы́шим вопию́щу:/ жа́ждай да гряде́т ко мне и пие́т ча́шу, ю́же держу́,/ ча́ша есть прему́дрости,/ сие́ питие́ и́стины сло́вом почерпо́х,/ во́ду пролива́ющую не прекосло́вия, но испове́дания,/ ю́же пия́ ны́нешний Изра́иль, Бо́га зрит веща́юща:/ ви́дите, ви́дите, я́ко Сам Аз есмь, и не пременя́юся./ Аз Бог пе́рвый, Аз же и по сих,/ и ра́зве Мене́ несть ино́го отню́д./ Отсю́ду причаща́ющиися насы́тятся,/ и восхва́лят благоче́стия вели́кое та́инство.
Синаксарий.
Песнь 7.
Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие/ мучи́теля увеща́ вопи́ти:/ благослове́н еси́, Бо́же оте́ц на́ших.
Рыда́ющее во стра́сти Твое́й со́лнце, во мрак облече́ся,/ и во дни по всей, Влады́ко, земли́ свет поме́рче, вопия́:/ благослове́н еси́, Бо́же оте́ц на́ших.
Облеко́шася, Христе́, схожде́нием Твои́м во свет преиспо́дняя,/ пра́отец же весе́лия испо́лнь, яви́ся ликовству́я, взыгра́ся, вопия́:/ благослове́н еси́, Бо́же оте́ц на́ших.
Троичен: Царствующее и всеми владящее Естество́ Триипостасное,/ благости и безмерныя пучины свет пою́ще, возопиим вернии:/ благослове́н еси́, Бо́же оте́ц на́ших.
Ин. Ирмос: В пещи́ о́гненней:
На о́блацех све́та вознесы́йся, и спасы́й мир,/ благослове́н Бог оте́ц на́ших.
На ра́му, Спа́се, заблу́ждшее взем естество́, возне́сся,/ Бо́гу и Отцу́ приве́л еси́. [Дважды.]
Возше́дый во пло́ти к безпло́тному Отцу́,/ благослове́н Бог оте́ц на́ших.
Умерщвле́ное на́ше грехо́м естество́ взем,/ Твоему́ сво́йственному Отцу́, Спа́се, приве́л еси́.
Ин. Ирмос: Росода́тельну:
Победи́сте неи́стовству тезоимени́таго А́риа,/ неи́стовствовавшаго лю́те и глаго́лавшаго на высоту́ непра́ведная./ Бо́жию бо Сы́ну отрече́ся вопи́ти:/ благослове́н еси́, Бо́же оте́ц на́ших. [Дважды.]
Сы́на Гро́мова подража́юще чу́днии,/ Сло́ва Отцу́ собезнача́льна и единопресто́льна,/ огнезра́чными усты́ ва́шими всех научи́сте вопи́ти:/ благослове́н еси́, Бо́же оте́ц на́ших. [Дважды.]
Слава: Я́ко крила́тии, Сло́ву помо́гшии, приидо́сте богоблаже́ннии,/ от коне́ц бо вселе́нныя собра́ вас Дух Святы́й вопи́ти:/ благослове́н еси́, Бо́же оте́ц на́ших.
И ныне, Богородичен: Ю́ноши три пещь не опали́,/ Рождество́ прообразу́ющия Твое́,/ Боже́ственный бо огнь Тебе́ не опали́в, всели́ся в Тя,/ и всех просвети́ вопи́ти:/ благослове́нна еси́, Бо́га пло́тию Поро́ждшая.
Катавасия: Согла́сная возшуме́ орга́нская песнь,/ почита́ти златосотворе́нный безду́шный истука́н,/ Уте́шителева же светоно́сная благода́ть почеству́ет,/ е́же вопи́ти:/ Тро́ице Еди́ная, равноси́льная, безнача́льная, благослове́на еси́.
Песнь 8.
Ирмос: Из пла́мене преподо́бным ро́су источи́л еси́,/ и пра́веднаго же́ртву водо́ю попали́л еси́,/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.
Иуде́йския дре́вле пророкоуби́йцы лю́ди,/ богоуби́йцы за́висть ны́не соде́ла,/ Тебе́ на крест возне́сшия, Сло́ве Бо́жий,/ Его́же превозно́сим во вся ве́ки.
