Минеи Богослужебные.
Свята́го апо́стола Іа́кова, бра́та Бо́жія.
ВЕЧЕРЪ.
На Го́споди воззва́хъ: стихи́ры на 6, гла́съ 4. Подо́бенъ: Да́лъ еси́ зна́меніе.
Пріиди́те, па́мять/ богобра́та почти́мъ/ свяще́нно, о богому́дріи!/ Иго бо взе́мъ Христо́во усе́рдно,/ Ева́нгелія бла́гости Его́/ и Ца́рствія проповѣ́дникъ показа́ся,/ и Того́ неизрече́нное строе́ніе увѣря́етъ./ Тѣ́мже и́мъ, Всеси́льне,/ очище́ніе на́мъ да́руй. Два́жды.
Вся́ огласи́ вселе́нныя концы́/ глаго́лъ твои́хъ вѣща́ніе,/ и́миже просвѣща́емся/ добродѣ́телей Боже́ственныя ко вся́кому ви́ду/ и наставля́еми вѣ́рно/ Святы́я Тро́ицы къ позна́нію./ Тѣ́мъ мо́лимъ тя́ я́ко іера́рха:/ моли́ся Іису́су Человѣколю́бцу/ спасти́ ду́ши на́ша. Два́жды.
Издале́ча прозря́/ твое́ жи́тельство, Іа́кове,/ бра́та тя́ прія́ Христо́съ Человѣколю́бецъ,/ прему́дрый прови́децъ,/ Іерусали́мовъ священноявле́нника вѣ́рна/ и пастыренача́льника поставля́етъ и таи́нника/ неизрече́нная священнодѣ́йствующа та́инства./ Его́же и ны́нѣ моли́/ спасти́ся душа́мъ на́шимъ. Два́жды.
Кро́вію муче́нія свяще́нство украси́лъ еси́, священному́чениче апо́столе: на крилѣ́ бо святи́лища предста́въ, Бо́га Сло́ва проповѣ́далъ еси́, Творца́ су́ща всего́. Тѣ́мъ отъ іуде́й све́рженъ, небе́сныхъ черто́говъ сподо́бился еси́, богобра́те Іа́кове, Христа́ Бо́га моли́, спасти́ся душа́мъ на́шимъ.
Благоче́ствующихъ мно́жества,/ ны́нѣ свяще́нный пра́здникъ ра́достно соверша́юще,/ воскли́кнемъ вси́,/ вѣ́рно восхваля́юще/ во псалмѣ́хъ и пѣ́ніихъ,/ богобра́та дне́сь/ и ученика́ Госпо́дня:/ при́сно бо мо́литъ спасти́ся на́мъ.
Сти́хъ: Во всю́ зе́млю изы́де вѣща́ніе и́хъ/ и въ концы́ вселе́нныя глаго́лы и́хъ.
Еже по пло́ти Госпо́дня жела́нія, му́дре,/ бра́тъ показа́лся еси́, учени́къ/ и самови́децъ Боже́ственныхъ та́инъ,/ бѣ́гаяй съ Ни́мъ, и въ Еги́птѣ бы́въ со Іо́сифомъ,/ Ма́терію же Іису́совою:/ съ ни́миже моли́ спасти́ся на́мъ.
Сти́хъ: Небеса́ повѣ́даютъ сла́ву Бо́жію,/ творе́ніе же руку́ Его́ возвѣща́етъ тве́рдь.
Апо́стольскій ли́къ тебе́ избра́/ свяще́нствовати пе́рвѣе въ Сіо́нѣ святѣ́мъ/ Христу́ Благодѣ́телю,/ я́ко су́ща Того́ по пло́ти сро́дствомъ и бра́та,/ спутеше́ственника и наслѣ́дника слѣдо́въ Того́, Іа́кове.
Началопа́стыря Христа́ бра́тъ бы́лъ еси́ и прее́мникъ, и во апо́столѣхъ знамени́тъ, е́же за Того́ умре́ти возлюби́лъ еси́ и муче́нія не устыдѣ́лся еси́, Іа́кове сла́вне, Того́ моли́ непреста́нно спасти́ ду́ши на́ша.