Небе́снаго кру́га не оста́вил еси́,/ и во ад соше́д, всего́ совоздви́гл еси́/ лежа́щаго во гно́ищи, Христе́, челове́ка,/ Тя превознося́ща во вся ве́ки.
Богородичен: От Све́та Светода́вца Сло́ва зачала́ еси́,/ и ро́ждши неизрече́нно Сего́, просла́вилася еси́,/ Дух бо в Тя, Отрокови́це, Бо́жий всели́ся./ Те́мже Тя пое́м во вся ве́ки.
Ин. Ирмос: Из Отца́ пре́жде век:
Во двою́ существу́ возлете́вшаго Жизнода́вца Христа́ на небеса́ со сла́вою,/ и Отцу́ соседя́щаго,/ свяще́нницы, по́йте, лю́дие, превозноси́те во вся ве́ки.
От рабо́ты и́дольския тварь изба́вившаго,/ и предста́вившаго ту свобо́дну Твоему́ Отцу́,/ Тебе́, Спа́се, пое́м,/ и Тебе́ превозно́сим во вся ве́ки.
Свои́м схожде́нием низложи́вшаго супоста́та,/ и Свои́м возше́ствием возне́сшаго челове́ки,/ свяще́нницы, по́йте, лю́дие, превозноси́те во вся ве́ки.
Богородичен: Херуви́мов превы́шшая яви́лася еси́, Богоро́дице Чи́стая,/ во чре́ве Твое́м си́ми Носи́маго носи́вшая,/ Его́же со безпло́тными, челове́цы славосло́вим во вся ве́ки.
Ин. Ирмос: Из пла́мене преподо́бным:
Просвети́вшеся луча́ми Твоего́ Божества́ блази́и Твои́ па́стырие,/ Тебе́ испове́даша бытию́ Соде́теля всех и Го́спода,/ Его́же превозно́сим во вся ве́ки. [Дважды.]
Лик па́стырей приснопа́мятный собра́вся,/ богому́дренно Тро́ицу несозда́нную ны́не богосло́вя, всех учи́т вопи́ти:/ Тя превозно́сим во вся ве́ки. [Дважды.]
Благослови́м Отца́ и Сы́на и Свята́го Ду́ха, Го́спода.
Священнонача́льницы, па́стырие достосла́внии,/ Христо́ву Це́рковь просвеща́ют,/ ины́й и́нуду сию́ освеща́юще и превознося́ще во вся ве́ки.
И ны́не и при́сно и во ве́ки веко́в, ами́нь.
Богородичен: Та́йно во о́бразех предви́деша Тебе́ проро́цы вси, Сло́во, ро́ждшую,/ плоть бо из Тебе́ взе́мый, Сей про́йде сугу́б,/ Его́же превозно́сим во вся ве́ки.
Таже, Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Катавасия: Разреша́ет у́зы/ и ороша́ет пла́мень,/ трисве́тлый Богонача́лия О́браз,/ пою́т о́троцы,/ благослови́т же Еди́наго Спа́са и Вседе́теля,/ я́ко Благоде́теля,/ сотворе́нная вся́ческая тварь.
Поем, Честне́йшую:
Песнь 9.
Ирмос: Бо́га/ челове́ком не возмо́жно ви́дети,/ на Него́ же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́ же велича́юще,/ с Небе́сными во́и/ Тя ублажа́ем.
Страсте́й неприча́стен Ты пребы́л еси́, Сло́ве Бо́жий,/ пло́тию приобщи́вся страсте́м,/ но реши́ши от страсте́й челове́ка,/ страсте́м быв страсть, Спа́се наш,/ еди́н бо еси́ безстра́стен, и всеси́лен.
Тлю сме́ртную прие́м, тле́ния соблю́л еси́ те́ло Твое́ невку́сно,/ Твоя́ же животворя́щая и боже́ственная, Влады́ко, душа́, во а́де не оста́влена бысть,/ но я́коже от сна воскре́с, нас совоздви́гл еси́.
Троичен: Бо́га Отца́, Сы́на собезначальна,/ вси человецы устнами у́бо чистыми сла́вим,/ неизреченную же и преславную Ду́ха Всесвятаго силу чтим,/ едина бо еси́ всесильная Троица неразлучная.
Ин. Ирмос: Тя па́че ума́ и словесе́, Ма́терь Бо́жию:
Тебе́, Изба́вителя ми́ра, Христа́ Бо́га,/ апо́столи ви́дяще Боже́ственно возвыша́ема,/ со стра́хом игра́юще велича́ху.
Твою́ обожи́вшуюся плоть/ зря́ще, Христе́, на высоте́ а́нгели,/ друг ко дру́гу глаго́лаху:/ вои́стинну Сей есть Бог наш.
Тебе́, безпло́тных чи́нове, Христе́ Бо́же,/ на о́блацех взе́млема ви́дяще, взыва́ху:/ сла́вы Царю́, врата́ возьми́те.
Богородичен: Ра́дуйся, Богоро́дице, Ма́ти Христа́ Бо́га,/ Его́же родила́ еси́,/ днесь от земли́ возноси́ма/ со апо́столы зря́щи, возвелича́ла еси́.
Ин. Ирмос: Бо́га челове́ком:
Обре́т вы спобо́рники собра́,/ держа́вною си́лою вооружи́в Ду́ха,/ Отцу́ собезнача́льное, и сопресто́льное Сло́во, пре́жде век су́щее,/ Его́же ны́не, всесвяще́ннии,/ с небе́сными во́инствы при́сно сла́вите. [Дважды.]
Па́жить А́риеву лю́тыя е́реси,/ я́ко вра́чеве душа́м же и телесе́м уста́висте,/ свяще́нный ве́ры Симво́л всем изложи́вше,/ и́же ны́не держа́ще,/ па́мять ва́шу, священноде́телие, при́сно сла́вим. [Дважды.]
Слава: Я́ко свет сый, Христе́, пречи́стый,/ от страсте́й мглы ду́шу мою́ очи́сти,/ моли́твами, Влады́ко, Твои́х служи́телей,/ ны́не Тебе́ пропове́давших безнача́льна, несозда́нна,/ Зижди́теля же всех и Бо́га, и Отцу́ собезнача́льна.
И ныне, Богородичен: Ме́ртвым воскресе́ние ны́не дарова́ся/ Твои́м неизрече́нным и неизглаго́ланным Рождество́м, Богоро́дице Влады́чице,/ жизнь бо из Тебе́ пло́тию обложе́на всем возсия́,/ и сме́рти неускла́бное я́ве разруши́.
Катавасия: Ра́дуйся, Цари́це,/ Матероде́вственная сла́во,/ вся́ка бо удобообраща́тельная благоглаго́ливая уста́/ вити́йствовати не мо́гут,/ Тебе́ пе́ти досто́йно,/ низумева́ет же ум всяк, Твое́ Рождество́ разуме́ти./ Те́мже Тя согла́сно сла́вим.
Свят Госпо́дь, Бог наш. [Трижды.]
Ексапостиларий воскресен:
Тивериа́дское мо́ре с детьми́ Зеведе́евыми,/ Нафана́ила с Петро́м же и со други́ма двема́ дре́вле,/ и Фому́ имя́ше на ло́ве,/ и́же Христо́вым повеле́нием одесну́ю вве́ргше,/ мно́жество извлеко́ша рыб,/ Его́же Петр позна́в, к Нему́ бродя́ше,/ и́мже тре́тие явле́йся,/ и хлеб показа́, и ры́бу на у́глех.
Слава, отцев.
Подобен: Жены́ услы́шите:
Оте́ц боже́ственных днесь па́мять пра́зднующе,/ моле́ньми тех мо́лим, Всеще́дре:/ вся́каго вре́да ересе́й изба́ви лю́ди Твоя́, Го́споди,/ и вся сподо́би, Отца́ Сло́ва сла́вити, и Всесвята́го Ду́ха.
И ныне, Вознесения:
Ученико́м зря́щим Тя,/ возне́слся еси́, Христе́, ко Отцу́ соседя́,/ а́нгели предтеку́ще зовя́ху:/ возьми́те врата́, возьми́те,/ Царь бо взы́де к нача́льному Све́ту сла́вы.