Яко Госпо́день учени́къ воспрія́лъ еси́, пра́ведне, Ева́нгеліе, я́ко му́ченикъ, и́маши е́же неопи́санное, дерзнове́ніе — я́ко бра́тъ Бо́жій, е́же моли́тися — я́ко іера́рхъ. Моли́ Христа́ Бо́га спасти́ся душа́мъ на́шимъ.
НА УТРЕНИ.
Апо́столе Христо́въ, и самови́дче, и му́чениче, Іа́кове прему́дре, бра́те Бо́жій блаже́нне, вѣ́рою пра́зднующія честну́ю твою́ па́мять, свободи́ отъ обдержа́щихъ прегрѣше́ній моли́твами твои́ми, небеса́ наслѣ́дуяй си́лою Ду́ха. Два́жды.
Купину́, ю́же Моисе́й неопа́льну ви́дѣ, го́ру Бо́жію, святы́й о́блакъ, сѣ́нь нескве́рную, богопрія́тную трапе́зу, пала́ту Высо́каго Царя́, всесвѣ́тлую и непроходи́мую две́рь, Дѣ́во, пое́мъ Тя́.
Учени́къ Словесе́, Истины проповѣ́дникъ, я́ко стрѣла́ по́сланъ бы́лъ еси́, просвѣща́я су́щія во тмѣ́ лю́тѣй, свя́те апо́столе, и безбо́жія мглу́ отгоня́ отъ земли́, вся́ благовѣ́рующія сы́ны дне́ показа́лъ еси́, Христо́въ ви́дче, свя́те Іа́кове. Два́жды.
Иже упова́ніе на Тя́, Дѣ́во Пречи́стая, непреткнове́нное иму́ще, покро́въ су́щи отъ разли́чныхъ напа́стей и обстоя́ній, и бѣ́дъ лю́тыхъ свободи́ ны, моля́щи Сы́на Твоего́ со апо́столы Его́, и спаси́ вся́, воспѣва́ющія Тя́.
Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.
Дая́нію благо́му, Іа́кове, и да́ру соверше́нну отъ Отца́ свѣ́товъ человѣ́комъ подая́тися, учи́ши я́вѣ, Ему́же причасти́тися, апо́столе, тя́ пою́щимъ помоли́ся.
Свѣ́томъ просвѣще́нъ, до́блій, Боже́ственнаго Ду́ха и съ Ни́мъ зако́ны изложи́въ, Це́ркви управля́еши язы́ковъ, я́ко Христо́въ апо́столъ, священнотаи́нниче всеблаже́нне.
Ли́къ апо́стольскій, всему́дре, я́вѣ украси́лъ еси́, я́ко пе́рвый іера́рхъ бы́въ, самодѣ́йствомъ Сло́ва пома́занъ, я́ко учени́къ и бра́тъ Бо́жій, священнопроповѣ́дникъ свяще́ннѣйшій.
Богоро́диченъ: Исто́чникъ Тя́ исцѣле́ній иму́ще, почерпа́емъ, я́ко Исто́чникъ ро́ждшую жи́зни, Богоро́дице Дѣ́во Чи́стая, и ду́шъ врачевство́, и тѣле́съ обновле́ніе.
Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.
Весели́тся о тебѣ́ колѣ́но Іу́дово дне́сь, Христо́выми свѣтлостьми́ ви́дѣ тя́ свѣ́тло облиста́юща.
Звѣзду́ богосія́нну Це́рковь язы́чная иму́щи тя́, благосла́внаго проповѣ́дателя, и Боже́ственнымъ Свѣ́томъ озаря́ется.
Зако́нъ ты́ жи́зни Це́ркви Христо́вѣ положи́лъ еси́, Жизнода́тельнымъ Ду́хомъ ты́ законополага́я и вѣща́я.
Богоро́диченъ: Его́же родила́ еси́ пло́тію, о Богома́ти, изъ Отца́ Возсія́вшаго, Того́, Чи́стая, Іа́ковъ я́ко Бо́га всѣ́хъ проповѣ́да.