На хвалитех, Вся́кое дыха́ние:
поставим стихов 8. И поем стихиры воскресны 4,
и святым отцем 4.
Стихиры воскресны, глас 6:
Крест Твой, Го́споди,/ жизнь и воскресе́ние лю́дем Твои́м есть,/ и наде́ющеся нань,/ Тебе́ воскре́сшаго Бо́га на́шего пое́м: поми́луй нас.
Погребе́ние Твое́, Влады́ко,/ рай отве́рзе ро́ду челове́ческому:/ и от истле́ния изба́вльшеся,/ Тебе́ воскре́сшаго Бо́га на́шего пое́м: поми́луй нас.
Со Отце́м и Ду́хом Христа́ воспои́м,/ воскре́сшаго из ме́ртвых,/ и к Нему́ вопии́м:/ Ты Живо́т еси́ наш и Воскресе́ние, поми́луй нас.
Тридне́вен воскре́сл еси́, Христе, от гро́ба/ я́коже пи́сано есть,/ совоздви́гнувый пра́отца на́шего./ Те́мже Тя и сла́вит род челове́ческий,/ и воспева́ет Твое́ воскресе́ние.
Ины стихиры святых отец, глас 6.
Подобен: Всю отложи́вше:
Все собра́вше душе́вное худо́жество,/ и Боже́ственным Ду́хом сразсмотри́вше,/ небе́сный и честны́й Симво́л ве́ры,/ честни́и отцы́ богопи́санне начерта́ша,/ в не́мже я́вственнейше Ро́ждшему собезнача́льнаго Сло́ва науча́ют,/ и всеи́стинно единосу́щнаго,/ апо́стольским после́дующе проявле́нно уче́нием,/ благосла́внии и пребога́тии и́стинно,/ и богому́дрии.
Все прие́мше у́мное сия́ние Свята́го Ду́ха,/ преесте́ственнейшее благосло́вие,/ кра́ткими глаго́лы и мно́гим ра́зумом/ богодухнове́нно провеща́ша,/ я́ко Христо́вы пропове́дницы,/ ева́нгельских предста́телие уче́ний, блаже́ннии,/ и благочести́вых преда́ний,/ свы́ше прие́мше сих открове́ние я́ве, и просве́щшеся,/ изложи́ша ве́ру богонауче́нную.
Стих: Благослове́н еси́, Го́споди Бо́же оте́ц на́ших,/ и хва́льно и просла́влено И́мя Твое́ во ве́ки.
Все собра́вше па́стырское иску́сство,/ и я́рость подви́гше ны́не пра́веднейшую,/ отмсти́тельне тя́жкия отгна́ша и па́губныя во́лки,/ пра́щею Ду́ха изве́ргше от церко́внаго исполне́ния,/ па́дшия, я́ко к сме́рти, и я́ко неисце́льно неду́говавшия,/ боже́ственнии па́стырие,/ и я́ко раби́ и́стиннейшии Христо́вы,/ и Боже́ственнаго пропове́дания таи́нницы свяще́ннейшии.
Стих: Собери́те Ему́ преподо́бныя Его́,/ завеща́ющия заве́т Его́ о же́ртвах.
И паки 1-ю стихиру: Все собра́вше душе́вное худо́жество,/ и Боже́ственным Ду́хом сразсмотри́вше,/ небе́сный и честны́й Симво́л ве́ры,/ честни́и отцы́ богопи́санне начерта́ша,/ в не́мже я́вственнейше Ро́ждшему собезнача́льнаго Сло́ва науча́ют,/ и всеи́стинно единосу́щнаго,/ апо́стольским после́дующе проявле́нно уче́нием,/ благосла́внии и пребога́тии и́стинно,/ и богому́дрии.
Слава, глас 8: Святы́х отце́в лик,/ от коне́ц вселе́нныя сте́кшийся,/ Отца́ и Сы́на и Ду́ха Свята́го,/ еди́но Существо́ научи́ша и Естество́,/ и та́йну богосло́вия я́сно преда́ша Це́ркви,/ и́хже похваля́юще ве́рою ублажи́м, глаго́люще:/ о боже́ственный по́лче,/ богоглаго́ливии ору́жницы ополче́ния Госпо́дня,/ зве́зды многосве́тлыя мы́сленныя тве́рди,/ та́инственнаго Сио́на необори́мии столпи́,/ миродохнове́ннии цве́ти ра́йстии,/ всезлата́я уста́ Сло́ва,/ Нике́йская похвало́, вселе́нныя украше́ние,/ приле́жно моли́теся о душа́х на́ших.
И ныне: Преблагослове́нна еси́ Богоро́дице Де́во:
Славословие великое.
Таже, тропарь воскресен.
Воскре́с из гро́ба и у́зы растерза́л еси́ а́да,/ разруши́л еси́ осужде́ние сме́рти, Го́споди,/ вся от сете́й врага́ изба́вивый,/ яви́вый же Себе́ апо́столом Твои́м,/ посла́л еси́ я́ на про́поведь,/ и те́ми мир Твой по́дал еси́ вселе́нней,/ Еди́не Многоми́лостиве.
Ектении и отпуст. И исхождение в притвор.
Слава, и ныне,
стихира евангельская, глас 6:
По е́же во ад соше́ствии,/ и е́же из ме́ртвых воскресе́нии,/ скорбя́ще, я́коже досто́яше,/ о разлуче́нии Твое́м, Христе́,/ ученицы́ на де́лание обрати́шася,/ и па́ки корабли́ и мре́жи, и ло́ва нигде́же./ Но Ты, Спа́се, яви́вся, я́ко Влады́ка всех,/ одесну́ю мре́жи повелева́еши воврещи́,/ и бысть сло́во де́ло вско́ре,/ и мно́жество рыб мно́гое,/ и ве́черя стра́нная гото́ва на земли́,/ ея́же причасти́вшымся тогда́ Твои́м ученико́м,/ и нас ны́не мы́сленно сподо́би наслади́тися,/ человеколю́бче Го́споди.
И поучение Студитово, и час первый. На 1-м часе тропарь воскресен. Сла́ва: праздника: И ны́не: Богородичен часов. По Трисвятом кондак праздника. На 3-м часе тропарь воскресен. Сла́ва: отцев. И ны́не: Богородичен часов. По Трисвятом кондак отцев. Таже и на прочих часех, тропарь и кондак праздника, и отцев, глаголем пременяюще.
На Литургии
Блаженна гласа. Глас 6:
Помяни́ мя, Бо́же Спа́се мой,/ егда́ прии́деши во Ца́рствии Твое́м,/ и спаси́ мя, я́ко Еди́н Человеколю́бец.
Дре́вом Ада́ма прельсти́вшагося,/ дре́вом кре́стным па́ки спасл еси́ и разбо́йника, вопию́ща:/ помяни́ мя, Го́споди, во Ца́рствии Твое́м.
А́дова врата́ и вереи́ сокруши́вый, Жизнода́вче,/ воскреси́л еси́ вся, Спа́се, вопию́щия:/ сла́ва воста́нию Твоему́.
Помяни́ мя, и́же смерть плени́вый погребе́нием Твои́м,/ и воскресе́нием Твои́м ра́дости вся испо́лнивый, я́ко Благоутро́бен.
И праздника песнь 4-я, на 4, глас 5:
Возне́слся еси́ во сла́ве, а́нгелов Царю́,/ Уте́шителя нам от Отца́ посла́в./ Те́мже вопие́м:/ сла́ва, Христе́, вознесе́нию Твоему́.
Я́ко взы́де Спас ко Отцу́ с пло́тию,/ удиви́шася Ему́ а́нгельская во́инства, и возопи́ша:/ сла́ва, Христе́, вознесе́нию Твоему́.
А́нгельския си́лы го́рнейшим вопия́ху:/ врата́ возьми́те, Христу́, на́шему Царю́,/ Его́же воспева́ем вку́пе со Отце́м и Ду́хом.
Богородичен: Де́ва роди́, и ма́терняя не позна́,/ но Ма́ти у́бо есть, Де́вою же пребы́сть,/ Ю́же воспева́юще, ра́дуйся Богоро́дице, взыва́ем.
И отцев песнь 6-я, на 4, глас 6:
Утаи́тися не возмо́же пле́велов се́ятель, про́мысла неизрече́ннаго,/ неи́стовству тезоимени́т нарече́нный,/ Иу́де бо поревнова́в, я́коже он разсе́деся вселука́вый.