Сро́дникъ по пло́ти Іису́совъ бы́лъ еси́, и отъ Него́, апо́столе, благода́ть мно́гу прія́лъ еси́ и всѣ́мъ препо́далъ еси́ просвѣще́ніе и ра́зумъ, всему́дре Іа́кове, и и́дольскую ле́сть изъ ко́рене исто́ргнувъ. Тѣ́мъ, и́же тмы́ предста́тели и лестцы́, непра́ведно тя́ убива́ютъ, Спа́са проповѣ́дающа. Сего́ ра́ди вопіе́мъ ти́: моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. Два́жды.
Со́лнца о́блаче разу́мнаго, Боже́ственнаго Свѣ́та свѣти́льниче златокова́нный, Нескве́рная, Небла́зная, Всенепоро́чная Влады́чице, омраче́нную ду́шу мою́ ослѣпле́ніемъ страсте́й, безстра́стія заре́ю просвѣти́, молю́ся, и оскверне́нное мое́ се́рдце омы́й пото́ки умиле́нія, покая́нія же слеза́ми и отъ тимѣ́нія мя́ очи́сти дѣ́лъ мои́хъ, да любо́вію зову́ Ти: Богоро́дице Приснодѣ́во, моли́ Христа́ Бо́га прегрѣше́ній оставле́ніе пода́ти ми́, Тебе́ бо имѣ́ю наде́жду, ра́бъ Тво́й.
Ирмо́съ: Любве́ ра́ди, Ще́дре, Твоего́ о́браза, на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.
Вве́лъ еси́ въ мо́ре Твоя́ ко́ни, апо́столы, Спа́се, и просвѣти́ша язы́ки, къ Твоему́ позна́нію привле́кше, Влады́ко.
Нескве́рно, я́ко зерца́ло, я́влься, и перводѣ́тельныя лучи́ Несозда́нныя Тро́ицы извѣ́стно пріе́мъ, всѣ́мъ возсія́лъ еси́.
Валя́емаго тя́ ка́меня проро́чество освяще́нное зри́тъ и сокруша́юща пре́лести гнило́е су́етство си́лою Ду́ха.
Богоро́диченъ: Вше́дъ, о Богома́ти, во чре́во Твое́ Превѣ́чное Сло́во, роди́выйся изъ Отца́ неизрече́нно, Іа́кова апо́стола явля́етъ.
Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.
Ты́, Го́споди, Свѣ́тъ, блиста́ніе Іа́кова яви́лъ еси́ свѣтя́ща, и земны́я невѣ́дѣнія и тмы́ измѣня́юща.
Тя́, Го́споди, гла́сомъ свобо́днымъ проповѣ́да пра́ведный бра́тъ Тво́й, подража́тель же Стра́сти бы́сть, убива́емь.
Кíй земны́й у́мъ похва́лъ пѣ́нія тебѣ́ принести́ мо́жетъ, добродѣ́телей просвѣще́нному благода́тьми, Іа́кове?
Богоро́диченъ: Тя́ и́стинно Боже́ственное обрѣ́тъ жили́ще, всели́ся, о Дѣ́во, на́ше спасе́ніе, Сло́во, промышля́я.
Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.
Оде́ждею зако́нною облече́ тя́ лу́чшею, и іера́рха явля́етъ, Ааро́на дре́вняго честнѣ́йша, и́же ми́лости ра́ди въ бра́тство пріе́мый тя́.
Орга́нъ, дѣ́йствы ударя́емь Ду́ха, все́ помышле́ніе наслажда́я и Бо́гу приве́дъ спаса́емыя отъ рабо́ты лютѣ́йшія, бы́лъ еси́ изря́днѣйшій.
Возжажда́въ, жи́зненныя испи́лъ еси́ воды́, и рѣ́ки источа́еши богоглаго́ливаго твоего́ чре́ва, теку́щія вселе́ннѣй Боже́ственнымъ Ду́хомъ.
Богоро́диченъ: Ева у́бо преслуша́ніемъ сме́рть роди́, Богоро́дица же, Жи́знь заче́нши, роди́ Нестарѣ́ющуюся и дре́вній за всѣ́хъ отдаде́ до́лгъ.
Отчее Единоро́дное Бо́гъ Сло́во, прише́дшее къ на́мъ въ послѣ́днія дни́, Іа́кове боже́ственне, пе́рваго тя́ показа́ Іерусали́млянъ па́стыря и учи́теля, и вѣ́рнаго строи́теля та́инствъ духо́вныхъ: тѣ́мже тя́ вси́ чти́мъ, апо́столе.