Боже́ственное собра́ние оте́ц честно́е, единоро́дное озаре́ние,/ от существа́ возсия́вшее О́тча, пропове́дует Тя, Влады́ко,/ и пре́жде всех век рожде́нна Сы́на.
Слава: Чре́во растерза́ется по словеси́,/ исто́чник му́тный и непи́тный ересе́й, источи́вший злочести́вых,/ ра́лом моли́твы свяще́нник боже́ственных промы́сленнее.
И ныне, Богородичен: Вели́кий преднаписа́ во проро́цех Моисе́й, Тебе́,/ ковче́г и трапе́зу, и све́щник, и ру́чку,/ обра́зно зна́менуя воплоще́ние Вы́шняго из Тебе́, Ма́ти Де́во.
По входе глаголем
тропарь воскресен, глас 6:
А́нгельския Си́лы на гро́бе Твое́м,/ и стрегу́щии омертве́ша;/ и стоя́ше Мари́я во гро́бе,/ и́щущи Пречи́стаго Те́ла Твоего́./ Плени́л еси́ ад, не искуси́вся от него́;/ сре́тил еси́ Де́ву, да́руяй живо́т./ Воскресы́й из ме́ртвых, Го́споди, сла́ва Тебе́.
Таже тропарь Вознесения, глас 4:
Возне́слся еси́ во сла́ве, Христе́ Бо́же наш,/ ра́дость сотвори́вый ученико́м,/ обетова́нием Свята́го Ду́ха,/ извеще́нным им бы́вшим благослове́нием,/ я́ко Ты еси́ Сын Бо́жий, Изба́витель ми́ра.
И тропарь отцев, глас 8:
Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый,/ и те́ми ко и́стинней ве́ре вся ны наста́вивый,/ Многоблагоутро́бне, сла́ва Тебе́.
Слава, кондак отцев, глас 8.
Подобен: Я́ко нача́тки:
Апо́стол пропове́дание и оте́ц догма́ты,/ Це́ркви еди́ну ве́ру запечатле́ша,/ я́же и ри́зу нося́щи и́стины,/ истка́ну от е́же свы́ше богосло́вия,/ исправля́ет и сла́вит благоче́стия вели́кое та́инство.
И ныне, кондак Вознесения
самогласен, глас 6:
Е́же о нас испо́лнив смотре́ние,/ и я́же на земли́ соедини́в Небе́сным,/ возне́слся еси́ во сла́ве, Христе́ Бо́же наш,/ ника́коже отлуча́яся,/ но пребыва́я неотсту́пный,/ и вопия́ лю́бящим Тя:/ Аз есмь с ва́ми, и никто́же на вы.
Вместо прокимна песнь отцев, глас 4:
Благослове́н еси́, Го́споди Бо́же оте́ц на́ших,/ и хва́льно и просла́влено И́мя Твое́ во ве́ки. Стих: Я́ко пра́веден еси́ о всех, я́же сотвори́л еси́ нам.
Апостол в Деяниих, зачало 44.
[Деян. 20, 16 – 18, 28 – 36.]
Во дни о́ны, суди́ Па́вел ми́мо ити́ Ефе́с, я́ко да не бу́дет ему закосне́ти во Аси́и, тща́ше бо ся, а́ще возмо́жно бу́дет, в день Пятьдеся́тный бы́ти во Иерусали́ме. От Мили́та же посла́в во Ефе́с, призва́ пресви́теры церко́вныя. И я́коже приидо́ша к нему́, рече́ к ним: внима́йте у́бо себе́ и всему́ ста́ду, в не́мже вас Дух Святы́й поста́ви епи́скопы, пасти́ Це́рковь Го́спода и Бо́га, ю́же стяжа́ Кро́вию Свое́ю. Аз бо вем сие́, я́ко по отше́ствии мое́м вни́дут во́лцы тя́жцы в вас, не щадя́щии ста́да: И от вас саме́х воста́нут му́жие глаго́лющии развраще́ная, е́же отторга́ти ученики́ вслед себе́. Сего́ ра́ди бди́те, помина́юще, я́ко три лета нощь и день не престая́х уча́ со слеза́ми еди́наго кого́ждо вас. И ны́не предаю́ вас, бра́тие, Бо́гови и сло́ву благода́ти Его́, могу́щему назда́ти и да́ти вам насле́дие во освяще́нных всех. Сребра́ или́ зла́та или́ риз ни еди́наго возжела́х. Са́ми ве́сте, я́ко тре́бованию моему́ и су́щим со мно́ю послужи́сте ру́це мои́ си́и. Вся сказа́х вам, я́ко та́ко тружда́ющимся подоба́ет заступа́ти немощны́я, помина́ти же сло́во Го́спода Иису́са, я́ко Сам рече́: блаже́ннее есть па́че дая́ти, не́жели приима́ти. И сия́ рек, прекло́нь коле́на своя́, со все́ми и́ми помоли́ся.