Рожде́ніе тя́ Іо́сифово, Іерусали́мовъ пе́рваго іера́рха, Іа́кове богови́дче, и Госпо́дня бра́та пѣ́сньми похва́льными воспое́мъ вѣ́рно, и къ тебѣ́ возопіе́мъ: да́руй на́мъ да́ръ соверше́нъ отъ Отца́ свѣ́товъ и отжени́ ско́рбь, настоя́щую отъ мно́жества прегрѣше́ній, поднесо́ша бо врази́ на ны́ пя́ту и обступи́ша на́съ исма́ильтяне, и́хже сокруши́ вско́рѣ лу́ки, священноявле́нне, я́ко да тя́ вси́ почита́емъ, апо́столе.
Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.
Яко въ пещи́, на го́рницѣ просвѣща́емь, Боже́ственнымъ прише́ствіемъ Ду́ха, та́инственно, богоглаго́ливе, возопи́лъ еси́: благослове́нъ еси́ въ хра́мѣ сла́вы Твоея́, Го́споди.
Свы́ше дыха́ніе зѣ́льное апо́стола язы́комъ огнеобра́знымъ вѣща́ти Бо́жія вели́чествія устро́и: благослове́нъ еси́ въ хра́мѣ сла́вы Твоея́, Го́споди.
Видѣ́нія дѣ́ятельнаго излага́я дщи́цу, отъ скрижа́ли же, я́ко духо́вныя, человѣ́ки научи́лъ еси́: благослове́нъ еси́, Бо́же мо́й, зовы́й, Го́споди.
Богоро́диченъ: Возсозда́вый мíръ, во утро́бѣ Твое́й, Богоневѣ́сто, Боже́ственнаго служе́нія показу́етъ соверши́теля Іа́кова, взыва́юща: благослове́на Ты́ въ жена́хъ Всенепоро́чная Влады́чице.
Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.
Ру́ки распросте́ръ крѣ́пкія, апо́столы Твоя́, Спа́се, благослови́лъ еси́, восходя́, Влады́ко, къ Безнача́льному Отцу́ Твоему́, и устро́илъ еси́ ты́я съ весе́ліемъ вопи́ти: благослови́те вся́ дѣла́ Госпо́дня Го́спода.
Якоже обѣща́лся еси́, нело́жно апо́столомъ Твои́мъ, Ду́ха посла́лъ еси́. Сего́ Іа́ковъ, Влады́ко, свѣ́тлостію просвѣща́емь, вселе́нную мо́лніями просвѣща́етъ я́вѣ и вопіе́тъ Тебѣ́: благослови́те вся́ дѣла́ Госпо́дня Го́спода.
Му́дрость, Іа́кове му́дре, ѵпоста́сную имѣ́лъ еси́ Учи́теля, уча́щу тя́ неизрече́ннымъ и неизглаго́ланнымъ та́йнамъ, и къ благоче́стію лю́ди зва́ти воздви́глъ еси́: благослови́те вся́ дѣла́ Госпо́дня Го́спода.
Богоро́диченъ: Го́ру явле́нну мы́сленную, Дѣ́во Чи́стая, проро́къ ви́дѣ Тя́, изъ Тебе́ бо пречестны́й Ка́мень отсѣче́ся, спаса́я вселе́нную вои́стинну, Боже́ственно пою́щую: благослови́те вся́ дѣла́ Госпо́дня Го́спода.
Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.
Пріиди́те, первопресто́льника вси́, Це́ркве свѣти́льника, свяще́нными, Іа́кова, пѣ́сньми, я́ко іера́рха и христопроповѣ́дника, тезоиме́ннѣ пра́веднаго именова́нна, велича́емъ.
Боже́ственнаго о́бщника, я́ко я́вльшася безконе́чнаго Ца́рствія, и Бо́жія нарече́нна бра́та, и житіе́мъ и́стинствующа, именова́ніе пріе́мша, священнотаи́нника, тя́ велича́емъ, Іа́кове.
Престо́лу предстоя́, блаже́нне, вѣнцено́сецъ Тро́ицы, вѣ́рою почита́ющихъ твою́ па́мять, нетлѣ́ющихъ наслади́тися че́стей, я́ко іера́рхъ, Іа́кове, благопрія́тенъ, твоего́ Влады́ку умоли́.
Богоро́диченъ: Ты́, отъ Дѣ́вы Рожде́ннаго неискусобра́чно, богоявле́нне, уче́ніи твои́ми я́вѣ чести́ Бо́га науча́еши, Воплоще́нное Сло́во, въ Него́же мы́ вѣ́рующе ны́нѣ, досто́йно велича́емъ.
Яко Госпо́дня бра́та бы́вша, блаже́нне Іа́кове богодохнове́нне, вѣ́рніи по до́лгу хва́лимъ тя́, сла́вяще свѣ́тлую и всечестну́ю, и свѣтоно́сную твою́ па́мять, моли́ся прилѣ́жно за чту́щихъ тя́. Два́жды.
Моли́твенницу Тебѣ́ приво́димъ и те́плую предста́тельницу, Чи́стую Ма́терь Твою́, вѣ́рніи, по до́лгу: сподо́би рабы́ Твоя́ причасти́тися сла́вы Твоея́, и пра́ведныхъ ча́сти, и сла́дости ра́йскія, и улучи́ти на́мъ небе́сное Ца́рствіе.
Го́споди,/ а́ще и на крилѣ́ предста́/ святи́лища Іа́ковъ,/ но, дерзнове́ніемъ возопи́въ,/ Бо́га Сло́ва Тя́ проповѣ́да,/ Содѣ́теля всѣ́хъ,/ въ мíръ прише́дшаго:/ его́же моли́твами и ны́нѣ пода́ждь/ просвѣще́ніе душа́мъ на́шимъ.
Го́споди,/ а́ще и дре́вомъ глава́/ апо́столова сокруше́на бы́сть,/ но въ раи́ дре́во жи́зненное ему́ даде́ся,/ и отъ привре́менныхъ отрѣши́вся,/ вѣ́чно весели́тся:/ его́же моли́твами/ Це́рквамъ ми́ръ Тво́й низпосли́.
Го́споди,/ Тя́ исповѣ́давъ на земли́ до́блественнѣ,/ бра́тъ Бо́жій,/ Сы́на Бо́га Вы́шняго,/ и́скренно приснопа́мятный,/ злосла́вныя враги́/ посрами́ и укроти́:/ сего́ ра́ди и пострада́въ,/ Тебѣ́ предстои́тъ, ра́дуяся.
Го́споди,/ а́ще и сверго́ша іуде́и/ съ высоты́ пра́веднаго,/ но небе́сныхъ черто́говъ/ съ весе́ліемъ сподо́бися,/ и въ пи́щи наслажде́нія/ досто́йно весели́тся:/ тѣ́мъ у́бо подае́ши/ ми́ръ душа́мъ на́шимъ.
Во о́гненнѣй зари́ Боже́ственнаго Ду́ха просвѣти́вся, благоче́стія яви́лся еси́ боже́ственный ревни́тель, бра́те Бо́жій Іа́кове. Тѣ́мъ и оде́ждею тя́ зако́ннаго свяще́нства, я́ко Ааро́на дре́вняго, честнѣ́йшею одѣ́я, и́же милосе́рдія ра́ди въ бра́тство тя́ пріе́мый. Того́ моли́, апо́столовъ похвало́, спасти́ся душа́мъ на́шимъ.
Славосло́віе вели́кое, ектеніи́ и отпу́стъ.
НА ЛИТУРГІИ.
Блаже́нна отъ кано́на апо́стола, пѣ́снь 3-я и 6-я. Проки́менъ, гла́съ 8: Во всю́ зе́млю изы́де вѣща́ніе и́хъ,/ и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Апо́столъ къ Гала́томъ, зача́ло 200. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, и́бо и́стину Твою́ въ це́ркви святы́хъ. Сти́хъ: Бо́гъ прославля́емь въ совѣ́тѣ святы́хъ. Ева́нгеліе Матѳе́я, зача́ло 56. Прича́стенъ: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ.
Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 198 – 202 об.