Аллилуиа, глас 1. Стих: Бог бого́в Госпо́дь глаго́ла, и призва́ зе́млю от восто́к со́лнца до за́пад. Стих: Собери́те Ему́ преподо́бныя Его́, завеща́ющия заве́т Его́ о же́ртвах.
Евангелие от Иоанна, зачало 56.
[Ин. 17, 1 – 13.]
Во вре́мя о́но, возведе́ Иису́с о́чи Свои́ на не́бо и рече́: О́тче, прии́де час, просла́ви Сы́на Твоего́, да и Сын Твой просла́вит Тя. Я́коже дал еси́ Ему́ власть вся́кия пло́ти, да вся́ко, е́же дал еси́ Ему́, даст им живо́т ве́чный: Се же есть живо́т ве́чный, да зна́ют Тебе́ еди́наго и́стиннаго Бо́га, и Его́же посла́л еси́ Иису́с Христа́. Аз просла́вих Тя на земли́, де́ло соверши́х, е́же дал еси́ Мне да сотворю́. И ны́не просла́ви Мя Ты, О́тче, у Тебе́ Самого́ сла́вою, ю́же име́х у Тебе́ пре́жде мир не бысть. Яви́х и́мя Твое́ челове́ком, и́хже дал еси́ Мне от ми́ра: Твои́ бе́ша, и Мне их дал еси́, и сло́во Твое́ сохрани́ша: Ны́не разуме́ша, я́ко вся, ели́ка дал еси́ Мне, от Тебе́ суть. Я́ко глаго́лы, и́хже дал еси́ Мне, дах им, и ти́и прия́ша, и разуме́ша вои́стинну, я́ко от Тебе́ изыдо́х, и ве́роваша, я́ко Ты Мя посла́. Аз о сих молю́: не о всем ми́ре молю́, но о тех, и́хже дал еси́ Мне, я́ко Твои́ суть: И Моя́ вся Твоя́ суть, и Твоя́ Моя́, и просла́вихся в них: И ктому́ несмь в ми́ре, и си́и в ми́ре суть, и Аз к Тебе́ гряду́. О́тче Святы́й, соблюди́ их во и́мя Твое́, и́хже дал еси́ Мне, да бу́дут еди́но, я́коже и Мы. Егда́ бех с ни́ми в ми́ре, Аз соблюда́х их во и́мя Твое́: и́хже дал еси́ Мне, сохрани́х, и никто́же от них поги́бе, то́кмо сын поги́бельный, да сбу́дется Писа́ние. Ны́не же к Тебе́ гряду́, и сия́ глаго́лю в ми́ре, да и́мут ра́дость Мою́ испо́лнену в себе́.
Вместо же Достойно:
Велича́й душе́ моя́,/ возне́сшагося от земли́ на не́бо,/ Христа́ Жизнода́вца.
Ирмос, глас 5: Тя па́че ума́ и словесе́, Ма́терь Бо́жию,/ в ле́то Безле́тнаго неизрече́нно ро́ждшую,/ ве́рнии, единому́дренно велича́ем.
Вместо Ви́дехом Свет И́стинный: поется тропарь Вознесения: Возне́слся еси́ во сла́ве:
Причастный:
Хвали́те Го́спода с Небе́с,/ хвали́те Его́ в вы́шних. Другий: Ра́дуйтеся, пра́веднии, о Го́споде,/ пра́вым подоба́ет похвала́./ Аллилу́иа. [Трижды.]